JHN - BUU 12
12
Wa gban nye ri Yeso ri Batani
1Iro ri dzagran a don vi tanren imba Yeso ka hi ri gbu Batani bubu riwa Lazaru nji riwa Yeso a ta shɨme rimi kuu a ran son. 2Ri bubu wan wa ka zhu la ri yawulu riwa Marta nye a ran ga la-a; Lazaru a he rimi wawa wa son ran ri ri-a ri Yeso 3Imba Meremu ka ban nye ri kpangu raro riwa a ti ree riwa wa ti-u ri nardi ran gban wu ri Yeso ri dza wan ko ran ka mfutu wan gban wu wa kpɨrewan inguu raro riwa nye-a ka shu ko-a wawu. 4Ama Yahuda Iskariyoti iri rimi mirindu Yeso riwa wawu nye ri ka Yeso re, 5<<Ingye ti wa ka nye mu reri nkren kigbu riwa lebra ri fe rimi vi ngo tra wari ka nkren-a no wawa wati yaa ran?>> 6Yahuda a tre tre nyi a ran ritu riwa a nyɨme wawa wati-u yaa ran, ama ritu riwa a he nji ri yibi wati yaa wawu nye a ran ngji kpo riwa wa sro nkren mba, ari ye ka ye yibi rimi nkrn-a.
7Yeso ka tre ri,<<Ka-u chuwo a ka-u dzi ritu riwa a kɨma bubu riti ri gben vi riwa wa no wen yɨwi. 8Ai bla vi bi he iwa wawa wana ri kyari ran ama a ran he bla vi nye bi he ri me ran.>>
Wa shutu riwa wa Wuu Lazaru
9Riwa ishutu nji Yahuda kigbu wa wo iri Yeso a he ri bubu wan, wari wa ran ye ritu Yeso ri kankshe ran ama ritu riwa wa to Lazaru riwa Yeso a ta shɨme ri mi kuu ngawen. 10Imba wa rinkon wa sro yii waka shutu riwa wa wuu Lazaru ngawen, 11ritu Lazaru nye nji Yahuda kigbu wa ka wa ndu Izhi don wari kpanyɨme ri Yeso.
Yeso a Gra ri Urushelima Ka Ichu
12Ri mibreri wan nji kigbu wawa wa ye ri ro ri dza gran wa wo ri Yeso he nkon ri hi Urushelima.
13Waka vu wa mfran rii wari zhu wari zon-u ri nkon wa nzu raan wari ran tre ri,
<<Igibree wa Izhi!>>
<<Ndindi wan he wa riwa ari ye rimi nde Bachi!>>
<<Ndidi wan he wa chu Israila!>>
14Riwa Yeso a fe vren lamkpron ri ran hon bibi riwa wa ngaa ri,
15<<Ran ti sisiri ran biyi wa nji gbu Siyona,
ingye ichu mbi ri ye,
ritu lamkpron mba.>>
16Ri mimɨlan imiri ndu wan wana to tu wan ran ama kugon riwa wa no Yeso mkpen, waka taka ri wa nganngan nyi ritu wan nga kyawa-a wa he bibi riwa wa ngaa-a.
17Wa nji wawa wa he ri wa ri vi riwa a yo Lazaru ri no zhu rimi bubu gru, waka sondu ran la nji kya riwa Yeso a ti. Wa nji wawa wa he iwa ri vi riwa a yo Lazaru ri no zhu rimi bubu gru waka sondu ran la nji kya riwa Yeso a ti. 18Inji kigbu wa hi bubu kpa ri nkon ritu wari don wo kyawa wa de sisiri riwa a ti. 19Farisa wa ka tre ri ngamba ri,<<To mba yi, kiran ri vu tu nji nyi ran, to mgbumgblume wawu wa hu.>>
Helenawa wari wa wa Yeso
20Rimi wawa wa ye ro-a riwa wa ye kɨbu mgbazhu ri Izhi Helanawa wari wa he. 21Wa ka ye ri Filibu nji ri Batsaida riwa Galili waka tre riwu ri,<<Inji rinkon ki wa ki to Yeso.>>
22Filibu a hi ran ka la Andarawus, imba wawa ngamba waka hi wari ka la Yeso. 23Imba Yeso ka tre ri wa ri,<<Ivi ti riwa wa gbre vren nji. 24Kpunji tre me la yi, inde wana chu wɨlo alikama no kuu ri meme ran ari son ri kankshi wan. Ama inde a kuu nye ko ari de miri bran. 25Inji riwa a nyɨme sron wan ari hon-u, nji riwa a kawan ri sron wan ritu won ri mgbumgblume nyi a ka-u ri ri dzi riwa ari fe wu hi riwa a ran kre ran. 26Inji riwa a ri hu wen a he no hu wen hi bubu riwa me he, nji riwa ari hu wen ari son ri me, A ti won ri no ko ngan riwa ari hu wen mkpen.
Yeso a tre ritu Kuu wan
27Zizan ari kri wen ri sron ingye nye me tre enron? Me tre ri,<A wu A ti ban vi nyi zho ri mo?>Onhon, ai me ye ri sen ritu vi nyi nye. 28A wu A ti, no nde wen mkpen!>>
Imba iran ka zhu ri shu ran tre,<<Ai me gbuchi no mkpen-e, me bru no mkpen sro ngaan.>>
29Riwa nji wawa wa ki ri bubu wa wo raan-a,<<Inzan ka yira.>>Wari waka tre ri,<<Ivren ko Izhi nye tre ri wu.>>
30Yeso ka tre ri wa ri,<<Iraan nyi ye ritu mbi nye, a ran he ritu won ran. 31Zizan nye wa bla tre ri mgbumgblume nga zizan nye wa dzi nji ri kpanchison ri nji wa mgbumgblume nyi. 32Kugon riwa wa nzu wen zho ri meme, me gbi wa nji wawu hi ri ngawon.>> 33Yeso a la nganyi ritu riwa ari tsro bibi kuu wan riwa ari he.
34Inji waka tre ri Yeso ri,<<Doka mbu la ta ri Kristo ran kuu ran hari hi, ko wu tise wuri tre ri wa nzu vren nji? Ingaan nye he vren nji-a?>>
35Yeso ka tre riwa ri, <<Ikpan he ri yi ri vi tsawen zren yi tu ka ikpan he ri yi no bu no ran fe yi ran, nji riwa ari zren rimi bu a ran to bubu riwa ari hi ran. 36Kpanyɨme ri kpan-a tu ka bi he ri wu, ritu no yi he miri wa kpan.>>
Nji Yahuda wa Sondu ri Kamba ri Yeso
Kugon riwa Yeso a tretre nyi ran kɨma ngawan tsriri ri wa. 37Ko riwa Yeso a si ti kyawa wa de sisiri kigbu kusi mba ri ngamba wa ran kpanyɨme ri wu ran, 38Rinyi a he ngamba ritu no kya riwa Ishaya, nji ri la tre ri kusi a tre ri,
<<A wu Bachi ingan kpanyɨme ri tre mbu? Ngha ri ngan nye wa tsro mkpen Bachi,>>
39Ri ngamba wana kpanyɨme ran bibi riwa Ishaya a bru tre ri bubu ri ri,
40<<A kɨma wa ti mfiyen, nga ran kpan
sron wari ritu no wa
ran to ri simba wari to rimi sron hari
wari kɨma ye ri me no wen den wa kpa chuwo.
41Ishaya nji ri la tre Izhi a tre nganyi ritu riwa a to mkpen Yeso nga ran la tre wan.
42Ringamba wa rinkon nji Yahuda waka kpanyɨme ri Yeso. Ama ritu sisiri a ti wa Farisa wana tre ri wa rimi tra riwa wawa wa kpa nyɨme ri Yeso ran, ritu no wa ran dzu wa rimi bubu kabru tu nji Yahuda ran. 43Ritu wa wa no ji no wa ran gbre wawa han riwa Izhi ri gbre wawa.
Itre Yeso ri Bla tre
44Yeso ka nzu raan ran tre ri,<<Inji riwa a kpanyɨme ri me, a ran he ame nye a kpanyɨme ri me ran, ama nji riwa a ti we ndu nye a kpanyɨme ri wu. 45Inji riwa aya wen, a to nji riwa a ti wen ndu ye. 46Me ye ka ikpan rimi mgbumgblume ritu nji riwa a kpanyɨme ri me no ran son rimi bu ran. 47<<Inji riwa a wo tsro won ran ran hu ran, a ran he ame nye me bla tre ri wu ran, a ran he ritu nowen ye bla tre ri mgbumgblume nye me ye ran, ama ritu no wen ye kpa mgbumgblume chuwo nye. 48Inji riwa a kawan ri me nga a ran kpa tre won ran a he ri nji riwa ari bla tre ri wu, itre riwa me tre wawu nye ri bla tre ri wu chachu kre vi, 49Kyawa wawa me tre a ran zhu ri me ran, A ti won riwa a ti wen ndu nye ri la wen kya riwa me la, ri tre riwa me tre. 50Ngha me to ivri riwa a ran kre ran ari fe ri mgbemgbɨren ri wa A ti de. Ritu ngamba ikya riwa me la, me la tsra ri kya riwa A ti la wen no wen me la.>>
Currently Selected:
JHN - BUU 12: BUU
Highlight
Share
Compare
Copy
Want to have your highlights saved across all your devices? Sign up or sign in
The word for the World International and The word for the World Nigeria
