Najə̄ kə́ Majə yā Jeju ń Ja̰a̰ ndang ní 14

Jeju i róbə́ kə́ yā kaw̄ń rɔ̄ Bɔbə̄n tə́

1Jeju əda ngé ndóō yá̰a̰ yān gə̄: Ādī kemsí sōl̄ alé:

Ī-taāī kem Nə́ɓā ō, ī-taāī kemḿ mā ō. 2Loo ndi i ngá̰ý kem ɓē yā Bɔbə́ḿ tə́. Nə́ngētə́ i beé aĺ anī, m-ə́dásí kɔ̄ɔ́. M-ā m-āw̄ yā rāā loo tām̄ yāsí tə́. 3Loo ń ré m-āw̄ m̄-rāā loo tām̄ yāsí tə́ oy anī, m-ā m̄-tél yā kɔysí kə̄ rɔ̄ḿ tə́, yā kadə̄ loo ń mā i tū tə́ ní, sḭḭ̄ i tū tə́ ō. 4Ba sḭḭ̄ ī-gerī róbə́ ń ā aw̄ kə̄ loo ń m-ā m-āw̄ kə̄ tū tə́ ní.

5Toma ədan na:

Kɔ́ɔ̄ɓē, jə-ger̄ loo ń ā āw̄ kə̄ tū tə́ ní, alé ní loo kadə̄ jə-ger̄ róbən i ba̰ý?

6Jeju tél ədan na:

Mā i róbə ō, najə̄ kə́ rɔ̄kum ō, ndi kə kumuú ō. Deē asə kaw̄ rɔ̄ Bɔbə́ḿ tə́ i kə ta kūlə̄ḿ māá ngóy. 7Ré ī-ger̄mī anī, ā ī-gerī Bɔbə́ḿ ō. Əla gír ngɔr ń toō tə́ ní, sḭḭ̄ ī-gerīin̄ ō, á̰a̰in̄ kɔ̄ɔ́ ō.

8Pilipə ədan na:

Kɔ́ɔ̄ɓē, ɔ́jə́jí kə Bɔbí anī nge ń noō a asəjí.

9Jeju ədan na:

Pilipə, m̄-ndi sesí dan i ngá̰ý, ba ī-gerə̄m̄ aĺ a? Deē ń a̰a̰m̄ ní, a̰a̰ i Bɔbə́ḿ. I ba̰ý á ə́da na kə m-ɔ́jə́sí kə Bɔbə́ḿ ní? 10Ī-taā kem kadə̄ mā i kem Bɔbə́ḿ tə́ ō, Bɔbə́ḿ i kemḿ mā tə́ ō aĺ a? Najə̄ gə̄ ń m-ə́dásí ní, m-ə́dásí i kə dɔḿ mə̄kɔ́ alé, banī i Bɔbə́ḿ ń ndi kemḿ tə́ ní n rāā kəla yān gə̄ ní. 11Ī-taāī kemḿ loo ń m-ə́dásí na mā i kem Bɔbə́ḿ tə́ ō, Bɔbə́ḿ i kemḿ mā tə́ ō ní. Ré ī-taāī kemḿ mā aĺ gə̄gē anī, ī-taāī kem tām̄ kəla gə̄ ń toō tə́. 12Ādə̄ m-ə́dásí najə̄ kə́ bo ngá̰ý, deē ń taā kemḿ anī a rāā kəla gə̄ ń m̄-rāā ní ō, ba a rāā ngé kə́ bo tɔȳ ngé gə̄ ń toō ɓáý, tɔdɔ̄ m-ā m-āw̄ i kə̄ rɔ̄ Bɔbə́ḿ tə́. 13Ba yá̰a̰ malang ń ā ī-dəjeī kə rīḿ ní, m-ā m̄-rāā, yā kadə̄ Ngōn̄ ɔsəń gɔn Bɔbə̄n. 14Ré ī-dəjemī yá̰á̰ kə́rēý kə rīḿ anī, m-ā m̄-rāā.

Jeju ənī míndən tām̄ yā Ndíĺ kə́ Táĺ tə́

15Ré ī-tármī anī, ā ī-rāāī yá̰a̰ gə̄ ń gō míndə́ḿ əda ní, 16ba mā m-ā m̄-dəje Bɔbə́ḿ kadə̄ adə̄sí nge rāā sesí kə́ rang ń i Ndíl najə̄ kə́ rɔ̄kum ní, kadə̄ ndi sesí ngándáńg. 17De kə́ dɔ nang tə́ gə̄ asən̄ kəhɔn kə̄ rɔ̄də́ tə́ alé, tɔdɔ̄ nin̄-a̰a̰nən̄ aĺ ō, ger̄nən̄ aĺ ō. Ba sḭḭ̄ ī-ger̄niī, tɔdɔ̄ ni-ndi sesí ō, ndi kemsí tə́ ō.

18M-ā m-ə́yá̰sí hal alé, m-ā m̄-tél yā reē rɔ̄sí tə́. 19Sḛ́ý to̰ anī de kə́ dɔ nang tə́ gə̄ a a̰a̰mə̄n̄ to̰ alé, banī sḭḭ̄ ā á̰a̰mī, tɔdɔ̄ m̄-ndi kə kumḿ ō, sḭḭ̄ ā ī-ndiī kə kumsí ō. 20Ndɔ̄ ń noō tə́ ní ā ī-gerī kadə̄ mā i kem Bɔbə́ḿ tə́ ō, sḭḭ̄ i kemḿ mā tə́ ō, mā i kemsí tə́ ō.

21Deē ń ngɔ̄m̄ gō míndə́ḿ gə̄ ō, rāā yá̰a̰ gə̄ ń gō míndə́ḿ əda ō ní, i deē ń noō n tárəm̄ ni. Bɔbə́ḿ a tár deē ń tárəm̄ ní. M-ā m̄-tárən ō, m-ā m̄-rāā kadə̄ a a̰a̰m̄ ō.

22Jud ń i Judas Iskariot aĺ ní ədan na:

Kɔ́ɔ̄ɓē, i tām̄ rí tə́ á ā ɔ́jə́jí jḭḭ rɔ̄í, ba ā ɔ́jə de kə́ dɔ nang tə́ gə̄ rɔ̄í aĺ ní?

23Jeju tél ədan na:

Ré deē kógə̄ḿ tárəm̄ anī, a rāā yá̰a̰ gə̄ ń najə̄ yāḿ əda ní. Adə̄ Bɔbə́ḿ a tárən ō, j-a jə-reē rɔ̄n tə́ ō, j-a jə-ndi looneé ō. 24Deē ń tárəm̄ aĺ ní, a rāā yá̰a̰ gə̄ ń m-ə́dá ní alé. Ba najə̄ ń m-ə́dásí ní i najə̄ yāḿ mā alé, i najə̄ yā Bɔbə̄ Ngōn̄ ń əlam̄ ní. 25M-ə́dásí najə̄ ń noō i dan ń mā i sesí ɓáý ní. 26Ba nge rāā sesí i *Ndíĺ kə́ Táĺ ń Bɔbə́ḿ a əlań kə rīḿ ní. Ni a ndóōsí yá̰a̰ malang ō, a rāā kadə̄ əga kemsí dɔ najə̄ gə̄ ń m-ə́dásí tə́ ní ō.

27M-ə́ya̰ kem sɔl̄ lɔm m-ādə̄sí, m-ādə̄sí kem sɔl̄ lɔm yāḿ. M-ādə̄sí i tītə̄ ń de kə́ dɔ nang tə́ gə̄ a adə̄nəń ní alé. Ī-lōōī sōl̄ ō, ɓōĺ ō. 28Sḭḭ̄ ōōī najə̄ ń m-ə́dásí ní. M-ə́da na:

M-ā m-āw̄, ba m-ā m̄-tél yā reē rɔ̄sí tə́. Ré ī-tármī anī, rɔ̄sí a nel̄sí tām̄ kaw̄ḿ kə̄ rɔ̄ Bɔbə́ḿ tə́, tɔdɔ̄ Bɔbə́ḿ i kə́ bo tɔȳm̄. 29Ngɔlaā ní m-ə́dásí yá̰á̰ gə̄ ń toō kété tá kadə̄ rāān̄ yá̰á̰ ɓáý, yā kadə̄ ré yá̰a̰ gə̄ ní rāān̄ yá̰a̰ anī, ī-taāī kem. 30M-ā m-ɔ̄r̄ najə̄ sesí ngá̰ý to̰ alé, tɔdɔ̄ ngār yā de kə́ dɔ nang ń toō tə́ gə̄ a reē i mbée. Ni-aw̄ kə tɔ́gə yā rāā yá̰á̰ kógə̄ḿ seḿ alé, 31ba majə kadə̄ de kə́ dɔ nang tə́ gə̄ gerə̄n̄ kadə̄ m̄-tár Bɔbə́ḿ ō, m̄-rāā yá̰á̰ ń Bɔbə́ḿ ədam̄ kadə̄ m̄-rāā ní ō. Ḭ́ḭī dɔɔ́ j-awī.

Currently Selected:

Najə̄ kə́ Majə yā Jeju ń Ja̰a̰ ndang ní 14: BS

Highlight

Copy