Najə̄ kə́ Majə yā Jeju ń Ja̰a̰ ndang ní 16

1M-ə́dásí najə̄ gə̄ ń toō malang i yā kadə̄ loo ń ré yá̰a̰ gə̄ a nāān̄sí anī, ə̄sōī alé. 2A tə̄ɓān̄sí kɔ̄ɔ́ kem kújə́ kán̄ naā gə̄ tə́. Tá ɓáý to̰ ní, ndɔ̄ a reē nuú yā kadə̄ náā nəkɔ́ ń a tɔ̄l̄sí ní a gír̄ na n rāā na i kəlā n-adə̄ Nə́ɓā. 3A rāān̄ yá̰a̰ beé, i tɔdɔ̄ nin̄-gerə̄n̄ Bɔbə́ḿ aĺ ō, ger̄mə̄n̄ mā aĺ ō. 4M-ə́dásí najə̄ ń toō i yā kadə̄ loo ń ndɔ̄ ní ugə̄ anī, əga kemsí dɔ tə́ kadə̄ m-ə́dásí kɔ̄ɔ́.

Kəla rāā Ndíĺ kə́ Táĺ

M-ə́dásí najə̄ ní kété alé, i tɔdɔ̄ mə̄kɔ́ i sesí ɓáý. 5Ngɔlaā m-ā m̄-tél yā kaw̄ kə̄ rɔ̄ nge ń əlam̄ tə́ ní, ba deē kógə̄ḿ dansí tə́ kə́ dəjem̄ na ké ā āw̄ i kə̄ rá wa ní gətóo. 6Ba rɔ̄sí nel̄sí alé, i tām̄ kəda ń m-ə́dásí najə̄ ń noō ní. 7Banī m-ə́dásí najə̄ kə́ rɔ̄kum: I só tə́ tām̄ yāsí tə́ kadə̄ m-āw̄. Tɔdɔ̄ ré m-āw̄ aĺ anī, nge dḭḭ̄sí a reē rɔ̄sí tə́ alé. Ba ré m-āw̄ anī, m-ā m-ə́la seneé yā kadə̄sí. 8Loo ń ni a ugə̄ anī, a əhɔ de kə́ dɔ nang tə́ gə̄ kə najá tām̄ yā majaĺ tə́ ō, yá̰á̰ kə́ gōtə́ tə́ ō, sarya yā Nə́ɓā tə́ ō. 9Kə́ ɔjə dɔ yá̰á̰ kə́ majaĺ ɓáa, i tām̄ nin̄-taān̄ kemḿ alé. 10Kə́ ɔjə dɔ yá̰á̰ kə́ gōtə́ ɓáa, i tām̄ m-ā m-āw̄ kə̄ rɔ̄ Bɔbə́ḿ tə́, ba sḭḭ̄ ā á̰a̰mī to̰ alé. 11Kə́ ɔjə dɔ sarya ɓáa, i tām̄ gāngə̄n̄ sarya dɔ ngār kə́ dɔ nang ń toō tə́ kɔ̄ɔ́.

12M-āw̄ kə yá̰a̰ gə̄ ngá̰ý kadə̄ m-ə́dásí ɓáý, ba sḭḭ̄ ásiī ger̄ kum ngɔr ń toō tə́ alé. 13Loo ń Ndíl najə̄ kə́ rɔ̄kum a ugə̄ anī, a rāā kadə̄ ā ī-gerī najə̄ kə́ rɔ̄kum kə taá malang. Tɔdɔ̄ ni a ɔr̄ najə̄ i kə dɔneé alé, banī a əda i yá̰a̰ malang ń ni a oō ní ō, yá̰á̰ ń a rāā yā reē ɓáý ní, ni a ədasí kété ō. 14Ni a ɔsə gɔnəḿ, tɔdɔ̄ a taā dām̄ yá̰a̰ yāḿ yā kədasí. 15Yá̰a̰ yā Bɔbə́ḿ malang i yāḿ. I tām̄ najə̄ ń noō tə́ n m-ə́da na ni a taā dām̄ yá̰á̰ yāḿ yā kədasí ní.

Rɔ̄nelāĺ yāsí a tél rɔ̄nel̄.

16Sḛ́ý to̰ anī, ā á̰a̰mī alé, banī gō tə́ sḛ́ý anī, ā á̰a̰mī.

17Gō najə̄ ń noō tə́ ní, ngé ndóō yá̰á̰ kə́rēý gə̄ dəjen̄ naā dɔ dáńdə́ tə́ na:

Nge ń ədají noō kumən na i rí? Əda na sḛ́ý to̰ anī, j-a j-a̰a̰niī alé, ba gō tə́ sḛ́ý anī, j-a j-a̰a̰niī. Əda ɓáý to̰ na i tām̄ na n-a n-aw̄ kə̄ rɔ̄ Bɔbə̄n tə́. 18Sḛ́ý to̰ anī ń ni-əda noó ní kumən na i rí? Jḭḭ̄ jə-gerī kum najə̄ ń ni-sāā kəda noó alé.

19Jeju ger̄ kadə̄ a sāān̄ dəjen anī, ədadə́ na:

Sḭḭ̄ ī-sāāī ger̄ kum najə̄ ń m-ə́da na: sḛ́ý to̰ anī ā á̰a̰mī alé, ba sḛ́ý to̰ anī ā á̰a̰mī ní. 20Ādə̄ m-ə́dásí najə̄ kə́ bo ngá̰ý, ā ī-nōōī ō, ā ī-sō̰míī ō, ba de kə́ dɔ nang tə́ gə̄ a rāān̄ rɔ̄nel̄. Rɔ̄sí a nel̄sí alé, banī rɔ̄nelāĺ yāsí ní a tél rɔ̄nel̄. 21Loo ń dəyá̰ rāā kem ní, ni i kə rɔ̄ katāá tām̄ ndɔ̄ yān ugə̄, banī loo ń ojə ngōn̄ oy anī, əga kemən dɔ wur kɔl yān tə́ alé. Rɔ̄n nelə̄n, tɔdɔ̄ ni-ojə deē ndul kógə̄ḿ dɔ nang tə́. 22I beé n ngɔlaā sḭḭ̄ rɔ̄sí nel̄sí aĺ ō ní. Banī m-ā m̄-tél yā ka̰a̰sí gogə́, loo ń noō tə́ rɔ̄sí a nel̄sí ō, de kə́ yā kɔr̄ rɔ̄nel̄ ní kemsí tə́ kɔ̄ɔ́ a gətóo ō.

23Ndɔ̄ ń noō tə́ ní ā ī-dəjemī kum yá̰á̰ kógə̄ḿ to̰ alé. Ādə̄ m-ə́dásí najə̄ kə́ bo ngá̰ý, ré ī-dəjeī Bɔbə́ḿ yá̰á̰ kógə̄ḿ kə rīḿ anī, ni a adə̄sí. 24Bátə́ ngɔlaā ní sḭḭ̄ ī-dəjeī yá̰á̰ kógə̄ḿ kə rīḿ aĺ ɓáý. Ní, ī-dəjeī, anī ā ə́ngeī, yā kadə̄ rɔ̄nel̄ yāsí i kə́ ɔtə̄ kə taá mámák.

Jeju tetə de kə́ dɔ nang tə́ gə̄ rɔ̄ɔ̄ kɔ̄ɔ́

25M-ə́dásí yá̰a̰ gə̄ ń toō i kə kūjə́ najá, banī ndɔ̄ a reē noó kadə̄ m-ā m-ɔ̄r̄ najə̄ kə́ dɔ Bɔbə́ḿ tə́ sesí kadə̄ unjə̄ wáńg wáńg. 26Ndɔ̄ ngé ń noō tə́ ní, ā ī-dəjeī Bɔbə́ḿ yá̰a̰ kə rīḿ. Ba m-ə́dásí na m-ā m̄-ndɔ̄ȳn tām̄ yāsí tə́ alé, 27tɔdɔ̄ Bɔbə́ḿ nəkɔ́ táŕsí. Ni táŕsí tɔdɔ̄ sḭḭ̄ ī-tármī ō, ī-taāī kem kadə̄ m-ḭ́ḭ i rɔ̄ Nə́ɓā tə́ n m̄-reē ō ní. 28M-ḭ́ḭ i rɔ̄ Bɔbə̄ Ngōn̄ tə́ n m̄-reē dɔ nang tə́ ní. Ba ngɔlaā ní m-ā m-ə́ya̰ dɔ nang, ba m-ā m-āw̄ rɔ̄ Bɔbə̄ Ngōn̄ tə́.

29Loo ń noō tə́ ngé ndóō yá̰a̰ yān gə̄ ədanən̄ na:

Ń toō ɓáa ɔ̄r̄ najə̄ i wáńg, ba i kə kūjə́ najá to̰ alé. 30Ngɔlaā jə-ger̄ kadə̄ ḭ̄ ī-ger̄ yá̰a̰ malang ō, ī-sāā kadə̄ deē dəjeī najə̄ aĺ ō. I tām̄ najə̄ ń noō tə́ n jə-taā kem kadə̄ ḭ̄ ḭ́ḭ i rɔ̄ Nə́ɓā tə́ ní.

31Jeju tél ədadə́ na:

Ngɔlaā ī-taāī kem tā a? 32Á̰a̰ī, kum mbang a reē noó, ba ugə̄ kɔ̄ɔ́, adə̄ ā ī-tḭ̄ḭ̄ naā kə̄ loo gə̄ tə́, ba ā ə́ya̰mī kə kérə́ḿ. Banī mā i kə kérə́ḿ alé, tām̄ Bɔbə́ḿ i seḿ. 33M-ə́dásí yá̰a̰ gə̄ ń toō i yā kadə̄ loo ɓoosí naā seḿ tə́ ní, sḭḭ̄ i kə kem sɔl̄ lɔmɔɔ́. Wur kɔl əsō dɔsí tə́ dɔ nang tə́ laā ba əhɔī rɔ̄sí tɔgə, tɔdɔ̄ m̄-tetə de kə́ dɔ nang tə́ gə̄ rɔ̄ɔ̄ kɔ̄ɔ́.

Currently Selected:

Najə̄ kə́ Majə yā Jeju ń Ja̰a̰ ndang ní 16: BS

Highlight

Copy