Yelemiya 34
34
Zumbe Mulungu ataaghiiza mbuli kwa Sedekia
1Mwe mishi Nebukadineza zumbe wa Babeli, ahezaiza hang'we na waghojo wa mbali zoshe na shi zoshe ndizo akigholokela na mbali zosheni za wantu woshe kunga kuutoa mzi wa Yelusalemu na mizi yoshe ya Yuda, Zumbe Mulungu akamghamba Yelemia, 2“Hita kwa Sedekia zumbe wa Yuda, ukamghambe kuti, ‘Imi Zumbe Mulungu, Mulungu wa Izilaeli, ni hehi kuugea unu mzi mwe mikono ya zumbe wa Babeli, yohe neauwoke. 3Iwe heumnyiike, miya neugwiwe na neuighawe kwakwe, neudughane na zumbe wa Babeli na kushimoea naye, vikibinda neuighawe Babeli.’ 4Iwe Sedekia zumbe wa Yuda, tegheleza nichekughambila. Heufiie kwe nkondo. 5Neufe kifa kitana sa via wantu waokavyo ubani wahewazika baba zako ndiwo wai wazumbe, nee ndivyo wantu wakuokee ubani na kusininika wakighamba, ‘Waume! Zumbe weshu azafa!’ ” Ni miyo Zumbe Mulungu nilongiewo. 6Vikibinda, mteghanyi Yelemia akamghambila Sedekia, zumbe wa Yuda, izo mbuli zoshe uko Yelusalemu, 7mishi waghojo wa zumbe Nebukadineza wa Babeli waheituka waatoana na wantu wa Yelusalemu na mizi ya Yuda ndiyo ikikidaha yaani Lakishi na Azeka, inu nee mizi izungushiizweyo ukando yashighalayo mwe shi ya Yuda.
Kuekewa kwa watung'wa
8Inu nee mbuli ya Zumbe Mulungu yamuiziayo Yelemia mishi zumbe Sedekia aheivana na wantu woshe wa Yelusalemu wabilikile kuekewa kwa watung'wa. 9Kia mntu akundighwa amuekee mtung'wa wakwe wa Kiebulania, aituke mghoshi hambu mvyele, asheoneke mntu yoyoshe mwemghalusha Myahudi nyiae mtung'wa. 10Kwa ivyoho wagholokezi woshe na wantu woshe waikilewo icho kilagha wakaivana woshe wawaekee watung'wa wawe wa kighoshi na wa kivyele na mntu yoyoshe ashezawaghalusha watung'wa vingi. Wakaivana wakawaekea. 11Miya wakahitua fanyanyi zawe, wakawagwia awo watung'wa wa kighoshi na wa kivyee ndiwo waiwaekee, wakawaghalusha vingi watung'wa.
12Nee Zumbe Mulungu ahemghamba Yelemia kuti, 13“Naaika kilagha na baba zenyu nihezawalavya Misii mwe shi ya utung'wa, nikawaghamba kuti, 14kia jikibula vui ja mfungate, kia mng'we wenyu amuekee mtung'wa wakwe Muebulania nyiae akitaghieye ng'wenye kuituka mtung'wa kwa mavui mtandatu. Muwaekee washemighosholee vingi ndima. Miya baba zenyu hewanitegheleze wala kuniiva. 15Mishi migheke izinkileyo, mutevoteka mukaghoshola mbuli nimighambilezo, kia mng'we wenyu akakunda kumuekea Muebulania nyiae. Na inywi mukaika kilagha mwe mesho yangu mwe nyumba yeitaikana kwa zina jangu. 16Miya ushe muzahituka mukakanka zina jangu kwa kuti, kia mng'we wenyu azawauza vingi watung'wa wakwe wa kighoshi na wa kivyele ndiwo aiwaekee waite wakwekunda. Muzawakungumiza waituke watung'wa wenyu vingi. 17Imi Zumbe Mulungu naghamba, inywi hemuniivile kwa mbuli ya kuwaekea wandughu wenyu Waizilaeli. Naimi ushe nenimieke mukong'we kwa nkondo, kwa matamu na kwa saa. Nenimieke wantu wa zumbe zoshe ze mwe shi wamiihiwe. 18Wantu waekilewo kilagha changu na kuemela maaghizo ya kilagha waghosholecho mwe mesho yangu, neniwaghoshole waituke sa kadama kashengighweko kaili vikibinda wakazinka gatigati yakwe. 19Neniwashenge vihindi, hata kati ni wagholokezi wa Yuda na wagholokezi wa mzi wa Yelusalemu, wakulu wa kaya cha zumbe, wavikizi, hang'we na wantu woshe, kwa kuti woshe wazaeka kilagha changu. 20Neniwaeke wagwiwe ni wankuu na wantu wekunda kuwakoma. Maiti zawe neziituke nkande za madeghe na vizama vya tundui. 21Sedekia, zumbe wa Yuda, hang'we na waambizi wakwe, neniwaeke wagwiwe ni wankuu wawe wekunda kuwakoma na wagwiwe ni waghojo wa zumbe wa Babeli waekilewo kuwatoa. 22Imi Zumbe Mulungu neniwauze vingi waghojo wa Babeli na mwe unu mzi. Newautoe, newaughue na kuuwoka. Neniighalushe mizi ya Yuda iituke mahuzu yashiikawayo ni mntu.”
Currently Selected:
Yelemiya 34: SHBV
Highlight
Share
Compare
Copy
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.