Ta Kəla gír yá̰a̰ gə̄ 29
29
Jakob əngen̄ naā kə Raselé
1Jakob əsō róbó aw̄ kə̄ dɔ nang kə́ gír ɓē tə́. 2Ni-a̰a̰ bəlo man̄ kógə̄ḿ bembeé. Ba gír ɓūtə̄ batə̄ gə̄ mətá ra a ɔrə̄n̄ koō kadə tə́, tɔdɔ̄ a adə̄n̄ yá̰a̰ kul̄ gə̄ man̄ i dɔ bəlo man̄ ngeé ń noō tə́. Mbal̄ kə́ ta bəlo man̄ ní tə́ i kə́ bo ngá̰ý. 3Adə̄ ré yá̰a̰ kul̄ gə̄ kánə̄n̄ naā malang pá tá a ndūbə̄rūn̄ mbal̄ ní ta bəlo tə́ yā kadə̄ńdə́ man̄ kadə̄ a̰ȳn̄ ō, tél əndān̄ ta tə́ gogə́ ō.
4Jakob əda ngé ngɔ̄m̄ yá̰a̰ kul̄ gə̄ ní na:
Ngákó̰ó̰ḿ gə̄, sḭḭ̄ i de kə́ ɓē kə́ rá tə́ gə̄?
Anī nin̄ tél ədanən̄ na nin̄ na i de kə́ Haran gə̄. 5Ni-dəjedə́ na ké gerə̄n̄ Laban ngōn̄ kaa Nahor wa. Anī ədanən̄ na n-ger̄nən̄. 6Ni-dəjedə́ na ké to karī wa. Anī tél ədanən̄ na to karī ba na i ngōnə̄n Rasel n a reē kə yá̰a̰ kul̄ gēé noō. 7Jakob ədadə́ na mbang na i ngá̰ý ɓáý, mbang kán̄ nja yá̰a̰ kul̄ gə̄ na na̰y ɓáý, kə adə̄n̄ batə̄ gə̄ man̄ kadə̄ a̰ȳn̄ ba kə aw̄n̄ sedə́ dɔ mu tə́ kadə̄ əsan̄ yá̰á̰ ɓáý. 8Nin̄ tél ədanən̄ na n-asən̄ kadə̄də́ man̄ alé. Ré nja yá̰a̰ kul̄ gə̄ na ɔsə naā malang pá tá n-a n-ndūbə̄rūn̄ mbal̄ kə́ ta bəlo man̄ tə́ kɔ̄ɔ́ yā kadə̄ńdə́ man̄ kadə̄ a̰ȳn̄ ɓáý.
9Ni a ɔr̄ najə̄ sedə́ kə̄ tan tə́ ɓáý anī, Rasel reē ugə̄ kə yá̰a̰ kul̄ yā bɔbə̄n gēé. Tɔdɔ̄ Rasel i nge kul̄ yá̰a̰. 10Dan ń Jakob a̰a̰ Rasel ń i ngōn̄ nānə̄n Laban ní ō, a̰a̰ yá̰a̰ kul̄ yā nānə̄n gə̄ ō anī, aw̄ ndūbə̄rū mbal̄ kə́ ta bəlo man̄ tə́ kɔ̄ɔ́ adə̄ń yá̰a̰ kul̄ yā nānə̄n gə̄ man̄ adə̄ a̰ȳn̄. 11Jakob əhɔ Rasel kə̄ rɔ̄n tə́ ɓirə̄n dagə, ba un ndūn kə̄ dɔɔ́ nōoń. 12Jakob əda Rasel na ni na i nge bɔbə̄n, ni na i ngōn̄ Rebeka. Rasel a̰ȳ ngɔ̄də̄ aw̄ əda bɔbə̄n. 13Dan ń Laban oō na i Jakob ngōn̄ ngōkó̰o̰n kə́ dəyá̰ anī, a̰ȳ ngɔ̄də̄ tə́nī tan. Ni əhɔn kə̄ rɔ̄n tə́ ɓirə̄n dagə, ba aw̄ seneé ɓēé looneé. Jakob ənīn gotə yá̰a̰ gə̄ ń rāān̄ yá̰á̰ ní malang. 14Laban ədan na:
Ḭ̄ i ngeeḿ rɔ̄kum, jḭḭ seí i mósə́ kə́ kógə̄ḿ beē. Jakob rāā nāā kógə̄ḿ ɓē Labaná.
Jakob taā dəyá̰ nja jōó
15Laban əda Jakob na:
Tām̄ ḭ̄ ń i ngeeḿ ní n kə ī-rāā kəla ādə̄m̄ karī ní a? I rí n kə m-ə̄gāiń a ə́dam̄.
16Ngán Laban kə́ dəyá̰ gə̄ i jōó. Rī nge kə́ nga tɔ́gə na i Lea, ba rī gidən na i Rasel. 17Kum Lea rāān sḛ́ý, ba Rasel tá mandə ngá̰ý ō, kumən majə ka̰ā̰ ngá̰ý ō. 18Jakob gḛy Rasel ngá̰ý adə̄ əda Laban na:
M-ā m̄-rāā kəla seí ɓāl̄ sīrí gír ngōnīí kə́ nge ko̰ jōó tə́.
