Ndū najə̄ yā Ngán Lebi gə̄ 11
11
Yá̰á̰ kə́ majaĺ tákə̄ ō, yá̰á̰ kə́ majaĺ tákə̄ aĺ ō
Dā̰ kə́ yḛr gə̄ ō, dā̰ kə́ unjə̄ njáý njáý gə̄ ō
1Kɔ́ɔ̄ɓē mēr̄ Moijə nin̄ kə *Aaro̰ 2-3kəda ngán *Israel gə̄ najə̄ ń toō:
Dan dā̰ gə̄ malang kə́ dɔ nang tə́ ní, i ngé gə̄ ń hēl̄ njadə́ gar gajə jōó ō, a ɔsən̄ mu#11.2-3 Ɔsən̄ mu, i dā̰ gə̄ kə́ əsan̄ yá̰a̰ urən̄ kemdə́ tə́ ba tél ɔsə reēnəń tadə́ tə́ gogə́ əsan̄. ō ní n ā ə́saīdə́ ní. 4Ba dan dā̰ gə̄ ń a ɔsən̄ mu tə́, aké dan dā̰ gə̄ ń hēl̄ njadə́ gar gajə tə́ ní, ngé gə̄ ń ā ə́saīdə́ aĺ ní n toó:
Jámbal, tɔdɔ̄ ni-ɔsə mu ba hēl̄ njan gar gajə alé, adə̄ ā ī-rāāin̄ i dā̰ kə́ yḛr tə́.
5Dā̰ damā̰a̰#11.5 Dā̰ damā̰a̰ i dā̰ kə́ asən̄ naā kə dɔgəm̄. ō, tɔdɔ̄ ni-ɔsə mu ba hēl̄ njan gar gajə alé, adə̄ ā ī-rāāin̄ i dā̰ kə́ yḛr tə́.
6Dɔgəm̄, tɔdɔ̄ ni-ɔsə mu ba hēl̄ njan gar gajə alé, adə̄ ā ī-rāāin̄ i dā̰ kə́ yḛr tə́.
7Kosong, tɔdɔ̄ hēl̄ njan gar gajə banī ɔsə mu alé, adə̄ ā ī-rāāin̄ i dā̰ kə́ yḛr tə́.
8Dā̰ gə̄ ń noō ā ə́saīdə́ aĺ ō, ā ɔ́diī nīńdə́ jīsí tə́ aĺ ō. Ā ī-rāāīdə́ i dā̰ gə̄ kə́ yḛr gə̄ tə́.
9Dā̰ gə̄ malang kə́ kum bā bo tə́, aké kum ngán man̄ gə̄ tə́ ń aw̄n̄ kə jenjədə́ ō, ngɔ́də́ ō ní, ā ə́saīdə́. 10Ba ngé gə̄ ń jenjədə́ aké ngɔ́də́ ō, kur̄ gə̄ kə́ kum man̄ tə́ ō ní, ā ə́saīdə́ alé. 11Ā ī-rāāīdə́ i yá̰á̰ kə́ yḛr tə́. Ā ə́saīdə́ aĺ ō, ā ɔ́diī nīńdə́ jīsí tə́ aĺ ō. 12Adə̄ dā̰ gə̄ malang kə́ maná ń jenjədə́ gətóo ō, ngɔ́də́ gətóo ō ní, ī-lōōī kəsadə́.
13Yel̄ gə̄ ń ā ī-rāāīdə́ i yá̰á̰ kə́ yḛr tə́ ō, ā ə́saīdə́ aĺ ō ní, nin̄ n toó: Kə̄rō, gərā, tɔ́sə̄-ngɔ́r, 14holíyō, gír māl̄ kə́ tayā tayā gə̄, 15gíŕ ká̰ā̰ kə́ tayā tayā gə̄, 16burum, gabə kɔsə, yel̄ dɔ bā, gír nənga kə́ tayā tayā gə̄, 17kɔȳ múu gə̄, nūgə̄, 18kɔȳ kə́ yɔ̄kə̄lóý, kɔȳ kōrōrōý, 19kóndə́la, go̰, ngā wor, dō, dong, birbir.
20Ngán kur̄ gə̄ ń njadə́ to ō, əɓan̄ bɔ̄gə̄ ō ní, ā ī-rāāīdə́ i yá̰á̰ ké yḛr tə́. 21Ba ngé gə̄ ń njadə́ kə́ kadə̄ tíīnəń bal dɔ nang tə́ to ní, ā ə́saīdə́. 22I nin̄ n toó: Gír yim̄, gaẃ, kə́ndīŕ kə́ tayā tayā gə̄. 23Ba gotə ngán kur̄ gə̄ malang ń njadə́ to ō, a ḭḭn̄ bɔ̄gə̄ ō ní, ā ī-rāāīdə́ i yá̰á̰ kə́ yḛr tə́.
Majaĺ kə́ tákə̄ deē
24Dā̰ kə́rēý gə̄ a rāān̄sí kadə̄ ī-téliī de gə̄ kə́ yḛr gə̄. Deē ń ɔdə nīńdə́ ní, kɔ́ɔ̄ a tél de kə́ yḛr bátə́ kadə̄ loo tíbə dɔn tə́. 25Ba deē ń a əto nīndə́ ní, i gáŕ kadə̄ a tə́go kūbə̄ yān gə̄ ō, ni i de kə́ yḛr bátə́ kadə̄ loo tíbə dɔn tə́ ō. 26-28Dā̰ gə̄ ní nin̄ n toó:
Ngé gə̄ ń hēl̄ njadə́ gar gajə aĺ ō, ngé gə̄ ń ɔsən̄ mu aĺ ō ní,
deē ń ɔdə rɔ̄də́ anī, kɔ́ɔ̄ a tél de kə́ yḛr.
Dā̰ kə́ nja sɔ́ gə̄ malang ń a əndān̄ da njadə́ nang tə́ a njə̄rānəń ní, deē ń a ɔdə nīńdə́ ní, kɔ́ɔ̄ a tél de kə́ yḛr bátə́ kadə̄ loo tíbə̄ dɔn tə́. Tá deē ń a ətō nīńdə́ ní, kɔ́ɔ̄ a tə́go kūbə̄ yān gə̄ ō, ni i de kə́ yḛr bátə́ kadə̄ loo tíbə dɔn tə́ ō.
29Dan ngán dā̰ gə̄ kə́ dɔ nang tə́ ní, ngé gə̄ ń ā ī-rāāīdə́ i dā̰ gə̄ kə́ yḛr tə́ ní nin̄ n toó: Yégə̄ so ō, būrū ō, ngarwa̰y ō, móngə ō, 30ngol ō, gíŕ kíl̄ kə́ tayā tayā gə̄ ō, līyā̰ ō. 31Ā ī-rāāīdə́ i dā̰ gə̄ kə́ yḛr tə́. Deē ń a ɔdə nīńdə́ ní, kɔ́ɔ̄ a tél de kə́ yḛr bátə́ kadə̄ loo tíbə dɔn tə́. 32Yá̰a̰ malang ń deē a rāań kəla, adə̄ i bugə̄rū, aké i kūbə̄, aké i ngə̄rā, aké i ngong ní, ré nīńdə́ əsō dɔ tə́ anī, a tél i yá̰á̰ kə́ yḛr. A tə́gon̄ yá̰á̰ ní kə maná, ba majaĺ a nay dɔ tə́ bátə́ kadə̄ loo tíbə pá tá a tél yá̰á̰ kə́ *unjə̄ njáý njáý ɓáý. 33Dan ngáń dā̰ gə̄ ń noō tə́ ní, ré kógə̄ḿ əso kem jóó nánjə́ tə́ anī, yá̰á̰ kə́ kem jóó ní a téĺ yá̰á̰ kə́ yḛr ō, i gáŕ kadə̄ ā ī-tɔ̄ɔ̄ī jóó ní kɔ̄ɔ́ ō. 34Yá̰a̰ kəsa malang ń man̄ kə́ kem jóó ní tə́ aw̄ dɔ tə́ ní a téĺ yá̰á̰ kə́ yḛr. Yá̰a̰ ka̰ȳ malang, ká i kem yá̰á̰ rí tə́ gə̄gē, ré man̄ kə́ kem jóó ní tə́ aw̄ dɔ tə́ anī, a téĺ yá̰á̰ kə́ yḛr. 35Yá̰a̰ malang ń nīń nge kógə̄ḿ a əsō dɔ tə́ ní a téĺ yá̰á̰ kə́ yḛr. Ré i púr aláa i hīl̄ n nīń dā̰ ní əsō dɔ tə́ anī, ā ī-rāāī i yá̰á̰ kə́ yḛr tə́ adə̄ ā ī-tɔ̄ɔ̄ī kɔ̄ɔ́. 36Ba ré nīń dā̰ ní əsō i kum man̄ kə́ kem gárāá tə́, aké i kum man̄ kə́ a əɓa tə́ anī, man̄ ní i kə́ *unjə̄ njáý njáý. Ba deē ń a ɔdə nīń dā̰ ní kum man̄ ní tə́ ní, kɔ́ɔ̄ i de kə́ yḛr. 37Ré nīń dā̰ ní əsō i dɔ kum kōō kə́ yā dubə̄ tə́ anī, kum kōō ní to karī. 38Ba ré kum kōō ní i kə́ nūm̄ yā kəsa tá nīń dā̰ ní əsō dɔ tə́ anī, ā ī-rāāī kum kōō ní i kum kōō kə́ *unjə̄ njáý njáý tə́.
