Kəla rāā Ngámbang kəla gə̄ 8

1Ba ngé gə̄ ń tɔ̄lə̄n̄ Etiyen ní Sol ndigə najə̄ gōdə́ tə́.

Sol rāā de gə̄ yā Jeju ndoō tə́

Ndɔ̄ nəkɔ́ ń noō tə́ əlan̄ gír rāā kum Egəlijə kə́ *Jerusalem ndoō tə́ ngá̰ý. Loo ń noō tə́ i ngámbang kəla gə̄ ngóy n tə̄ndān̄ naā tḭ̄ḭ̄n̄ kə̄ loo gə̄ tə́ aĺ ní, ba gotə de gə̄ malang ní tə̄ndān̄ naā tḭ̄ḭ̄n̄ kə̄ loo gə̄ tə́. Nin̄-aw̄n̄ kə̄ ngán ɓē kə́ dūú gə̄ tə́ dɔ nang kə́ Jude tə́ ō, Samari tə́ ō. 2De kə́ ngé ɓōĺ Ndíĺ Nə́ɓā gə̄ dubə̄n̄ Etiyen ō, nōōnən̄ ngá̰ý ō.

3Ba Sol əhɔ rɔ̄n tɔgə a sāā loo nujə Egəlijə kɔ̄ɔ́. Ni túdə̄ kə̄ kem kújə gə̄ tə́, ndɔ́r̄ dəngam gə̄ ō dəyá̰ gə̄ ō kə̄ ndágá ba ɓōkə́də́ dəngáyá.

Pilipə ɔjə Najə̄ kə́ Majə kem ɓē kə́ Samari tə́

4Ngé gə̄ ń tə̄ndā tḭ̄ḭ̄n̄də́ kə̄ loo gə̄ tə́ ní, unən̄ gō ɓē gə̄ ba ɔjən̄ de gə̄ Najə̄ kə́ Majə. 5I beé n Pilipə aw̄ń kem ɓē kógə̄ḿ kə́ gō nang kə́ Samari tə́ ní. Ni ɔjə de kə́ kemeé gə̄ najə̄ yā *Kərist. 6Kósə de gə̄ malang nēlə̄n̄ mbīdə́ oōn̄neé najə̄ yā Pilipə, tɔdɔ̄ nin̄-oōn̄ kōō yá̰á̰ kə́ yáā gə̄ ń ni-rāā ní ō, nin̄ kɔ́ gə̄ a̰a̰n̄ yáā gə̄ ní kə kumdə́ ō. 7Ndíĺ kə́ yḛr gə̄ ngá̰ý teēn̄ kɔ̄ɔ́ kə kɔŕ kə́ ngá̰ý kem de gə̄ ń nin̄ i kemdə́ tə́ ní ō, rɔ̄ ngé lígə̄rī gə̄ kə ngé tə́sō motə gə̄ ngá̰ý tél ngan̄g májə́ májə́ gogə́ ō. 8Adə̄ rɔ̄ de gə̄ nel̄də́ ngá̰ý kem ɓē ní tə́.

9Ba kété tá kadə̄ Pilipə reē ní, deē kógə̄ḿ kə́ rīn na i Simo̰ ndi kem ɓē ní tə́. I de kə́ nge mbōlí kə́ yá̰a̰ rāān gə̄ ɔr kum de kə́ Samari gə̄ ngá̰ý. Ni ɔjə kadə̄ ni na i de kə́ bo, 10adə̄ de gə̄ malang, kə́ dūú gə̄gē kə́ bo gə̄gē a oōn̄ i yān. De gə̄ ədan̄ na deē ní na i tɔ́gə yā Nə́ɓā ń a ɓārə́n̄ na i tɔ́gə́ kə́ bo ní.

11De gə̄ a oōn̄ i yān, tɔdɔ̄ ni-əla gíŕ yáādə́ kə mbōlí yān gēé i jóó ngá̰ý. 12Ba dan ń de gə̄ ní taān̄ kem Pilipə tɔdɔ̄ ni ɔjədə́ Najə̄ kə́ Majə kə́ dɔ *Ɓē ko̰o̰ yā Nə́ɓā tə́ ō, kə́ dɔ rī Jeju *Kərist tə́ ō anī, nin̄ malang ní adə̄ rāān̄də́ *batém, dəngam gē dəyá̰ gē. 13Simo̰ nəkɔ́ gə̄gē taā kem ō, adə̄ rāānən̄ *batém. Ni əya̰ gō Pilipə alé, ni i kadən tə́ ngɔr ngɔr. Dan ń ni-a̰a̰ yá̰á̰ kə́ to kɔr kum ngá̰ý gə̄ ō, yá̰á̰ kə́ yáā gə̄ ō ń rāān̄ yá̰á̰ ní anī ɔr kumən ngá̰ý.

14Dan ń ngámbang kəla gə̄ ń ndin̄ *Jerusalem ní oōn̄ kadə̄ de kə́ Samari gə̄ na ndigən̄ najə̄ yā Nə́ɓā anī əlan̄ Piyer ō Ja̰a̰ ō loodə́. 15Nin̄-ugə̄n̄ anī, ndɔ̄ȳn̄ Nə́ɓā tām̄ yādə́ tə́ kadə̄ əngen̄ *Ndíĺ kə́ Táĺ. 16Tɔdɔ̄ Ndíĺ kə́ Táĺ reē dɔ deē kógə̄ḿ tə́ dandə́ tə́ aĺ ɓáý, rāān̄də́ *batém i kə rī Kɔ́ɔ̄ɓē Jeju ngóy. 17Adə̄ Piyer nin̄ kə Ja̰a̰ əndān̄ jīdə́ dɔdə́ tə́, anī nin̄-əngen̄ Ndíĺ kə́ Táĺ.

18Dan ń Simo̰ a̰ā̰ kadə̄ Nə́ɓā adə̄ de gə̄ *Ndíĺ kə́ Táĺ loo ń ngámbang kəla gə̄ əndān̄ jīdə́ dɔdə́ tə́ ní anī, ni-reē kə naraá rɔ̄ ngámbang kəla gə̄ tə́ ba ədadə́ na:

19Ādə̄mī tɔ́gə́ ń toō tə́ ō, kadə̄ ré m-ə̄ndā jīḿ dɔ deē tə́ anī kɔ́ɔ̄ ənge Ndíĺ kə́ Táĺ ō.

20Anī Piyer tél ədan na:

Nar yāí gə̄gē, īkɔ́ gə̄gē, ā údiī kɔ̄ɔ́ mbak. Tɔdɔ̄ yá̰á̰ ń Nə́ɓā a adə̄ deē i karī ní, ḭ̄ ī-gír̄ mang kə naraá. 21Kum yāí ō, yá̰a̰ kəngeí ō, gətóon̄ tū najə̄ ń toō tə́. Tɔdɔ̄ kemií i súmūú ta kum Nə́ɓā tə́ alé. 22Ní, ī-tūr̄ hálí dɔ yá̰á̰ kə́ majaĺ ń ī-sāā rāā tə́ ní. Ba ī-ndɔ̄ȳ Kɔ́ɔ̄ɓē, yā kadə̄ ré majanī ni m ā̰ȳ rɔ̄n dɔ gír̄ kə́ kemií tə́ n toō. 23Tɔdɔ̄ m-á̰a̰ kadə̄ majaĺ kógə̄ḿ kə́ atə̄ kárárá rosə kemií ō, yá̰á̰ kə́ majaĺ kə́ ī-rāā do̰ō̰ī kə kəlāá ō.

24Simo̰ tél əda Piyer nin̄ kə Ja̰a̰ na:

Sḭḭ̄ kɔ́ gə̄ ī-ndɔ̄yī Kɔ́ɔ̄ɓē tām̄ yāḿ tə́, ādə̄ yá̰á̰ kógə̄ḿ kə́ dan yá̰a̰ gə̄ ń ə́damī tə́ toō rāām̄ alé.

25Dan ń Piyer nin̄ kə Ja̰a̰ ədan̄ najə̄ kə́ kum tə́ dɔ najə̄ yā Kɔ́ɔ̄ɓē tə́ ō, ɔjən̄ najə̄ yān ō oy anī, tél aw̄n̄ gogə́ *Jerusalem. Ta téĺdə́ tə́ ní, ɔjən̄ Najə̄ kə́ Majə kem ngán ɓē gə̄ ngá̰ý kə́ gō nang kə́ Samari tə́.

Pilipə ɔjə de kə́ bo kə́ Etiopi najə̄ yā Jeju

26De kə́ dɔ rā̰ tə́ yā Kɔ́ɔ̄ɓē əda Pilipə na:

Āw̄ kumií kə̄ dām̄ mbɔ́r ɓē kə́ geleé tə́, róbə́ ń ḭḭ *Jerusalem aw̄ kə̄ Gaja tə́ ní, i róbə́ kə́ kem dəla loo tə́.

27Pilipə ɔtə aw̄ kə̄ ta jī tə́ noō kanjə̄ kɔr bā̰ā̰. Anī ni-a̰a̰ deē kógə̄ḿ róbó. Deē ní i áji mbang#8.27 ō 38 ō Áji mbang i de kə́ ɔrə̄n̄ gumə̄n kɔ̄ɔ́. . Kəla yān i ngɔ̄m̄ yá̰a̰ kənge yā Kandas, mban̄g kə́ dəyá̰ kə́ *Etiopi. Ni-aw̄ Jerusalem i ndɔ̄ȳ Nə́ɓāá, 28ba tél a aw̄ i kə̄ ɓēé. Ndi i kem púsə́ sə́nda yān tə́ ba a tə́da i najə̄ gə̄ ń Ijai *nge koō ta ndang ní. 29Anī *Ndíĺ kə́ Táĺ əda Pilipə na:

Ī-njə̄rā kə̄ kété, aw̄ ngɔr rɔ̄ púsə́ ń noō tə́. 30Pilipə a̰ȳ ngɔ̄də̄ aw̄ rɔ̄ tə́, anī oō de kə́ bo ní ndi a tə́da i najə̄ yā Ijai *nge koō ta. Anī dəjen na ké ger̄ kum najə̄ nəkɔ́ ń a tə́da toó wa. 31Anī dəngam ní tél ədan na:

Ré deē ɔjəm̄ kum aĺ anī m-ā m̄-ger̄ i ba̰ý? Ba ni-mēr̄ Pilipə kal̄ ndi dɔɔ́ rɔ̄n tə́ kem púsú. 32Ba najə̄ ń ndi a tə́dá ní n toó:

Ni to i tītə̄ batə̄ kə́ aw̄n̄ seneé kə̄ loo tɔ̄lən tə́ beē,

tītə̄ ngōn̄ batə̄ kə́ ra tan mbóo no nge dəsā bḭḭ̄n#8.32 Dəsā bḭḭ̄n: Dɔ nang kə́ Israel tə́ ní de gə̄ a dəsān̄ bḭḭ̄ batə̄ gə̄ yā rāań kūbə̄. tə́ beē,

ni-tḛḛ̄ tan mḛḛ alé.

33Əlan̄ rɔ̄sɔl̄ dɔn tə́ ō, gāngə̄n̄ sarya yān kə gōó aĺ ō.

I náā n a asə kɔr̄ najə̄ yā de kə́ gōn tə́ gə̄ ní?

Tɔdɔ̄ rāān̄ adə̄ gír yān gān̄g kɔ̄ɔ́ dɔ nang tə́.

34De kə́ bo ní əda Pilipə na:

m̄-rāāī ɓɔ́ ba ə́dam̄, deē ń *nge koō ta a ɔr̄ najə̄ yān toó i náā? A ɔr̄ i najə̄ yān nəkɔ́ aké i najə̄ yā de kə́ rang ḿ? 35Loo ń noō tə́ Pilipə un najə̄ ɔr̄, əla gír dɔ loo ń ni-tə́dá tə́ ní ba ɔjən Najə̄ kə́ Majə yā Jeju. 36Dan ń unən̄ róbə́ á ugə̄n̄ loo ń man̄ i tū tə́ ní tə́ anī de kə́ bo ní əda na:

Man̄ n toó ō ba i rí n ɔgə̄ kadə̄ ī-rāām̄ *batém ní?

37Pilipə ədan na:

Ré ī-taā kem mámák anī ásə kadə̄ m̄-rāāī *batém. Anī de kə́ bo ní tūr̄ ədan na:

m̄-taā kem kadə̄ Jeju *Kərist i Ngōn̄ Nə́ɓā#8.37 K. 37 ní, gətóo kem makətūbə̄ Kəla rāā kə́rēý gə̄ kə́ kété tə́ kə ta Gərek..

38Gō tə́ anī ni-adə̄ púsə dəba, ba nin̄ jōó mbak, Pilipə ō *áji mbang ō udən̄ kum man̄ tə́ adə̄ Pilipə rāān *batém. 39Dan ń teēn̄ kum man̄ tə́ anī, Ndíĺ Kɔ́ɔ̄ɓē un Pilipə aw̄ seneé kɔ̄ɔ́. Áji mbang ní a̰a̰n to̰ alé, ba ni-un róbə yān kə rɔ̄nelēé. 40Ba Pilipə a̰a̰ rɔ̄n i kem ɓē kə́ Ajot tə́ kɔ̄ɔ́. Gō tə́ anī ni-njə̄rā kə gō ɓē gə̄, ba ɔjə Najə̄ kə́ Majə kem ɓē gə̄ malang ń ni-mān̄ tū tə́ ní tə́, bátə́ ugə̄ń kem ɓē kə́ Sejare tə́.

Currently Selected:

Kəla rāā Ngámbang kəla gə̄ 8: BS

Highlight

Copy