Ta Kəla gír yá̰a̰ gə̄ 44

Jəjep nāā ngákó̰o̰n gə̄

1Jəjep ɔr̄ najə̄ kə pajā kə́ kem kújə yān tə́, ədan na kə tūr̄ kōō kadə̄ rosə ngɔng yā de gə̄ ń noō, kə adə̄də́ kadə̄ ré asən̄ kətō anī kə aw̄nəń, ba kə tél kə tə́la nar yādə́ ta ngɔng yādə́ gə̄ tə́ gogə́, 2kə əla kópə yān kə́ rāā kə gində̄ arjā̰a̰á̰ ní ta ngɔng yā nge kə́ dūú tə́ naā tə́ kə nar mang kōō yānneé. Pajā rāā yá̰a̰ gə̄ ń Jəjep ədan ní.

3Teē dəloí anī əya̰n̄ de gə̄ ní kə kərō yādə́ gēé adə̄ aw̄n̄. 4Nin̄ teēn̄ kem ɓēé kɔ̄ɔ́ ba aw̄n̄ sa̰y aĺ ɓáý anī, Jəjep əda pajā yān na kə ngɔ̄də̄ gō de gə̄ ń noō. Ré əngedə́ anī, kə dəjedə́ na ké i tām̄ rí tə́ áké rāān̄ majaĺ kum gotə majə kə́ rāān̄ sedə́ ní wa, 5ké i tām̄ rí tə́ á ɓogən̄ kópə ń na n-a̰ȳń yá̰a̰ ō, na n-ndḛḛ̄ń sāā ō ní wa. Kə ədadə́ na yá̰á̰ ń rāān̄ ní na majə alé.

6Pajā aw̄ əngedə́ ədadə́ najə̄ ní. 7Anī tél ədanən̄ na kɔ́ɔ̄ ɓē gə̄, ké i ba̰ý áké ɔr̄ najə̄ kə́ beé wa. Nin̄ na n-nāān̄ rāā yá̰á̰ kə́ beé nja kógə̄ḿ aĺ ɓáý. 8Kə a̰ā̰, loo ń na n-əngen̄ nar ta ngɔng yādə́ gə̄ tə́ ní na n-ḭḭnə̄ń dɔ nang kə́ Kanaan tə́ na n-tél na n-reēnəń na n-adə̄nən̄. Ní ké na n-ɓogən̄ yá̰á̰ kə́ rāā kə arjā̰a̰á̰, aláa kə lɔ́rɔ́ kə́ kem kújə yā kɔ́ɔ̄n tə́ ké i ba̰ý wa. 9Deē ń a teēn̄ dɔ kópə ní tə́ kem ngɔng yān tə́ dɔ dáńdə́ tə́ laā ní, kadə̄ kɔ́ɔ̄ kə oy ō, kadə̄ nin̄ kə i ɓəlo yān gə̄ ō.

10Pajā əda na n-a n-rāā tītə̄ ń ədanə̄ń noō. Deē ń na n-ənge kópə ní jīn tə́ ní na a tél ɓəlo yān, ba nin̄ gotə gə̄ tá najə̄ na a gətóo dɔdə́ tə́. 11Nin̄ tə́ndān̄ ngɔng yādə́ gə̄ nang tə́ kə̄ ta jī gə̄ tə́ noō ba teēn̄ ta. 12Pajā gó̰ō̰ kem ngɔng gə̄ ní, əla gír dɔ ngɔng yā nge kə́ ngatɔ́gə́ tə́ aw̄ tɔ̄l̄ ta dɔ yā nge kə́ dūú tə́, anī ənge kópə ní kem ngɔng yā Benjamḛ tə́. 13Nin̄ *rə́yā̰n̄ kūbə̄ kə́ rɔ̄də́ tə́ gə̄ ō, ɔyn̄ yá̰a̰ kətō kə̄ dɔ kərō yādə́ gə̄ tə́ ō, ba tél aw̄n̄ gogə́ kem ɓēé.

Juda adə̄ rɔ̄n kum gotə Benjamḛ

14*Juda nin̄ kə ngákó̰o̰n gēé reē ugə̄n̄ ɓē Jəjepé. Ni teē aĺ ɓáý adə̄ əngenən̄ ɓēé. Reē ɔsən̄ nodə́ nang tə́ non tə́, 15anī Jəjep ədadə́ na ké i kəla rí n ké rāān̄ toó wa, ké gerə̄n̄ kadə̄ de kə́ tītə̄n ni ké asə ger̄ yá̰á̰ kə́ to loo mundə̄ tə́ aĺ wa. 16Juda tél ədan na ké kə n-ədan̄ kɔ́ɔ̄də́ na i rí wa, ké kə n-ədanən̄ na i rí yā kɔjənəń kadə̄ nin̄ na i de kə́ sew gə̄ ní wa. Na i Nə́ɓā n teē kə gíŕdə́ dɔɔ́ ní nin̄ na i ɓəlo yān gə̄ naā tə́ kə deē ń əngen̄ kópə jīn tə́ ní. 17Ba Jəjep əda na n-a n-rāā tītə̄ ń noō alé, na i deē ń əngen̄ kópə jīn tə́ ní n na i ɓəlo yān ní, ba nin̄ gotə gə̄ kə tél kə aw̄n̄ rɔ̄ bɔbə̄də́ tə́ kə kem kə́ sɔl̄ lɔmɔɔ́.

18Anī Juda ndɔ́tə̄ kə̄ rɔ̄ Jəjep tə́ ngɔr, əda na:

Ɓɔ́ kɔ́ɔ̄ ɓē gə̄, ādə̄ m-ə́daī najə̄ kógə̄ḿ laā, ba ādə̄ wōn̄g rāāī dɔḿ tə́ alé, tɔdɔ̄ ḭ̄ i nge kɔsə kum gotə *Parao̰. 19Ī-dəjejí kété na ké bɔbə̄jí ké ndi noó ō, ké ngōkó̰ó̰jí kógə̄ḿ ké ndi noó ō wa. 20Anī jə-tél j-ədaī na ɓə́ga bɔbə̄jí na ndi noó ō, na ngōkó̰ó̰jí kə́ dūú kə́ bɔbə̄jí ojən dɔ ɓə́gan tə́ na ndi noó ō. Ngōkó̰ó̰jí ní tá na kem kó̰o̰ madə̄n na oy kɔ̄ɔ́, na̰y na i nəkɔ́ kə kérneé adə̄ bɔbə̄jí na tárən ngá̰ý. 21Ḭ̄ ī-mēr̄jí reē seneé yā ka̰a̰n kə kumií. 22Jə-tél j-ədaī na ngōn̄ ní na a əya̰ bɔbə̄n alé. Ré na əya̰n anī, bɔbə̄n na a oy. 23Ḭ̄ ī-téĺ ə́dájí na ré ngōkó̰ó̰jí kə́ dūú na i sejí aĺ anī, na j-a j-a̰a̰ kumií gogə́ to̰ alé i kə́ bátə́ gə̄ tə́. 24Jə-tél j-aw̄ j-ənī bɔbə̄jí gotə nja najə̄ gə̄ ń ɔ̄r̄ sejí ní. 25-26Dan ń bɔbə̄jí ədají na kə jə-tél kə jə-reē kə jə-mang yá̰a̰ kəsa sḛ́ý ní, j-ədan na ré ngōkó̰ó̰jí kə́ dūú na i sejí tá na j-a j-aw̄, ba ré ni na i sejí aĺ anī j-a j-aw̄ alé, tɔdɔ̄ na ī-tāājí ə́da na ré na á̰a̰ ngōkó̰ó̰jí kə́ dūú sejí aĺ anī na ā ə́hɔ́jí kə̄ rɔ̄í tə́ alé. 27Loo ń noō tə́ bɔbə̄jí ɔr̄ najə̄ sejí əda na nə̄yá̰n Rasel na ojə ngán gə̄ na i jōó beē ngóy n na adə̄n. 28Kə́ kógə̄ḿ na gətóo kɔ̄ɔ́, n-gír̄ kadə̄ i dā̰ n əhɔn tɔdɔ̄ na n-a̰a̰n to̰ alé, 29adə̄ ré jə-taā nge kə́ kógə̄ḿ ń noō jīn tə́ ɓáý tá yá̰á̰ kə́ to kum kaȳ aĺ aw̄ rāān anī ɓur̄ na a tɔ̄lə̄n kadə̄ najə̄ na i dɔjí tə́, tɔdɔ̄ na n-tɔgə ngá̰ý kɔ̄ɔ́. 30Adə̄ ré m̄-tél m-āw̄ rɔ̄ bɔbə́ḿ tə́ kanjə̄ ngōnə̄n ń kemən i dɔn tə́ ní anī a oy. 31Ɓur̄ a tɔ̄lə̄n tām̄ ni tɔgə ɓə́gá ngá̰ý kɔ̄ɔ́ kadə̄ najə̄ i dɔjí tə́. 32M-ə̄nā míndə́ḿ m-ādə̄ bɔbə́ḿ tām̄ yā ngōn̄ ní tə́, m-ə́da na ré m̄-tél m̄-reē seneé m-ādə̄n aĺ anī, na m̄-rāā i majaĺ seneé adə̄ sarya na i dɔḿ tə́. 33Ní, m̄-rāāī ɓɔ́ ba ādə̄ m̄-ndi kum gotə ngōn̄ ní. Mā i ɓəlo yāí, ba ādə̄ ngōn̄ ní aw̄ kə ngákó̰o̰n gēé. 34Ré ngōn̄ ní i seḿ aĺ anī, loo kadə̄ m̄-tél m-āw̄ rɔ̄ bɔbə́ḿ tə́ gətóo. m̄-gḛy kadə̄ yá̰á̰ kə́ to kum kaȳ aĺ rāā bɔbə́ḿ ta kumḿ tə́ alé.

Currently Selected:

Ta Kəla gír yá̰a̰ gə̄ 44: BS

Highlight

Copy