Yelemiya 41
41
1Mwe ng'wezi wa mfungate, Ishimaeli ng'wana wa Nesania, ng'wezukuue ja Elishama, mweandukia na mwe wavyawa wa kizumbe vingi nee ni mng'we wa wagholokezi mwe kitaa cha zumbe, atebula uko Mizipa kwa Gedalia ng'wana wa Ahikamu aiongozane na wantu muongo mng'we. Waheituka waaja nkande hang'we uko Mizipa, 2Ishimaeli ng'wana wa Nesania hang'we na waja wantu muongo mng'we, wateshooa mamundu yawe wakamkoma Gedalia ng'wana wa Ahikamu ng'wezukuue ja Shafani. Gedalia nee ashaghulwaye ni zumbe wa Babeli aituke mgholokezi wawe. 3Ishimaeli akawakoma wantu wa Yuda ndiwo wai hang'we na Gedalia uko Mizipa na waghojo wa Babeli ndiwo wai aho hantu.
4Keloi hakwe wantu waishizati kutaila kuti Gedalia azakong'wa, 5wateiza wantu miongo mnane kulawa Shekemu na Shilo na Samalia. Nee waimoiye ndezu zawe na shuke nee waizitatue na waikishengieshengie. Wakiituka wainue ntogoo zawe za nkande na ubani kunga wakalavye mwe nyumba ya Zumbe Mulungu. 6Kwa ivyoho ushe Ishimaeli ng'wana wa Nesania akauka Mizipa akaita kwewahokela awo wantu uko aakema. Ahedughana nawo akawaghamba, “Kaibui mwe mzi wa Gedalia ng'wana wa Ahikamu.” 7Waheingila mwe mzi, Ishimaeli ng'wana wa Nesania hang'we na wantu wakwe muongo mng'we ndiwo aina nawo, wakawakoma na mii yawe wakaigongoosha na mwe kishima. 8Miya nee kuina wantu muongo mng'we mwe awo wantu aitilewo kwewahokela, wakamghamba Ishimaeli, “Taakuombeza ushetikome! Tina ngano na shayili, mavuta ya mzaituni na woki tifishizevyo mwe ubuwa.” Kwa ivyoho hawakomie. 9Chiya kishima Ishimaeli agongooshezecho zia maiti za waja wantu akomiewo, ni chiya kishima kikulu chafukwacho ni zumbe Asa kunga akifishe mwe ija mishi ahezaingiiwa ni Baasha zumbe wa Izilaeli. Ishimaeli ng'wana wa Nesania akamemeeza maiti za wantu akomiewo mwe icho kishima. 10Ishimaeli akawagwia wana wa kindele wa zumbe hang'we na wantu wosheni washighalawo uko Mizipa, waja wainkiwawo ni Nebuzaladani mkulu wa waghojo kwa Gedalia ng'wana Ahikamu awagholokele. Ishimaeli ng'wana wa Nesania akawaghua awo wantu awagwizilewo kwa nguvu akaomboka nawo kuita kwa Waamoni. 11Yohanani ng'wana wa Kalea hang'we na wagholokezi woshe wa waghojo waheiva mbuli zosheni Ishimaeli ng'wana wa Nesania aghosholezo, 12wakawaunganyanya wantu wawe wosheni wakaita kwetoana na Ishimaeli ng'wana wa Nesania, wakambuiza he bwawa kulu jeuko Gibeoni. 13Wantu woshe ndiwo waigwizighwe ni Ishimaeli wahemuona du Yohanani ng'wana wa Kalea hang'we na wagholokezi wa waghojo wakatamilwa. 14Kwa ivyoho, waja wantu wosheni ndiwo waighuighwe ni Ishimaeli kulawa Mizipa, wakahituka na kumbasha Yohanani ng'wana wa Kalea. 15Miya Ishimaeli ng'wana wa Nesania hang'we na waja wantu mnane wakamnyiika Yohanani, wakaghuukia kwa Waamoni. 16Vikibinda Yohanani ng'wana wa Kalea na wagholokezi wa waghojo ndiwo wai hang'we naye, wakawavunila wantu woshe washighalewo uko Mizipa haja Gedalia ng'wana wa Ahikamu ahezakong'wa, yani waghojo, wavyele, wana na wagholokezi wa waghojo alawiewo nawo uko Gibeoni. 17Wakakihima na ntambo, wakanaikala kwe mzi wa Gelusi Kimuhamu hehi na Betilehemu, ndiho wakikiighanya kuita Misii, 18kunga wawanyiike Wakalidayo. Wawaiva wogha kwa kuti, Ishimaeli ng'wana wa Nesania nee aimkomie Gedalia ng'wana wa Ahikamu, ashaghulwaye ni zumbe wa Babeli aituke mgholokezi mwe shi.
Currently Selected:
Yelemiya 41: SHBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.