JHN - BUU 2
2
Iro ri Gran ri Kana riwa Galili
1Ri vi ri tra wan waka ti ro ri ri gran ri Kana riwa Galili iyi Yeso ka he ri bubu gran. 2Wa yo Yeso nga mirindu wan ri bubu ro gran 3Riwa iima raro ri ro ri gran a kre, iyi Yeso ka tre riwu ri,<<Iima raro kre.>>
4Yeso ka tre riwu ri,<<Iya itre nyi ran he wa me ran, ai ivi won ran ti rina.>>
5Iyi Yeso ka tre ri wa ndu wan ri,<<Ikya riwa Yeso tre ri no yi ti, bi ka ti wu.>>
6Nji Yahuda wa he ri bibi tsri ngamba riwa wa ti ritu ngamba wa ri mbuwari tanren wawa wa me wa ri tita ki ri bubu wan, ko ritan rimi mba ri ri galo gbigba ri.
7Imba Yeso ka tre ri wawa wa tindu ri,<<Fon ima sho ri mbuwari wanyi.>>Waka shu mbuwari wa-a ri ima,
8Ngha Yeso ka la wa ri,<<To zizan vu hi no nji riwa a he nji ri ro gran.>>Wa ka vu ima-a ka no nji ri ro gran, 9iima-a ka kɨma ti ima raro nji riwa a ran ya ro ri gran ka pireso tsawen. Wawu kana to bubu riwa iima raro-a zhu ye ran, ama wawa wa ti ndu-a wa to bubu riwa iima-a zhuu ye, imba ka yo ron wasa-a ri gran, 10ran tre riwu ri,<<Ai ko ngan ri gbuchi de ima ri roo ri, kugon riwa nji wa so wari hua ko ari ngɨzhi riwa a ran bi tsra ri rigbuchi ran yi ama a wu wu rii ima ndindi-a tse zizan!>>
11Rinyi nye a he kya ri de sisiri ri gbuchi riwa Yeso a ti-a ti kya nyi ri kana riwa Galili; bubu riwa wa tsro mkpen wan, imiri ndu wan waka kpa nyɨme riwu.
12Kugon rinyi, Yeso nga yi wan ri miri vayi wan, nga miri ndu wan waka hi ri gbu Kafarnau wari ka ki ti vi hari ri bubu wan.
Yeso a hi ri Ko Izhi
13Riwa ivi ro dza gran riwa Youdawa a ye hwri, imba Yeso ka hi ri Urushelima. 14Ri kana ko Izhi-a a fe nji wa ran reri wa lando, intɨma, inguu wa ko nga wawa wa sran nkren wa ki ritu tebru mba. 15Imba Yeso ka chan gbagba ri zhizhi ran dzu wa wawu rimi ko Izhi, ka hu ri wa ntɨma ri wa lando nga ran tru wa kpanchi mba riwa wa sran nkren-a rega, ran vu nkren mba vra rega. 16Yeso ka tre ri wawa wa rewa nguu wa ko-a ri,<<Vu wa zho ri nyi! Ran kɨma ko ti won ti bubu reri kpi ran!>>
17Imiri ndu wan waka taka kya riwa wa ngan rimi tre Izhi ri,<<Inyɨme riwa me nyɨme ko wen, a wu Izhi, ari huu wen ka iwulu.>>
18Imba wa rinko nji Yahuda waka myen Yeso ri,<<Ko wu ti ngye riwa ari de sisiri riwa wu tsro ta riwa a no-u ti kyawa wanyi ?<<
19Yeso ka nyɨme ri,<<Dzi ko Izhi nyi, nga rimi vi tra me bru mme nganga.>>
20Wa rinkon wa nji Yahuda waka minye Yeso ri,<<Wu bru mme rimi vi tra? A ban vi senza don tanren riwa wa mme tra ibrenyi!>>
21Ama iko riwa Yeso ri tre-a a he kpa wan nye. 22Ka wa ta Yeso shɨme rimi kuu, imiri ndu wan waka taka kya riwa Yeso a tre-a wari kpa nyɨme ri tre Izhi riwa wa ngan-a, nga tre riwa Yeso a la.
Yeso to Sron ko Nghaa
23Ri vi riwa Yeso a he ri Urushelima ritu ro ri dza gran, nji kigbu waka kpanyɨme riwu ritu kyawa wa de sisiri riwa wa to a ti wa. 24Ama Yeso a ran ka sron wan no wa ran ritu a to ren nne mba kre. 25Yeso a ran wa riwa injo ran la-u kyari ritu mba ran, ritu wawu a gbuchi to kya riwa a he rimi sron mba.
Currently Selected:
JHN - BUU 2: BUU
Highlight
Share
Compare
Copy
Want to have your highlights saved across all your devices? Sign up or sign in
The word for the World International and The word for the World Nigeria
