1 oKorotiyawa 16
16
Ododa ko Dase ko Owuso
1Anani, ikweyi kokpa ni alata ko dikwiri ko tawa ase ko Owuso abo Oyahudiya. Ala yoza ni nka dawoda ko Owuso ni bo Ogaletiya mo ana ya ni. 2Eno kikyikyo ko bize wonyonya ananoho kala na ngmikwiri bwipu koza ni opye ni tagye, shala kpotukpa, shini nwwa aba dikwiri kelo. 3Ishini nwwa, nyya dawase ni ala shu ni okpa ni ya dawoshu ko byeshi kala go Ojerusele. 4Owoni oshoshi koni nyya ga ni, aba byumoshi aga.
Ozani Obulus Gbo ko Ya ni
5Ishini nggyehe Omasedoniya kweyi nyya webe kala, koni nyya bwa ko Omasedoniya la.
6Nyya wa yagye kpala kishi gbayayi, kweyi nyya yishi kowu mani ngmo ebe kala, shini ala tumabo ipu kiyawu hin, ebe ni nyya wa ga ohobwu ni. 7Nyya yimu kowa mala anani kweyi shigbo kin lo; Nyya yiyitagye ko wa yagye kpala kishi gboji ome, owoni Adole kyogwu.
8Nyya yagye ebe mani ipu ko Efesu gbeno ko Opentekos ome, 9Koni owe koko nyaku oye gwa dami, koni awo omonyekwotu baba nwashika ni.
10Owoni Otimoti webe kala, ala yo omaba neshi na yoshi kojije ishini oyo kpala ni lo, ikweyi koni oya yoko ka Adole la, byoni nyya ya ni. 11Ashishe naka monye lo, Ala ke byoshi ipu komene, shini ona kwikye webe hin; koni Nyyiyi tagye ko mo kpayene ni.
12Anani, ikweyi koyene ka Apolos. Nka danu kpoko nyaku mona webe kala kpayene ashini, oyimu ko ga anani lo oke ya wa ga ishini opyishi.
Ongmeyi Kela
13Ala gbera; ala hagye giri ipu kotuse, ala wawine kotugbagba; ala loshu. 14Ala yojoji ipu ki imu yoya.
15Ala gyela ko Ostefanas kpi ipwoma nu; awa pini wa kikyikyo ko shagbotu ipu ka Akaya la, kweyi aziyiwa doko ko yoya da ase ko Owuso. Nyya bala ayene hin, 16ala gboso ogwu kedo kawase mani, kpase kpiri ni ba yoko kpawa ni. 17Nshotunehe kpo wowa ko Ostefanas, Ofoshunetu kpo Akayikwu; ikweyi koni awa yoza ni ala bebeni ko ya lo ni. 18Atumotugbagba, byoni atala otugbagba ni. Awase mani gye ko ni ahan dawabo-okpa.
19Awoda ko Owuso ni bo okpagye ko Asiya ni mo na talogbogba; Akwila kpo Oprisila kpo oda ko Owuso ni ba gbayi olewa ni ba talogbogba kpoko nyaku. 20Ayene kpiri ni bebeni ba talogbogba. Ala tananoho ogbogba kyi kuwa botu kpimu.
21Ami, Obulus, togbogba mani kpabo hin:
Ogbogba bwebe ko Obulus.
22Ase ni ya yimu ka Adole lo, igbe na to!
Marana ta. Adole ka wa!
23Nyya beshi ka Adole Oyesu na yo kpala.
24Nyya yimu kala kpiri ipu ko Okristi Oyesu.
Currently Selected:
1 oKorotiyawa 16: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA