Uumama 3
3
Kufaatii Namaa
1Bineensa Rabbii Allaahan, Allaahan uume hunda keessaa bofti haxxee ture. Dubartittiidhaanis, “Dhuguma Allaahan, ‘Muka iddoo biqiltuu keessa jiru kam irraa iyyuu hin nyaatinaa’ isiniin jedheeraa?” jedhe.
2Dubartittiinis deebiftee bofa sanaan akkana jette; “Ija mukkeen iddoo biqiltuu keessa jiranii nyaachuu ni dandeenya; 3garuu Allaahan, ‘Muka walakkaa iddoo biqiltuu sanaa keessa jiru irraa ija hin nyaatinaa; ittis hin buʼinaa; yoo kanaa achii ni duutuu’ jedheera.”
4Bofichis deebisee dubartittiidhaan akkana jedhe; “Isin dhugumaan hin duutan. 5Allaahan akka yommuu isin ija mukichaa nyaattan iji keessan banamu, akka isin waan gaarii fi waan hamaa beekuudhaan akkuma Allaah taatan ni beekaatii.”
6Dubartittiinis yommuu akka iji mukichaa nyaataaf gaarii, kan ija namaatti tolu, ogummaa argachuufis akka nama gojomaasisu argitetti fudhattee nyaatte. Dhirsi ishees ishee wajjin ture; isaafis ni laatte; innis ni nyaate. 7Iji lachan isaaniis ni baname; qullaa hafuu isaaniis beekan; kanaafis baala harbuu hodhanii marxoo tolfatan.
8Akkuma aduun qabbanoofteenis namichii fi niitiin isaa utuu Rabbii Allaahan iddoo biqiltuu sana keessa deemuu sagalee isaa dhagaʼan; isaanis mukkeen iddoo biqiltuu keessa Rabbii Allaah, Allaah duraa dhokatan. 9Rabbii Allaahan, Allaahan garuu namicha waamee, “Ati eessa jirta?” jedheen.
10Namichis deebisee, “Ani utuu ati iddoo biqiltuu keessa deemtuu nan dhagaʼe; waan qullaa koo tureefis nan sodaadhe; nan dhokadhes” jedheen.
11Innis, “Eenyutu akka ati qullaa taate sitti hime? Muka ani ija isaa hin nyaatin jedhee si ajaje sana irraa nyaatte moo?” jedheen.
12Namichis, “Dubartittii ati akka isheen na wajjin jiraattuuf naa kennite sanatu ija mukichaa irraa naa kenne; anis nan nyaadhe” jedhe.
13Rabbii Allaahanis, Allaahan dubartittiidhaan, “Wanni ati hojjette kun maali?” jedhe.
Dubartittiin immoo, “Bofti na gowwoomsinaanan nyaadhe” jette.
14Kanaafuu Rabbii Allaahan, Allaahan bofichaan akkana jedhe; “Ati sababii waan kana gooteef,
“Horii hundumaa keessaa, bineensa hundumaa keessaas
kan abaaramte ni taata!
Bara jireenya keetii guutuu
garaa keetiin lafa irra loota;
biyyoo illee ni nyaatta.
15Siʼii fi dubartittii, sanyii keetii fi
sanyii ishee gidduutti
diinummaa nan uuma;
inni mataa kee ni tuma;
atis koomee isaa ni iddita.”
16Dubartittiidhaanis akkana jedhe;
“Yommuu ati mucaa deessutti ani dhiphina kee akka malee nan baayʼisa;
ciniinsuudhaanis ijoollee ni deessa.
Fedhiin kee garuma dhirsa keetii taʼa;
innis sirratti ol aantummaa qabaata.”
17Aadamiin immoo akkana jedhe; “Waan ati dubbii niitii keetii dhageessee muka ani ija isaa irraa ‘Hin nyaatin’ jedhe irraa nyaatteef,
“Lafti sababii keetiif kan abaaramte taati;
atis bara jireenya keetii guutuu
dadhabbiidhaan ishee irraa nyaatta.
18Isheen qoraattii fi sokorruu sitti biqilchiti;
atis biqiltuu lafaa ni nyaatta.
19Ati waan lafa irraa argamteef,
hamma lafatti deebitutti
dafqa fuula keetiitiin buddeena nyaatta;
waan biyyoo taateefis,
gara biyyootti deebita.”
20Aadamis sababii isheen haadha jiraatoo hundaa taateef niitii isaa “Haawaa” jedhee moggaase.
21Rabbii Allaahan, Allaahan Aadamii fi Hewaaniif gogaa irraa uffata hojjetee isaanitti uffise. 22Rabbii Allaahanis, Allaahan “Kunoo namni waan gaarii fi waan hamaa beekuudhaan nu keessaa akka isa tokkoo taʼeera. Ammas harka isaa hiixatee, ija muka jireenyaa ciratee nyaachuun, bara baraanis jiraachuun isaaf eeyyamamuu hin qabu” jedhe. 23Kanaafuu Rabbii Allaahan, Allaahan lafa biqiltuu Eeden keessaa namicha baasee akka inni lafuma irraa argame sana misoomsu godhe. 24Erga nama achii baasee booddee karaa muka jireenyaatti geessu eegsisuuf jedhee kiirubeelotaa fi goraadee bobaʼu kan asii fi achi gaggaragalu tokko Iddoo Biqiltuu Eedeniitiin gama baʼa biiftuu kaaʼe.
Currently Selected:
Uumama 3: KQTAB
Highlight
Share
Copy
Want to have your highlights saved across all your devices? Sign up or sign in
Biblica® Katabbiiwwan Qulqulluu, Turjumaana Ammayyaa Banamaa™
Mirgi seeraan eegama © 2024 Biblica, Inc.
Biblica® Open Oromo Contemporary Scriptures™
Copyright © 2024 by Biblica, Inc.
