Kəla rāā Ngámbang kəla gə̄ 1

Jeju Kərist ənī ndūn yā kadə̄ ngámbang kəla yān gə̄ Ndíĺ kə́ Táĺ

1Kó tár yāḿ Teopil,

kem makətūbə̄ yāḿ kə́ kété tə́ ní, m̄-ndang i yá̰a̰ gə̄ ń Jeju rāā ní ō, yá̰a̰ gə̄ ń ni ndóō de gə̄ ní ō. M-ə́lá gír i dɔ ngé kə́ ta kəga dɔ gə̄ tə́, 2bátə́ m-ūgəń dɔ ngé kə́ ndɔ̄ ń un aw̄n̄neé seneé dɔ rā̰ tə́ ní. Kété pá tá kadə̄ ni-aw̄ ní, ɔjə ngámbang kəla gə̄ ń ni-gə̄rādə́ ní yá̰a̰ gə̄ kə ta kūl̄ tɔ́gə yā *Ndíĺ kə́ Táĺ#1.2 Kété ... Ndíĺ kə́ Táĺ, kumən kə́ rang ń tūrə̄n̄ ní na i: Ni gə̄rā ngámbang kəla yān gə̄ i kə ta kūl̄ Ndíĺ kə́ Táĺ.. 3I nin̄ ngeé ń toō ɓáý to̰ n ni ɔjədə́ rɔ̄n ní ō, rāā yá̰a̰ gə̄ ngá̰ý gō koy ń ni-oy tə́ ní, ɔjəńdə́ kadə̄ na n-ndi kə kumneé ní ō, ni-rāā adə̄ a̰a̰nən̄ ō, ɔr̄ najə̄ kə́ dɔ *Ɓē ko̰o̰ yā Nə́ɓā tə́ sedə́ ō dɔ ndɔ̄ kutə sɔ́. 4Ndɔ̄ kógə̄ḿ tə́ dan ń ndi a əsa yá̰a̰ sedə́ anī, ədadə́ na kə lōōn̄ teē kɔ̄ɔ́ kem ɓē kə́ *Jerusalem tə́, ba kə ndin̄ kemeé kə ngóōn̄neé yá̰á̰ ń Bɔbə̄ Ngōn̄ ənī míndən yā kadə̄də́ ní, yá̰á̰ kə́ kadə̄ karī ń na n-ədadə́ najə̄n kété ní#1.4 K. 4: Á̰a̰ī Luk 24.49 . 5Tɔdɔ̄ Ja̰a̰ rāā de gə̄ *batém i kum man̄ tə́, banī na̰y ndɔ̄ i ngá̰ý aĺ kadə̄ a rāān̄sí batém kum *Ndíĺ kə́ Táĺ tə́.

Jeju aw̄ dɔ rā̰ tə́

6Nin̄-kánə̄n̄ naā rɔ̄n tə́ ba dəjenən̄ najə̄ ədan̄ na:

Kɔ́ɔ̄ɓē, i ngɔlaā ń toō n ā ī-tél yā rāā Ɓē ko̰o̰ gogə́ rang yā kadə̄ *Israel gə̄ ní a?

7Jeju tél tūr̄ ədadə́ na:

I Bɔbə́ḿ n i nge rāā kadə̄ yá̰a̰ gə̄ rāān̄ yá̰a̰ kə ɓāl̄ yādə́ gēé ō, kə kum mbang yādə́ gēé ō, kə ndū ko̰o̰ ɓē yānneé ō ní. Ger̄ ɓāl̄ gə̄, aké kum mbang gə̄ ń yá̰a̰ gə̄ a rāān̄neé yá̰á̰ ní ndetəsí alé. 8Banī ā ə́ngeī tɔ́gə́ kógə̄ḿ, dan ń *Ndíĺ kə́ Táĺ reē dɔsí tə́ ní. Loo ń noō tə́ ā ī-téliī de kə́ kum tə́ yāḿ gə̄, kem ɓē kə́ *Jerusalem tə́ ō, gō nang malang kə́ Jude tə́ ō, gō nang kə́ Samari tə́ ō, bátə́ ta ngóy dɔ nang tə́ ō.

9Dan ń ni-ədadə́ yá̰a̰ gə̄ ń toō oy anī, ḭḭ ta kumdə́ tə́ ɗil ta kaw̄ kə̄ dɔ rā̰ tə́. Gō tə́ anī kil̄ man̄ kógə̄ḿ reē utə̄ dɔn kɔ̄ɔ́ ɔgə̄də́ ka̰a̰n.

10Dan ń nin̄-nda a ənīn̄ kumdə́ kə̄ dɔɔ́ a a̰a̰n̄neé dɔ rā̰ ń Jeju a aw̄ kə̄ tū tə́ ní anī, de gə̄ jōó kə́ o̰ō̰n̄ kūbə̄ kə́ ndaa táĺ táĺ gə̄ teēn̄ kə̄ rɔ̄də́ tə́ hɔy, 11ba dəjen̄də́ najə̄ ədan̄ na:

Sḭḭ̄ de kə́ Galile gə̄ ń toō, ī-ra ā á̰a̰ī loo kə̄ dɔ rā̰ tə́ i tām̄ rí tə́? Jeju nəkɔ́ kə́ kógə̄ḿ beē ń ɔr̄nən̄ kɔ̄ɔ́ rɔ̄sí tə́ ta kaw̄ kə̄ dɔ rā̰ tə́ ní, a tél yā reē i tītə̄ nəkɔ́ ń á̰a̰niī loo kaw̄ tə́ kə̄ dɔɔ́ toō.

Nge kun gotə Judas

12Loo ń noō tə́ ngámbang kəla gə̄ ḭḭn̄ dɔ ngán mbal̄ ń a ɓārə́n̄ na i ngōn̄ mbal̄ *kāgə̄ olibə gə̄ ní tə́ ba tél aw̄n̄ gogə́ *Jerusalem. Kḭḭ dɔ mbal̄ ní tə́ kaw̄ kə̄ kem ɓēé asə kilometər kógə̄ḿ beē ngóy. 13Dan ń ugə̄n̄ Jerusalem anī, aw̄n̄ kem kújə́ kə́ dɔɔ́ ń a ndin̄ tū tə́ dejə ní tə́. Ngámbang kəla gə̄ ń əngen̄ naā kem kújə́ kə́ dɔɔ́ ngeé ń noō tə́ ní i Piyer ō, Ja̰a̰ ō, Jakə ō, Andəre ō, Pilipə ō, Toma ō, Bartelemi ō, Matiye ō, Jakə kə́ ngōn̄ Alpe ō, Simo̰ nge rɔ̄ɔ̄ dɔ ɓē tə́ ō, Jud kə́ ngōn̄ Jakə ō. 14Nin̄ malang ní kemdə́ i kógə̄ḿ ō, əhɔn̄ rɔ̄də́ tɔgə loo ndɔ̄ȳ tə́ kə dɔ ndɔ̄ gə̄ ō. Nin̄-ndin̄ i kum naā tə́ kə dəyá̰ gēé ō, kə Mari kó̰o̰ Jeju ō, ngákó̰o̰ Jeju gə̄ ō.

15Kem ndɔ̄ gə̄ ngeé ń noō tə́ ní, ngé taā kem gə̄ kánə̄n̄ naā asən̄ deē ɓú kə kutə jōó, anī Piyer ḭḭ ra dandə́ tə́ ba ədadə́ na:

16Ngákó̰ó̰ḿ gə̄, i gáŕ kadə̄ yá̰á̰ ń *Ndíĺ kə́ Táĺ əda najə̄n kété á ndangən̄ ní reē udə gírí. Judas ń tél nge kɔr no ngé kəhɔ Jeju gə̄ ní, Ndíĺ kə́ Táĺ əndā najə̄ yān ta Dabid tə́ adə̄ ɔr̄ kété kɔ̄ɔ́ adə̄ ndangən̄. 17Ni i de kə́ kem ɓūtə̄ yājí tə́ ō, kəla ń jə-rāāī ní ənge núsən yān kə́ sɔɔ̄ dɔn ō.

18Nar ń adə̄nən̄ gíŕ yá̰a̰ kə́ majaĺ ń ni-rāā tə́ ní, deē ngeé ń toō aw̄ mangəń ndɔr̄ tām̄ yān tə́. Ni-əsō ur dɔn nang tə́ kem ndɔr̄ ní tə́ ō, rɔ̄n njar naā tə́ danaá adə̄ tiīn kəjā ndágá malang ō. 19De kə́ *Jerusalem gə̄ malang gerə̄n̄ gō yá̰á̰ ń noō ń rāā yá̰á̰ ní, adə̄ əndān̄ rī loo ní kə ta ɓē yādə́ na i Hakeldama, kumən na i ndɔr̄ mósə#1.19 K. 18, 19: Á̰a̰ī Mat 27.3-8 .

20Tá yá̰á̰ ń ndangən̄ kem makətūbə̄ Pā gə̄ tə́ ní n toó:

Kadə̄ loo yān kə tél ndəbā ɓē ō,

kadə̄ deē kógə̄ḿ kə ndi tū tə́ aĺ ō#1.20 K. 20: Á̰a̰ī Pā 69.26; Pā 109.8.

Tá ndangən̄ ɓáý to̰ na:

Kadə̄ kə i de kə́ rang n kə un ta kəla yān ō.

21De kə́rēý gə̄ njə̄rān̄ sejí dan ń Jeju a ɔrəń nojí tə́ ní. 22Nin̄-əlan̄ gír i dan ń Ja̰a̰ rāań Jeju *batém tə́ ní mbóńg ndɔ̄ ń unən̄neé Jeju ta kaw̄ kə̄ dɔ rā̰ tə́ ní. Adə̄ majə kadə̄ deē kógə̄ḿ dandə́ tə́ ərōjí tə́, kadə̄ ni i de kə́ kum tə́ sejí dɔ najə̄ koyn tə́ ō ndólə̄n tə́ ō.

23Reēn̄ kə de gə̄ jōó, adə̄ i Jəjep ń a ɓāŕnən̄ na i Barsabas ba rī tɔ̄yn na i de kə́ súmūú ní ō, Matiyas ō. 24Gō tə́ anī nin̄ malang ndɔ̄ȳn̄ Nə́ɓā ədan̄ na:

Kɔ́ɔ̄ɓē, ḭ̄ ń i nge ger̄ kem de gə̄ malang ní, ɔ́jə́jí deē ń ī-gə̄rān dan de kə́ jōó gə̄ ń toō tə́ 25kadə̄ un gotə Judas kem kəla ngōmbang kəla ń ni-əya̰ kɔ̄ɔ́ ba aw̄ń loo yān tə́ ní.

26Nin̄-túgə̄n̄ wə̄lā yā gə̄rań deē kógə̄ḿ dan de kə́ jōó gə̄ ní tə́. Anī wə̄lā əhɔ i Matiyas, adə̄ ənīnən̄ tā ngámbang kəla gə̄ ń nin̄ i deē kutə gidə i kógə̄ḿ ní tə́.

Currently Selected:

Kəla rāā Ngámbang kəla gə̄ 1: BS

Highlight

Copy