LUK 22

Ngol gə̄ kə́ dɔ ngé tun̄ yá̰a̰ gə̄ oōn̄ naā yā tɔ̄l̄ Jeju

(Á̰a̰ī Mat 26.1-5; Mark 14.1-2; Ja̰a̰ 11.45-53)

1Dan ngé ń noō tə́ ní, ndɔ̄ nāā mápa kə́ kanjə̄ kaa mápá ń a ɓārə́n̄ na i Pákə́ ní i ngɔr. 2Ngol gə̄ kə́ dɔ ngé tun̄ yá̰a̰ gə̄ tə́ kə ngé ndóō de gə̄ ndū najə̄ gə̄ sāān̄ loo kəhɔ Jeju tɔ̄lə̄n, ba gerə̄n̄ loon alé, tām̄ nin̄-ɓōlə́n̄ Jipə gə̄.

Judas rāā loo kəla Jeju jī de gə̄ tə́

(Á̰a̰ī Mat 26.14-16; Mark 14.10-11)

3Anī Sətan udə kem Judas ń a ɓāŕnən̄ na i Iskariot ní tə́. Ni i nge kə́ kógə̄ḿ kə́ dan ngé kə́ kutə gidə i jōó gə̄ tə́. 4Ni ɔtə jákə́ aw̄ ənge ngol gə̄ kə́ dɔ ngé tun̄ yá̰a̰ gə̄ tə́ ō, ngol ngé ngɔ̄m̄ kújə yā Kɔ́ɔ̄ɓē gə̄ ō, ba ɔr̄ najə̄ sedə́ dɔ loo kəla ń a əla Jeju jīdə́ tə́ ní. 5Nin̄-rāān̄ rɔ̄nel̄ dɔ tə́, ba oōn̄ naā kadə̄ n-adə̄nən̄ nar. 6Ni ndigə dɔ tə́ ba a sāā ndɔ̄ kə́ majə tá kadə̄ n-aw̄ kə n-əla Jeju jīdə́ tə́ jəke gidə kósə de gə̄ tə́.

Rāān̄ loo kəsa yá̰a̰ nāā Pákə́

(Á̰a̰ī Mat 26.17-25; Mark 14.12-21; Ja̰a̰ 13.21-30)

7Ndɔ̄ yā mápá kə́ kanjə̄ kaa mápá ń kadə̄ a ɔlən̄neé míndə ngōn̄ batə̄ Pákə́ ní reē ugə̄. 8Jeju ɔr̄ Piyer nin̄ kə Ja̰a̰ əladə́ ba ədadə́ na:

Āw̄ ī-rāāī loo yá̰a̰ gə̄ yā nāā Pákə kadə̄ j-əsaī.

9Nin̄-tél dəjenən̄ na:

Ī-gḛy kadə̄ jə-rāā loo yá̰a̰ gə̄ ní i rá?

10Ni ədadə́ na:

Á̰a̰ī, dan ń ā údiī kə̄ kem ɓēé anī, dəngam kógə̄ḿ kə́ ətō jóo man̄ a dərāsí róbó. Úniī gōn, āwī seneé kem kújə́ ń a udə tū tə́ ní, 11ba ə́daī kɔ́ɔ̄ kújə́ ní na ngoljí na kə ədaīn̄ na: Ké kújə́ ń kadə̄ n-əsa yá̰á̰ Pákə tū tə́ kə ngé ndóō yá̰a̰ yān gēé ní ké i rá wa. 12Anī kɔ́ɔ̄ kújə ní a ɔjəsí kem kújə́ kə́ dɔɔ́ kógə̄ḿ kə́ bo, kə́ lábə̄n̄ yá̰a̰ taā gír dɔ gə̄ kemeé. Ī-rāāī loo yá̰a̰ yā nāā Pákə gə̄ i kemeé nuū.

13Nin̄-aw̄n̄ anī, əngen̄ yá̰a̰ gə̄ ní malang tītə̄ ń ni-ədańdə́ ní, adə̄ rāān̄ loo yá̰a̰ gə̄ yā nāā Pákə tū tə́.

Pákə́ kə́ kijə

(Á̰a̰ī Mat 26.26-30; Mark 14.22-26; 1Ko 11.23-25)

14Dan ń mbang asə ní anī, Jeju ndi a əsa yá̰a̰ kə ngámbang kəla yān gēé, 15ba ədadə́ na:

m̄-ndə̄ngā ngá̰ý kadə̄ m-ə́sá yá̰á̰ Pákə́ ń toō sesí pá tá kə́ m-á̰á̰ tápə̄ ɓáý, 16tɔdɔ̄ ādə̄ m-ə́dásí, m-ā m-ə́sá yá̰á̰ Pákə sesí to̰ aĺ bátə́ kadə̄ ugə̄ń dɔ ta tɔ̄l̄ ta Pákə́ tə́ kem Ɓē ko̰o̰ yā Nə́ɓā tə́.

17Loo ń noō tə́ anī ni-un kópə, ndadə̄ Nə́ɓā dɔ tə́, ba əda na:

Ī-taāī, ā̰yī naā tə́ malang, 18tɔdɔ̄ ādə̄ m-ə́dásí, ngɔlaā ní gír gān̄g tā, m-ā m-ā̰ȳ kasə nduú to̰ aĺ bátə́ kadə̄ Ɓē ko̰o̰ yā Nə́ɓā reēń tá.

19Gō tə́ anī ni-un mápa, ndadə̄ Nə́ɓā dɔ tə́, tétə̄ naā tə́, adə̄də́, ba ədadə́ na:

Nge ń toō i rɔ̄ḿ kə́ m-ādə̄ tām̄ yāsí tə́. Ī-rāāī yá̰á̰ ń toō kadə̄ əgań kemsí dɔḿ tə́.

20Gō yá̰a̰ kəsa tə́ anī, ni-rāā tītə̄ ń noō ɓáý to̰ kə kopoó, ba ədadə́ na:

Kopə ń toō i kópə yā madə̄ naā kə́ kijə kə ta kūl̄ mósə́ḿ kə́ ɓōkə́ nang tə́ tām̄ yāsí tə́. 21Ba á̰a̰ī, deē ń a əlam̄ jī de gə̄ tə́ ní, əla jīn gō yāḿ tə́ kem kār̄ kəsań toō tə́. 22Ngōn̄ Deē a aw̄ tītə̄ ń Nə́ɓā ədań dɔn tə́ kété ní, ba deē ń a əlan jī de gə̄ tə́ ní tā a, rɔ̄ tō ndoō i yān.

23Anī nin̄-əlan̄ gír dəje naā kógə̄ḿ kógə̄ḿ ké i náā dandə́ tə́ n a rāā yā rāā yá̰a̰ nəkɔ́ ń noō ní wa.

I náā n i de kə́ bo ngá̰ý ní?

24Nin̄-nējə̄n̄ naā najə̄ dɔ dáńdə́ tə́ yā gerə̄ń ké i náā dandə́ tə́ n i de kə́ bo mān̄ madə̄n gə̄ ní wa. 25Anī Jeju ədadə́ na: Mban̄g gə̄ yā gíŕ nápar de gə̄ a rāān̄ ngār dɔdə́ tə́, tá ngé gə̄ ń əlan̄ dɔ nápar de gə̄ gíŕ tɔ́gə yādə́ tə́ ní adə̄n̄ a ɓārə́n̄də́ na i ngé rāā majə gə̄. 26Yāsí sḭḭ̄ i tītə̄ ń noō alé, ba kadə̄ deē ń i kə́ bo ngá̰ý dansí tə́ ní a kɔ́ɔ̄ tél to tītə̄ de kə́ dūú ngá̰ý dansí tə́, kadə̄ nge ń ndi ngār dɔ madə̄n gə̄ tə́ ní tél to tītə̄ ngōn̄ nge kəla kə́ karī ō. 27I náā n i kə́ bo ngá̰ý ní, i deē ń ndi ta yá̰a̰ kəsa tə́ ní, aké i nge ń rāā kəla kətō yá̰a̰ kə̄ rɔ̄n tə́ ní? M-á̰a̰, i deē ń ndi ta yá̰a̰ kəsa tə́ ní aĺ a? Ba á̰a̰ī, dansí tə́ laā ní, mā i tītə̄ nge rāā kəla kətō yá̰a̰ ō, nge nə̄ɓō ō. 28Sḭḭ̄ i ngé gə̄ ń ə́hɔī rɔ̄sí tɔgə seḿ tū yá̰a̰ gə̄ ń nāāmə̄n̄ tə́ ní. 29Adə̄ ń toō m-ə̄ndā dɔ Ɓē ko̰o̰ danaá kɔ̄ɔ́ tām̄ yāsí tə́ tītə̄ ń Bɔbə́ḿ əndāń dɔ danaá tām̄ yāḿ tə́ ní ō. 30Ā ə́saī yá̰a̰ dɔ yāḿ tə́ ō, ā ā̰yī seḿ ō, kem Ɓē ko̰o̰ yāḿ tə́, tá ā ī-ndiī dɔ kōr̄ kāgə̄ mbang gə̄ tə́ yā gāngəń sarya dɔ gír ɓē kə́ kutə gidə i jōó gə̄ yā ngán Israel gə̄ tə́ ō.

Jeju tāā Piyer na a nējə̄ gerə̄n

(Á̰a̰ī Mat 26.31-35; Mark 14.27-31; Ja̰a̰ 13.36-38)

31Simo̰, Simo̰, á̰a̰ā̰, Sətan dəje kadə̄ n-əgasí tītə̄ ń a əgan̄neé kum kōō gémē kə yengəreé noō beé. 32Ba m̄-ndɔ̄ȳ tām̄ yāí ḭ̄ tə́ kadə̄ ə̄sō loo taā kem yāí tə́ alé. Ba ḭ̄, dan ń ī-tél ta róbə yāí tə́ ní a, ī-mbūsə̄ ngákó̰ó̰í gə̄.

33Ba Piyer ədan na:

Kɔ́ɔ̄ɓē, mā m̄-ndi dɔ rɔ̄ḿ tə́ ngan̄g ngá̰ý yā kadə̄, ré i dəngáy a, m-ā m-āw̄ seí tū tə́ ō, i yo a, m-óy seí ō.

34Ba Jeju tél ədan na:

Ādə̄ m-ə́daī, Piyer, ɓōólaā nəkɔ́ ń toō, kété tá kadə̄ kə́ra kə̄njá a nōō ní, ā ī-nējə̄ nja mətá na ī-gerə̄m̄ alé.

Ngong nar ō, ngong mbā ō, kaskar ō

35Gō tə́ anī, ni-ədadə́ na:

Dan ń m-ə́lásí kanjə̄ ngong nar, aláa sángá, aláa sākə̄rā njasí tə́ ní, ī-nalī yá̰á̰ kógə̄ḿ sḛ́ý a? Nin̄-tél ədan̄ na:

Jə-nal̄ yá̰á̰ kógə̄ḿ yḛtə alé.

36Anī ni-tél ədadə́ na:

Ba ngɔlaā ní, kadə̄ deē ń aw̄ kə ngong naraá ní, kadə̄ kɔ́ɔ̄ un ō, kadə̄ deē ń aw̄ kə sángá ní, kɔ́ɔ̄ un ō, ba deē ń aw̄ kə kaskaraá aĺ ní, kadə̄ kɔ́ɔ̄ igə kūbə̄ yān mangəń. 37Tɔdɔ̄ ādə̄ m-ə́dásí, i gáŕ kadə̄ najə̄ ń ndangən̄ kem makətūbūú na: Tə́danən̄ dan ngé rāā majaĺ gə̄ tə́ ní reē udə gírí dɔḿ tə́. Tām̄ najə̄ gə̄ ń ndangən̄ ɔjə dɔḿ ní a reē yā kudə gíŕ kə́ rɔ̄ tə́.

38Nin̄-tél ədanən̄ na:

Kɔ́ɔ̄ɓē, á̰a̰, kaskar to laā i jōó kɔ̄ɔ́ ɓá. Anī tél ədadə́ na:

Asə beé.

Jeju ndɔ̄ȳ dɔ mbal̄ kāgə̄ olibə gə̄ tə́

(Á̰a̰ī Mat 26.36-46; Mark 14.32-42)

39Loo ń noō tə́ a, ni-teē aw̄ dɔ mbal̄ kāgə̄ olibə gə̄ tə́, tītə̄ ń a rāān̄ dejə ní, adə̄ ngé ndóō yá̰a̰ yān gə̄ unən̄ gōn. 40Dan ń ni-ugə̄ dɔ mbal̄ ní tə́ anī, ədadə́ na:

Ī-ndɔ̄yī tām̄ kadə̄ údiīneé dan yá̰a̰ gə̄ ń a nāān̄sí kadə̄ ə̄sōī tə́ ní alé.

41Gō tə́ anī, ndɔ́tə̄ rɔ̄də́ tə́ kɔ̄ɔ́ kə̄ sa̰y sḛ́ý, adə̄ dɔ dáńdə́ asə kadə̄ deē ənī kɔkərɔ anī əsō tū tə́, ba tétə̄ kejən nang tə́ a ndɔ̄ȳ əda na:

42Bɔbə́ḿ, ḭ̄ kɔ́ ndigə anī, úń kópə́ ń toō rɔ̄ḿ tə́ kɔ̄ɔ́, banī kadə̄ i gō kem ndigə yāḿ mā n kə yā rāā ní alé, ba kadə̄ i gō kem ndigə yāí ḭ̄ kɔ́ tá.

43Anī de kə́ dɔ rā̰ tə́ kógə̄ḿ teē hɔy kə̄ rɔ̄n tə́ adə̄n tɔ́gə. 44Gō tə́ ɓá anī, kemən rɔ̄n kə ngangāá ngá̰ý, ba ni-ndɔ̄ȳ kə ngangāá ngá̰ý tɔȳ kə́ kété gə̄ ō, tətōn teē a tə́sō kə́ kūbə̄rū mósə́ tə́ kok kok ō#22.44 K. 44 Kəlān 43-44 tə́ ní, gətóo kem makətūbə̄ yā Luk kə́rēý gə̄ kə́ kété tə́ kə ta Gərek..

45Ni-ḭḭ ta ndɔ̄ȳ tə́, ba reē rɔ̄ ngé ndóō yá̰a̰ yān gə̄ tə́. Dan ń ni-reē əngedə́ ní a to a ɓīīn̄ kə sōlōó kekəre, banī ədadə́ na:

46Ā ī-ɓīī i rí? Ḭ́ḭī dɔɔ́ ba ī-ndɔ̄yī kadə̄ údiīneé dan yá̰a̰ gə̄ ń a nāān̄sí kadə̄ ə̄sōī tə́ ní alé.

Əhɔn̄ Jeju

(Á̰a̰ī Mat 26.47-56; Mark 14.43-50; Ja̰a̰ 18.3-11)

47Dan ń ni-ɔr̄ najə̄ kə̄ tan tə́ ɓáý anī, a̰a̰ kósə de kə́ ngá̰ý gə̄ kə́ a reēn̄, ba nge kə́ kógə̄ḿ kə́ dan ngé kə́ kutə gidə i jōó gə̄ tə́ ń a ɓāŕnən̄ na i Judas ní, njə̄rā kété nodə́ tə́. Ni-aw̄ kə̄ rɔ̄ Jeju tə́ ngɔr yā ɓirə̄n kə̄ rɔ̄n tə́ dagə. 48Anī Jeju ədan na:

Judas ā ī-ɓir̄ Ngōn̄ Deé kə̄ rɔ̄í tə́ dagə n ā ī-rāā yā kəlaneé jī de gə̄ tə́ ní a?

49Dan ń ngé gə̄ ń gīrə̄n̄ gidə Jeju ní a̰a̰n̄ yá̰á̰ ń a rāā yā rāā yá̰á̰ ní anī, dəjenən̄ ədan̄ na: Kɔ́ɔ̄ɓē, jə-tə́gādə́ kə kaskaraá a?

50Anī deē kógə̄ḿ dandə́ tə́ əga nge kəla yā ngol ngé tun̄ yá̰a̰ gə̄, əga mbīn kə́ ko̰ó̰ gān̄g. 51Ba Jeju un najə̄ əda na:

Əya̰ī, asə beé!

Ba ɔdə mbī dəngam ní ɓáa, mbīn tél ndi ta naā tə́ gogə́. 52Gō tə́ anī, Jeju əda ngol gə̄ kə́ dɔ ngé tun̄ yá̰a̰ gə̄ tə́ ō, ngol ngé ngɔ̄m̄ kújə yā Kɔ́ɔ̄ɓē gə̄ ō, kum kɔɔ̄ gə̄ ō ń reēn̄ kəhɔn tə́ ní na:

I ba̰ý á ī-reēī kə kaskar gə̄, kə sálang kāgə̄ gə̄, tītə̄ kə́ ī-reēī i kəhɔ nge kum̄ róbə́ tə́ beé ní? 53Ngáńdáńg kə ndɔ̄ gə̄ mā i sesí kem kújə yā Kɔ́ɔ̄ɓē tə́, ba sḭḭ̄ ə́hɔmī alé. Banī i kum mbang yāsí n toó ō, i kum mbang yā tɔ́gə́ kə́ kum til tə́ gə̄ ō.

Piyer nējə̄, əda na n-ger̄ Jeju alé

(Á̰a̰ī Mat 26.57-58,69-75; Mark 14.53-54,66-72; Ja̰a̰ 18.12-18,25-27)

54Dan ń əhɔn̄ Jeju oy anī, aw̄n̄ seneé, ba adə̄n̄ udə kújú ɓē yā ngol ngé tun̄ yá̰a̰ gə̄ tə́. Piyer a un gōdə́, ba dandə́ tá gə̄lā sa̰y sḛ́ý. 55Nin̄-rāān̄ hor ta loo ndal̄ tə́ kem ndogó danaá rak, ba ndin̄ nang tə́ naā tə́ mbak, anī Piyer reē ndi dandə́ tə́. 56Anī nge kəla kə́ dəyá̰ kógə̄ḿ a̰a̰n gō horoó anī əndā kumən dɔn tə́ ba əda na: Dəngam ń toō i seneé ō.

