Kəla rāā Ngámbang kəla gə̄ 20

Pol aw̄ dɔ nang kə́ Masedəwan tə́ ō, kə́ Gəresə tə́ ō

1Dan ń gír najə̄ gān̄g anī, Pol ɓāŕ ngé taā kem gə̄ ba əla go̰ kemdə́ tə́. Gō tə́ anī ni-rāādə́ lápə́ya a̰ȳń ta njan ba ɔr̄ dɔɔ́ ta kaw̄ kə̄ Masedəwan. 2Ni ənda gō nang ń noō gān̄g ba ɔjə ngákó̰o̰n kə́ tū tə́ gə̄ najə̄ yā Nə́ɓā ngá̰ý əlań go̰ kemdə́ tə́ dɔɔ́ dɔɔ́. Ni-aw̄ bátə́ ugə̄ dɔ nang kə́ Gəresə tə́, 3ba ndi noó nāā mətá. Dan ń ni-sāā kun to bo yā kaw̄ dɔ nang kə́ Siri tə́ anī, oō kadə̄ *Jipə gə̄ oōn̄ naā dɔn tə́. Loo ń noō tə́ ni-gḛy tél teē gogə́ dɔ nang kə́ Masedəwan tə́. 4Madə̄ mbān gə̄ i Sopater ngōn̄ Pirus kə́ Bere ō, Aristark nin̄ kə Sekundus kə́ Tesalonik ō, Gayus kə́ Derbə ō, Timote ō, Tisik nin̄ kə Təropim ń nin̄ i de kə́ Aji tə́ gə̄ ní ō. 5Nin̄-əsōn̄ róbó kété ba aw̄ ngóōn̄jí Təroas. 6Jḭḭ kɔ́ gə̄ tá teē gidə gō ndɔ̄ yā mápá kə́ kanjə̄ *kaa mápá tə́ anī, jḭḭ ɓē kə́ Pilipə tə́ j-utə̄ gōdə́ kə to boó, j-aw̄ j-əngedə́ Təroas kə ndɔ̄ kə́ nge ko̰ mí, ba jə-dəba noó jə-rāā ndɔ̄ sīrí.

Pol i kem ɓē kə́ Təroas tə́

7Jə-kán̄ naā kə ndɔ̄ dəmásá#20.7 Dəmásá: Á̰a̰ī tū «Kum Najə̄ kə́ Ngón̄g Ngón̄g gə̄» tə́. ta loo tíbə́ tə́ yā tetə mápa#20.7 Tetə mápa: Á̰a̰ī 1Ko 11.17-34 anī, Pol ɔr̄ najə̄ kə ngé kán̄ naā gēé. Dan ń teē bírí anī ni a ɔr̄ i dɔɔ́ yā kaw̄ ní, ni-ɔr̄ najə̄ sedə́ bátə́ dan loo tə́. 8Hor lámba gə̄ i ngá̰ý kem kújə́ kə́ dɔɔ́ ń jə-kán̄ naā tū tə́ ní. 9Balsáá kógə̄ḿ kə́ rīn na i Etis ndi i ta ko̰rō̰ kújə́ kə́ ra kə wōyōó tə́. Dan ń Pol ɔr̄ najə̄ dan gān̄g aĺ ní, ɓīī ənda gō balsáá ní kɔ̄ɔ́. Ɓīī ní unən adə̄ ni-teē kum ko̰rō̰ kújə́ kə́ dɔɔ́ kə́ nge ko̰ mətá tə́ əsō nang tə́. Unnən̄ anī ni i kə oy kɔ̄ɔ́. 10Pol risə nang tə́ láẃ aw̄ rɔ̄n tə́, unən kadən tə́ ba əda na:

Ī-sōlī alé, na to i kə kumneé!

11Ni-tél aw̄ dɔɔ́ gogə́, tetə mápa əsa, ba ɔr̄ najə̄ ɓáý to̰ bátə́ loo tīī tá ḭḭ mbā. 12Télən̄ kə balsáá ní aw̄n̄ seneé gogə́ i kə kumneé ō, kem de gə̄ malang tetə kə̄ nang tə́ ō.

Kḭḭjí Təroas ta kaw̄ kə̄ Milet

13Jḭḭ j-aw̄ kété kə too boó ta kaw̄ kə̄ Asos, loo ń kadə̄ j-un Pol tū tə́ ní tə́. Ni ɔjə loon i tītə̄ ń noō, tɔdɔ̄ gḛy kaw̄ tū tə́ i kə njaneé. 14Dan ń ni-reē əngejí Asos anī, j-unən kem to boó ba j-aw̄ Mitilen. 15Teē kə ndɔ̄ kə́ noō anī j-ḭḭ noó kə to boó j-aw̄ j-ugə̄ gidə dor̄ kə́ Siyos tə́. Teē kə ndɔ̄ kə́ nge ko̰ jōó anī j-aw̄ j-ugə̄ Samos. Ba teē kə ndɔ̄ kə́ rangaá anī j-ugə̄ Milet. 16Tɔdɔ̄ Pol gḛy mān̄ Epejə kanjə̄ dəba, yā kadə̄ n-ɔrəń bā̰ā̰ gō nang kə́ Aji tə́ alé. Ni sōl̄ kaw̄ láẃ ngá̰ý i yā kadə̄ ré n-asə anī kadə̄ ni i kem ɓē kə́ *Jerusalem tə́ ndɔ̄ nāā *Pa̰təkotə tə́.

Pol ɔr̄ najə̄ kə kum kɔɔ̄ gə̄ kə́ Epejə

17Pol ndi Milet ba əla kəla gō *kum kɔɔ̄ gə̄ kə́ kem Egəlijə kə́ Epejə tə́ kadə̄ reēn̄. 18Dan ń nin̄-reē ugə̄n̄ rɔ̄n tə́ anī ədadə́ na:

Əla gír ndɔ̄ ń m-ə̄ndań njaḿ dɔ nang kə́ Aji tə́ ní, hálə́ḿ ń m̄-ndiń sesí ní sḭḭ̄ ī-gerī. 19m̄-rāā kəla yā Kɔ́ɔ̄ɓē i kə dɔ sɔlɔ́ ō, i kə man̄ noó kumḿ tə́ ō, i dan yá̰á̰ kə́ tōr̄ gə̄ tə́ ō, sɔɔ̄ń *Jipə gə̄ ń oōn̄ naā dɔḿ tə́ ní. 20Sḭḭ̄ ī-gerī kadə̄ mā m̄-ɓɔ̄ɔ̄sí dɔ yá̰á̰ kógə̄ḿ kə́ kadə̄ rāā majə sesí alé: M-ə́dásí yá̰a̰ malang ō, m-ɔ́jə́sí yá̰a̰ malang ō, i ndágə loo gə̄ tə́ ō, i kem kújə gə̄ tə́ ō. 21Najə̄ kə́ kum tə́ yāḿ ɓāŕ i *Jipə gə̄ ō Gərek gə̄ ō kadə̄ tūrə̄n̄ rɔ̄də́ kə̄ rɔ̄ Nə́ɓā tə́ ō, kadə̄ taān̄ kem Kɔ́ɔ̄ɓē yājí Jeju ō. 22Ba ń toō ɓáa m-ā m-āw̄ i kə̄ *Jerusalem, tītə̄ ń *Ndíĺ kə́ Táĺ ɔsəń seḿ ta kaw̄ ní. Ba m̄-ger̄ yá̰á̰ ń to a ngóōm̄ nú ní alé. 23Yá̰á̰ ń m̄-ger̄ ní n toó ngóy: Ndíĺ kə́ Táĺ tām̄ kə gō ɓē gə̄ kadə̄ dəngáy ō, wur kɔl ō, ton̄ a ngóōmə̄n̄ noó. 24Banī mā m-á̰a̰ kadə̄ ndiḿ kə kumḿ i yá̰á̰ kógə̄ḿ ta kumḿ tə́ alé. Yá̰á̰ ń m̄-sāā ní i kadə̄ m-ā̰ȳ ngɔ̄də̄ yāḿ m̄-tɔ̄l̄ ta kə gōó majə ō, kəla ń Kɔ́ɔ̄ɓē Jeju adə̄m̄ ní m̄-rāā m̄-tɔ̄l̄ ta kə gōó majə ō: I kadə̄ m-ə́da najə̄ kə́ kum tə́ yā Najə̄ kə́ Majə kə́ dɔ rajə ń Nə́ɓā rajə de gə̄ tə́ ní.

