oRoma 2
2
Epwo ko Owuso
1Ala awoya hin ke bwowe ko nyepwo lo, ala ni ba kwase ashishini epwo ni, ishi kpiri ni oya kwashe epwo, oya kwiyo epwo oma, ikweyi koni ala ni ba kuwepwo ni ba ya mamani. 2Kweyi agye mo epwo ko Owuso wokwokwoshi ikweyi kawo yoza mani. 3Ala awoya hin, owoni awo asuse ya kwase epwo, ome, awo kiya mamani byawa ni, omamo oya gege ya bose abo ko Owuso eno kepwo koka? 4Oya keshi ko Owuso ikweyi kiyinyinyi, kpo otuzoze ni ogbo ome oya dawo ishi ko shagbotu ni.
5Ikweyi ko zakpaha ni ala gbo kpo ozalabi ome ni ala ki ta ko shagbotu do Owuso ni, ala ba kpanya ko Owuso tukpa gbeyi ke eno kepwo ko Owuso ni yawa ni. 6Owuso Yawa dananoho abola koza ni oyaya ni. 7Awase ni hagye loshu ko yoza neshi ba labo kigyashi kpa abokpa kpoyiyi ko gbogbo-gbogbo; oya dawo Olayi ko gbogbo-gbogbo. 8Awase ni ke ba yimu kiyiwa kpawo tela ko kwokwoshi ga gboso obibi; Anya ko Owuso yikweyi wa. 9Owe kpo otubyobya yaba dawino yoza labi, kikyikyo Oyahuda ome awase ni wo Oyahuda lo. 10Owuso ke ya dawa igyashi, kpo abokpa, omene wa kase kpiri ni ya yoza neshi ni, kikyikyo Oyahuda ome awase ni ke wo yahuda lo. 11Owuso ya yimu kashe shashe lo.
12Kpiri kase ni ba yozalabi gogo kpono ko Omusa ni; ba gekwu gogo kpono, kweyi kpiri kase ni yozalabi ipu ko ono ono ya kuwepwo. 13Koni ase ni pwono ni pini ba wase neshi obutu ko Owuso lalo, ase ni ke ba gboso ono ni pini ba waseneshi la. 14Ko kwokwoshi owoni awase ko Oyahuda lo ni gbono lo ni; ke ba yoza ni ono ka ni, awono kabiyiwa oma, koni agbono abo wa lo ni, 15koni asayi kamo ayoza ni ono kani tota ipu kotu wa ni, otu wa yolobene, ome elakotu wa ya kuwepwo, anani oki ya shepwo wa. 16Oza mani wa gbodagye eno ni Owuso kepwo koza-teba kananoho bwebe ko Oyesu Okristi, byoni oshu neshi hin ka ni.
Ase ko Oyahuda Kpo Ono
17Anani, owoni ala ba yiyi kala ogu mase ko Oyahuda; owoni ala yotu sono kweyi ba gwabotu kpema kala kpo Owuso; 18Owoni ala gyoza ni Owuso ya yimu shala ya, kweyi ala gyoneshi kpolabi byoni ono fala ni; 19owoni ala kyogwu mala wawino pyofiyi abo, ala woyoyu dase ni bebe dibu ni, 20ki wino dikyo ela, ino fayileke oza, koni ala gboko kozagyogye kpo kwokwoshi ipu ko ono ni. 21Ala ni ba fase oza ni ala yamoji ba fiyi kala lo? Ala ni ba tono, ba wobi kowiyi ni, ala ke ba wiyi abiyikala? 22Ala ni ba wasobi kamo, <<ala ka beba lo>> ni, ala ki ba beba? Ala ni ba wobi keka yoya ni, ala ki ba wiyi kiyo kofonu keka? 23Ala ni ba yo wada kpono ni, ala to Owuso nye bwebe ko ono ni ala yi kigbo ni lo? 24Byoni okpa kamo, <<Ase ni wase ko yahuda lo ni ba yo Owuso ishi ikweyi kala ni wase ko yahuda ni.>>
25Ofu shoshe gboko owoni ala ba gboso ono neneshi, owoni ala ke yono kyigbo, ala lema gyogye byofu afafu oma. 26Owoni agboga, awase ni ashuwofu lo ni, yoza gyogye byoni ono kani, Owuso azuwa lema gyogye kpa wase ni shofu ni lo? 27Ase ni ashofu kikpiye lo oke ya gboso ono neneshi, azawo ni shofu ni wase yeye, koni ogbono ome okyi shofu ni, owino yono kigbo.
28Ase ya gege ya wase ko Oyahuda lo owoni oyipu ki kpiye, ofu shoshe ke wa kikpiye kpo kya kin la lo. 29Aayi, ase ya wase ko Oyahuda owoni owa kipu-ipu la; kweyi ofu shoshe wofu shoshe kipu kotu la, bwebe ko Omaku, obwebe ko ono lalo. Iyeshosha kedo kasuse mani bwebe kasuse la lo, opa bwebe ko Owuso la.
Currently Selected:
oRoma 2: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA
