Kəla rāā Ngámbang kəla gə̄ 11

Piyer ɔjə ngé kán̄ naā gə̄ kə́ Jerusalem gíŕ yá̰á̰ ń rāā yá̰á̰ ní.

1Ngámbang kəla gə̄ ō, ngákó̰ó̰jí gə̄ #11.1 Ngákó̰o̰ gə̄ ní i ngé taā kem Jeju Kərist gə̄, háĺdə́ to tītə̄ yā Jeju Kərist beé. ō ń ndin̄ gō nang kə́ Jude tə́ ní, oōn̄ kadə̄ de gə̄ ń nin̄ i *Jipə aĺ gə̄ ní gə̄gē na ndigən̄ najə̄ yā Nə́ɓā ō. 2Ba dan ń Piyer tél aw̄ ugə̄ gogə́ *Jerusalem anī *Jipə gə̄ kɔ̄lə̄n̄ seneé, 3ədanən̄ na ni na udə kújə yā de gə̄ kə́ nin̄ i *Jipə aĺ gə̄ tə́ ō, na əsa yá̰a̰ sedə́ ō. 4Anī Piyer ɔr̄də́ gíŕ yá̰a̰ malang ń rāā yá̰á̰ ní kə ta njaá, ədadə́ na:

5Dan ń m̄-ndi m-ā m̄-ndɔ̄ȳ Nə́ɓā kem ɓē kə́ Jope tə́ anī, m-á̰á̰ yá̰á̰ kógə̄ḿ kə́ to tītə̄ kūbə̄ kə́ bo kə́ əhɔn̄ ta kílən kə́ sɔ́ gə̄ beé ḭḭ dɔ rā̰ tə́ reē bátə́ ugə̄ rɔ̄ḿ tə́ ngɔr. 6M-ə̄ndā ma̰ȳ kem yá̰á̰ ní anī m-á̰a̰ dā̰ kə́ nja sɔ́ gə̄ ō, dā̰ kə́ bembeé gə̄ ō, kur̄ kə́ kagə nang tə́ gə̄ ō, yel̄ kə́ dɔɔ́ gə̄ ō. 7Loo ń noō tə́ m-ōō ndū deē kógə̄ḿ ədam̄ na: Piyer ḭ́ḭ dɔɔ́ ī-tɔ̄l̄ ə́sa! 8Banī m̄-tél m-ə́dan na: Kɔ́ɔ̄ɓē, m-ɔ́də alé, tɔdɔ̄ m̄-ndi jóo toó yá̰á̰ kə́ ɔgə̄n̄ kəsa, aláa yá̰á̰ kə́ yḛr ɔdə taḿ aĺ ɓáý. 9Ba ndū deē ní ɓār̄ dɔ rā̰ tə́ ɓáý əda na: Yá̰á̰ ń Nə́ɓā əda na i yá̰á̰ kə́ *unjə̄ njáý njáý ní, ī-lōō rāān yá̰á̰ kə́ yḛr tə́. 10Yá̰á̰ ní rāā yá̰a̰ beé nja mətá ba gō tə́ anī ɔrən̄ yá̰á̰ ní malang aw̄n̄neé dɔ rā̰ tə́ kɔ̄ɔ́. 11Kum mbang nəkɔ́ ń noō tə́ bang ɓáa de gə̄ mətá reē ran̄ ta kújə́ ń m̄-ndi kemeé tə́ ní. Nin̄-ḭḭn̄ i Sejare ō, i deē kógə̄ḿ n əladə́ gōḿ tə́ ní ō. 12*Ndíĺ kə́ Táĺ ədam̄ na kə m-āw̄ sedə́ kanjə̄ kadə̄ kemḿ tɔ́sə̄m̄. Ngákó̰ó̰jí kə́ mehḛ́ gə̄ ń m̄-reē sedə́ á ran̄ toó dānə̄mə̄n̄ Sejare ō, j-udə kem kújə yā Kɔrney tə́ i malangjí gə̄ ō. 13Kɔrney ɔjəjí gotə ka̰a̰ ń ni-a̰a̰ *de kə́ dɔ rā̰ tə́ ní. Deē ní reē ra kem kújə yān tə́ ba ədan na kə əla de gə̄ Jope gō Simo̰ ń rī tɔ̄yn na i Piyer ní tə́ kadə̄ reē. 14Ni a ədaī yá̰á̰ kə́ a ajiī īkɔ́ ō, de kə́ kem kújə yāí tə́ gə̄ malang ō. 15M-ə́lá gír kɔr̄ najə̄ ɓáý anī *Ndíĺ kə́ Táĺ reē dɔdə́ tə́ tītə̄ ń reēń dɔjí tə́ ta kəla gíŕ tə́ ní. 16Loo ń noō tə́ əga kemḿ dɔ najə̄ ń Kɔ́ɔ̄ɓē əda kété ní tə́, əda na: Ja̰a̰ rāā de gə̄ *batém i kə maná, banī sḭḭ̄ a rāān̄sí batém i kə *Ndíĺ kə́ Tálá. 17Ré Nə́ɓā adə̄də́ nin̄ kadə̄ karī kə́ kógə̄ḿ beē nəkɔ́ ń ni-adə̄jí jḭḭ̄ tām̄ taā kə́ jə-taāī kem Kɔ́ɔ̄ɓē Jeju *Kərist tə́ ní anī, mā i náā á m-ásə kɔgə̄ Nə́ɓā rāā yá̰á̰ ní?

18Dan ń nin̄-oōn̄ beé anī asədə́ kɔr̄ najə̄, ba ɔsən̄ gɔn Nə́ɓā ədan̄ na:

Yá̰á̰ ní i tītə̄ ń toō rɔ̄kum tā, de gə̄ ń i *Jipə aĺ gə̄ ní Nə́ɓā adə̄də́ ta róbə tūr̄ háĺdə́, yā kadə̄ nin̄-əngen̄neé ndi kə kumuú kə́ rɔ̄kum.

Egəlijə kə́ A̰tiyos

19De gə̄ ń rāān̄ kumdə́ ndoō tə́ dan ń tɔ̄lə̄n̄neé Etiyen tə́ ní, tə̄ndān̄ naā tḭ̄ḭ̄n̄ kə̄ loo gə̄ tə́. Ngé kə́rēý gə̄ dandə́ tə́ aw̄n̄ bátə́ ugə̄n̄ dɔ nang kə́ Penisi tə́ ō, kə́ Sipər tə́ ō, kə́ A̰tiyos tə́ ō. Nin̄-ɔjən̄ de gə̄ najə̄ yā Nə́ɓā, banī ɔjən̄ i *Jipə gə̄ ngóy. 20Banī ngé kə́rēý gə̄ kə́ dandə́ tə́ ń nin̄ i de kə́ Sipər tə́ gə̄ ō, kə́ Siren tə́ gə̄ ō ní, dan ń nin̄-ugə̄n̄ A̰tiyos anī, ɔjən̄ Gərek gə̄ Najə̄ kə́ Majə yā Kɔ́ɔ̄ɓē Jeju. 21Tɔ́gə yā Kɔ́ɔ̄ɓē i naā tə́ sedə́, adə̄ de gə̄ ngá̰ý taān̄ kem ō, tūrə̄n̄ rɔ̄də́ kə̄ rɔ̄ Kɔ́ɔ̄ɓē tə́ ō.

22Najə̄ ní əsō mbī ngé kán̄ naā gə̄ kə́ *Jerusalem tə́, adə̄ əlan̄ Barnabas A̰tiyos. 23Dan ń ni-ɔtə̄ á a̰a̰ majə ń Nə́ɓā rāā ní anī, rɔ̄n nelə̄n ngá̰ý ō, ra sedə́ malang ta kəhɔ gō Kɔ́ɔ̄ɓē kadə̄ ngan̄g ō. 24Tɔdɔ̄ Barnabas i de kə́ majə, kə́ *Ndíĺ kə́ Táĺ rosə kemən ō, ni-taā kem mámák ō. Adə̄ kósə de gə̄ ngá̰ý ndigən̄ najə̄ yā Kɔ́ɔ̄ɓē.

25Gō tə́ anī Barnabas aw̄ Tarsə sāā Sol tə́. 26Dan ń əngen anī reē seneé A̰tiyos. Nin̄ jōó mbak rāān̄ ɓāl̄ kógə̄ḿ kə taá dan de gə̄ kə́ kem Egəlijə kə́ A̰tiyos tə́ ō, ndóōn̄ kósə de kə́ ngá̰ý gə̄ yá̰a̰ ō. De gə̄ əlan̄ gír ɓāŕ ngé ndóō yá̰a̰ yā Jeju gə̄ na i Kəretiyḛ gə̄#11.26 Kəretiyḛ gə̄, kumən na i de kə́ tītə̄ Kərist gə̄. i kem ɓē kə́ A̰tiyos tə́.

27Kem ndɔ̄ gə̄ ngeé ń noō tə́ ní *ngé koō ta gə̄ ḭḭn̄ *Jerusalem aw̄n̄ A̰tiyos. 28Deē kógə̄ḿ kə́ dandə́ tə́ ń rīn na i Agabus ní *Ndíĺ kə́ Táĺ ɔjən kadə̄ ɓō kə́ ngá̰ý a əsō dɔ nang tə́ malang, adə̄ ni-ḭḭ dɔɔ́ əda de gə̄. Ɓō ní əsō rɔ̄kum ɓāl̄ ko̰o̰ ɓē yā Kəlodə tə́. 29Adə̄ ngé ndóō yá̰a̰ gə̄ ndigən kadə̄ nin̄ kógə̄ḿ kógə̄ḿ ní kə n-adə̄n̄ yá̰á̰ ń tɔ́gə́də́ asə ní, yā kəlań kadə̄ ngákó̰ó̰də́ gə̄ ń ndin̄ gō nang kə́ Jude tə́ ní yā rāań sedə́. 30I yá̰á̰ ń noō n nin̄-rāān̄ ní, adə̄ əlan̄ Barnabas ō Sol ō kə yá̰a̰ kadə̄ karī gə̄ ní kadə̄ aw̄n̄neé adə̄n̄ *kum kɔɔ̄ gə̄ kə́ gō nang kə́ Jude tə́.

Currently Selected:

Kəla rāā Ngámbang kəla gə̄ 11: BS

Highlight

Copy