25Ngɔlaā ní m̄-ger̄ majə kadə̄ sḭḭ̄ malang ń m̄-njə̄rā dansí tə́ m-ɔ́jəń najə̄ kə́ dɔ *Ɓē ko̰o̰ yā Nə́ɓā tə́ ní, ā á̰a̰mī to̰ alé. 26Adə̄ m-ə́dásí wáńg ɓōólaā: Ré deē kógə̄ḿ kə́ dansí tə́ tḭ̄ḭ̄ ta rɔ̄n anī najə̄n i dɔḿ tə́ alé. 27Tɔdɔ̄ m-ɔ́jə́sí yá̰a̰ malang ń Nə́ɓā əndā dɔ danaá kété kɔ̄ɔ́ ní kanjə̄ mundə̄sí yá̰á̰ kógə̄ḿ. 28Ī-ndiī dɔ rɔ̄sí tə́ majə ī-ngɔ̄mīneé rɔ̄sí sḭḭ̄ kɔ́ gə̄ ō, ī-ngɔ̄mīneé yá̰a̰ kul̄ gə̄ malang ń Ndíĺ kə́ Táĺ adə̄sí kadə̄ ī-ngɔ̄mī ní ō. Á̰a̰ī gō ngé kán̄ naā gə̄ yā Kɔ́ɔ̄ɓē ń nəkɔ́ mangdə́ kə mósəneé ní. 29m̄-ger̄ majə kadə̄ ré m-āw̄ kɔ̄ɔ́ anī soó kə́ majaĺ ngá̰ý gə̄ a reēn̄ dansí tə́ ō, nin̄ a əya̰n̄ yá̰a̰ kul̄ gə̄ ní aĺ ō. 30Tá dansí sḭḭ̄ kɔ́ gə̄ tə́ laā gə̄gē ní, de kə́rēý gə̄ a ndin̄ yā kɔr̄ najə̄ kə́ rɔ̄kum aĺ gə̄ yā kɔyń ngé taā kem gə̄ gōdə́ tə́. 31I beé ní ī-ndiī dɔ rɔ̄sí tə́ majə. Ādə̄ əga kemsí dɔ ɓāl̄ kə́ mətá gə̄ ń ndɔ̄ɔ́ ō, kadaá ō, m-ɔ̄jəńsí tə́ ní, m-ɔ̄jə̄sí kə man̄ noó kumḿ tə́ gə̄gē.

32Ba ń toō ɓáa m-ə́yá̰sí kem jī Nə́ɓā tə́ ō, kadə̄ najə̄ yān rāā majə sesí ō. Ni asə kadə̄sí tɔ́gə ō, kadə̄sí yá̰á̰ kə́ majə gə̄ ń ni-ngɔ̄m̄ tām̄ yā deē yān gə̄ tə́ malang ní ō. 33Mā m̄-ndə̄ngā nar, aláa lɔ́r, aláa kūbə̄, yā deē kógə̄ḿ alé. 34Sḭḭ̄ kɔ́ gə̄ ī-gerī kadə̄ m̄-rāā kəla i kə jīḿ n m-ə́ngeń yá̰a̰ gə̄ ń ndoōdə́ rāām̄ ō, rāā madə́ḿ kə́ seḿ gə̄ ō ní. 35M-ɔ́jə́sí ngándáńg kadə̄ j-a̰a̰ī tápə̄ beé tá jə-rāāīneé kə ngé gə̄ ń tɔ́gə́də́ gətóó ní ō, kadə̄ əga kemjí dɔ najə̄ ń Kɔ́ɔ̄ɓē Jeju nəkɔ́ əda tə́ ní ō, əda na: Deē ń adə̄ yá̰á̰ ní kemən nelə̄n tɔȳ yā nge taā yá̰a̰.

36Dan ń Pol ɔr̄ najə̄ gə̄ ń noō sedə́ oy anī, ni-ɔsə kejən nang tə́ sedə́ malang ba ndɔ̄ȳ Nə́ɓā. 37Loo ń noō tə́ de gə̄ malang mbutən̄ kə́ nōō tə́ ō, əsōn̄ míndə Pol tə́ ō, ɓir̄nən̄ kə̄ rɔ̄də́ tə́ ō. 38Yá̰á̰ ń rāā adə̄ rɔ̄də́ nel̄də́ aĺ ngá̰ý ní, i kəda ń ni-ədadə́ na a a̰a̰n̄ kumən to̰ aĺ bátə́ ní. Gō tə́ anī əndānən̄ róbó bátə́ ugə̄n̄ seneé ta too bo tə́.

Currently Selected:

Kəla rāā Ngámbang kəla gə̄ 20: BS

Highlight

Copy