1CO - BUU 3
3
Wa Ndu Izhi
1Imiri vayi rimi hu Izhi, riwa me ye ri yi, me ran tre ri yi ka wawa wa he ri Yuu Tsitsri riwa ari tsro wa gba nkon ran, tsede me tre ri yi ka wawa wa ran kpa Izhi ran, me tre ri yi ngamba ritu bi kpa Izhi sisa gyen ri. 2Me no yi tre Izhi ri huiri ka bibi riwa iyii ri no vren sisan. Me ran tre riyi ri bibi tre riwa a he yaa to ran ritu bi ran tsra riwa bi kpa tsro-a rina ko zizan, bi ran tsra riwa bi kpa tsro nyi rina. 3Me tre ri yi ngamba ritu hari zizan bi yo sron ri bibi kya riwa isron mbi ri wa, bi ti huu ri ngambi, bi ri ri janyu ri ngambi, rinyi ran tsro ri bi ki ka nji wa mgbumgbrume nyi ran? Bi ran ri ti ka nji wawa wana to Izhi ran? 4Inde njo mbi tre ri,<<Me huu Bulus,<<Nga wari rimi mbi wa tre ri,<<Me he wa Apolo,<< Rimba ran tsro ri bi he ka mgbron wawa wati meme ti ran?
5Zizan me wa no yi to bibi nji riwa ame Bulus nga Apolo ki he ki he wa ndu Izhi inkankshe Izhi no ta ndu no ta ki tsro yi nkon riwa bi kpanyɨme ri Yeso, haambu ki ti ndu riwa Izhi no ta ki ti. 6Ame Bulus me chu wɨlokpi-a, nga Apolo nye bwa ima, ama Izhi nye no no zhuu-mbe. 7Ri ngamba, nji riwa a chu wɨlokpi, nga nji riwa a bwa ima, wa ran he kyari ran, ama Izhi a han ritu wawu nye no mbe-a no zhu. 8Inji riwa a chu ri nji riwa a bwa ima irimɨremba he riri ama ko ngan rife kya ritu bibi ndu riwa a ti. 9Ame Bulus nga Apolo ki he ka wa ndu Izhi, biyi wanji Korantus nye bi he ka zhu riwa Izhi, bi yi bi he koo riwa a he wa Izhi.
10Ri ndindi riwa Izhi no wen, me dzi nchi tra ka nji riwa a to tu ndu mme, nga njo ri nkan nye ri mme ritu wan, ko ngan riwa ari mme no mɨlan ya mme riwa ari mme. 11Injo ran he riwa ari dzinchi mme ri nkan han riwa Yeso Kristo dzi ran. 12Inde njo mme ritu nchi tra nyi riwa a tindu ri zanariya nga ri azurfa nga tita wa kpan riirii, ama inde wandu Izhi wa ran tindu mba tsra ran, wa he ka wa mme ko wawa wa tindu ri kpi mme wawa wa he huiri woto wa, konkron, ri mgbakpu nga giga, 13chachu ri ko ngan rito bibi ndu riwa ko ngan ti ritu chachu riwa Yeso ri ye, ari no kyawa wanyi no wa he ri rira, iri Izhi ye ri wuru, nga iwulu ri tsra bibi ndu-a riwa ko ngan ti. 14Inde indu nji riwa a ti a bi, ari kpa ife ri ndu wan. 15Inde indu nji-a time, nji-a riti asara ko inde a fe kpachuwo, ama ari zhu ka a dzu rimi wulu nye zhu.
16Bi ran to ri biyi kyumbi bi he Tsitsri bubu son riwa Izhi riwa ari son rimi mbi ran?
17Inde njo kpa bubu Tsitsri riwa Izhi ri son time, Izhi ri kpa nji-a time, ritu bubu son Izhi he Tsitsri, nga biyi nye bi he bubu Tsitsri riwa Izhi-a.
18Ran gyuru ngambi ran. Inde iri rimi mbi a yonga wawu wɨri bibi ti ri nzan nyi, ari he nji ri<<Mkpɨran<<Ritu riwa Izhi ri kɨma-u ti nji ri wiwɨri. 19Wiwɨri ri mgbumgblume nyi he mkpɨran kusi Izhi. Bibi riwa wa ngan ri:<<Wari wa yonga wawa wa wiri, ama Izhi ri tindu ri wiwɨri sron mba, ran ko wa,<< 20Nga tre wanyi ngawen wa he rimi ngan ri mbe Izhi:<<Bachi to ri irimɨren wa wiwɨri he kukulu.<< 21Ritu ngamba no njo no ran kpo ngawan ritu nji ran ritu ko ngye he wambi. 22Ko Bulus, ko Apolo, ko Kefas ka mgbumgblume, ko vɨri, ko kuu ko zizan ko kusi, ikya wa wanyi wa wambi wawu, 23biyi bi he wa Kristo nga Kristo he wa Izhi.
Currently Selected:
1CO - BUU 3: BUU
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria