Dadatika Maxaafa 42
42
Yooseefik Dayyuwwi Gibtse'a Me'e
1Ya'iqoobi Gibtse midha hexxeexxa laqeexxi ifixxa labbaxxa oose hiyyee qici, «Mayee weli weli uuddina? 2Gibtse boga'ni midha hexxeexxa laqeennen; hedhoti he'nannoshshannaa reyotenaa'n gantannoshsha Gibtse aade martine midha no'o'a hirre» hiyye.#Erga. Huj. 7:12. 3Ookkoneechchi uduma Yooseefik tomminiingi dayyuwwi midha hiro'a aade Gibtse mare. 4Yaane kinni miitaaxxi yaane iso'n geltaa'n hiyyati sodaatemmaxxee Ya'iqoobi Yooseefinni welti mitte amake godobinaa'ni i'lrrka dayyo ifika Biiniyaamii wele isike dayyuwwinni welt Gibtse'a ergebaan. 5Kenaanike boga'n solo'i hedhemmaxxee midha hiratee Gibtse'a me'a'neeke manni giddo Isira'eelixxi labbaxxi oosenna hexxemman.
6Ookkone wodda Yooseefi ookkene bogike galchallomman; bogi boginaa'ni dagaammake manni'a midha gurguraammaki isotemman; Yooseefik dayyuwwinna isiba genneexxi isi'a kumbulise. 7Yooseefinna dayyuwwa ifika uudeeshshanni ege'ne; yaane kinni insa'nee ege'nebaake ifi asseexxi mufeti, «Ha'no habaa'n daggineeke manna?» Hiyye qore.
Insa'nenna «Midha hidhdhinonnaa Kanaanii'ni dangeennen» hine.
8Yooseefi dayyuwwa ifika ege'nolenna insa'ne iso'o egenneemmabaan. 9Yooseefinna ifike dayyuwwixxee oojjotemmaxxa oojjo kassi hiyyeexxi, «Ha'no colibaleeyyeeten; hunna no'oke bogixxi gooffeeba uudatte dagineke mannan.»#Dada. 37:5-10.
10Isa'nenna isoo hinee qici, «No'oke gootta no'o colibaleeyyetebaan; no'o atik erganjuwwan kaba midha hidhdhinonnaa dangennen. 11No'o duuchchiingi mitte annixxe oosen; no'o atike erganjuwwi dhugaatike manna malee colibaleeyyetebaan» hine.
12Yooseefinna insa'ne'ni hiisexxi, «Waawwo! Ha'no daggineechchi hunna no'oke bogixxi gooffeeba uudateeten» hiyye.
13Insa'ne kinni hiissineexxi, «No'o atik erganjuwwi kenaanike boga'n hedha'neeke mitti manjichchi ileexxe tommenna lame dayyuwwan; maa'nichchi dayyi no'ok anniinba hedheen; mitti no'oki dayyi kinni hedhebaan» hine.
14Yooseefinna insa'nee, «Ha'no'n haaso'enneshshanni ha'no colibaleeyyeten; 15Maa'nichcho ha'nook dayyi kaba daga gopheexenni Feri'oon ani'a reyo ha'no kabaa'ni ittanna mishiki hitinabaan; yoonna ayyumma ha'nooxxi ege'nedaak tennenniten. 16Ha'no giddii'n mitte ergitine'naa okkone ha'nooka dayyo aadheexxi iyyedagowwaal; haasotinemmak haaso'e kokeessemma qico ha'no gattineek usurriinke mine'ni turtinaan; haasottineshsha kada gophphoole kinni Feri'ooni ani'a reyo; ha'no duuchching colbaleeyyeten» hiyye. 17Ookkoneechchi uduma insa'nee sase barra usuriinke mine'n turse.
18Sakkaxxa barra Yooseefii insa'nee hiyyee qici, «Ani Mageno sodaatanaxxe lubbo gattino'a assinaaxxi yaane: 19Ha'no dhugaatike manna kaddinoole ha'noo giddii'n mitti ha'nook dayyi kaba usurriinke mine'n turaan; ha'no weli gattineek solo'wemake ha'noke hadi'a midha aaxxine iyyemarre. 20Ha'nooka maa'nichcho dayyo kinni iyyedaga hasissaan; konne qicinni haasotinemmak haaso'i dhugaatike kadeexxa kokeesemaan; ha'nonna reyotenaa'n gattinaan» hiyye.
Insa'nenna konnee yaado assino'a adhdhine. 21Insa'nenna weli'aanni weli «Dayyo no'oka balleessinennaxxe balleessaxxe tinni abara no'o'ni gelteen; okkone wodda isi wixxirri hiyyeexxi lubbotee no'oo kadhatee wodda laqa ginbeneennan; tennexxeten kunni abar no'o'n geyeechchi» hine.
22Roobelinna, «Konne belto'n fuggoxxa assitinoqqe'e hiyyennabaa? Ha'no kinni ani hiyyennexxa laqa gibbine; kunnise ta'a lubbo isixxi no'onaa'n hasenda'neen» hiyye.#37:21-22. 23Yooseefi insa'nenni haaso'emmak weli tikaa'naate kaddeemmaxxee insa'neeka afo'o Yooseefi ege'neexxa egenneemmabaan. 24Yooseefinna insa'nenaa'ni gamake'n higeexxi oodhe; ookkoneechchi uduma insa'neeba'a ille iima higeexxi higgeenna insa'nenni haaso'e; Simooninna oddo insa'neexxenaa'n aadheexxi insa'ne edo usure.
25Yooseefinna qalqallo insa'neexxe'n midha wonshinaashsha, mitte mittingika birretika sibljo anni anninixxe qalqallo'n hiissineexxi ugginaashshannaa orakeenna gala'a insa'ne'aa uunaashsha Yooseefi ajaje. Tinni insa'ne'a assendeechchi uduma, 26ifi ifixxa midha ifi ifixxe harre'n fe'e'neexxi okko'n ke'ne me'ine.
27Ora galeeba insa'ne giddii'n mitti harre ifixxe midhanaa'n uwwo'a qalqallo ifixxa tikaa wodda qalqallotike afo'o'n ifika biretika sbljo afe. 28Isinna dayyuwwa ifike'n «Ang birretik siblji ani'a hige'e, kunna'a anxe qalqallo giddo» hiyye.
Insa'ne duuchchiing alanne culphinse weli uunda'n weli'aani weli, «Isi Magen no'o'n asseexxi tinni yaane maachcho?» Hine.
29Kenaanike boga'n hedheek ifike anniba Ya'iqoobiba genneechchi uduma; insa'ne'n gelteexxa duuchcha hinee iso'ni kullee qici, 30«Ookkone bogik gootti boga dooyinaanneshsha no'oo asse uudiyyot mufet no'o'n haaso'e. 31No'o kinni iso'n hinenee qici, ‹No'o dhugaatike manna malee colibaleeyyetebaan. 32No'o tommenna lame dayyuwwa mitte annixxe ooseen; mitti no'oki dayyi hedhebaan; maa'nichchi no'ok dayyi anna no'okiba Kenaan hedhe› hinenne.
33«Ookkoneechchi uduma manjichchikinna ‹Dhugaatike manna kaddineexxa egennonnaa ha'no giddii'n mitti kaba aniba gatee'naa weli gattineek solo'weeke ha'nooke hadi'a midha aaxxine me'e. 34Yaane kinni dayyo ha'nooka maa'nichcho aniba iyyedagge; ookkone wodda colibaleeyyete kaddineebaaxxa ege'nannon; dayyo ha'nookanna ha'no'a ille iima hiissannon; ha'nonna konne bogi giddo dadda'litinaan#42:34 Yookaan eetineeshsha marema dandeetinaan› » hiyye.
35Midhatanna ififixxe qalqallo giddii'n fulchinaa wodda mitti mittingi ififixxe qalqallo giddo guduunfemeeka birretika sibljo anfe; insa'nenna anni insa'neek konne guduunfemeeka maallaqa afee wodda lumoshsha sodaante. 36Anni insa'neek Ya'iqoobinna insa'nee, «Anee finni belo gatissineelaqi; Yooseefii hedheba'a; Simooniinna hedhebaan; ta'anna kinni Biiniyaamiinna adhdhitine me'itino'aaten. Isi maa yaane tinni duuchchi ane'n dagge!» Hiyye.
37Roobelinna anna ifika, «Biniyaamii atiba illee iima hiisse iyyedaga gophonoole anxa lamiinxa labbaxxa oose shiyi; isixxa yaane ane'n waali; aninninni insoo atiba ille iima hiisse iyyedagannon» hiyye.
38Ya'iqoobinna «Haranga belti anki ha'nonni ookko adadde me'abaan; dayyi isik godobik reyedheen gateek iso callan. Isoo adhdhitine me'itinaa'naa orake'n mitte yaane iso'ni geltoole ane'e cimo giddo yaaddoti reyannoshsha assitinaan» hiyye.
Currently Selected:
Dadatika Maxaafa 42: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
