Ta Kəla gír yá̰a̰ gə̄ 33

Jakob əngen̄ naā kə Esauú

1Jakob un kumən kə̄ dɔɔ́ anī, a̰a̰ Esau a reē kə de gēé ɓú sɔ́. Ni kēgə̄ ngán gə̄ adə̄ Lea ō, Rasel ō, ngé kəla kə́ dəyá̰ kə́ jōó gə̄ ō. 2Ni əndā ngé kəla kə́ dəyá̰ gə̄ kə ngáńdə́ gēé kété ō, Lea nin̄ kə ngánən gēé gōdə́ tə́ ō, Rasel nin̄ kə Jəjepé ta tɔ̄l̄ ta tə́ ō. 3Nəkɔ́ mān̄ kété nodə́ tə́, ba ɔsə non nang tə́ bátə́ nja sīrí ɔtə̄ń rɔ̄ ngōkó̰o̰n tə́. 4Esau a̰ȳ ngɔ̄də̄ tə́nī tan, əhɔn kə̄ rɔ̄n tə́ ɓirə̄n dagə ō, əsō kə̄ kɔ́ɔn tə́ ō, ba nōōn̄ jōó mbak. 5Esau un kumən kə̄ dɔɔ́, a̰a̰ dəyá̰ gə̄ ō, ngán gə̄ ō, anī dəjen na ké de gə̄ ń seneé toō ké i náā gə̄ wa. Anī Jakob tél ədan na:

I ngán gə̄ kə́ Nə́ɓā adə̄ nge kəla yāí.

6Ngé kəla kə́ dəyá̰ gə̄ ndɔ́tə̄n̄ kə̄ kété kə ngáńdə́ gēé ba ɔsən̄ nodə́ nang tə́. 7Lea ndɔ́tə̄n̄ kə ngánən gēé kə̄ kété ba ɔsən̄ nodə́ nang tə́ ō. Jəjep nin̄ kə Raselé ndɔ́tə̄n̄ kə̄ kété ba ɔsən̄ nodə́ nang tə́ ō. 8Esau dəje Jakob na ké gír ɓūtə̄ gə̄ ń na n-də̄rādə́ róbó malang ní, ké a sāā i rāań rí wa. Anī Jakob tél ədan na i yā kadə̄ n-adə̄n kadə̄ nel̄nəń seneé. 9Banī Esau ədan na:

Ngōkó̰ó̰ḿ, yá̰a̰ yāḿ i ngá̰ý. Ī-ngɔ̄m̄ yá̰a̰ yāí.

10Ba Jakob tél ədan na:

I beé alé, m̄-rāāī ɓɔ́! Ré ə́hɔm̄ kemií tə́ to̰ aĺ anī, ī-taā yá̰á̰ ń m-ādī karī ní. Kənge ń m-ə́ngeī ní to i tītə̄ loo kənge naā kə Nə́ɓāá, tɔdɔ̄ ī-rāā kem majə seḿ ngá̰ý. 11Adə̄ m̄-rāāī ɓɔ́ ba ī-taā kadə̄ karī ń m-ə́lań m-ādī ní, tām̄ Nə́ɓā rāā kem majə seḿ asə kə̄ ta tə́, adə̄ m̄-nal̄ yá̰á̰ kógə̄ḿ alé.

Jakob ra kə Esauú ngá̰ý adə̄ Esau taā 12ba əda na kə n-əsōn̄ róbó kə n-aw̄n̄ na n-njə̄rā seneé. 13Ba Jakob tél ədan na:

Ī-ger̄ kadə̄ ngán gə̄ ngangə̄n̄ aĺ ō, kadə̄ mā i kə kó̰o̰ batə̄ gēé ō, kə kó̰o̰ man̄g gēé ō, kə́ ngáńdə́ gə̄ a ilən̄ i mba ɓáý. Ré deē njə̄rā sedə́ ngá̰ý ndɔ̄ kógə̄ḿ anī a oyn̄ malang. 14Ādə̄ kɔ́ɔ̄ḿ aw̄ kété no nge kəla yān tə́, na m-ā m-ún gōn jəke jəke kə gō njə̄rā yá̰a̰ kul̄ gə̄ ń i kété noḿ tə́ ní ō, kə gō njə̄rā ngán gēé ō, yā kugə̄ń ɓē kɔ́ɔ̄ḿ dɔ nang kə́ Seir tə́.

15Esau əda na n-sāā kəya̰ deē yān kə́rēý gə̄ sḛ́ý kadə̄ Jakob. Banī Jakob tél ədan na ké i yā rāań rí wa, na əhɔn kə̄ rɔ̄n tə́ majə ɓá adə̄ na n-sāā yá̰á̰ kə́ rang to̰ alé.

16Adə̄ Esau tél un róbə́ gír njan ndɔ̄ nəkɔ́ ń noō tə́ ta kaw̄ kə̄ Seir. 17Ba Jakob tá aw̄ kə̄ Sukot. Ni rāā kújə tām̄ yān nəkɔ́ tə́ ō, rāā bəla tām̄ yā yá̰a̰ kul̄ yān gə̄ tə́ ō. I tām̄ najə̄ ń noō tə́ n əndānəń rī loo ní na i Sukot ń i ngáń kújə́ kámbə gə̄ kə̄ tə́gān̄ i ta jī kāgə̄ gə̄ n rāānəń ní.

Jakob ndi kadə ɓē kə́ Sisem tə́.

18Jakob tél Mesopotami#33.18 Mesopotami: Á̰a̰ī Tkg 24.10 ugə̄ Sisem dɔ nang kə́ Kanaan tə́ kə lápə́yaá. Ni ndi i kadə ɓē tə́. 19Ni mang núsə loo ń udə kújə tandā yān tū tə́ ní jī ngán Hamor gə̄ tə́ kə kesita#33.19 Kesita kógə̄ḿ i nar gír batə̄ kógə̄ḿ. ɓú kógə̄ḿ. Hamor i bɔbə̄ Sisem. 20Jakob rāā *loo tun̄ yá̰a̰ loo ngeé ń noō tə́ ba əndā rīn na i Nə́ɓā i Nə́ɓā yā *Israel.

Currently Selected:

Ta Kəla gír yá̰a̰ gə̄ 33: BS

Highlight

Copy