Najə̄ kə́ Majə yā Jeju ń Luk ndang ní 11
11
Jeju ɔjə ngé ndóō yá̰a̰ yān gə̄ loo ndɔ̄ȳ
(Á̰a̰ī Mat 6.9-13; 7.7-11)
1Ndɔ̄ kə́rēý tə́ Jeju ndi a ndɔ̄ȳ Nə́ɓā loo kógə̄ḿ tə́. Dan ń ni-ndɔ̄ȳ oy anī, nge ndóō yá̰a̰ yān kógə̄ḿ ədan na:
Kɔ́ɔ̄ɓē, ɔ́jə́jí loo ndɔ̄ȳ tītə̄ ń Ja̰a̰ ɔjəń ngé ndóō yá̰a̰ yān gə̄ ní.
2Anī Jeju ədadə́ na:
Ré ā ī-ndɔ̄yī anī, ə́daī na:
Bɔbə̄jí, ādə̄ de gə̄ tɔ̄ȳn̄ rīí,
ādə̄ *Ɓē ko̰o̰ yāí reē ō.
3Ādə̄jí yá̰a̰ kəsa yājí kə́ kə dɔ ndɔ̄ gə̄ kə dɔ ndɔ̄ loo gə̄ ń a tīīn̄ noó.
4Ī-mā̰ȳ rɔ̄í dɔjí tə́ najə̄ majaĺ yājí gə̄ tə́,
tɔdɔ̄ jḭḭ kɔ́ gə̄ jə-mā̰ȳ rɔ̄jí dɔ de gə̄ malang
ń rāān̄jí yá̰á̰ kə́ gōtə́ aĺ gə̄ ní tə́ ō,
ī-lōō kaw̄ sejí ta yá̰a̰ nāā gə̄ tə́ ō.
5Jeju ədadə́ ɓáý to̰ na:
Ré deē kógə̄ḿ dansí tə́ aw̄ kə madə̄n kógə̄ḿ, ba aw̄ rɔ̄ madə̄n ní tə́ dan loo tə́ ədan na: Madə́, ādə̄m̄ mápá tə́ mətá loo tə̄nā tə́. 6Tɔdɔ̄ madə́ḿ kógə̄ḿ reē mbā tə́ dɔḿ tə́, ba ngōn̄ yá̰á̰ sḛ́ý kə́ yā kadə̄ m-ādə̄n gətóo. 7Ba ré madə̄n ní to kə̄ kújú noō ba tūr̄ ədan na: Ī-lōō njə́ɓām̄, tɔdɔ̄ ta kújə i kə́ kutə̄ kɔ̄ɔ́ ō, jə-to nang tə́ kə ngánə́ḿ kɔ̄ɔ́ ō, adə̄ m-ásə kḭḭ dɔɔ́ kadī mápa alé. 8Anī ādə̄ m-ə́dásí, ká ré ni-ḭḭ dɔɔ́ adə̄n mápá ní loo madə̄ naā yādə́ tə́ aĺ gə̄gē anī, a ḭḭ dɔɔ́ tām̄ njə́ɓā ń deē ń toō njə́ɓān ngá̰ý tə́ ní yā kadə̄n yá̰á̰ ń gḛy ní. 9Banī mā m-ə́dásí na: Ī-dəjeī anī a adə̄n̄sí ō, ī-sāāī anī ā ə́ngeī ō, ə́ndaī ta róbə anī a teēn̄ yā kadə̄sí ō. 10Tɔdɔ̄ deē ń dəje yá̰á̰ ní kɔ́ɔ̄ a ənge ō, deē ń a sāā yá̰á̰ ní, kɔ́ɔ̄ a ənge ō, deē ń a sāā ní, kɔ́ɔ̄ a ənge ō, nge ń a ənda ta loo ní, a teēn̄ yā kadə̄n ō. 11Sḭḭ̄ bɔbə̄ ngán gə̄, i náā dansí tə́ n ré ngōn̄ kemən dəjen kānjə̄ anī a un lī yā kadə̄n ní? 12Aláa ré dəjen kaw kə̄njá anī, a un kókə́rang yā kadə̄n ní? 13Sḭḭ̄ ń i de kə́ majaĺ gə̄ ní ba ī-gerī kadə̄ ngáńsí gə̄ yá̰á̰ kə́ majə gə̄ anī, Bɔbə̄sí ń ndi dɔ rā̰ tə́ ní tá ger̄ kadə̄ *Ndíĺ kə́ Táĺ ngé gə̄ ń dəjenən̄ ní majə tɔȳ aĺ a?
Najə̄ ń Jeju tūr̄ əda ngé kəndā najə̄ dɔn tə́ gə̄ ní
(Á̰a̰ī Mat 12.22-30; Mark 3.22-27)
14Ndɔ̄ kógə̄ḿ tə́ Jeju tə̄ɓā ndíĺ kə́ majaĺ kə́ nge kɔgə̄ de gə̄ kɔr̄ najə̄ gə̄ adə̄ teē kɔ̄ɔ́ kem deē kógə̄ḿ kə́ a ɔr̄ najə̄ aĺ tə́. Dan ń ndíĺ ní teē anī de kə́ nge kɔr̄ najə̄ aĺ ní tél a ɔr̄ najə̄, adə̄ ɔr kum kósə de gə̄ ngá̰ý. 15Banī de kə́rēý gə̄ dandə́ tə́ ədan̄ na:
I Beljebul ngār yā ndíĺ kə́ majaĺ gə̄ ń adə̄n tɔ́gə́ á a tə̄ɓań ndíĺ kə́ majaĺ gə̄ ní!
16Kə́ madə̄ gə̄ nāānən̄, dəjenən̄ kadə̄ rāā yá̰á̰ kə́ yáā kógə̄ḿ yā kɔjəń kadə̄ tɔ́gə yān ní i tɔ́gə́ kə́ ḭḭ i rɔ̄ Nə́ɓā tə́. 17Banī Jeju ger̄ gír̄ kə́ kemdə́ tə́ adə̄ ədadə́ na:
Ɓē ko̰o̰ malang ń de kə́ kemeé gə̄ mbātə́n̄ naā ní a tḭ́ḭ kɔ̄ɔ́, adə̄ kújə́ kə́ tū tə́ gə̄ a tə́sōn̄ dɔ naā tə́. 18Dan ń ə́daī na mā na m̄-tə̄ɓā ndíĺ kə́ majaĺ gə̄ na i kə tɔ́gə́ kə́ Beljebul adə̄m̄ ní, ré *Sətan rɔ̄ɔ̄ dā̰ rɔ̄n nəkɔ́ Sətan anī loo kadə̄ ɓē ko̰o̰ yān a ndi i ba̰ý? 19Ba ré mā m̄-tə̄ɓā ndíĺ kə́ majaĺ gə̄ i kə tɔ́gə́ kə́ Beljebul adə̄m̄ anī, ngé ndóō yá̰a̰ yāsí gə̄ ní a tə̄ɓān̄də́ i kə tɔ́gə yā náāá tā? I beé ní i nin̄ kɔ́ gə̄ n a télən̄ ngé gān̄g sarya dɔsí tə́ gə̄ ní. 20Kə́ rɔ̄kum tə́ ɓáa mā m̄-tə̄ɓā ndíĺ kə́ majaĺ gə̄ i kə tɔ́gə yā Nə́ɓāá. Kumən na *Ɓē ko̰o̰ yā Nə́ɓā reē ugə̄ rɔ̄sí tə́ kɔ̄ɔ́.
21Ré de kə́ dəngam kə́ ngan̄g kə́ aw̄ kə yá̰a̰ rɔ̄ɔ̄ gēé ngɔ̄m̄ kújə yān anī, yá̰á̰ kə́ yā kɔdə rɔ̄ yá̰a̰ kənge yān a gətóo. 22Ba ré de kə́ dəngam kə́ rang kə́ ngan̄g tɔȳn reē tetən rɔ̄ɔ̄ anī, a taā yá̰á̰ rɔ̄ɔ̄ yān gə̄ ń əndā tɔ́gən dɔ tə́ ní ō, a nə̄ɓō yá̰a̰ kənge yān gə̄ ń ɔy ní kɔ̄ɔ́ malang ō.
23Deē ń i seḿ aĺ ní kɔ́ɔ̄ i madə̄ ba̰ā̰ḿ ō, deē ń kán̄ yá̰a̰ kə̄ naā tə́ seḿ aĺ ní kɔ́ɔ̄ a tə̄ndā a tḭ̄ḭ̄ i mbée ō.
Ndíĺ kə́ majaĺ kə́ tél reē gogə́ kem deē tə́
(Á̰a̰ī Mat 12.43-45)
24Ndíĺ kə́ yḛr ń teē kɔ̄ɔ́ kem deē tə́ ní, aw̄ dáȳ beé kem loo gə̄ kə́ mángá tə́ sāāń loo kə́ yā koōń rɔ̄n. Dan ń ənge aĺ anī əda na: M-ā m̄-tél yā kaw̄ gogə́ kem kújə yāḿ ń m̄-teē kemeé tə́ ní. 25Ni-tél aw̄ gogə́ anī ənge loo i kə́ kɔy ō, yá̰a̰ gə̄ i kə́ tə́ndādə́ kə gōó gōó ō. 26Anī aw̄ sāā ndíĺ kə́ rang gə̄ kə́ yḛr ngá̰ý tɔȳn gə̄ sīrí. Reē sedə́ adə̄ ndin̄ seneé kem kújə́ ní tə́. Loo ń noō tə́ ndi yā deē ní kə́ ta tɔ̄l̄ ta tə́ majaĺ ngá̰ý tɔȳ ndin kə́ kété.
Ndi majə kə́ rɔ̄kum
27Dan ń Jeju əda najə̄ ń noō ní a, dəyá̰ kógə̄ḿ un ndūn kə̄ dɔɔ́ dan kósə de gə̄ tə́ ədanneé na: Dəyá̰ ń ətōī kemən tə́ ō, íl mban ō ní, yān i rɔ̄nel̄!
28Banī Jeju tél əda na:
Ɓá tā ba i ngé koō najə̄ yā Nə́ɓā ba rāā yá̰á̰ ń Nə́ɓā əda ní gə̄ n i ngé rɔ̄nel̄ kə́ rɔ̄kum gə̄ ní!
Jeju mbātə́ rāā yá̰á̰ kə́ yáā kadə̄ de gə̄ a̰a̰n̄
(Á̰a̰ī Mat 12.38-42)
29Dan ń kósə de gə̄ kánə̄n̄ naā ngá̰ý kə̄ dɔ Jeju tə́ anī ni-ɔr̄ najə̄ əda na:
De kə́ ngɔlaā gə̄ majən̄ alé. Nin̄-sāān̄ ka̰a̰ yá̰á̰ kə́ ɔjə kadə̄ i Nə́ɓā ń rāā yá̰a̰! Banī yá̰á̰ kə́ rang kə́ Nə́ɓā a rāā yā kɔjəńdə́ yá̰a̰ gətóo, i yá̰á̰ kə́ yáā yā Jonas tá ngóy. 30Tītə̄ ń yá̰á̰ kə́ yáā yā Jonas *nge koō ta i yá̰á̰ kə́ Nə́ɓā rāā ɔjəń de kə́ Ninibə gə̄ yá̰á̰ ní, yá̰á̰ kə́ yáā yā Ngōn̄ Deē i yá̰á̰ kə́ Nə́ɓā a rāā yā kɔjəń de kə́ ngɔlaā gə̄ yá̰a̰ ō. 31Ndɔ̄ sarya tə́ anī mban̄g kə́ dəyá̰ kə́ mbɔ́r ɓē kə́ geleé tə́ a ḭḭ dɔɔ́ naā tə́ kə de kə́ ngɔlaā gēé yā gān̄g sarya dɔdə́ tə́, tɔdɔ̄ ni-ḭḭ ta ngóy dɔ nang tə́ sa̰y nú reē koō kum kedə̄ yā Salomo̰ tə́, ba kə́ tɔȳ Salomo̰ i laā. 32Ndɔ̄ sarya tə́ anī de kə́ Ninibə gə̄ a ḭḭn̄ dɔɔ́ naā tə́ kə de kə́ ngɔlaā gēé yā gān̄g sarya dɔdə́ tə́, tɔdɔ̄ nin̄ tūrə̄n̄ háĺdə́ dan ń oōn̄ najə̄ yā Nə́ɓā ń Jonas ɔjədə́ ní, ba kə́ tɔȳ Jonas i laā.
Kum deē i hor lámba yā dā̰ rɔ̄n
(Á̰a̰ī Mat 5.15, 6.22-23)
33Deē əndā hor tū lámbá tə́ i yā kəndān loo ɓɔ̄ɔ̄ rɔ̄ tə́ alé, banī i yā naān tū kāgə̄ hor lámbá tə́, yā kadə̄ ngé kudə kújú gə̄ a̰a̰n̄neé loo. 34Kumií rāā rɔ̄n i hor lámba yā rɔ̄í tə́, adə̄ ré mo̰y rāā kumií aĺ anī rɔ̄í malang i kum loo kə́ unjə̄ kow tə́. Ba ré mo̰y rāā kumií anī rɔ̄í malang i kum til tə́. 35I beé ní ə̄ndā ma̰ȳ loo kə́ unjə̄ kow kə́ kemií tə́ á̰a̰ā̰ ké i til aĺ wa. 36Adə̄ ré rɔ̄í malang i kum loo kə́ unjə̄ kow tə́ kanjə̄ kadə̄ núsən kə́rēý sḛ́ý i kum til tə́ anī, rɔ̄í ní a ndi kum loo kə́ unjə̄ kow tə́ kə taá malang i tītə̄ ń hor lámba unjə̄ń dɔí tə́ kow ní.
Jeju kɔ̄l̄ kə Parijiyḛ gə̄ ō, ngé ndóō de gə̄ ndū najə̄ gə̄ ō
(Á̰a̰ī Mat 23.1-36; Mark 12.38-40)
37Dan ń Jeju ɔr̄ najə̄ oy anī, nge ndóō de gə̄ *ndū najə̄ gə̄ kógə̄ḿ mērən ta kəsa yá̰a̰ ɓēé looneé. Jeju udə kújə yān tə́ ba aw̄ ndi ta yá̰a̰ kəsa tə́. 38Dan ń *Parijiyḛ ní a̰ā̰ kadə̄ Jeju tə́go jīn tá əsań yá̰a̰ aĺ anī, ɔr kumən seneé ngá̰ý. 39Anī Kɔ́ɔ̄ɓē ədan na:
Sḭḭ̄ *Parijiyḛ gə̄, ī-tə́goī gidə kópə ō, gidə səmbē kə́ laa ō, banī ngur ɓogə i ngá̰ý kemsí tə́ ō, kemsí ndul ngá̰ý ō. 40Sḭḭ̄ i de kə́ ger̄ yá̰a̰ aĺ gə̄! Nə́ɓā ń rāā gidə yá̰á̰ ní rāā kemən ō aĺ a? 41I beé ní ādī ngé ndoō gə̄ yá̰a̰ kə́ kem kópə yāsí gə̄ tə́ ō, kə́ kem səmbē yāsí gə̄ tə́ ō, loo ń noō tə́ ɓáa yá̰a̰ malang i kə́ *unjə̄ njáý njáý tām̄ yāsí tə́.
42Rɔ̄ ndoō i yāsí sḭḭ̄ *Parijiyḛ gə̄! Tām̄ sḭḭ̄ ɔ̄rī dɔ kámbə kotə ō, kámbə ru#11.42 Kámbə ru i kámbə́ kə́ ong kə́ a ndīrə̄n̄neé yá̰a̰ ō, a rāān̄neé dáwá ō. ō, mbī kámbə́ kə́ tayā tayā gə̄ ō kə́ nge ko̰ kutə ādī Nə́ɓā ō, banī yá̰á̰ kə́ gōtə́ ō, táŕ Nə́ɓā ō, ɓáa usəsí dɔ tə́ alé. Tá i yá̰a̰ gə̄ ń toō n majə kadə̄ ə̄nīī rɔ̄sí rak ī-rāāīdə́ kanjə̄ kəya̰ ngé gə̄ noō kɔ̄ɔ́ ō ní.
43Rɔ̄ ndoō i yāsí sḭḭ̄ *Parijiyḛ gə̄! Tām̄ nel̄sí ndi kété no de gə̄ tə́ kem kújə́ kán̄ naā gə̄ tə́ kadə̄ de gə̄ a̰a̰n̄sí ō, nel̄sí kadə̄ de gə̄ rāān̄sí lápə́ya rɔȳn̄neésí ndágə loo gə̄ tə́ ō. 44Rɔ̄ ndoō i yāsí! Tām̄ sḭḭ̄ ī-toī i tītə̄ dɔ ɓádə gə̄ ń deē a̰ā̰ alé ba njə̄rā dɔ tə́ ní!
45Anī nge ndóō de gə̄ *ndū najə̄ gə̄ kógə̄ḿ əda Jeju na:
Ngoljí, ɔ̄r̄ najə̄ tītə̄ ń noō anī ī-tájə̄jí i jḭḭ ō. 46Jeju tūr̄ ədan na:
Sḭḭ̄ ngé ndóō de gə̄ *ndū najə̄ gə̄, rɔ̄ ndoō i yāsí ō! Tām̄ ī-tə́ndāī yá̰á̰ kə́ kɔȳ kə́ nel̄ kətō aĺ gə̄ dɔ de gə̄ tə́, ba sḭḭ̄ kɔ́ gə̄ ɔ́diī yá̰a̰ gə̄ ní kə ta ngōn̄ jīsí kógə̄ḿ sḛ́ý aĺ bátə́. 47Rɔ̄ ndoō i yāsí! Tām̄ sḭḭ̄ ī-rāāī dɔ ɓádə́ *ngé koō ta gə̄ majə, tá i kaasí gə̄ n tɔ̄lə̄n̄ *ngé koō ta gə̄ ngeé ń toō ní. 48Dan ń ī-rāāī tītə̄ ń noō ní ɔ́jiī i kə̄ ndágá kadə̄ sḭḭ̄ ī-ndigiī yá̰á̰ ń kaasí gə̄ rāān̄ ní. Tɔdɔ̄ nin̄ i ngé tɔ̄l̄ *ngé koō ta gə̄, ba sḭḭ̄ i ngé rāā dɔ ɓádə́də́ gə̄! 49I tām̄ najə̄ ń noō tə́ n Nə́ɓā əda kə kum kedēé na: M-ā m-ə́la kə *ngé koō ta gēé ō, kə ngámbang kəla gēé ō yā kadə̄də́. Nin̄ a tɔ̄lə̄n̄ ngé kə́rēý gə̄ dandə́ tə́ ō, a rāān̄ ngé kə́rēý gə̄ ndoō tə́ ō. 50Adə̄ *ngé koō ta gə̄ ń əlan̄ gír tɔ̄l̄də́ i ta kəla gíŕ yá̰a̰ gə̄ tə́ nú ní, a dəjen̄ de kə́ ɓōólaā gə̄ mósə́də́, 51a əlan̄ gír i dɔ mósə Abel tə́ bátə́ kadə̄ ugə̄n̄neé dɔ mósə Jakari ń oy dɔ dán loo *tun̄ yá̰á̰ tə́ kə *loo kə́ táĺ tə́ ní. A̰á̰ā̰, m-ə́dásí najə̄ kə́ rɔ̄kum, a dəjen̄ de kə́ ngɔlaā gə̄ mósə de gə̄ ń noō malang.
52Sḭḭ̄ ngé ndóō de gə̄ *ndū najə̄ gə̄, rɔ̄ ndoō i yāsí! Tām̄ lakélé ń deē a teēń ta róbə́ yá̰a̰ ger̄ ní, sḭḭ̄ úniī kɔ̄ɔ́. Sḭḭ̄ kɔ́ gə̄ údiī kemeé aĺ ō, ngé gə̄ ń a sāān̄ kudə ní a sḭḭ̄ ɔ̄gīdə́ kudə kɔ̄ɔ́ ō.
53Dan ń Jeju teē kɔ̄ɔ́ ɓē *Parijiyḛ ní anī ngé ndóō de gə̄ *ndū najə̄ gə̄ ō, *Parijiyḛ gə̄ ō, əhɔnən̄ kemdə́ tə́ ō, dəjenən̄ najə̄ dɔ yá̰a̰ gə̄ tə́ gír i kósə ngá̰ý ō. 54Nin̄-sāān̄ tan kə najá ké a əda yá̰á̰ kə́rēý kə́ gōtə́ aĺ wa.
Currently Selected:
Najə̄ kə́ Majə yā Jeju ń Luk ndang ní 11: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
