Dadatika Maxaafa 44
44
Birretike Sibljixxi Buuda Qalqallo Giddo Afende
1Ookkoneechchi uduma Yooseefi ifike minika ajajallo hiyyee ajajee qici, «Mitte mittingee konne mannixxi qalqallo aaxxaa qico midha itti wonshi; mitte mittingika birretika sibljonna qalqallo anni anniniinxi giddo ofooke'n uggir. 2Birretike sibljixxa anxa buudanna maa'nichchi beltixxe qalqallo giddo midha hidhdho'a iyyedaqqemmake birretike sibljinni welt ugge» hiyye. Isinna Yooseefi hiyyemmashshanni asse.
3Gorsa boro haachchabbaa wodda dayyuwwi insa'neexxe harrenninni me'inaashsha assemme. 4Qachchi giddii'n lumo qico bayyante me'inebaangi Yooseefi ifike minika ajajallo hiyyee qici, «Konne manna kexxe hordoffe, dhaqqabbettexxi, ‹Eloxxixxa bado mayee elobaaxxa hiissitine?› 5Kunni gootti anki isenaa'ni ha'wa'neexxe, sho'ondeexxa yaanenna isenni ege'na'neexxe buudabaata? Tinni assitineexxi yaane hara fuggoxxen» insa'ne'n hite kuli.
6Isike minik ajajallinna insa'nee dhaqqaabeexxi hiyyendemmaxxa hexxeeshshanni insa'nenni haaso'e. 7Insa'neenna iso'ni hinee qici, «No'oke goottaa! Iitta hexxeexxa yaane ati maaye haasottaatte? Tenne hiyyendeexxa yaane assa no'o atike erganjuwwanaa'ni ise bayyatto'o. 8Konneechchi edo qalqalluwwa no'oxxi giddo afo'oke'n hedhee'naa anfenneka birretika sibljo Kenaanike boginaa'n midde ati'a hiissinee iyyedangenen; ta'ata no'o birretika sibljo yookaan worqe atike goottike minenaa'n mayeeta moorranno? 9No'oo atike erganjuwwi giddii'n kunni miyi mitteke'ninna afemoole ikki manji shiyemmowwaal; no'o gantenekinna atee anke goottike garba kandannon» hine. 10Isinna, «Eloxxe, hitineeshshanni kadduun; yaane kinni tinni buuda afendeeki manji anke garba kadaan; weli gattineek tenne balleessanaa'n qullo fuldinaan» hiyye. 11Tennexxee mitti mittingi manji rake qalqallo ififixxa dirriseexxi afo'o tike. 12Ookkoneechchi uduma Yooseefik erganji angafakenaa'n maa'nii qico'n duuchchiingixxa qalqallo giddo buuda findige hase; buudatinna Biiniyaamixxe qalqallo giddo afende. 13Eettene yanna'n Yooseefik dayyuwwi yaaddoti seemma ifi ifixxa daddare; ifi fixxa qalqallonna ifi ifixe harre'n fe'ee'neexxi qachchiinba ille iima hinge.
14Yihudanna dayyuwwi isik Yooseefibaa hinge dangaa wodda Yooseefi okko minenni hedhemman; insa'nenna isi edo wabbi hine. 15Yooseefinna insa'nee, «Mayee iitta hexxeexxa yaane assitine? Anishsha hedheek manji buqo yaane afaaxxa ege'na afaaxxa egendineebaa?» Hiyye.
16Yihudanna, «Atee anke gootta'n maa hine haasonnannota? Tenne balleesannaa'ni ifi qulloonsatee haasonnannok haaso'i hoonte habadheta? Mageni no'oo atike erganjuwwixxa balleessa farri asse'een; yoona buuda itti afendeeke manjo calla kadebaangi no'o duuchchiingi atee anke goottike garbuwwan» hiyye.
17Yooseefinna, «Tinne haranga assannoxxe yaanebaan; garba anke kadaak buuda anxi itti afeendeeke manjo callanni; weli gatineek ha'no ha'nook anniba nage'ik me'e» hiyye.
18Yihudanna Yooseefibaa shikki hiyyeexxi, «Anke gootta mitte yaane calla haaso'onna laqi; ati Feri'oonishshanni ulfichcha manjo kaddeettexxe maganneten anee garbichcho atike'ni mufattoxxe'e. 19Anke gootta ati, ‹Anna yookaan wele dayyo affinee?› Hite no'o atika erganjuwwa qorteettan. 20No'onna ‹Eeti, cimeeke anna anfeennen; isinna cimo giddo i'leeka mitte maa'na belto afe'een; konne beltik godobi dayyinna reyedheen; amatee gate'eke iso mitte callan; annikinna isoo yo'oshsha eeyyaan› hineennan. 21Ookkoneechchi uduma atinna erganjuwwa atika no'oo, ‹Isoo uudonnaa aniba'a iyyedagge› hitette. 22No'onna ‹Belti anna waale daga dande'abaan; waale dagoole kinni anni isiki reya reyaan› hinee gootta no'oke ate'ni kulleenan. 23Ati kinni no'oo atika erganjuwwa, ‹Ha'nook dayyi maa'ni ha'nonni daga gopheexxe kaddoole ani edo shiqqinoqqe'e› hitette.
24«No'onna atika garba, anke anniba'a ille iima hingennexxa yanna ati gootti ank hitettexxa iso'n kullen. 25Ookkoneechchi uduma anni no'ok, ‹Illee iima higgineexxi heenooxxa midha no'aa hirre› hiyye. 26No'onna, ‹Mara dandenabe'no; mara dandennannok dayyi no'ok maa'ni, no'onni welt me'a'nole callan; maa'ni no'oki dayyi no'onni welt me'a gophpha'noole okkone manjichchi edo shiqa dandeennabe'non› hinenne.
27«Anni ank garbichchi atik no'o'n hiyyee qici, ‹Are anxi lame labbaxxa oose ani'a ildeexxa egendine'en. 28Konne laminaa'n mitti anenaa'n fuleeshsha gatee'naa, «Biniinchi isoo ite'een» hiyyenneni; telchi qico'ninna iso'o afebe'non. 29Ta'a kinni konne belto anenaa'n aaxxine me'itinee'naa mitte miitaxxi yaane iso'n geltoole, anee cimo giddo yaaddoti reyannoshsha assitinaan› hiyye.
30«Ta'anna anna anka atike garbichchibaa illee iima higanno wodda, beltichchi no'onni welt hedha gophpha'noole isoo lubbo ifixxishsha eeyyaammaxxee reyaan. 31No'onna, anna no'oka cimo giddo yaaddoti reyaashsha assinenneshshaten. 32Atik garbichchi aninna anke anna'n, ‹Belto atika illee iima hiisse ati'a iyyedaga gophphonnole baro anke duuchcha'n ati edo aallatema'n hedhunnuni› hiyye beltiinka annooma adhdhenen.
33«Tennexxe ta'a ani atik garbichchi beltiinxa bado garba atike kade kaba gato; belti kinni dayyuwwa ifikenni welti illee iima higowwaal. 34Hitta konne belto waale anke anniba ille iima hige me'annota? Anke anna'n geltaxxa rakko abboo uudonnoqqe'e» hiyye.
Currently Selected:
Dadatika Maxaafa 44: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
