Teē Ngán Israel gə̄ 3

1Moijə a ul̄ i batə̄ gə̄ kə bə̄yā̰ gə̄ yā umən Jetəro nge tun̄ yá̰á̰ kə́ Madian. Ndɔ̄ kə́rēý tə́ anī ni ənda dan dəla loo mān̄ kə yá̰a̰ kul̄ gēé, aw̄ ugə̄ kadə mbal̄ *Horeb ń i mbal̄ yā Nə́ɓā ní tə́. 2*Nge kaw̄ kəla yā Kɔ́ɔ̄ɓē ndɔ̄bən tū ndo̰ hor tə́ dan bɔkə́ kámbə́ tə́. Moijə a̰a̰ hor kə́ a əɓa dan bɔkə́ kámbə́ ní tə́ kanjə̄ ko̰o̰ bɔkə́ kámbə́ ní. 3Ni-əda na kə n-rə̄ngō rɔ̄n kə n-aw̄ kə n-a̰a̰ yá̰á̰ kə́ to kɔr kum ń rāā yá̰á̰ á hor o̰o̰ń bɔkə́ kámbə aĺ ní. 4Dan ń Kɔ́ɔ̄ɓē a̰a̰n loo rə̄ngō rɔ̄n tə́ anī, ɓār̄ ɓār̄ kə̄ dan bɔkə́ kámbə́ ní tə́, əda na: Moijə, Moijə. Anī Moijə ndigə na: Mā n toó. 5Anī Kɔ́ɔ̄ɓē əda na:

Ī-lōō reē ngɔr. Ɔ̄r̄ sākə̄rā kə́ njaí tə́ kɔ̄ɔ́, tɔdɔ̄ ī-ra i *loo kə́ táĺ tə́. 6Mā i Nə́ɓā yā bɔbí, Nə́ɓā yā Abəraham ō, Nə́ɓā yā Isaak ō, Nə́ɓā yā Jakob ō. Moijə ənī kūbə̄ utə̄ń ta kumən kɔ̄ɔ́ tɔdɔ̄ ni ɓōĺ ka̰a̰ Nə́ɓā. 7Kɔ́ɔ̄ɓē tél əda na: M-á̰a̰ loo rāā ń rāān̄ kum gír deē yāḿ gə̄ ndoō tə́ dɔ nang kə́ Ejiptə tə́ ní. M-ōō nōō yādə́ dan ń ngé rāā kumdə́ ndoō tə́ gə̄ a tə̄ndān̄də́ ní. m̄-ger̄ tápə̄ yādə́. 8Adə̄ m̄-reē i gān̄g dɔdə́ tə́ jī de kə́ Ejiptə gə̄ tə́ ō, i teē sedə́ tə́ kem ɓē ń toō tə́ kɔ̄ɔ́ ō, yā kaw̄ sedə́ dɔ nang kə́ majə ō, laa ngá̰ý ō tə́, dɔ nang kə́ mba ō, yibə̄ tejə ō i ngá̰ý tū tə́ tə́. I dɔ nang ń Kanaan gə̄ ō, Het gə̄ ō, *Amor gə̄ ō, Periji gə̄ ō, Hibi gə̄ ō, Yebus gə̄ ō, ndin̄ tū tə́ ní. 9Ń toō ní nōō yā ngán *Israel gə̄ əsō mbīḿ tə́ ō, m-á̰a̰ loo rāā ń de kə́ Ejiptə gə̄ a rāān̄ kumdə́ ndoō tə́ ní ō, 10adə̄ m-ā m-ə́laī rɔ̄ *Parao̰ tə́. Āw̄ ī-teē kə gír deē yāḿ gə̄ ń i ngán *Israel gə̄ ní kem ɓē kə́ Ejiptə tə́ kɔ̄ɔ́.

Nə́ɓā əda Moijə rīn

11Moijə əda Nə́ɓā na ké ni i náā áké kə n-aw̄ rɔ̄ *Parao̰ tə́ yā teē kə ngán Israel gēé Ejiptə tə́ kɔ̄ɔ́ wa. 12Nə́ɓā tél ədan na ni na i naā tə́ seneé, na yá̰á̰ ń a ɔjə kadə̄ i ni n n-əlan ní n toó. Dan ń a teē kə ngán Israel gēé kem ɓē kə́ Ejiptə tə́ kɔ̄ɔ́ anī, na a rāān̄ kəla yān ni Nə́ɓā dɔ mbal̄ ń toō tə́. 13Moijə əda Nə́ɓā na ré i beé anī na n-aw̄ rɔ̄ ngán *Israel gə̄ tə́ yā kədadə́ na Nə́ɓā yā kaadə́ gə̄ na əlan kə̄ rɔ̄də́ tə́. Ba ré dəjenən̄ rī Nə́ɓā ní anī ké kə n-ədadə́ na i rí wa. 14Nə́ɓā əda Moijə na: Mā i mā ń m̄-ndi noó ní. Najə̄ ń kadə̄ ə́dá ngán Israel gə̄ ní n toó: m̄-ndi noó əlam̄ rɔ̄sí tə́. 15Ə́dádə́ na i Kɔ́ɔ̄ɓē Nə́ɓā yā kaadə́ gə̄, adə̄ i Nə́ɓā yā Abəraham ō, Nə́ɓā yā Isaak ō, Nə́ɓā yā Jakob ō n əlaī rɔ̄də́ tə́ ní. Rīḿ ń a to ngándáńg kadə̄ de gə̄ a ɓāŕmə̄n̄neé kə dɔ ɓāl̄ gə̄ ní n noó. 16Āw̄ ɔ́sə dɔ *kum kɔɔ̄ gə̄ yā ngán *Israel gə̄ naā tə́, ə́dádə́ na Kɔ́ɔ̄ɓē, Nə́ɓā yā kaasí gə̄, adə̄ i Nə́ɓā yā Abəraham ō, Nə́ɓā yā Isaak ō, Nə́ɓā yā Jakob ō, na ndɔ̄bī, ədaī na n-gḛy dḭḭ̄sí tām̄ yá̰á̰ ń rāān̄ sesí kem ɓē kə́ Ejiptə tə́ ní. 17Adə̄ əda na n-a n-teē sedə́ kem ɓē ń na rāān̄ kumdə́ ndoō tə́ tū tə́ ní kɔ̄ɔ́, yā kaw̄ sedə́ dɔ nang yā Kanaan gə̄ tə́ ō, Het gə̄ tə́ ō, *Amor gə̄ tə́ ō, Periji gə̄ tə́ ō, Hibi gə̄ tə́ ō, Yebus gə̄ tə́ ō, adə̄ i dɔ nang ń mba ō, yibə̄ tejə ō, i ngá̰ý tū tə́ ní tə́. 18Ngán Israel gə̄ a oōn̄ taí ō, ā āw̄ kə *kum kɔɔ̄ yādə́ gēé rɔ̄ mban̄g kə́ Ejiptə tə́ ō. Ā ə́dain̄ na Kɔ́ɔ̄ɓē Nə́ɓā yā Hebəro gə̄ na ndɔ̄bə̄sí, adə̄ na i gáŕ kadə̄ ī-njə̄rāī ndɔ̄ mətá āwī kem dəla loo tə́ āw̄ ī-tunī yá̰a̰ ādīin̄. 19m̄-ger̄ majə kadə̄ a əya̰sí kadə̄ ā āwī alé, adə̄ ré m-ə̄ndā i gúu dɔn tə́ tá. 20Adə̄ m-ā m̄-rāā yá̰á̰ kə́ to kɔr kum kə́ tayā tayā gə̄ yā rɔ̄ɔń kə ɓē yānneé kə ngangá ngá̰ý. Gō tə́ anī a əya̰sí kadə̄ āwī. 21M-ā m̄-rāā kadə̄ de kə́ kem ɓē kə́ Ejiptə tə́ gə̄ a rāān̄ majə kə deē yāsí gēé, adə̄ dan ń a əya̰n̄sí kadə̄ āwī anī, ā āwī jīsí karī alé. 22Dəyá̰ kə́ Israel gə̄ a dəjen̄ dəyá̰ kə́ Ejiptə gə̄ ń ndin̄ kújú gōdə́ tə́, aláa ndin̄ madə̄ ɓēdə́ ní, yá̰á̰ kə́ rāā kə gində̄ arjā̰a̰á̰ ō kə lɔ́rɔ́ ō, kūbə̄ kə́ yā tə́la rɔ̄ ngáńdə́ kə́ dəngam gə̄ tə́ ō, kə́ dəyá̰ gə̄ tə́ ō. I beé n ā ī-taāīneé yá̰a̰ yā de kə́ Ejiptə gə̄ jīdə́ tə́ ní.

Currently Selected:

Teē Ngán Israel gə̄ 3: BS

Highlight

Compare

Copy