19Ba Laban əda na:
m̄-ndigə kadī seneé tɔȳ kadə̄n kə de kə́ rangaá. Ī-ndi seḿ.
20Jakob rāā kəla ɓāl̄ sīrí gír Rasel tə́, ba ɓāl̄ gə̄ ní mānə̄n̄ ta kumən tə́ i tītə̄ ndɔ̄ gə̄ beé, tɔdɔ̄ ni-gḛyn ngá̰ý. 21Gō tə́ anī Jakob əda Laban na ɓāl̄ kə́ sīrí gə̄ ní na asə kɔ̄ɔ́ ní, kə adə̄n nə̄yá̰n kadə̄ kə reē rɔ̄n tə́.
22Laban ɓāŕ de kə́ kem ɓēé gə̄ malang ba rāā yá̰a̰ kəsa kə́ ngá̰ý adə̄də́. 23Ba ndɔ̄ɔ́ anī, un i ngōnə̄n Lea n aw̄ seneé rɔ̄ Jakob tə́, adə̄ Jakob ɓīī seneé ní. 24Laban un Silpa adə̄n kə Lea kadə̄ rāā kəla seneé. 25Jakob teē dəloí a̰a̰ kadə̄ i Lea, anī əda Laban na:
I rí n ī-rāā seḿ toō? m̄-rāā kəla seí i gír Rasel tə́ ba ī-gólə̄m̄ i tām̄ rí tə́?
26Laban tél ədan na:
Yá̰a̰ kāgə̄ ɓē yājí ɔjə kadə̄ ngōn̄ kə́ dūú aw̄ ngaawaá no nga tɔ́gən tə́ alé. 27Ī-tɔ̄l̄ ta ndɔ̄ kə́ sīrí kə́ yā kaw̄ń kújə ngaawaá kə nge kə́ nga tɔ́gɔ́, tá ré ī-ndigə tél rāā kəla gír nge kə́ dūú tə́ ɓāl̄ sīrí ɓáý to̰ anī, j-a j-adī seneé.
28Jakob ndigə, adə̄ ni tɔ̄l̄ ta ndɔ̄ kə́ sīrí gə̄ ní kə Leaá, gō tə́ anī Laban adə̄n Rasel. 29Ni un Bila adə̄n kə Raselé kadə̄ rāā kəla seneé. 30Jakob ɓīī kə Raselé. Ni-tárən tɔȳ Lea, adə̄ rāā kəla gírən tə́ ɓē Labaná ɓāl̄ sīrí ɓáý.
Ngán Jakob gə̄
31-32Kɔ́ɔ̄ɓē a̰a̰ kadə̄ Jakob tár Lea alé, anī ni rāā adə̄ Lea ojə ngán gə̄ ba Rasel tá i dəyá̰ kə́ kujə. Lea ndān̄ ngōn̄, ojə ngōn̄ kə́ dəngam əndā rīn na i Ruben#29.31 Ruben kə ta Hebəro kumən na i (Kɔ́ɔ̄ɓē) a̰a̰., tām̄ ni əda na:
Kɔ́ɔ̄ɓē a̰a̰ téĺ ń télən̄ seḿ kə̄ nang tə́ ní, adə̄ ngɔlaā ngaaḿ a tárəm̄ tā.
33Ni ndān̄ ngōn̄ ɓáý, ojə ngōn̄ kə́ dəngam, anī əda na:
Kɔ́ɔ̄ɓē ger̄ kadə̄ tármə̄n̄ alé, adə̄ adə̄m̄ ngōn̄ kə́ dəngam kə́ rang ɓáý to̰.
Ni əndā rī ngōn̄ ní na i Simeo̰#29.33 Simeo̰ kə ta Hebəro kumən na i (Kɔ́ɔ̄ɓē) ger̄..
34Ni ndān̄ ngōn̄ ɓáý, ba ojə ngōn̄ kə́ dəngam ɓáý to̰, anī əda na:
Kə́ ɓōó ń toō ní kem ngaaḿ a əhɔ yāḿ, tɔdɔ̄ m-ójə́ ngáń kə́ dəngam gə̄ mətá seneé.
Əndā rī ngōn̄ ní na i Lebi#29.34 Lebi kə ta Hebəro kumən na i kemən a əhɔ yāḿ..
35Ni ndān̄ ngōn̄ ɓáý to̰, ojə ngōn̄ kə́ dəngam kə́ nge ko̰ sɔ́, anī əda na:
Kə́ ɓōó ń toō, m-ā m̄-tɔ̄ȳ Kɔ́ɔ̄ɓē.
Adə̄ ni əndā rīn na i *Juda#29.35 Juda kə ta Hebəro kumən na i m-ā m̄-tɔ̄ȳ.
Anī asən kojə ngán gə̄ tā.
Currently Selected:
Ta Kəla gír yá̰a̰ gə̄ 29: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
