LUK LUKA- BUU 2
2
Iŋgɨji Yeso
1Ri vi wa ichu Kaisar Augustus a dɨbu iri nowa bla ko ngha riwa a he ri ndoza kpanchi wan. 2Rinyi nye a he bla ri gbuchi riwa wa ti ri zamani kiriniyas, ri wa a he rinkon meme suriya. 3Ko ngha no hi gbu mba nowa hi bla.
4Yusufu ngawen ka wurunde ri gbu Nazara ri meme Galili, ran hi meme Yudiya ran hi gbu Doda riwa wa yo wu ri Batalami (ritu riwa a he ri gɨzhi wa Doda nye ri nne mba). 5A hi nowa ngha nde wan ri Meriyamu, riwa a su ran gran wu nga wa ran gben vren. 6Riwa wa he ri muu tse ivi ngɨzhi wan ka ti. 7Ka ngɨzhi vren wan ri gbuchi, ran kau ri tsro ri sho vren, ran kau yo rimi tra yawo rimi bubu riwa wa sro ri riwa, ritu riwa wana fe tra ri kuru ran.
Wa kɨshu Ntɨma ri wa miri ko Izhi
8Ri ŋɨma meme-a wa kishu ntɨma wari wa kru ri ra ŋgbende, wa ran gben ntɨma mba ri chu. 9Tse ivren ndu Izhi ri ka kri kusan mba, lgbresan Izhi kakpan kagon mba, wa ka ti sisiri branbran. 10Imba lvren ndu Izhi ka tre ri,<< Ran ti sisiri ran yi, ngye me ngɨzhi tre dindi ye ri yi ri kinklan sron kigbu, riwa ari he wa nji iwawu. 11Ritu riwa wa ngɨzhi nji wa ari kpayi chuwo ri gbu Doda, riwa wawu nye he nji rikpa nji chuwo, Bachi. 12Ingye bibi kya riwa bi to een, bi to vi vren-a wa kau ri tsro ri sho-gbosho, a kru rimi tra yawo rimi bubu riwa wa sro riwa.>>
13Ba labari tse ngye ikpa miri ndu Izhi wa kagbamu wari ran gbre Izhi, wari ran tre,
14<< Igbre he wa Izhi, rimi shu wulu riwa wa gbre wu han, ran nowa kinklan sron branbran.>>
15Riwa imirindu Izhi wa kawa don wari bru hi shu, imba wa kɨshu ntɨma waka tre ri kamba ri,<<ki hi to kya riwa a ti ri Batalami zizan, riwa Bachi a la ri ta.>>
16Wa ka hi gbagbla, wa ri ka fe wa Meriyamu mba Yusufu, ri vi vren-a ka a kru ri tra yawo rimi bubu riwa wa sro ri ri wa. 17Riwa wato, wari la bibi tre riwa wa lawa ritu vren-a, 18Wawu wawa wa wo wari gra ti sisiri ritu kya riwa wa kɨshu ntɨma wa la wa. 19Meriyamu ka ngɨzhi kya wa riwa wa la ran ran taka wan ri sron. 20Wa kɨshu ŋtiman-a waka bru hi, wari si gbre Izhi wari zon nde, ritu kya riwa wawo, wari to, bibi riwa wa lawa.
Wa Ngɨji Yeso hi ri tra Bre
21Riwa ivi ri tandɨra a ye riwa wa fon Yeso nzhu, waka yonde wan ri Yeso inde riwa ivren rindu Izhi a la ri ko ivren-a kagon ri nne.
22Riwa ivi Tsitsrimba a ye ritu bla tre Musa, waka ngɨzhi Yeso ye Urushelima, wari kau no Izhi. 23Bibi riwa a he rimi ngha bla tre Izhi ri, <<Ivren ri gbuchi riwa wa ngɨzhi, wa tre ri a he Tsitsri ri Izhi,>> 24Wari tsiri-u ritu kya riwa wa zi ri mbe Izhi ri, <<Inguu hari nga inguu ri ko hari.>>
25Imba nji ri a he ri Urushelima riwa, inde wan a he Saminu riwa a he nji dindi, a ran hu Izhi, a ran ti nbiye riwa ari to Israila, Iyu Tsitsri ka he riwu. 26Tsitɨri Wu a gbuchi lau ri, a ran kuu ran tse a to Bachi Kristo. 27Tsitiri Wu a ran tru, ka gra rimi tra Izhi. Riwa wati wan wa ngɨzhi vren-a Yeso gra, wati riwu bibi riwa waka tre zi, 28Imba Saminu ka ban wu ngɨzhi ran ngɨri ri Izhi, ran tre:
29<<Zizan nye, a wu riwa wu ngɨzhi ko, ka miriko wen chuwo ri sikpa,
Ritu bibi kya riwa wu la,
30Riwa me to kpachuwo wen ndende,
31Riwa wu mɨlan zi ri kusi gbunji wawu,
32Ikpan riwa ari tsro nji nkon wen,
nga gbre wa nji Israila.>>
33Wa yiwan mba Tiwan waka ti sisiri ritu kya riwa wa tre ri tuwan. 34Imba Saminu ka ti lɨwu dindi sro riwa, ran tre ri Meriyamu iyi Yeso: << Wu to vren nyi, kigbu wari wa kpa Izhi, kigbu wari wa kamba riwu rimi Israila, nga ritu alama riwa wa kamba riwu, 35Ritu rimɨren sron wanji kigbu wa he Een, a wu ngawen njigban ri yɨra sron wen.>>
36Iwa rindu Izhi a he inde wan a he Hannatu, ivren Fanuwela, riwa a he ri gɨzhi Asha. A kunchon ngbazhi ran; a son gran ri se tamgban riwa wa ban u ri vɨru wa wan, 37riwa iron wan akuu ka son wari kɨbo hari se setandira don nza. A ran ran ka tra Izhi ran don ran, a ran hu Izhi ri chu ri mibreri ibrenga vulaima. 38Imba kaye ran ye ngɨri ri Izhi nga ran tre tre vi vren-a ri nji wawa wa sɨrenton wari wo kpa Urushelima chuwo.
39Kugon riwa wa kre kon ngye ritu bla tre riwa Izhi, waka bru hi meme Galili wari hi gbu mba Nazarat. 40Vi vren-a ka gbron, ran senkpa, ran he ri to ti Ndindi riwa Izhi a he ri wu.
Yeso Vɨren-ze a Gra ri Tɨra Izhi
41Ri se ri se wati wan waye waka hi ri Urushalima riwa wati iro ri za gran. 42Riwa Yeso a ti se wuru don hari, waka ban wu hi ri bubu ro ritu kya riwa wasi ti. 43Riwa wa kre ro mba, wari ran ye, ivren-a ka son ri Urushelima watiwan wa ran to ran. 44Wawa wa zɨren jiakuu, wa yonga ri a he rimi mba wa si lanji bla rimi miri vayimba ri wa kpan mba. 45Riwa wana fe ran, waka hi ri Urushelima, wari si wa-u bla. 46Imba ri vi ri tre waka fe rimi tra Izhi ka a son ri tsutus wa tsro, ran ran sirenton, ran ran miyen wa miyen. 47Wa wa wa wou wati sisiri bibi to wan riwa a to ri nyime miyen wan. 48Riwa wa to waka ti sisiri, mba iyiwan ka tre riwa, << A wu vren won ingye ti ko wu tita kawa? Kpunji ki si wa-u mbu tiwen rimi sron time.>>
49Imba Yeso ka mɨyen wa,<< Ingye ti ko bi si wa wen? Ashe bi ran to a he lele nowen me ti ndu Tiwon ran?>> 50Ama wa ka ran to tu tre riwa a lawa ran.
51Imba ka bru hi Nazarat iwawa, ran ran kpa tre mba iyi wan a ngɨzhi kyawa wanyi ri sron wan wawuu. 52Yeso ka gbron rimi to kyawa, nga senkpa ran fe zon ri Izhi nga wanji.
Currently Selected:
LUK LUKA- BUU 2: BUU
Highlight
Share
Compare
Copy
Want to have your highlights saved across all your devices? Sign up or sign in
The word for the World International and The word for the World Nigeria
