Dadatika Maxaafa 43
43
Yooseefik Dayyuwwixxa, Langaxa Gibtse'a Me'a
1Solo'i Kanaanike boga'n jabaateeshshanni hedhemman. 2Gibtsee'n iyyedangemmaxxa midha indee'naa muddee wodda anni insa'neeki, «Amme higgine martineexxi midha shixxonxa no'a hirre» insa'nee hiyye.
3Yihuda kinni iso'n «Iikki Manjichchi ‹Ha'nooka dayyo iyyedaga gophphinoole ani edo shiqqinoqqe'e› hiyye no'o jaba qico xexxe'achchise'een; 4Dayyi no'ok no'oni aade maro'a ergitaattole marennexxi midha ati'a hirrannon. 5Iso erga gophphatole kinni ikki manjichchi ‹Dayyo ha'nooka iyyedaga gophphinoole ani edo shiqqinoqqe'e› hiyyemmaxxee no'onna okko aade marrabo'no» hine.
6Isira'eelinna, « ‹Wele dayyonna anfe'eennen› hitinee ookkone manjichcho'n kulati tenne rakko duuchcha ane'n mayee iyyedagine?» Hiyye insa'nee qore.
7Insa'nenna, «Majichchi ikki, ‹Anni ha'nook lubbo hedhenni hedhee? Wele dayyonna afine'ee?› Hiyya'ni no'oo qoreeke qortumika hiissichcho isi'a uunenne malee ‹Dayyo ha'nooka aaxxine kaba'a iyyedagge› hiyyaaxxa hitta egennannata?» Hine.
8Yihudanna anna ifika Isira'eelii hiyyee qici, «Beltichchi aninni me'o'a ergi, no'onna ranke ke'ne me'ino; tinni kaddoole ati, no'onna oose no'oxxi rennabe'non, gantanno. 9Konne beltixxee annoomma ani umi anikinni adhdhanon; isixxe ane calla laqemannon; nege'iki qullo hedhe'naa isoo ille iima hiisse iyyedagennexxi ate'n uwwa gophphonnole baro anike duuchcha'n ati edo aallatemo. 10Konnee qico, hekki hiyya gonphennele silaati lamele genne hingeenna woddamman.»
11Ookkoneechchi uduma anni insa'neek Ya'iqoobi insa'nee, «Yoona yaane itatike kaddoole assitinaa qici: buttin no'ok fulcheexxe elolla yaane duuchchanaa'n shiixxooxxa belsaani, shiixxoka malebo, heenoonxa fishshaxxa qurunfuduwwa, karbe temirennaa lewuze qalqallo ha'nooxxe'n uggitineexxi uwwatishsha ookkne manjichchi'a iyyemarre. 12Ha'noxxe qalqallo giddo wirri hiyye higemmaka ookkone birretika sibljo hiissa hasissammaxxe birretika sibljo lame anga assitine aaxxine me'e. 13Dayyo ha'nokanna aaxxine okkone manjichchiba kexxine ille iima higge. 14Wele ha'nooka dayyonnaa Biiniyaamii aaxxine daggino'aa duuchchiinxa dande'aak Mageni ifixxe marartenni ookkone manjichchik godoba ha'no'aa shaqishowwaal! Akimagaada oose anxa gophonnolenna maassaanne gophe'e gatunnun» hiyye.
15Insa'enna eettene uwwanna lame anga okkone birretika sibljonna Biiniyaamii adhdhineexxi aade Gibtse me'ine; Yooseefi edonna shinqe. 16Yooseefinna Biiniyaami insa'nenni welti hedheexxa afeexxi okkone ifike minika ajajallo, «Konnee manna mine aniba iyyemari; telcho barra dhiyaana aninni welti indammaxxee dulde qophpheessi» hiyye.
17Manjichchikinna Yooseefi iso'n kulemmashshanni manna Yooseefike mine'n iyyemare. 18Insa'nenna Yooseefike miniba dangee wodda, «No'o kabaa dangennechchi, edii miila kaba dange hinganno wodda ifixxe qalqallo no'oxxi giddo higeeke birretike sibljixxe buuto'aaten; yoona no'oo manjichchi rakkisa; harre no'oxxanna no'onaa'n adhdheexxi no'oo garbake assedha» hina'n sodaante.
