ROM ROM-BUU 16
16
Ichi Bulus
1Me tru vayi mbu Fibi ri ye ri yi ri wa me layi tre wan ri a he wa ri lo sron. Wawu he wa riwa ari zon wawa wa hu Izhi ri kan kiriya. 2Kpa rimi nde Bachi bibi riwa nabi no wa ka wa tsitsri bi ri no bibi dzon riwa ari yi ritu wawu ri towa zon wa nji kigbu nga ame ngawen. 3Bi chi Briskila mba Akila wa kpan ndu won rimi Kristo Yeso 4Wawa wa ka sron mba de ka wa kuu ri tu won. A ran he ame ri kankshe won nye me ngiri ri wa ran hari ri mgbiron wa nji wa hu Izhi wawa wana he wa nji Yahuda ran. 5Bi chi wa nji wa hu Izhi wawa wa kabru ri ko mba 6Bi chi Meremu riwa a so yaa ri ndu bran ri tu mbi. 7Bi chi Andaronikus nga Yuniya wawa Yahuda nye ka ame, wawa wa lo wa ri tra tren riri me wawa wa wanji wawa wa to wa bran bran rimi wa ta tre Izhi nga wa gbuchi kpa tre Izhi ri rimi Kristo. 8Bi chi Amfiliyatus ikpan won ri kpunji rimi kabrutu ri Bachi. 9Bi chi Urbanus ikpan ndu mbu rimi ndu Kristo, nga kpan won Sitakis. 10Bi chi Afalis riwa inyime wan rimi Kristo he njiaji bi ka chi wa ko Aristobulus.
11Bi ka chi Hirudiyan riwa wawu nye he nji Yahuda bi chi wawa wa he rimi Bachi rimi ko Narkisus.
12Bi ka chi Tiryifina nga tirayifusa imba wa nyi wa wa wa so yaa rimi ndu Bachi bi ri chi Farisa ikpan won ri wa me nyimeu, riwa a so yaa rimi ndu bran ritu Bachi. 13Bi ka chi Rufus riwa wa to rimi Bachi bi ri chi iyi wan riwa a ban wen ka me he vren wan. 14Bi ka chi Asinkiritus, nga Filigona, ri Harmis, ri Foturobas, ri Harmas ri wa miri vayi wawa wa he iwawa. 15Bi ka chi Filologus ngaYulia, nga Niriyus mba vayi wan vruwa, nga Olimfas nga wa hu Izhi wawu wawa wa he ri wa. 16Chi ngambi ri bibi chi riwa wa hu Izhi. Wa hu Izhi wawu wa chi yi.
Ide Tre Bulus ri kremkpen
17Me bre yi biyi wa miri vayi won: milan ya wawa wa ga yi nga wari kpa yosron nji pisi nga wari kamba ri tsro riwa bi kpa. Kima ngambi zho ri wa. 18Ritu wawa wa ti bibi mba wa ran ri hu Bachi mbu Kristo ran, ama wa hu mbiye mba. Wa gyuru nji wawa wa ran to kya ran ri tre mba ndindi nga tre ri raro. 19Ko ngaa wo bibi riwa bi hu tre Izhi, nga ritu nganyi me ti kinklan sron ritu mbi. Me no yi he ri wiwiri ritu kya riwa a bi, ama bi ri kambi ri kya riwa a meme. 20Ngha Izhi riwa wawu nye ri de sisron, ari chan meme nji yo ri ndodza mbi. No ndindi ti Bachi mbu Yeso no he ri yi. 21Ikpan ndu won Timoti, nga Lushiyus, Yason nga Sosifata wawa wa he wa nji Yahuda wa hu ngawen wa chi yi. 22Ame Tartiyus, riwa Bulus a no wen me ngan mbe nyi, me chi yi bibi wa wa hu Izhi. 23Gayus riwa wawu nye a kpa wen yo ri ko wan, nga wawu nye wa hu Izhi wa kabrutu ri ko wan, wawu ngawen ri chi yi; Erastus, nji ri dzi nkren ri gbu, nga vayi mbu Kwartu wa chi yi ngawen. 24No ndindi ti Bachi mbu Yeso Kristo No he ri yi wawu. No he ngamba.
Ikre Bre Izhi ri Gbre
25No ta ki no Izhi mkpen! Wawu he ri gbengbren riwa ari no ta ki ki mgbemgben rimi yosron mbi, bibi riwa tre ri ro riwa me la ritu Yeso Kristo nga bibi riwa nghɨran nchi yayibi ri kpunji riwa wa ka-u ri dzi sesenmu. 26Zizan, wa nghɨran kpunji-a zhu ri raa hu ri ngan wa la tre Izhi; nga itre Izhi riwa a ran kre ran-a nye la mgbumgblume wawu, ritu no 27Ki gbre Izhi nkankshe wan riwa wawu ka kre he ri wiwiri hu ri Yeso Kristo hi ri kre! No he ngamba.
Currently Selected:
ROM ROM-BUU 16: BUU
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria