Matendu 22
22
1“Walongu wa nenga na watati ghangu, mniyoghanili hinaa nikijitetela kuulongolo gha mwenga.” 2Pawayoghanila akilonga na weni kwa Kiebulania wakayendelela kutama nuu nesu kupiti mtumbulo. Na mweni Paulo akayendelela kulonga,
3“Nenga ni Myahudi, muwelekwa wa kumbwani Taliso ku Kilikia. Ila nileleliwi baha kumbwani Yelusalemu pahi gha mvula Gamalieli. Nivulilwi kukovekela kwa umaha malaghililo gha wagogolo wa twenga. Kwa umaha nikwinilili malaghilo hyogha, kwa ikiva nipalili kumyitikila Sapanga handa mwenga mvile hinaa.” 4Niwahakili na hata kuwakoma wala wandu wakovekelili mavulo gha Yesu. Niwakamulili walumi na wadala na kuwavika mulighuta lya wawopwa. 5Mtambika Mkulu na njengakaya hyogha gha wagogolo wanguwesa kuhighilisa yiwa ni uchakaka vila nilongela. Kuhuma kwa weni wanipeghili lihamba iyandikilwi kwa wala walongu Wayahudi wavile kula Damesiki. Niyendili Damasiko ili niwakamuli wandu wakovikela mavulo gha Yesu na kuwayegha handa wawopwa mbaka Yelusalemu ili wahakilwi.
Paulo angulongela vila kalokoka
Matendu 9:1-19; Matendu 26:12-18
6“Hinu, panivile kunjila pabehi na kuhika kumbwani Damasiki, lipindi lya lisaa isita pamuhi, mhana mkulunga kuhuma kundumba bwitu ukanihumila na ukanilangasila pandi zyogha.” 7Baha nikaguwa pahi, nikayoghanila lilowi likinilongela, “Sauli, Sauli! Kwa kyani ungunihakila?” 8Na nenga nikakonya, “wenga ni ghani, Bambu?” Na mweni akanilongela, “Nenga ni Yesu wa Nazaleti yula wenga ungunihakila.” 9Hinu, wala wandu wavile pamonga na nenga, waulolili hula mhana ila wamanya ng'ogha lilowi lya yula awelili akilongela na nenga. 10Hinu, nenga nikakonya, “Nigholi kyani Bambu?” Na mweni Bambu akanilongela, “Gholoka, uyendi Damasiko na kula utelongelwa hyogha ungupalwa kughola.” 11Paniwela niwesa ng'ogha kulola kwaikiva gha kung'ala kwa hula mhana wala wayangu wakanikola liwoku mbaka Damasiko.
12“Kula kuwelili na mundu mmonga akemilwi Anania, mundu myupa Sapanga, mweni kukwinila malaghilo gha twenga na mweni kutundamilwa nesu kuulongolo gha Wayahudi wawelili wangulikala Damesiki.” 13Mweni akagholoka pabehi na nenga, akalonga, “Mlongu Saulo! Lola kangi.” Palapala nikalola kangi, nikamlola Anania. 14Hinu Anania akalonga, “Sapanga wa mbuyi wa twenga kakuhaghula wenga ili upati kumanya mapalo ghaki na kumlola yula mtumikila ghaki wa maha na kumyoghanila lilowi lyaki mweni akilonga.” 15Kwaikiva utevile mlongela ghaki kwa yala uyalolili na kuhyoghanila. 16Hinaa ungulindila kyani? “Gholoka na ubatiswi na kuhumisiwa mahakata ghako kwa kulikema lihina lyaki.”
Paulo angukemwa kuwatangasila wandu Wayahudi ng'ogha
17“Panihika Yelusalemu, na panivile nikiyupa ku Lighuta lya Sapanga, nikapokela mawonu. 18Nikamlola Bambu akinilongela, ‘Uhuki Yelusalemu kwa uloposeli kwaikiva wandu wa baha watejumila ng'ogha yala uyalolile yala yanilongile nenga.’ 19Na nenga nikamyanga, ‘Bambu,’ weni wangumanya chakaka yiwa nenga ni yula avile angutyangatyanga kumighuta gha kutundamila Wayahudi na kuwakamula na kuwatova wala wavile wangukukwinila wenga. 20‘Na lipindi mtumikila ghako Sitefano akihova, nenga mwenibaha niwelili pala nikayitikilana na mghalu hula na kugholokela makoti gha wala wawelili wangumkoma.’ 21Na mweni Bambu akanilongela, ‘Uyendi, nitekuyegha kutali kwa wandu Wayahudi ng'ogha.’”
22Wala wandu wawelili wangumyoghanila Paulo mbaka pala kayomola kulonga lilando lya mwihu ndiwa wakatova lilowi wakilonga, “Mumkomi hayu! Mundu hayu kapalwa ng'ogha kuyendelela kulama.” 23Wayendelili kutova lilowi mkomi hayu na wakipungila makoti ghao na kutagha lifu kunani kuwonesa vila wahyomili. 24Mkulu wa watovangondo awalaghilili wagholokela ghaki wamyeghi Paulo mghati gha ngomi, akawalongela wamtove hyatu Paulo ili awalongeli kwa kyani Wayahudi wangutova lilowi. 25Ila pawayomola kumuwopa kwa ngoi zya ngosi ili wamtove hyatu, Paulo akamlongela kilongosi wa wagholokela avile kagholoka pala pabehi na mweni, “Ghuli hagha gha maha mwenga kumtova hyatu mundu kuhuma ku Lumi handa mwenga ikiva kambila kulamulwa?”
26Yula kilongosi pakahyoghanila hila milandu akamyendela Mkulu wa watovangondo akilonga, “Ungupala kughola kyani? Kwa ikiva mundu hayu ni mundu wa mlima wa Loma.”
27Hinu, Mkulu wa watovangondo akamyendela Paulo, akamkonya, “Ghuli, wenga ni mundu wa mlima wa Loma?” Paulo akamyanga,
“Yiiina.”
28Mkulu wa watovangondo akalonga, “Nenga nivile mundu wa mlima wa Loma kwa kuhipa mapesa ngenju.”
Paulo akalonga, “Ila nenga ni mundu wa mlima wa Loma kwa kuwelekwa.”
29Wala wandu wawelili wakilindila kumkonya Paulo wakahuka bwitu. Hata yula Mkulu wa watovangondo akatila paamanyili yiwa Paulo ni mundu wa Loma na vila kamwopisa kala minyololu.
Paulo angulitetela kuulongolo gha njengakaya
30Kilau ghaki, Mkulu wa watovangondo apalili kumanya mahakata hyogha Wayahudi wawelili wangumsitakila Paulo. Nagha, akamuwopola, akalaghila Watambika Wakulu na njengakaya hyogha wakongine. Hinu akamyegha Paulo, akamgholokesa kuulongolo gha njengakaya.
Currently Selected:
Matendu 22: NTMbBL2025
Highlight
Copy
Compare
Share
Want to have your highlights saved across all your devices? Sign up or sign in
The New Testament in Mbunga @The Word for The World International and Mbunga Language translation, 2025. All rights reserved.
