2 oKorotiyawa 2
2
1Mani oni, nze ipu kotu hin mo nyya wa yotu kala naka bya kelo. 2Owoni nyyo otu kala bya, anoho yaba ko kami otu agye, ala ni nyyo otu kala bya ni lalo? 3Oza ni yun tokpa oni dala ni oma, nyya yimu ko webe kala lo ela koni ala ni shu ko kamotu agye ni ga yotu hin ya bya ni. Koni nkyogwu ipu kotu hin mo owoni otu hin sha otu kala kpiri ba sha mamani. 4Ntokpa mani dala ipu kotu byobya nwashika kpize iyi; nyya yimu ko yotu kala na bya la lo, nke ya yimu shini ala gyedo kimu ni ngbo dala ni la.
Ala Rigbase ni Yozalabi ni
5Anani, owoni ashe yotu kashe bya, oyun fufun la lo, oke yala kpiri la. (Nka mani ikweyi koni nyya yimu ko kela labi danu lo.) 6Owe ni ase nwashika ipu kala gbogo agye ni gbayi anu. 7Anani ke, ala rigbo kweyi totugbagba, shini otu nu naka bya ko yo na kwikye itikpi lo. 8Mani oni, nyya bala mala yo nagye mala ba yimu nu kotata. 9Ntokpa oni dala shina ma kwe ipu kishi kpiri ala ba hagye loshu kweyi ba yoko kpe ela hin ipu kojoji. 10Ishini ala yozalabi ni ase ya ni gbuwa, ami rigbuwa mamani. Kweyi owoni nrigbase kwokwoshi, nrigbuwa obutu ko Okristi ikweyi kala, 11shini Ibiri naka pyowe ko gyaha egya lo, ikweyi koni aha kwobonu gyoza ni oya gbo ni.
Otudose ko Obulus Ipu Kogya ko Otrowas
12Ishini nwwogya ko Otrowas ko tono ko Oshu Neshi ko Okristi ni, Adole gwowe koko dami ebe ni. 13Otu hin ke sha lo, ikweyi koni nmo oyene kaha ko Otitus ebeni lo ni. Nka dawase ni bebeni kamo nyya ga hin oma, kweyi nkwowe go Omasedoniya.
Orore Bwebe ko Okristi
14Nke shotunehe do Owuso! Ikweyi koni ipu ko dudu kpo Okristi, Owuso yoko kpaha byase na shuwotu ni kweyi kpogwu kawo refu ipu ko Okristi. Owuso yoko kpaha ko koshu ko Okristi ebebenya byoza kpehe. 15Koni aha le byoza kpehe no Okristi peshi do Owuso, ni kpehe ge ebebenya ipu kawase ni angmawa ni kpawase ni gebi owe ni. 16Ebe kawase ni gebi ni, owoza kwipi labi ko yase ngmo; ebe kawase ni ake ngmawa ni, owoza kpehe ko dase olayi. Anoho ke gye ko yoko mani? 17Aha le byase nwashika ni ba kyoleho ko Owuso ko pyoza kese ni lalo, ake wayole ko Owuso kokwokwoshi la, kweyi aba kyoleho ko Owuso bwebe koshu ko Okristi.
Currently Selected:
2 oKorotiyawa 2: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA