Ta Kəla gír yá̰a̰ gə̄ 42

Jakob əla ngánən kə́ dəngam gə̄ Ejiptə tə́

1Jakob oō kadə̄ kōō na i dɔ nang kə́ Ejiptə tə́ anī əda ngánən ké dəngam gə̄ na ké ndin̄ kə̄ ta naā tə́ a rāān̄ ké i rí wa, 2na n-oō kadə̄ kōō na to dɔ nang kə́ Ejiptə tə́ ní, kə aw̄n̄ kə mangən̄ kadə̄ kə n-əsan̄ kə n-ajənə̄ń na sōgə́ na n-oyn̄. 3Ngákó̰o̰ Jəjep gə̄ kutə aw̄n̄ Ejiptə tə́ mang kōó. 4Jakob mbātə́ kəla Benjamḛ kem kó̰o̰ madə̄ Jəjep sedə́, tām̄ ni ɓōĺ kadə̄ yá̰á̰ kə́rēý yá̰á̰ kə́ to kum kaȳ aĺ aw̄ rāān. 5Ngán *Israel gə̄ aw̄ ugə̄n̄ Ejiptə tə́ naā tə́ kə de kə́ rang kə́ ngé kaw̄ mang kōó gēé, tɔdɔ̄ ɓō i ngá̰ý dɔ nang kə́ Kanaan tə́.

Jəjep əngen̄ naā kə ngákó̰o̰n gēé

6Jəjep ndi dɔ ɓē tə́. I ni n i nge kadə̄ de kə́ kem ɓēé gə̄ malang kōō kadə̄ mangən̄ ní. Ngákó̰o̰ Jəjep gə̄ reē ɔsən̄ nodə́ nang tə́ non tə́. 7Jəjep a̰a̰ ngákó̰o̰n gə̄ ger̄də́, ba rāā tītə̄ kə́ ni i tə̄rā beé. Ɔr̄ najə̄ sedə́ kə ngangá ngá̰ý, dəjedə́ na ké ḭḭn̄ i rá wa. Nin̄ tél ədanən̄ na n-ḭḭn̄ na i dɔ nang kə́ Kanaan tə́ n-reēn̄ mang kōó.

8Jəjep ger̄ ngákó̰o̰n gə̄ ba nin̄ tá ger̄nən̄ alé. 9Əga kemən dɔ nī ń rāān tə́ ní, anī ədadə́ na nin̄ na i ngé kum̄ loo gə̄, na reēn̄ na i kəndā ma̰ȳ loo kə́ ngan̄g aĺ gə̄ kə́ kem ɓēé tə́. 10Nin̄ tél ədanən̄ na i beé alé kɔ́ɔ̄ ɓē gə̄, nin̄ ngé kəla yān gə̄ na n-reēn̄ na i mang kōó. 11Nin̄ na i ngán de kə́ kógə̄ḿ beē gə̄ malang, nin̄ na i de kə́ sew gə̄ ba na i ngé kum̄ loo gə̄ alé. 12Ni tél ədadə́ na sḛ́ý aĺ bátə́, na reēn̄ na i kəndā ma̰ȳ loo kə́ ngan̄g aĺ gə̄ kə́ kem ɓēé tə́.

13Nin̄ tél ədanən̄ na nin̄ ngé kəla yān gə̄ na nin̄ na i deē kutə gidə i jōó. Nin̄ na i ngákó̰o̰ naā gə̄, ngán de kə́ kógə̄ḿ beē dɔ nang kə́ Kanaan tə́. Ngōkó̰ó̰də́ kə́ dūú na ndi ɓēé noō kə bɔbə̄də́, ba nge kə́ kógə̄ḿ tá na gətóo. 14Jəjep əda na n-ədadə́ laā na nin̄ na i ngé kum̄ loo gə̄, 15na n-nāādə́ yā ka̰ā̰: Tītə̄ ń *Parao̰ ndiń kə kumneé noō na a teēn̄ laā alé yā ngóoń ngōkó̰ó̰də́ kə́ dūú ní kadə̄ reē pá tá. 16Kə əlan̄ deē kógə̄ḿ dandə́ tə́ kadə̄ aw̄ gō ngōkó̰ó̰də́ tə́, ba kə nin̄ gotə gə̄ kə ndin̄ dəngáy. Na n-a̰a̰ ké najə̄ kɔr̄də́ i rɔ̄kum wa. Ré najə̄ kɔr̄də́ i rɔ̄kum aĺ anī, tītə̄ ń *Parao̰ ndiń kə kumneé noō, nin̄ na i ngé kum̄ loo gə̄.

17Ba ni ɓōkə́də́ dəngáyá malang ndɔ̄ mətá. 18Kə ndɔ̄ kə́ nge ko̰ mətá anī Jəjep ədadə́ na n-ɓōĺ Nə́ɓā, adə̄ n-a n-əndā yá̰á̰ kógə̄ḿ dɔdə́ tə́ kadə̄ rāān̄. Ré rāān̄ anī a ndin̄ kə kumdə́. 19Ré nin̄ na i de kə́ sew gə̄ anī kadə̄ ngōkó̰ó̰də́ kógə̄ḿ kə to dəngáyá kum gotədə́, ba nin̄ gotə gə̄ kə aw̄n̄ kə kōó kə adə̄n̄ de gə̄ yādə́ gə̄ kadə̄ əsan̄, 20ba kə reēn̄ kə ngōkó̰ó̰də́ kə́ dūú ní kə adə̄nən̄. Ɓáa n-a n-ger̄ kadə̄ ədan̄ na i najə̄ kə́ rɔ̄kum ō, na a oyn̄ aĺ ō. Nin̄ ndigən̄ rāā tītə̄ ń Jəjep ɔjəń ní. 21Anī nin̄ tél ədan̄ naā dɔ dáńdə́ tə́ na yá̰á̰ kə́ tōr̄ ń toō rāādə́ na i najə̄ yá̰á̰ kə́ majaĺ ń na n-rāān̄ kə ngōkó̰ó̰də́ ní, tɔdɔ̄ dan ń na rāādə́ ɓɔ́ ní, n-a̰a̰n̄ wur kɔl yān ba na n-oōn̄ yān aĺ bátə́. I tām̄ najə̄ ń noō tə́ n wur kɔl ń toō na əsōń dɔdə́ tə́ ní. 22Ruben un najə̄ əda na ké n-ədadə́ kété aĺ wa. N-ədadə́ na kə rāān̄ yá̰á̰ kə́ majaĺ kə ngōn̄ ń noō alé anī na oōn̄ alé. Ní, kə a̰a̰n̄, i ni n a dəjen̄də́ kə̄rā mósən toó. 23Nin̄ gerə̄n̄ kadə̄ Jəjep ger̄ kum najə̄ kɔr̄də́ alé, tɔdɔ̄ ni-ɔr̄ najə̄ sedə́ i kə deē kógə̄ḿ kə́ nge tūr̄ najá. 24Ni ɔtə əja rɔ̄n, aw̄ ra a nōō.

Ngán Jakob gə̄ tél aw̄n̄ gogə́ dɔ nang kə́ Kanaan tə́

Ni tél reē rɔ̄də́ tə́, ɔr̄ najə̄ sedə́ ba əhɔ Simeo̰ dɔ dáńdə́ tə́ adə̄ do̰ō̰nən̄ kə súlú ta kumdə́ tə́. 25Jəjep adə̄ ndūn kadə̄ tūrə̄n̄ kōō kem ngɔng yādə́ gə̄ tə́ kadə̄ rosə ō, kadə̄ tél tə́lan̄ nar yādə́ gə̄ gogə́ kem ngɔng yādə́ gə̄ tə́ kógə̄ḿ kógə̄ḿ ō, kadə̄ adə̄n̄də́ sádə̄ ō. De gə̄ rāān̄ yá̰a̰ gə̄ ní tītə̄ ń Jəjep ədań ní. 26Ngákó̰o̰ naā gə̄ ní ɔyn̄ ngɔng yādə́ gə̄ tə́ndān̄ gidə kərō gə̄ tə́ ba tél aw̄n̄.

27Dan ń aw̄ dəban̄ yā ɓīī anī, deē kógə̄ḿ dandə́ tə́ teē ta ngɔng yān yā kadə̄ń kərō yá̰a̰ kəsa anī teē dɔ nar kə́ to ta ngɔng yān tə́. 28Ni əda ngákó̰o̰n gə̄ na télən̄ kə nar yānneé gogə́ na adə̄nən̄, na i ni n to ta ngɔng tə́ toō. Anī kemdə́ gān̄g man̄ adə̄ a ndewn̄ ədan̄ na dɔ dáńdə́ tə́ na ké i rí kə́ beé n ké Nə́ɓā rāā sedə́ toō wa.

29Nin̄ tél reēn̄ rɔ̄ bɔbə̄də́ Jakob tə́ dɔ nang kə́ Kanaan tə́. Ɔjənən̄ gotə yá̰a̰ gə̄ ń rāādə́ ní malang, ədanən̄ na 30nge ko̰o̰ ɓē ní na ɔr̄ najə̄ sedə́ kə ngangá ngá̰ý ō, na rāādə́ na i ngé kum̄ loo gə̄ tə́ ō. 31N-ədanən̄ na nin̄ na i de kə́ sew gə̄ ba na i ngé kum̄ loo gə̄ alé, 32nin̄ ngákó̰o̰ naā gə̄ na i kutə gidə i jōó, bɔbə̄də́ na i kógə̄ḿ beē, ngōkó̰ó̰də́ kógə̄ḿ tá na gətóo, ba nge kə́ dūú na ndi ɓēé kə bɔbə̄də́ dɔ nang kə́ Kanaan tə́ noō. 33Anī nge ko̰o̰ ɓē ní ədadə́ na loo ger̄ ń na n-a n-gerə̄ń kadə̄ nin̄ na i de kə́ sew gə̄ ní n toó: Kə əya̰n̄ ngōkó̰ó̰də́ kógə̄ḿ rɔ̄n tə́, kə ɔyn̄ yá̰á̰ kə́ yā kulə̄ń de gə̄ yādə́ gə̄, ba kə aw̄n̄ kə reēn̄ kə ngōkó̰ó̰də́ kə́ dūú ní kə adə̄nən̄. 34Loo ń noō tə́ na n-a n-ger̄ kadə̄ nin̄ na i ngé kum̄ loo gə̄ alé ba na i de kə́ sew gə̄, na n-tél kə ngōkó̰ó̰də́ yā kadə̄də́ gogə́ ō, na n-əya̰də́ kadə̄ a njə̄rān̄ kem ɓēé karī ō.

35Dan ń a kəjān̄ yá̰á̰ kə́ kem ngɔng yādə́ gə̄ tə́ anī, əngen̄ ngɔng nar kem ngɔng yādə́ gə̄ tə́ kógə̄ḿ kógə̄ḿ kə naraá kemeé. Dan ń a̰a̰n̄ nar ní anī, ɓōĺ rāādə́ malang, rāā bɔbə̄də́ Jakob ō. 36Bɔbə̄də́ əda na i nin̄ n a rāān̄ kadə̄ na n-nal̄ ngánən gə̄ ní. Jəjep na gətóo, Simeo̰ na gətóo, tá ń toō ké a sāān̄ taā Benjamḛ jīn tə́ ɓáý to̰ wa. Yá̰a̰ gə̄ ń noō na a télən̄ na i kə̄ dɔn nəkɔ́ tə́ malang. 37Ruben əda bɔbə̄n na ré n-tél kə Benjamḛḛ́ n-reē seneé n-adə̄n aĺ ɓáa kə tɔ̄l̄ ngánən kə́ dəngam kə́ jōó gə̄, ní kə adə̄n seneé na n-a n-tél yā reē seneé kadə̄n. 38Jakob əda na ngōnə̄n na a aw̄ sedə́ alé, tɔdɔ̄ ngōkó̰o̰n na oy kɔ̄ɔ́, na̰y na i nəkɔ́ kə kérneé ngóy. Ré yá̰á̰ kə́ to kum kaȳ aĺ na aw̄ rāān dɔ róbə mbā ń a rāān̄ yā kaw̄ tə́ toō anī, wur kɔl na a tɔ̄lə̄n kɔ̄ɔ́ kadə̄ najə̄ na a əsō dɔdə́ tə́, tām̄ na n-tɔgə ɓə́gá ngá̰ý kɔ̄ɔ́.

Currently Selected:

Ta Kəla gír yá̰a̰ gə̄ 42: BS

Highlight

Copy