19Insa'nenna Yooseefike minike ajajalliba marreexxi baxxe isike minixxe'n iso'n hinee qici, 20«No'oke gootta sire midha hidhdhinonnaa kaba dangeennan. 21Yaane kinni ille iima hingennexxi galleneba ififixxa qalqallo tilqinanno wodda no'o mitti mittingixxe qalqallo giddo afo'oke'ni hedhe hedheeshshanni no'ok birretik sblji guduunfemee hedhenaa anfennen. Ta'a kunnise ookko birretika sbljo ille iima hiissinee aa'ne iyyedangeennen. 22Ta'anna midha hidhdhinonna'a wele birretika sibljo iyyedaqineennen; edi wodda no'oo mitti mittingika birretka sibljo qalqallo no'o mitti mittingixxi giddo wirri asseexxi uggeek ayyete kadeexxa egennebo'non» hine.
23Isike minik ajajallinna, «Nage'i ha'no'a kadowwaal; sodaatinoqqe'e; ha'nookinnaa anna ha'nookik Mageni okkone maallaqa ha'noo mitte mittingixxe qalqallo giddo ha'no'a ugge'een; ha'nook birretik siblji eddonni ane'n geyedheen» hiyye. Ookkoneechchi uduma Simoonii gadho insa'neeba iyyedage.
24Minik ajajallinna ookkonee manna Yooseefike mine'n iyyemare; wodeekanna insa'ne'a uwwee'naa lekka anshe'ne; harre insa'nexxenna oka'a uwwe. 25Barra saafo'a Yooseefinni welt dhiyaana okko inda'neexxa lanqemmaxxee Yooseefi dagaa qico'n isi'a uunaaxxa uwwa qixxeessine.
26Yooseefinna mini'a e'yee wodda iyyedangemmaxxa uwwa isi'a uune, butti'aanna heeshshineexxi isoo ulfeessine. 27Yooseefinna insa'nee nage'a aadheechchi uduma, «Ikki ane'n kuldinemmak geerchi, anni ha'nook nage'aangee? Lubbo hedhenni hedhee?» Hiyye insa'ne qore.
28Insa'nenna, «Anni no'ok atik erganji, nage'angen lubbondinni hedheen» hineexxi hiissine haasonne; iso'o ulfeessatee butti'a heeshshi hine.
29Yooseefi tama asse uudaa wodda godobika dayyo Biiniyaamii afe ke'eexxi, «Ane'n kuldinemmak ikki ha'nook maa'ni dayyi konnetee?» Hiyye insa'nee qore; Biiniyaaminna «Anke belto Mageni atee eebbiso!» Hiyye. 30Yooseefinna dayyo ifika uudee wodda ha'nurat isoo mararemmaxxee rake insa'ne edii'ni me'eexxi ifixxe kuta giddo e'ye oodhe.
31Alba anshedheechchi uduma fule dage; ifinna jabeesseexxi «ita shiqquun» hiyye.
32Yooseefi'a qofinni shiqinshe; dayyuwwa isekenna qofinni shiqinshe; iittanni Gibtsek manni Ibiritotike manninni welt ita diqachchiissammaxxee isinni welt itammake Gibtsek manni'a qofinni shiqinshe. 33Yooseefik dayyuwwi ifixxe ilemiinxe wogaxxe aanteshshanni angafakenaa'n maa'ni qico'n Yooseefi edo ofo'leemman; insa'nenna saadinoti weli weli uunde. 34Yooseefi'a shiqqeexxe itanaa'n aadhenda'n insa'nee mitte mittengee uwwendaa wodda Biiniyaamik qoobbi weliinkenaa'n onde anga caale'emman; insa'nenna konne qicinni Yooseefinni welti inde; dheebo fullaa qico'ninna ha'wine.
Currently Selected:
Dadatika Maxaafa 43: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
