Ta Kəla gír yá̰a̰ gə̄ 23

Abəraham mang loo dubə̄ń Sara

1Sara rāā ɓāl̄ ɓú kə kutə jōó kə kalən kə́ sīrí. 2Ni-oy i Kiryat Arba ń i Hebron ní, dɔ nang kə́ Kanaan tə́. Abəraham nōō nə̄yá̰n. 3Ni-ḭḭ dɔ nīń nə̄yá̰n tə́ aw̄ ɔr̄ najə̄ kə Het gēé, ədadə́ na:

4Mā i nge nam̄ dɔ dáńsí tə́, adə̄ ādə̄mī bāá yāsí kógə̄ḿ tə́ ādə̄ m̄-dubə̄ń nīń nə̄yá̰ḿ.

5Het gə̄ tél ədan̄ Abəraham na:

6Kɔ́ɔ̄jí, ōō najə̄ yājí. Ḭ̄ i ngār kə́ Nə́ɓā rāā majə seí dɔ dáńjí tə́. Ī-gə̄rā bāá kə́ nelī dan yājí gə̄ tə́ ī-dubə̄ń nə̄yá̰í. Deē kógə̄ḿ kə́ a ɔgī dubə̄ nə̄yá̰í kem bāá yān tə́ danjí tə́ laā gətóo.

7Abəraham ḭḭ ɔsə non nang tə́ ta kum kósə de kə́ kem ɓēé gə̄ tə́ ń i Het gə̄ ní, 8ba ədadə́ na:

Ré ī-ndigiī kadə̄ m̄-dubə̄ nə̄yá̰ḿ laā anī, ī-rāāī Epəron ngōn̄ Sohar ɓɔ́ ādə̄mī tə́, 9ādə̄ adə̄m̄ bəlo mbal̄ kə́ Makəpela ń i ta tɔ̄l̄ ta ndɔr̄ yān tə́ ní, ta kumsí tə́ laā, kə gātə̄ kə́ asə loon tə́, kadə̄ tél loo dubə̄ deē yāḿ dɔ dáńsí tə́.

10Epəron ń i Het ní ndi dan madə̄n gə̄ tə́. Ni-tél əda Abəraham ta kum Het gə̄ tə́ ō, ta kum de gə̄ ń reēn̄ loo sarya tə́ malang ní ō, na:

11I beé alé, kɔ́ɔ̄ḿ. Ī-nēl̄ mbīí ōoń najə̄ yāḿ. M-ādī ndɔr̄ ō, m-ādī bəlo mbal̄ kə́ kemeé ō, karī ta kum gír deē yāḿ gə̄ tə́. Ī-dubə̄ nə̄yá̰í kemeé.

12Abəraham ɔsə non nang tə́ ta kum kósə de gə̄ tə́ ɓáý to̰, 13ba ɔr̄ najə̄ kə Epəron ta kum de gə̄ tə́ malang əda na:

m̄-rāāī ɓɔ́, ba ī-nēl̄ mbīí ōoń najə̄ yāḿ! Ī-taā nar gír ndɔr̄ ní jīḿ tə́ ba ādə̄ m̄-dubə̄ nə̄yá̰ḿ.

14Ba Epəron tél əda Abəraham na:

15Kɔ́ɔ̄ḿ, ī-nēl̄ mbīí ōoń najə̄ ń m-ā m-ə́daī ní. Dɔ nang kə́ gātə̄n i njáŕ sə́lē kə́ rāā kə gində̄ arjā̰a̰á̰ ɓú sɔ́ i yá̰á̰ kə́ karī dɔ dáńjí tə́ seí. Ī-dubə̄ nə̄yá̰í.

16Abəraham ger̄ kum najə̄ ń Epəron ɔr̄ ní, adə̄ tə́da kutə nar ń Epəron gān̄g ní adə̄n ta kum Het gə̄ tə́. I njáŕ sə́lē kə́ rāā kə gində̄ arjā̰a̰á̰ ɓú sɔ́. I sə́lē gə̄ ń de gə̄ a əsan̄ kem ɓēé ní. 17Adə̄ ndɔr̄ yā Epəron kə́ Makəpela ń sɔɔ̄ń ta naā kə Mamre ní, ndɔr̄ ō, bəlo mbal̄ ń i tū tə́ ní ō, kāgə̄ gə̄ malang ń ran̄ kem ndɔrɔ́ ní ō, 18télən̄ yá̰a̰ yā Abəraham. Het gə̄ ń reēn̄ loo sarya tə́ malang ní, nin̄ i kum tə́.

19Gō tə́ anī Abəraham dubə̄ nə̄yá̰n Sara bəlo mbal̄ kə́ kem ndɔr̄ kə́ Makəpela tə́ ń sɔɔ̄n̄ ta naā kə Mamre ń i Hebron ní, dɔ nang kə́ Kanaan tə́. 20Adə̄ ndɔr̄ ō, bəlo mbal̄ kə́ kemeé ō, télən̄ loo dubə̄ de gə̄ yā Abəraham kə́ mang jī Het gə̄ tə́ ta kumdə́ tə́ malang.

Currently Selected:

Ta Kəla gír yá̰a̰ gə̄ 23: BS

Highlight

Copy