1 oKorotiyawa 10
10
Akpaha Pyopyi Ikweyi ko Geyagye de Eka
1Awa ayene hin, nyya yimu shala ra, oza ni tawo kyikyi ka ni gboso Omusa ni. Akamo akpa ngmawa kweyi kpiri wa sheyi ki ishu nowa, ojije tawa lo. 2Ayuwo obatisma ipu ka akpa kpi ishu kweyi kpiri wa wawo gboso Omusa. 3Kpiri wa hikyoga ko Omaku oyekponu ni wa bwebe ko Owuso bwebe koshu nu ni 4kweyi agwinyi ko Omaku oyekponu ni bwebe ko Owuso. Agwinyi bwipu ko okpo ni gakpa wa ni; okpo oni wo Okristi abiyinu. 5Ipu kishi oni Owuso ke shotunehe kpase nwashika ipu wa lo. Mani oni okwu wa shonu shonu ipu kimweshi.
6Anani, kpiri kawoza mani gbodagye shini ona woza fofu daha, shini aha anka yimu koza labi byoni awa ya ni lo. 7Kweyi anka geyagye deka, byoni ashishini wa ya ni lo. Byoni okpa ko Owuso kamo, <<Ase mani bagye ba roza ba gwinyi ba beba kpiyiwa.>> 8Anka beba byoni ashishini wa ya ni lo ipu ke eno oye kponu ase okpakwu awepa ayeta gbo okpagye kweyi gekwu kpiri. 9Anka mo Owuso ma lo, byoni ashishini kase ya ni, egwa yuwa ngmo kpiri. 10Anka kakyose lo, byoni ashishini wa ya ni kweyi oyoleho kikwu yuwa ngmo.
11Awoza mani kpiri gbodagye kpawa shini ase ashini na ma, kweyi ayi tota ko pyaha akpaha. Koni abishi ni okweyi kese ya gbeji kelo ni.
12Mani oni, owoni ala ma mala hagye loshu, ala gbera shini ala ka gbo lo.
13Kpiri kedo komama ni tala ni, woye kponu kpoza ni ya tashishini ni. Owuso ke ya byo okoyi nu, anu ya shomama bita na shaloshu lo, Ishini aba malama, oya dala oshu ko hagye loshu, kpowe ni ala ba bose ipu ko mama ni.
14Mani oni, ayene hin moshi, ala sho geyagye daweka bita. 15Nyya kela dala byawase ni gyoza koyoya ni; ala shepwo abiyikala ikweyi koza ni nka mani. 16Abwa ni aba gwinyi kpanu ebe ko Ozarore ka Adole, ni aba shotunehe do Owuso ikweyi nu ni, ishini aha gwinyi bwipu nu, aha gbingbo ipu ko oyi ko Okristi dudu. Kweyi ikyoga ni aba foha ni, ishini aha ha, aha gbingbo ipu kikpiye ko Okristi.
17Ikweyi koni ikyoga woye kpokponu, koni anwashika ni, kpiri kaha, wikpiye oyekponu la, kweyi kpiri kaha ikyoga oyekponu pini aba ha la.
18Rela kase ki Izrayila; Awase ni ba roza ni ayi peshi ni ba re dudu ikweyi ko okpe koko ko Owuso. 19Mani oni nyya kamo eka kwe ozarore ni ayipeka ni gboko ko oje la? 20Aayi! Oza ni nyya ka ni yoma oza ni ayipo okpe ke eka wako owu bibi oke wako Owuso lalo. Ni olemani oni nyya yimu shini ala ka rema dudu kpo owu bibi lo. 21Ala ba gwinyi bwa abwa ka Adole kweyi ki gwa bwa abwa ko owu bibi lo. Ala ba re ikweyi ko oda ko Owuso kweyi ki re ikweyi ko oda ko owu bibi lo. 22Kwe Ala ba yimu sha Adole na yanya kpaha la? Ala bama byaha loshu sha Adole la?
23Awa kamo, <<Oshahata ko yojoji.>> Owokwokwoshi, oza kpiri pini ke woneshi lalo. <<Oshahata koyoza kpiri.>> Oza kpiri pini ke ya ya tahabo lalo. 24Ashishe kala naka tikpo koneshi kiyinu lo, ona ke tikpo koneshi kase ashishini.
25Ala hojoji ni yi ipishi kebe ni, gbo doka kojije lo shini otu wo naka kwuwepwo lo. 26Okpa ko Owuso kamo, <<Ese kpoza kpiri kipu nu wa ka Adole la.>>
27Owoni aseni gyo Owuso lo ni pala ko ga roza ala ga, hojoji ni ayihoda dala kore ni, gbo doka kojije lo shini otu wo naka kwuwepwo lo. 28Owoni ashe ke kamo, <<Oza rore mani ayipeka,>> ala ka re lo, ikweyi kase ni ka dala ni shini otu kala naka kwala epwo lo, 29olamoni, wela ni yipu kotu kala lalo, oke wa kotu kase ni kani la.
Ashe doka mo, <<Owoni ole mani ojiya otu kashe ya wumobi ko yoza ni nyya yimu ko ya ni? 30Owoni nshotunehe do Owuso ikweyi koza ni nyya re ni, ojiya ni aba kwumepwo ikweyi koza ni nshotunehe do Owuso ni?>>
31Mani oni, oza kpiri ni oyaya, ko ya roza kwoya gwinyi ya kpiri ikweyi ki igyashi ko Owuso. 32Ka ya ashishe na shikawu lo, kase ko Oyahuda, kase ni wo Oyahuda lo, kase ni ba goda ko Owuso ni. 33Ala ya byoni nyya ni; nyya ya ela koneshi hin lalo, koni nyya takirikwu ikweyi ko neshi kase ashini, shini ana ngmawa.
Currently Selected:
1 oKorotiyawa 10: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA