Kəla rāā Ngámbang kəla gə̄ 18

Pol aw̄ Korḛntə

1Gō tə́ anī Pol ḭḭ Aten aw̄ Korḛntə. 2Ni-ənge *Jipə kógə̄ḿ kə́ ojənən̄ dɔ nang kə́ Po̰o̰ tə́ kem ɓē ní tə́, rīn na i Akilas. *Jipə ní ḭḭ dɔ nang kə́ Itali tə́ reē ugə̄ i ngɔr ɓáý nin̄ kə nə̄yá̰n Pərisil, tɔdɔ̄ Kəlodə nge ko̰o̰ ɓē adə̄ ndūn kadə̄ *Jipə gə̄ malang teēn̄ kɔ̄ɔ́ kem ɓē kə́ Rom tə́. Pol aw̄ əngedə́, adə̄ ndi sedə́ ō, rāā kəla sedə́ ō, 3tām̄ kəla yān i kə́ tītə̄ yādə́, i kəla kəjō kūbə̄ tandā gə̄. 4Kə ndɔ̄ *sabat gə̄ malang ní, Pol a ɔr̄ i najə̄ kem kújə́ kán̄ naā tə́. Ni sāā i kɔsə ngóy *Jipə gə̄ ō Gərek gə̄ ō.

5Banī loo ń Silas nin̄ kə Timote ḭḭn̄ Masedəwan reē ugə̄n̄ anī, Pol rāā yá̰á̰ kə́ rang to̰ alé, ba əndā rɔ̄n i ta kəla kɔjə najə̄ tə́ ngóy. Ni ɔjə *Jipə gə̄ kadə̄ Jeju i *Kərist rɔ̄kum. 6Banī *Jipə gə̄ mbātə́n̄ najə̄ yān ō, tájə̄nən̄ ō. Loo ń noō tə́ Pol *yéȳ kūbə̄ yān yakə yakə ba ədadə́ na:

Ādə̄ mósə́sí tél əsō dɔsí sḭḭ̄ kɔ́ gə̄ tə́! Najə̄n i dɔḿ tə́ alé. Əla gír ngɔr ń toō tə́ ní m-ā m-āw̄ kə̄ rɔ̄ ngé gə̄ ń nin̄ i *Jipə aĺ gə̄ ní tə́. 7Ni ɔtə loo ń noō tə́ ba aw̄ ɓē deē kógə̄ḿ kə́ rīn na i Titus Justus tə́. Deē ní i de kə́ nge rɔȳ Nə́ɓā. Kújə yān ra i kadə kújə́ kán̄ naā tə́ ngɔr. 8Ngār kə́ dɔ kújə́ kán̄ naā tə́ ń rīn na i Kərispus ní, taā kem Kɔ́ɔ̄ɓē naā tə́ kə ngéén gə̄ malang. Korḛntə gə̄ ngá̰ý ń oōn̄ najə̄ yā Pol ní taān̄ kem ō, rāān̄də́ *batém ō.

9Kɔ́ɔ̄ɓē ndɔ̄bə̄ Pol ndɔ̄ɔ́ ndɔ̄ kógə̄ḿ tə́ ba ədan na:

Ī-lōō ɓōĺ, ɔ̄r̄ najə̄ ba ī-lōō ndi kə taí kə́ mbóó, 10tɔdɔ̄ mā i seí. De kə́ asə kəhɔī yā rāāī yá̰á̰ kə́ majaĺ gətóo, tɔdɔ̄ deē yāḿ gə̄ i ngá̰ý kem ɓē ń toō tə́. 11Pol ndi Korḛntə asə ɓāl̄ kógə̄ḿ kə nāā mehḛ́ ndóoń de gə̄ najə̄ yā Nə́ɓā.

12Dan ń Galiyo̰ a o̰o̰ń ɓē kə́ Akayi ní, *Jipə gə̄ malang əndān̄ rɔ̄də́ naā tə́ ba oōn̄ kum Pol alé. Nin̄-aw̄n̄ seneé loo sarya tə́, 13ba ədan̄ na:

Deē ń toō a sāā i kadə̄ de gə̄ rɔȳn̄ Nə́ɓā kə gō loo rɔȳ kə́ *ndū najə̄ ɔgə̄. 14Pol un najə̄ kə̄ tan tə́ yā kɔr̄ ɓáý anī Galiyo̰ əda *Jipə gə̄ na:

Sḭḭ̄ Jipə gə̄, ré i yá̰á̰ kə́rēý kə́ kə gō róbəneé alé, aláa i yá̰á̰ kə́ majaĺ ngá̰ý kə́rēý n de gə̄ rāān̄ anī, m-ā m-ōō najə̄ yāsí kə gōó. 15Ba dan ń i nējə̄ naā najə̄ gə̄ kə́ dɔ kum najə̄ gə̄ tə́ ō, kə́ dɔ rī gə̄ tə́ ō, dɔ ndū najə̄ yāsí gə̄ tə́ ō ní, nge ń noō i najə̄ yāsí sḭḭ̄ kɔ́ gə̄. Mā m̄-gḛy gān̄g sarya dɔ yá̰á̰ kə́ tītə̄ ń noō gə̄ tə́ alé. 16Ba ni-tə̄ɓādə́ loo sarya tə́ kɔ̄ɔ́. 17Loo ń noō tə́ nin̄ malang əhɔn̄ Sosten ngār kə́ dɔ *kújə kán̄ naā tə́ ba udən̄ dɔn tə́ tə̄ndānən̄ kə̄ ta kújə́ kán̄ naā tə́ noō. Banī usə Galiyo̰ sḛ́ý aĺ bátə́.

Pol tél aw̄ gogə́ A̰tiyos

18Pol ndi Korḛntə dan oy tām̄ ɓáý. Gō tə́ anī ni-əya̰ ngákó̰o̰n gə̄ ba al̄ kem to bo kógə̄ḿ tə́ yā kaw̄ kə̄ Siri naā tə́ kə Pərisil ō Akilas ō. Ni dəsā dɔn kɔ̄ɔ́ kem ɓē kə́ Sankəre tə́, tɔdɔ̄ ni-ənī míndən kété#18.18 Ənī míndən kété: Á̰a̰ī Tə́da 6.5-18. 19Nin̄-ugə̄n̄ Epejə anī Pol əya̰ madə̄ mbān gə̄. Nəkɔ́ udə kújə́ kán̄ naā yā *Jipə gə̄ tə́ ba ɔr̄ najə̄ sedə́. 20Nin̄-dəjenən̄ kadə̄ ndi sedə́ dan oy tām̄ ɓáý, anī ni-ɔdə alé. 21Ba dan ń a rāā yā kəya̰də́ anī ədadə́ na:

Ré Nə́ɓā ndigə anī m-ā m̄-tél yā reē loosí ɓáý. Ni un to bo Epejə. 22Ba dan ń jə̄ngā Sejare anī, aw̄ *Jerusalem rāā Egəlijə lápə́ya tə́. Gō tə́ anī ni-aw̄ A̰tiyos. 23Ni-ndi noó sḛ́ý, ba gō tə́ anī tél dɔ tə́ aw̄ gogə́. Ni-njə̄rā kə gō ɓē gə̄ kə́ dɔ nang kə́ Galasi tə́ ō, kə́ Pəriji tə́ ō. Ni mbūsə̄ ngé ndóō yá̰a̰ gə̄ malang kə najá adə̄ ran̄ ngan̄g dɔ taā kem yādə́ tə́.

Apolos aw̄ Epejə ō, Korḛntə ō

24*Jipə kógə̄ḿ kə́ rīn na i Apolos reē ugə̄ kem ɓē kə́ Epejə tə́. Ojənən̄ i Aleksandəri. I de kə́ nge gōsə̄ najə̄ ō, i de kə́ ger̄ najə̄ gə̄ kə́ kem makətūbə̄ yā Nə́ɓā tə́ ngá̰ý ō. 25Ɔjənən̄ gō róbə yā Kɔ́ɔ̄ɓē kété, adə̄ ni-tḭ̄ḭ̄ rɔ̄n ɔjəń de gə̄ najə̄ yā Nə́ɓā ō, ni-ndóō de gə̄ yá̰á̰ kə́ dɔ Jeju tə́ i kə gōó ō. 26Ni udə kə̄ rɔ̄ najə̄ tə́ kem kújə́ kán̄ naā tə́ a ɔr̄ kanjə̄ ɓōĺ. Dan ń Pərisil nin̄ kə Akilas oōn̄ najə̄ kɔrə̄n anī, əhɔnən̄ kə̄ rɔ̄də́ tə́ ba ɔjənən̄ róbə yā Nə́ɓā kə gōó ngá̰ý tɔȳ kə́ kété ɓáý to̰. 27Ni gḛy kaw̄ gō nang kə́ Akayi tə́, anī ngákó̰o̰n gə̄ ndigən̄ gōn tə́ ō, ndangən̄ makətūbə̄ adə̄n̄ ngé ndóō yá̰a̰ gə̄ dəjen̄neédə́ kadə̄ əhɔnən̄ kə̄ rɔ̄də́ tə́ majə ō. Dan ń ni-ugə̄ anī, rāā majə ngá̰ý kə ngé taā kem gēé kə yá̰á̰ ń Nə́ɓā adə̄n karī ní. 28Tɔdɔ̄ ni-əhɔ *Jipə gə̄ kə najá ndágə looó ta kum kósə de gə̄ tə́ malang: Ni ɔjədə́ kə makətūbə̄ yā Nə́ɓāá jin̄ tə́ kadə̄ i Jeju n i *Kərist ní.

Currently Selected:

Kəla rāā Ngámbang kəla gə̄ 18: BS

Highlight

Copy