57Ba Piyer nējə̄ kɔ̄ɔ́ əda na:

Dəyá̰, m̄-gerə̄n alé.

58Sḛ́ý gō tə́ a, deē kógə̄ḿ a̰a̰n anī əda na:

Ḭ̄ ní, i deē kógə̄ḿ kə́ sedə́ ō. Anī Piyer tél əda na:

Madə́, mā i deē kógə̄ḿ kə́ sedə́ alé.

59Asə kum mbang kógə̄ḿ ń noō gō tə́ ngɔr anī, nge kə́ rang əda yān kə ngangāá ngá̰ý na:

Kə́ rɔ̄kum tə́ ní, dəngam ń toō ní i seneé ō. Á̰a̰ī, ni i de kə́ Galile aĺ a?

60Piyer tél əda na:

Madə́, mā m̄-ger̄ kum najə̄ yāí ń ī-ra ā ɔ̄r̄ toó alé. Anī kə̄ tajī tə́ noō, dan ń Piyer ɔr̄ najə̄ kə̄ tan tə́ ɓáý anī, kə́ra kə̄njá nōō. 61Anī Kɔ́ɔ̄ɓē tél tūr̄ rɔ̄n ba əndā kumən dɔ Piyer tə́. Loo ń noō tə́ anī, əga kem Piyer dɔ najə̄ ń Kɔ́ɔ̄ɓē ədan tə́ na ɓōólaā nəkɔ́ ń toō, kété tá kadə̄ kə́ra kə̄njá nōō ní, na a nējə̄ gerə̄n nja mətá ní. 62Anī Piyer teē ndágá, ba nōō kə wur katāá ngá̰ý.

De gə̄ tájə̄n̄ Jeju ō, tə̄ndānən̄ ō

(Á̰a̰ī Mat 26.67-68; Mark 14.65)

63Ba de gə̄ ń a ngɔ̄mə̄n̄ Jeju ní tá a lurənən̄ ō, a tə̄ndānən̄ ō. 64Nin̄-do̰ō̰n̄ kumən kə ta kūbūú, ba dəjenən̄ najə̄, ədan̄ na:

I náā n əndaī ní? Ḭ̄ na i nge koō ta ní, ə́da dɔ deē ní tā!

65Ba ədan̄ yá̰á̰ kə́ rang kə́ tītə̄ ń noō gə̄ ngá̰ý dɔn tə́, tájə̄nən̄neé ō.

Aw̄n̄ kə Jeju no ngé sarya kə́ bo gə̄ tə́

(Á̰a̰ī Mat 26.59-66; Mark 14.55-64; Ja̰a̰ 18.19-24)

66Dan ń loo tīī ní a, kum kɔɔ̄ gə̄ yā ngán Israel gə̄ kánə̄n̄ naā, kə ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ ō, 67reēn̄ kə Jeju loo sarya yādə́ tə́, ba ədanən̄ na: Ré ḭ̄ i Kərist anī, ə́dájí wáńg. Ni-tél ədadə́ na:

Ré m-ə́dásí anī, ā ī-taāī kem alé, 68aké m̄-dəjesí najə̄ anī, ā ī-dalmī aĺ ō. 69Ba əla gír ɓōólaā ń toō tə́ ní, Ngōn̄ Deē a ndi dɔ jī ko̰ Nə́ɓā kə́ tɔ́gən i ngá̰ý tə́.

70Anī ɓōkə́n̄ tadə́ malang, dəjenən̄ na:

Ní adə̄, ḭ̄ i Ngōn̄ Nə́ɓā tā ḿ? Jeju tél tūr̄də́ əda na:

Sḭḭ̄ kɔ́ gə̄ ə́daī na mā na i ni.

71Loo ń noō tə́ anī, nin̄-tél ədan̄ na:

Yá̰á̰ kə́ yā kadə̄ jə-sāāīneé i najə̄ kə́ kum tə́ gə̄ ɓáý to̰ nəkɔ́ i rí? Jḭḭ kɔ́ gə̄ j-oōī najə̄ ń teē tan tə́ ní kə mbījí ɓá?

Currently Selected:

LUK 22: SARDC

Highlight

Copy