Matendu 21
21
Paulo anguyenda Yelusalemu
1Patuyomola kutaulana kula Efesu, tukayingila muwhatu tukayenda mbaka ku Kosi. Kilau ghaki tukahika Lodesi, na kuhuma kula tukayenda Patala, 2Kula ku Patala tukonganili na whatu iwelili inguyenda kumbwani Foinike, hinu tukayingila, tukayenda. 3Badili gha kuhika mahala pavile tuwesa kuilola Kupulo, Tupitili mbandu ghaki gha kusini na kuyendelela na mwanja mbaka tukahika kumbwani Foinike, kumlima Silia. Tukahika kumbwani Tilo. Whatu igholokili pala machuwa mayaghani, kwaikiva wawelili wanguhumisa mihigu gha wandu. 4Kula tuwonili wavulwa, hinu tukayenda kulikala pamonga na weni machuwa isaba. Wala wavulwa wakilongoswa na Mpumulo wa Sapanga wakamlongela Paulo ukotoho kuyenda ku Yelusalemu. 5Ila lipindi lya twenga paliyomwike kala, wala wogha pamonga na wadala na wana ghao wakayenda na twenga mbaka panji gha mmbwani. Patuhikili mmbali mwa bahali, wogha tukatundamila manung'una tukamyupa Sapanga. 6Hinu, tukataulana wogha, twenga tukayingila muwhatu na weni wakahuya ukaya ghao.
7Kuhuma Tilo, tukayendelela kwa kutumila whatu mbaka kumbwani Tolemai. Kuwelili na wavulwa kula, tukawajambusa na kulikala na weni kwa lichuwa limonga. 8Kilau ghaki tukahuka tukayenda kummbwani Kaisalia. Kula tukayenda kulighuta lya mtangasa Filipo. Mweni avile mmonga wa wala isaba wawahaghulili kula Yelusalemu. 9Na mweni Filipo awelili na mabiti wanjechi wayingilwa ng'ogha na mlumi. Kila mmonga awesili kulonga yala Sapanga ateghola. 10Badili gha kulikala haku machuwa mayaghani, mlota akemilwi Agabo kuhuma kummbwani Yudasia akahika. 11Akahika kwa twenga, akatola ngoyi gha Paulo. Akajiwopa hila ngoyi kumawoku na maghulu ghaki na akalonga, “Mpumulo wa Sapanga angulonga, 'Vilongosi wa Wayahudi ku Yelusalemu watemkola mawoku na maghulu mundu mweni ngoyi hai na watewapegha kwa wandu Wayahudi ng'ogha mundu hayu handa muwopwa.' ”
12Patuyoghanila hagha, twenga na wala wandu ghangi wawelili pala tukamluwa nesu Paulo akotoho kuyenda Yelusalemu. 13Ila Paulo akayanga, “Kwa kyani mngulila masosi na kunitenyula moyu kwa kunilongela nikotoho kuyenda Yelusalemu? Ng'ogha kuwopwa hela, nenga nijiyandala kala hata kuhova ku Yelusalemu kwaikiva gha lihina lya Bambu Yesu.”
14Patulola yiwa kalema kukweghwa na twenga. Tukalonga, “Yambendeza Bambu Sapanga yagholeki”
15Machuwa gha kulikala pala Kaisalia payayomwike, tukawopa mihighu, tukayendelela na mwanja mbaka Yelusalemu. 16Wamonga wa wala wavulwa kuhuma mmbwani Kaisalia wayendili na twenga kula Yelusalemu, wakatuyegha kulighuta lya mundu akemilwi Mnasoni, mwenikaya wa Kupilo, awelili mkwinila wa Yesu kwa machuva matangala.
Paulo angumtyangila Yakobu
17Patuhikili ku Yelusalemu, lipinga lya walongu wamkwinila Kilisito wakatupokela kwa luheku nesu. 18Kilau ghaki Paulo ayendili pamonga na twenga kumjambusa Yakobu. Na wagogolo wa wandu wamkwinila Kilisito wawelili pala hilahila. 19Paayomola kuwajambusa, Paulo akawalongela mighalu igholilwi kwa mundu mmonga mbaka ghangi Sapanga awelili kaghola paghati gha wandu wa Wayahudi ng'ogha kwa njila gha utumikila ghaki. 20Pawayoghanila ghala, hinu wakamlongela Paulo, “Mlongu, ungujilolela mweni vila pavile na wandu imaelufu wa Kiyahudi hinaa wavile wakwinila wa Kilisito na wogha wangukola laghililo lya Musa kwa umaha. 21Wayoghanilili yiwa unguvula Wayahudi wogha wala wangulikala kumlima wa Wayahudi ng'ogha na wakotoho kukovekela laghililo lya Musa ukiwavula wakotoho kuwayingisa jandu wana wa weni na kangi wakotoho kukovekela malaghililo gha Kiyahudi. 22Ni uchakaka wandu wala watevile wayoghanila kala yiwa uhika, hinu hinaa tugholi kyani? 23Nagha ugholi handa havi tungukulongela. Tuvile na wandu wanjechi baha pamonga na twenga hagha wavile wajiwopa weni kwa kuilongela yiwa watempegha kindu Sapanga. 24Uyendi na wandu wala kumhambu ghao gha kujighulula na uhipi kwa kila wakitumila, hinu watemoa hwila ghao. Kwa njila hai wandu wogha watemanya yiwa mighalu hyogha wayoghanilili ni gha ughwangi, ila wenga ungukovekela laghililo lya Musa. 25Kwa wala wandu Wayahudi ng'ogha wakwinilili, tuwayandikilila lihamba gha kuwalongela yala wangupalwa kughola. Yiwa wakotoho kulyegha mulyo hula wandu wautolela litambiku kwa vindu vya kuhongwa, wakotoho kunywegha mwahi kuhuma kwa mkokolo, na wakotoho kulyegha mkokolo yula wandu wamhinja ng'ogha. Hilahila tuwalongela wakotoho kughola ungongola.”
26Na kilau ghaki akawatola wala wandu wanjechi pamonga na mweni wakaghola mhambu wa kujighulula. Kangi, Paulo akayenda ku lyugha lya lighuta lya Sapanga ili kuwalongela watambika yiwa ligha wateyomola kujighulula na ligha kila mmonga atetola litambiku.
Paulo angukamulwa mghati gha lighuta lya Sapanga
27Lipindi machuwa ghala isaba yakiva pabehi kuyomoka, wamonga wa Wayahudi kuhuma mbandu gha Asia wawelili wamwonili Paulo mghati gha Lighuta lya Sapanga. Wakalipapusa lipinga lya wandu wamkamuli Paulo, 28wakitova lilowi, “Wandu wa Izilaeli! Mtutangi, kunooo Hayu ndiwa yula mundu anguwavula wandu kogha na kogha wakingami malaghilo gha Musa na mahala baha pa Sapanga. Hinaa kawayingisa wandu Wayahudi ng'ogha kulighuta lya Sapanga na kupaghola pavile maha ng'ogha mahala pa Sapanga.” 29Walongili havi kwaikiva wawelili wamwonili Tilofimo, mwenikaya wa Efesu, akiva pamonga na Paulo kumbwani, wakawachila yiwa Paulo awelili kamyingisa mulighuta lya Sapanga.
30Wandu kuhuma kogha na kogha wa kumbwani wayoghanilili yiwa kuvile na maghaso ku lyugha lya Lighuta lya Sapanga, wakabhutukila kula. Wakamkamula Paulo na kumkulughula panji gha lighuta lya Sapanga. Na bahala milyango gha lyugha lya lighuta lya Sapanga ikawopwa kwa kuloposela. 31Lipindi wandu wala wangupala kumkoma Paulo lilando likamuhikila mkulu wa Watovangondo kuhuma Loma yiwa mlima wogha wa Yelusalemu umema mkologhanyiko. 32Mkulu wa watovangondo, bwitu akatola wakulu ghangi na lipinga likulunga lya watovangondo wakabhutukila kumkologhanyiko. Lipinga lya wandu pawamlola yula mkulu wa watovangondo na wala watovangondo wanguhika hinu wakaleka kumtova Paulo. 33Mkulu wa watovangondo akamuyendela Paulo, akamkamula na kulaghila awopwe kwa minyololu miivili. “Akakonya yiwa mweni ni ghani na awelili kaghola kyani.” 34Wamonga wa wandu kulila lipinga wawelili wakitova lilowi, wakilonga nagha na ghangi wakilonga vila. Yula mkulu wa watovangondo paalolili yiwa awesi ngʼogha kuhyoghanila uchakaka wa mghalu hula kwaikiva gha mkologhanyiko, akalaghila Paulo ayeghwi kungomi gha watovangondo. 35Paulo paahikili kungasi, watovangondo wakampapa kwaikiva gha makalaghanyo gha wandu wala wamkovekela. 36Lila lipinga lya wandu wawelili wakimkovekela kunu wakiyendelela kutova lilowi, “akomwi hayu!”
Paulo angulitetela
37Wala watovangondo pawawelili wakimyingisa kungomi ghao, Paulo akamluwa mkulu wa watovangondo akilonga, “Ninguwesa kukulongela kindu?” Yula mkulu wa wagholokela akamyanga,
“Ghuli, ungumanya Kigiliki wenga”? 38“Ghuli, wenga ng'ogha yula Mmisili avile machuwa hagha pabehi atumbulisili mkologhanyo ili kuipingika Silikali na ukalongosa lipinga lya wandu wahakata wakoma wandu ielufu njechi wavile na migoha mbaka kuluvagha?”
39Paulo akamyanga, “Nenga ni Myahudi, muwelekwa wa Taliso ku Kilikia; nenga ni mwenikaya wa mbwani mkulunga. Pepayi, unilekiseli nilonge na hagha wandu.”
40Yula mkulu wa watovangondo akamleka alonge na wandu. Paulo akagholoka ku ngasi akatumbula kwa kuwapungila liwoko wala wenikaya ili walikali jii, na wogha pawalikala jii, Paulo akalongela na weni kwa luga gha Kiebulania akilonga:
Currently Selected:
Matendu 21: NTMbBL2025
Highlight
Copy
Compare
Share
Want to have your highlights saved across all your devices? Sign up or sign in
The New Testament in Mbunga @The Word for The World International and Mbunga Language translation, 2025. All rights reserved.
