Dadatika Maxaafa 45
45
Yooseefi Ayyumma Ifixxa Dayyuwwa Ifike'n Ca'asse Kule
1Yooseefinna isi bira hedhemmake manni duuchchi edo ossa gopheexxi, «Kaba hedheeka manna duuchcha ani edii'n gadhi'aa fulche» hiyye ajaje. Tennexxe Yooseefi ayyumma ifixxa dayyuwwa ifike'n ca'a asse kulee wodda mittikinna Gibtsek manji isinni welt hedhemmabaan.#Erga. Huj. 7:13. 2Yooseefinna hafuura gikki asse oodha'naa Gibtsek manninna laqe; tenne yaanexxi odonna Feri'oonik mini hadi laqe.
3Yooseefinna dayyuwwa ifike'n «Ani Yooseefiten; anni ank lubbo hedhenni hedhee?» hiyye insa'ne qore. Dayyuwwi isik kinni isoo sodaate culphiseemmaxxee'e iso'ni hiissichcho uwwa dande'ebaan.
4Yooseefinna dayyuwwa ifika, «Amme ani biri'a shikki hiyye» hiyye. Insa'nenna isibaa shikki hine wodda isi hiyyee qici, «Ani Gibtseke manna'ni gurgudhitineemmake ha'nooke dayyo Yooseefiten! 5Ta'atenna kaddoole anee gurgurtineemmaxxee'e yaadinoqqe'e, bojogendinoqqe'e; Mageni hedho anjiro'a ha'no'a edisexxi kaba anee ergee'en. 6Bogake'n solo'i e'yeexxenni ta'a lame wogga kade'en; ookkoneechchi uduma wiilsinabaaxinnaa midha haa'mine bukki assinabaaxxi onde wogga edi'a hexxeen. 7Yaane kinni Mageni buttate'n hafe ha'noxxi gattaashshannaa hedho ha'nooxxi baxxabaashsha lumoxxe anjirenni ha'noo anjiro'a anee ediseexxi kaba ergeen.
8«Tennexxee anee kaba'a ergeek Magenoke malee ha'notebaan; isi anee Feri'ooni'a anniinsha, mini hadi duuchchike gootta, iittanni Gibtseke bogi duuchchike galchalloke asse. 9Ta'a tennee rakkine anna ankibaa illee iima higgineexxi iso'ni, ‹belti atik Yooseefi hiyye'eeni hitinaa qici: Mageni anee Gibtseka boga duuchchika gootta asse'en; tennexxee turtebexxongi anba dag. 10Oose atixxa, atixxe oosexxa oose, gedhebo, re'e, lalokanna hortettechcho duuchcha adhdhitettexxi loola anke'n Geesemi hexxatton. 11Ookkonna, edi'a daga'neexxi onde solo'iinxi wogga hexxemmaxxee hassissaaxxa ani ha'no'a uwwannon; iitta kada gophphoole kinni ate'n, atek mini hado'ninna ati horattettechcho duuchcha'n rakko geltaan.›
12«Ha'nooke albi edo hedhe ha'noonni haaso'aanneki ante Yooseefite kadeennexxa ha'noonna kadi godobika anka dayyo Biiniyaamii'i uudina'neen. 13Gibtseke boga'ni afeenneka ulfinna duuchchanna uuddineexxa yaane duuchcha anna anke'n kulle; anna ankanna rakkine kabaa iyyedagge.»
14Ookkoneechchi uduma isi dayyo ifike Biiniyaamike gooba'ni marxeme'e oodhe; Biinyaaminna oodha'n Yooseefi'i hanqalfe. 15Isi mitte mittinga ifika dayyuwwanna sunqedha'n oodhe; ookkoneechchi uduma dayyuwwikinna isinni welti haaso'a safe.
16Yooseefike dayyuwwixxi daga Feri'oonike mootummatike mine'n laqendee wodda Feri'ooninna isik ja'labuwwi duuchchi gammade. 17Feri'ooninna Yoosefi'n, «Atik dayyuwwa'n hitato qici, ‹Harre ha'nooxxa fe'exxine Kenaanike bogibaa illee iima higge. 18Anna ha'nokanna mini hado ha'nooka aniba iyyedagge; aninna ookkone shamoke Gibtseke bogana'ni ha'no'a uwwannon; ha'nonna ookkone shamoke bogina'ni geltaaxxa karra alfitine gammadina'ni hexxinaan.›
19«Iittanni insa'ne hite ajajjatto qici, ‹Ha'noxxe aruwwanni ha'nooxxe oose'a Gibtseke boginaa'n fadhadiinxa gaare adhitneexxi, anna ha'nokanna aaxxine dagge. 20Gibtseke bogik elo elochchi duuchchi ha'noochcho kadeemmaxxee'e afine'eeke miyixxee mittilchonna yaandoqqe'e.› »
21Isira'eelixxi labbaxxi oosenna hiyyendemmashshanni assite; Yooseefinna insa'ne'a Feri'ooni ajajemmashshanni fadhadiinxa gaarenna gala'a orakee uwwe. 22Insa'ne mitti mittengee lame lame haarooxxa jijjiidhdhinaaxxa seemma uwwe; Biiniyaami'a kinni onde haarooxxa jijjiidhdhaaxxa seemmanna sase dhibba birreti sibljo uwwe. 23Anna ifikeenna Gibtse bogichcho elo elochcho tomme harre'n, iittanni oriinxe gala'a annakee midha, xaltakkanna wele sagale tomme meyyaxxe harre'n fe'ise erge. 24Ookkoneechchi uduma dayyuwwa ifikanna me'inaashsha asseexxi, «Orake'n lolendinoqqe» hiyye.
25Insa'nenna Gibtseke boganaa'n fulleexxi anna insa'neeke Ya'iqoobiba Kanaan dange. 26Insa'nenna annake'n «Yooseefi lubbo hedheen; Gibtseke bogi duuchchike galchallo kade'een» hine. Ya'iqoobinna alayye qexerri hiyye; hineexxanna addate'emmabaa. 27Yaane kinni Yooseefi insa'ne'n kuleexxa duuchcha iso'n kullee woddanna Yooseefi isoo Gibtse'a iyyemarro'a ergemmaxxa fadhadiinxa gaarruwwa uudee wodda anna insa'nekiki Ya'iqoobik irre haarro'me. 28Ookkoneechchi uduma Isira'eel, «Belti ank Yooseefi lubbondinni hedheen shene'e; reyebe'nongi mare ille anxenninni isoo uudo» hiyye.
Currently Selected:
Dadatika Maxaafa 45: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