39Dan dā̰ gə̄ ń ā ə́saī tə́ ní, ré kógə̄ḿ oy anī, deē ń a ɔdə rɔ̄ nīnə́n ní, kɔ́ɔ̄ a tél de kə́ yḛr bátə́ kadə̄ loo tíbə dɔn tə́. 40Deē ń a əsa nīnə́n ní, kɔ́ɔ̄ a tə́go kūbə̄ yān gə̄ ō, a tél de kə́ yḛr bátə́ kadə̄ loo tíbə dɔn tə́ ō. Deē ń a ətō nīnə́n ní, kɔ́ɔ̄ a tə́go kūbə̄ yān gə̄ ō, a tél de kə́ yḛr bátə́ kadə̄ loo tíbə dɔn tə́ ō.
41Ngán kur̄ gə̄ malang ń a agən̄ nang tə́ ní, ā ə́saīdə́ alé, ā ī-rāāīdə́ i yá̰á̰ kə́ kɔgə̄ tə́. 42Ngán kur̄ kə́ kagə nang tə́ gə̄ malang, ngé gə̄ ń a agən̄ kə kemdə́ dɔ nang tə́ ō, ngé kə́ nja sɔ́ gə̄ ō, ngé kə́ njadə́ i ngá̰ý gə̄ ō ní, ā ə́saīdə́ alé. Ā ī-rāāīdə́ i yá̰á̰ kə́ kɔgə̄ tə́. 43Ī-lōōī kadə̄ ngán kur̄ kə́ kagə nang tə́ gə̄ ń noō rāān̄sí kadə̄ ī-téliī de kə́ yḛr gə̄. Ī-lōōī kadə̄ ɔdən̄ rɔ̄sí ō, ī-lōōī kɔdə rɔ̄sí ō, ī-lōōī kɔdə rɔ̄də́ ō, na sōgə́ ī-téliī de gə̄ kə́ yḛr gə̄. 44Tɔdɔ̄ mā i Kɔ́ɔ̄ɓē Nə́ɓā yāsí. Ā ɔ̄rī rɔ̄sí kɔ̄ɔ́ tayā tām̄ yāḿ tə́ kadə̄ sḭḭ̄ i de kə́ táĺ gə̄, tɔdɔ̄ mā i de kə́ táĺ, adə̄ ā ɔ́diī rɔ̄ dā̰ kə́ kagə nang tə́ gə̄ ń noō yā téləń de kə́ yḛr gə̄ alé. 45Tɔdɔ̄ mā i Kɔ́ɔ̄ɓē ń m̄-teē sesí kɔ̄ɔ́ dɔ nang kə́ Ejiptə tə́ yā kadə̄ mā i Nə́ɓā yāsí ní. Adə̄ majə kadə̄ sḭḭ̄ i de kə́ táĺ gə̄ tām̄ mā i de kə́ táĺ.
46*Ndū najə̄ kə́ dɔ dā̰ gə̄ tə́ ō, dɔ yel̄ gə̄ tə́ ō, dɔ dā̰ kə́ maná gə̄ tə́ ō, dɔ dā̰ kə́ kagə nang tə́ gə̄ tə́ ō n noó. 47*Ndū najə̄ ní i yā kadə̄ ī-gerīiń yá̰á̰ kə́ yḛr ō, yá̰á̰ kə́ *unjə̄ njáý njáý ō, dā̰ kə́ ásiī kəsa ō, dā̰ kə́ ásiī kəsa aĺ ō.
Currently Selected:
Ndū najə̄ yā Ngán Lebi gə̄ 11: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad