ACT - BUU 27
27
Bulus a Gra ri Nvu Mma hi ri Roma
1Riwa wana wa wari wurunde rimi nvu ima hi ri gbu Italiya, waka ka Bulus nga nji wari wawa wa tre wa ka no nji ri klukpa ri, wa yonde wan ri Yuliyas, ri kpa wa lo kpa ngori riwa Kaisar Augustus. 2Riwa ki gra ri nvu ima ri riwa Adaramitiya, riwa a ran wa ran wurunde hi ri gbu wari kusi Asiya, kika ran hi, Aristakus nji tasalonika ri gbu Makidoniya ka he rita. 3Ri mibrerɨa wan kika hi ri sidon, Yuliyas ka ti dindi ri Bulus, ka no ri no hi ran to kpanwan ri nowa dzon wu. 4Riwa ki wurunde ri bubu wan ri nvu ima-a kika kɨma hu kugon kubrus, ritu gungu a yota kusi. 5Riwa ki rugran ba riwa a he kusan gbu Kilikiya nga Bamfiliya, kika ka zhu ri Mira ri gbu likiya. 6Ŋba nji ri klukpa ka fe nvu ima ri Ishandariya riwa a ran hi ri gbu italiya, ka kata sro rimi wan. 7Kika ti vi ri vi ki ri ran hi rere, riwa kika zhu riya ri gbu kinida, ŋba ngungu ka nota ki ran hi kusi ran, kika hu bubu riwa ngungu a ran ran ti ran ku gbu Salmoni. 8kiran hu ri kusan nyu ba ri ya, kika zhu ri bubu riwa wa ran yo ri bubu riwa wa kpa nyɨwe riwu, riwa a he kusan gbu Lasiya.
9Tunde wa no vi bran, izren ngawen he meme, ivi ri vu nyu a vuyɨba, Bulus ka ran nghɨron wa, 10ka lawa ri,<<Biyi nji wamba, izren nyin ri he ri iya nga meme kigbu, a ran ri kpi nga nvu ima nkakshe ran, nga wa sron mbu ngawen.>> 11Ama rinkon nji ri lokpa-a, ka yo sronwan ri nji riwa a ri tru nvu ima-a kankshe nga nji ri nvu ima-a, a ran ritu kya riwa Bulus a tre ran. 12Riwa yake bubu ri tu won ran he ka bibi nvu ima nowa ri su rimi wan ran wari wa ngɨzhi shawara ye ri ki wurunde ri bubu wan, ko ka ari ya ngɨzhi ta hi ri Finikiya, a he bubu ri tu Karita, riwa ari ya kusi nzan nga kusi yawulu, isu ka fe wa ri bubu wan.
Wo Wulu ka Ti ri Nne
13Riwa gungu ka ran zhu ri kudu ran fu, rimi mba no yosron mba no nowa kya riwa wa wa, imba waka gbi anka jo waka hu kugran ri meme karita hyure ri gashi. 14Aran ban vi bran ran, nchon gungu ri ka ye ka ti zhu ri bubu riwa ima a kagon wan. 15Riwa gungu a wuru nvu ima-a, ka ran to kɨma si ya hu ran, kika kambu ran hi me. ka ran kɨbu ta. 16Riwa ki hu ku gran pka gbu riwa ima a kɨshu wu ti ri a he kauda kika fe ki ri sangbɨren ri nvu ima mbu no he wa mbu. 17Riwa wa gbi tsitsa nvu ima-a yo rimi nvu ima ri bren, waka ti wiwɨri wari lowa jiji ri ŋchi nvu ima ri bran, waka fon wu rega. Don no tsuwan no ran zhu wa rega ri meme nzan ri sirtis riwa ari mɨye ko ngye, waka gɨzhi wakpi wari chu wu wo ka ran hi ngawan. 18Nchon ngungu ka ran nota rimɨren kpunji, mibrerɨa wan waka gbuchi ran vu kpi riwa nvu ima-a a vu ran vɨra, rimi ima. 19Ri vi ri tra wan, wawa ritu mba waka vu kpi ndu nvu ima ta rega. 20Riwa ki ti vi bran,ki ran to ko ntsen ran, ka gungu nga wowulu ka ran wuru ta ri bubu wan, kika zhu ri sron mbu ri ki ran jɨbu ran. 21Ritu ki ti vi hari ki ran ri kyari ran, Bulus ka wulunde krinde ri tsutsu mba, ran tre <<Biyi nji, riwa bi wo tre won, bi ri ran wulunde ri gbu riwa ima kshu-u ti ri karita bi ri gra rimi nkon riwa ki zhu ri hasara ran. 22To zizan me no yi tre bi ri vu sron, ritu njo ran rasa rewan rimi mbi ran: ari ra jɨbu wo nvu ima-a. 23Ri chu iren ivren ndu Jii riwa ame me yo-u nyen, nga miri hu, ka kɨri kusan won, 24ran tre, <Bulus ran ti sisiri ran, A wu wu kɨri ri kusi Kaisar ichu Roma, Izhi ri losron riwu ran tre ri wa kpanwen, nji riwa a hu-u ari nawo. 25Ritu ngamba, bi ka vu sron, biyi nji, ritu me nyime ri Izhi ri ti bibi riwa a lawen-a ngamba nyen wati. 26Ama fa lele nyen waka yi vɨra ri gbu riwa ima kshu-u ti.>>
27Rimi chu ri wuru don nza, nga ri vi wurudon nza waka dzu ta ri sakaka ri ba rimi nne ri Adariya, ri tsutsu chu wawa wa ran tru nyu ima wa ri ke he hyure ri meme. 28Waka tsra ronɨma ri dzidzan, waka fe idza ngo ri ri se hari, riwa ki ban kusi hi, ki ran bru tsra wu to ki fe ngamba idza ton. 29Ritu wa ran ti sisiri nowa ran kawa rega ritu tita ran, waka bru fon anka ngbɨre nza ri kugon nvu ima ka rega, wa ran bre Izhi no me bre hi ri kpan mbre. 30Wa tru nvu ima wana wari tsustsu rimi nvu ima-a, waka yo si ri nvu ima ri tsitsa-a rimi ima, wari ran ti kama wa wa wa ri fon ŋchi nvu ima taga. 31Ama Bulus ka la wa rinkon wa klukpa nga wa klukpa ka nji wa nyi wa ran kɨri rimi nvu ima ran, ba kyari riwa bi ti bi ri kpa ngambi chuwo. 32Wa klukpa waka suru jiji ri nvu ima tsitsa rega wari chuwo no hu ima. 33Riwa mibreka gon ran kpan Bulus ka bre wa ri nowa ri viri ran tre,<< Luwa he vi ri wurudon nza bi ran ri kyari ran bi ki ri gben. 34Ritu kamba, misu bi ri wakyari ri ritu lafiya ŋbi, tunde a he ri nfutu ran yɨra njo rimi ŋbi ran. 35Riwa a la ngamba Bulus ka ban ŋɨma juju yɨmo ran ngɨri ri Jii kusi mba wawu, mba ka fɨren ran ka ri. 36Wawu mba waka wulunde ki, wawa kyumba waka ran riri 37Kita wawu mbu rimi nvu ima-a ki he gbigba hari ri setangban don tanren. 38Riwa wa ri wari hwɨshi, waka ran rege ri nvu ima-a, waka ran ka Alikama ran rega rimi ima.
39Ka me bre ka kpan wa tru nvu ima wa ran to ri bubu riwa wa ngɨzhi ran, ama waka milan ya iwɨri ri gbuchi ri meme ngaghɨmu, waka de tre ri, ikya riwa a ri he ki nowa ngji nvu ima-a hi zi ri bubu ngaŋɨmu. 40Waka sii wa nkan wawu wari kawa chuwo ri ima, wari ran si bubu riwa wa lo nvu ima a nga waka ran zhu flafla ri chi nvu ima ri gungu ka tru wa ri kpa gashi. 41Ama riwa ki ke ri bubu riwa ima ga wa tru nvu ima-a hi ri bubu ngaŋɨmu, hari ichiwan ka fon ka ran manaa ri ngaghɨmu. A gbuchi ran nzu gbre bre ritu isra shi ima-a. 42Wa klukpa wa ran wa wari wuu nji wawa wa vu wa tre bibi riwa wa ran to dran ima ran jɨbu wo ran. 43Wawu rinkon wa klukpa a ran wa ran kpa Bulus chuwo ran nowa ran ti kya riwa wa hi ran ti-a ran, ran tre ri nji riwa aya ziran ima ka za gra ran dran zhu. 44Ngbron mba wari wa hon ritu nibrekonkron , wari wa hon ritu ŋibrenvu ima-a. Ri ngamba, wawu mba waka zhu ri nyu ba.
Currently Selected:
ACT - BUU 27: BUU
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria
