Teē Ngán Israel gə̄ 6

1Kɔ́ɔ̄ɓē tél əda Moijə na a a̰a̰ yá̰á̰ ń na n-a n-rāā kə Parao̰ó̰ ní ɓáý. Na n-a n-ɔjə tɔ́gən dɔn tə́ kadə̄ a əya̰ ngán *Israel gə̄ kadə̄ a aw̄n̄ ō, kadə̄ a tə̄ɓādə́ dɔ nang yān tə́ kɔ̄ɔ́ ō.

Nə́ɓā ənī míndən yā teē kə ngán Israel gēé

2Nə́ɓā əda Moijə ɓáý to̰ na:

Mā i Kɔ́ɔ̄ɓē. 3Dan ń m̄-ndɔ̄bə̄ Abəraham ō, Isaak ō, Jakob ō ní, nin̄-ger̄mə̄n̄ i kə rīḿ ń na i Nə́ɓā kə́ bo kə́ tɔ́gən i ngá̰ý ní#6.3 K.3: Á̰a̰ī Tkg 17.1, Teē 3.13-15., ba rīḿ ń na i Kɔ́ɔ̄ɓē ní tá nin̄-gerə̄n̄ alé. 4Gō tə́ m-ə́hɔ *madə̄ naā sedə́ yā kadə̄də́ dɔ nang kə́ Kanaan ń ndin̄ tū tə́ tītə̄ tə̄rā kə́ ngé nam̄ gə̄ ní ō. 5Ń toō m-ōō nōō ngán *Israel gə̄ ń de kə́ Ejiptə gə̄ a rāān̄də́ ɓəlo tə́ ní, adə̄ əga kemḿ dɔ *madə̄ naā ń m-ə́hɔ sedə́ tə́ ní. 6Adə̄ m̄-mērī kədadə́ najə̄ ń toō: Mā i Kɔ́ɔ̄ɓē. M-ā m-ɔ̄r̄sí ta kəla ngámbá tə́ ō, ta kəla ɓəlo tə́ jī de kə́ Ejiptə gə̄ tə́ ō kɔ̄ɔ́. M-ā m-ə́ndádə́ kə tɔ́gə́ḿ ń yá̰á̰ kə́ dum̄ tan gətóó ní kadə̄ a ɓōlə́n̄ ō, m-ā m̄-taāsí jīdə́ tə́ yā kəya̰sí dɔɔ́ ō. 7M-ā m̄-rāāsí gír deē yāḿ gə̄ tə́ ō, mā i Nə́ɓā yāsí ō. Ā ī-gerī kadə̄ i mā n i Kɔ́ɔ̄ɓē Nə́ɓā yāsí, nge kɔr̄sí ta kəla ngámbá tə́ dɔ nang kə́ Ejiptə tə́ kɔ̄ɔ́ ní. 8M-ā m-ɔ́ŕsí ta róbə yā kaw̄ sesí dɔ nang ń m-ə̄nī ndūḿ m-ādə̄ Abəraham ō, Isaak ō, Jakob ō, najə̄n tə́ ní. M-ā m-ādə̄sí dɔ nang ní kadə̄ tél yá̰a̰ yāsí. Mā i Kɔ́ɔ̄ɓē.

9Moijə əda ngán *Israel gə̄ najə̄ ní tā, ba oōn̄ alé tām̄ kəla ɓəlo tɔȳ dɔdə́ kɔ̄ɔ́. 10Kɔ́ɔ̄ɓē tél əda Moijə na 11kə aw̄ kə ɔr̄ najə̄ kə *Parao̰ mban̄g kə́ Ejiptə kadə̄ əya̰ ngán Israel gə̄ kadə̄ teēn̄ kem ɓē yān tə́ kɔ̄ɔ́. 12Anī Moijə tél əda Kɔ́ɔ̄ɓē na n-ger̄ kɔr̄ najə̄ alé, ngán Israel gə̄ gə̄gē na oōn̄ najə̄ kɔrə̄n aĺ anī, *Parao̰ tá ké a oō najə̄ kɔrə̄n i ba̰ý wa. 13Kɔ́ɔ̄ɓē ɔr̄ najə̄ kə Moijə nin̄ kə *Aaro̰, ədadə́ na kə aw̄ kə əngen̄ ngán *Israel gə̄ ō, *Parao̰ mban̄g kə́ Ejiptə ō, kadə̄ ngán Israel gə̄ teēn̄ kem ɓē kə́ Ejiptə tə́ kɔ̄ɔ́.

Gír kaa Moijə nin̄ kə Aaro̰

14Rī de gə̄ kə́ dɔ gír kojə gə̄ tə́ n toó:

Ngán Ruben gə̄ kə́ ngōn̄ hágə Jakob i Hanok ō, Palu ō, Hesəron ō, Karmi ō. De kə́ gír kojə yā Ruben tə́ gə̄ n noó.

15Ngán Simeo̰ gə̄ i Yemuel ō, Yamin ō, Ohad ō, Yakin ō, Sohar ō, Saul ngōn̄ dəyá̰ kə́ Kanaan ō. De kə́ gír kojə yā Simeo̰ tə́ gə̄ n noó.

16Rī *ngán Lebi gə̄ n toó kə gō gír kaadə́ gēé. Ngánən gə̄ i mətá: Gerson ō, Kehat ō, Merari ō. Lebi rāā ɓāl̄ ɓú kə kutə mətá kə kalən kə́ sīrí pá tá kadə̄ oy ɓáý. 17Rī ngán Gerson gə̄ n toó kə gō gír kojə yādə́ gēé: Libəni ō, Simei ō. 18Ngán Kehat gə̄ i Amram ō, Isar ō, Hebron ō, Ujiel ō. Kehat rāā ɓāl̄ ɓú kə kutə mətá kə kalən kə́ mətá pá tá kadə̄ oy ɓáý. 19Ngán Merari gə̄ i Mali ō, Musi ō. Gír kojə yā Lebi gə̄ n noó kə gō gír kaadə́ gēé.

20Amram taā Yokebed ngōkó̰o̰ bɔbə̄n. Yokebed ojə ngán kə́ dəngam gə̄ jōó adə̄n, *Aaro̰ ō, Moijə ō. Amram rāā ɓāl̄ ɓú kə kutə mətá kə kalən kə́ sīrí pá tá kadə̄ oy ɓáý.

21Ngán Isar gə̄ i Kore ō, Nepeg ō, Jikəri ō. 22Ngán Ujiel gə̄ i Misael ō, Elisapan ō, Sitəri ō.

23*Aaro̰ taā Elijabet ngōn̄ Aminadab. Elijabet i ngōkó̰o̰ Nason. Ni-ojə ngán gə̄ sɔ́ adə̄n. Rī ngán gə̄ ní n toó. Nadab ō, Abihu ō, Eleajar ō, Itamar ō. 24Ngán Kore gə̄ i Asir ō, Elkana ō, Abiasap ō. Nin̄ i kaa de gə̄ kə́ gír kojə yā Kore tə́.

25Eleajar ngōn̄ Aaro̰ taā ngōn̄ Putiel. Ngōn̄ Putiel ní ojə ngōn̄ kə́ dəngam kógə̄ḿ kə́ rīn na i Pinas adə̄n.

I de gə̄ ń toō n nin̄ i dɔ gír kojə gə̄ yā Lebi tə́ kə gō gír kaa yādə́ gēé ní.

26Aaro̰ nin̄ kə Moijə i de gə̄ ń Kɔ́ɔ̄ɓē ədadə́ na kə əndān̄ ngán *Israel gə̄ kə gō naá, kə teēn̄neé sedə́ dɔ nang kə́ Ejiptə tə́ kɔ̄ɔ́ ní. 27I nin̄ n ɔrə̄n̄ najə̄ kə *Parao̰ mban̄g kə́ Ejiptə yā teēń kə ngán Israel gēé kem ɓē kə́ Ejiptə tə́ kɔ̄ɔ́ ní.

Nə́ɓā ənī míndən adə̄ Moijə ɓáý

28Ndɔ̄ ń Kɔ́ɔ̄ɓē ɔrə̄ń najə̄ kə Moijə dɔ nang kə́ Ejiptə tə́ ní, 29ədan na ni na i Kɔ́ɔ̄ɓē, na kə aw̄ kə əda *Parao̰ mban̄g kə́ Ejiptə najə̄ gə̄ ń n-ədan ní malang. 30Moijə tél əda Kɔ́ɔ̄ɓē na n-ger̄ kɔr̄ najə̄ alé, ní ké *Parao̰ a oō najə̄ kɔrə̄n i ba̰ý wa.

Currently Selected:

Teē Ngán Israel gə̄ 6: BS

Highlight

Compare

Copy