Ndū najə̄ yā Ngán Lebi gə̄ 2
2
Kōō kə́ ndējə̄ Kɔ́ɔ̄ɓē
1Ré deē kógə̄ḿ reē kə kōó yā ndējə̄ Kɔ́ɔ̄ɓē anī, ādə̄ i kōō kə́ rāā ndujə̄ kə́ lándə̄ tə́ ba ɓōkə́n̄ yibə̄ ō, kajaja ō dɔ tə́. 2Kɔ́ɔ̄ a aw̄ń rɔ̄ *ngé tun̄ yá̰a̰ gə̄ ń i ngán *Aaro̰ gə̄ ní tə́. *Nge tun̄ yá̰a̰ a ɔdə dɔ naā tə́ kə yibīí ō, kə kajaja malang ō, kem jīn kógə̄ḿ yā róō dɔ *loo tun̄ yá̰á̰ tə́. Nge ń noō i yá̰á̰ kə́ ɔjə kadə̄ *yá̰a̰ ndējə̄ ní i kə́ kadə̄ kə taá malang. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n. 3Gotə *yá̰a̰ ndējə̄ ń nay ní i tām̄ yā Aaro̰ tə́ nin̄ kə ngánən gēé. I yá̰á̰ kə́ táĺ ngá̰ý tɔdɔ̄ i gotə yá̰á̰ kə́ róō horoó kadə̄ Kɔ́ɔ̄ɓē.
4Ré ī-reē kə yá̰a̰ ndējēé ba i yá̰á̰ kə́ kəla púŕ tə́ anī, ādə̄ i mápá kə́ kanjə̄ kaa mápa kə́ ló̰ȳ kə yibīí, aláa i makəla kə́ kanjə̄ *kaa mápa kə́ rāā yibə̄ dɔ tə́ tá. 5Ré *yá̰a̰ ndējə̄ yāí ní i ndujə̄ kə́ ló̰ȳ ba kɔbə̄ kə gajoó anī, adə̄ i ndujə̄ kə́ lándə̄ ba ló̰ȳ kə yibīí ō, kanjə̄ kaa mápa ō tá. 6Báa ī-tétə̄ naā tə́ ō, ī-ɓōkə́ yibə̄ dɔ tə́ ō. Nge ń noō i kōō kə́ ndējə̄. 7Ré *yá̰a̰ ndējə̄ yāí i ndujə̄ kə́ ló̰ȳ tá ndīr̄ kə tawá anī, ādə̄ i ndujə̄ kə́ lándə̄ kə́ ló̰ȳ kə yibīí tá. 8Ī-reē kə *yá̰a̰ ndējə̄ ń toō ādə̄ *nge tun̄ yá̰a̰ kadə̄ aw̄ń ta *loo tun̄ yá̰á̰ tə́. 9Ni a un dɔ yā róō dɔ *loo tun̄ yá̰á̰ tə́. Nge ń noō i yá̰á̰ kə́ ɔjə kadə̄ *yá̰a̰ ndējə̄ ní i kə́ kadə̄ kə taá malang. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n. 10Gotə *yá̰a̰ ndējə̄ ń nay ní i tām̄ yā *Aaro̰ tə́ nin̄ kə ngánən gēé. I yá̰á̰ kə́ táĺ ngá̰ý tɔdɔ̄ i gotə yá̰á̰ kə́ róō horoó kadə̄ Kɔ́ɔ̄ɓē.
11Yá̰a̰ ndējə̄ kə́ rāā kə kōó ní, ā ī-rāāī *kaa mápa tū tə́ alé. Yá̰a̰ ndējə̄ kə́ yā róō kadə̄ Kɔ́ɔ̄ɓē ní, ā ī-rāāī kaa mápa tū tə́ aĺ ō, yibə̄ tejə tū tə́ aĺ ō. 12A adī Kɔ́ɔ̄ɓē kaa mápa ō, yibə̄ ō, i tītə̄ loo kadə̄ dɔ kōō kə́ kijə, banī ā ī-róōīdə́ dɔ *loo tun̄ yá̰á̰ tə́ tītə̄ *loo róō *yá̰a̰ ndējə̄ kə́ sēēn nel̄ Kɔ́ɔ̄ɓē alé.
13Yá̰a̰ ndējə̄ malang kə́ rāā kə kōó ní, ā ī-seĺ katə̄ dɔ tə́. Ā ə́yá̰ *yá̰a̰ ndējə̄ kə́ rāā kə kōó kanjə̄ seĺ katə̄ dɔ tə́ alé. Tɔdɔ̄ katə̄ i yá̰á̰ kə́ ɔjə dɔ *madə̄ naā ń Nə́ɓā yāí əhɔ seí ní#2.13 Tɔdɔ̄ katə̄ ... ní: Ā ī-rāā katə̄ tū yá̰a̰ ndējə̄ tə́ kadə̄ ndum alé, adə̄ katə̄ ní a ɔjə kadə̄ madə̄ naā ń Kɔ́ɔ̄ɓē rāā kə ngán Israel gēé ní a to ngándáńg.. I tām̄ najə̄ ń noō tə́ n ā ī-ɓōkə́ katə̄ dɔ yá̰a̰ ndējə̄ yāí gə̄ tə́ malang ní.
14-15Ré ā ī-ndējə̄ Kɔ́ɔ̄ɓē dɔ kōō kə́ kijə kə́ kem ndɔr̄ yāí tə́ anī, ī-gə́rē dɔ hor tə́ ba ɔ́sə, ī-rāā yibə̄ dɔ tə́ ō, ī-ɓōkə́ kajaja dɔ tə́ ō, pá tá ī-reēń. Nge ń noō i *yá̰a̰ ndējə̄ kə́ rāā kə kōó. 16*Nge tun̄ yá̰a̰ a ɔdə dɔ kōō kə́ ló̰ȳ kə yibīí ní sḛý naā tə́ kə kajaja gēé malang yā róō horoó. Nge ń noō i yá̰á̰ kə́ ɔjə kadə̄ *yá̰a̰ ndējə̄ ní i kə́ kadə̄ kə taá malang. I yá̰á̰ ndējə̄ kə́ róō horoó kadə̄ Kɔ́ɔ̄ɓē.
Currently Selected:
Ndū najə̄ yā Ngán Lebi gə̄ 2: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad