Matendu 7
7
Ujumbi wa Sitefano
1Hinu, Mtambika Mkulu akamkonya Sitefano, “Ghuli, mighalu hai ni chakaka?”
2Na mweni Sitefano akayanga, “Walongu wa nenga na watati, mnihyoghanili! Ukulu wa Sapanga umuhumililili mbuyi wa twenga Ibulahimu paawelili kula Mesopotamia kambila kayenda ng'ogha kutama kula Halani.” 3Sapanga amlongelelili, “Uhuki kumlima ghako, uhuki kuukolu wa wenga, uyendi kumlima hula nitekulangiha.” 4Hinu Ibulahimu akahuka kumlima gha Wakalidayo akayenda kutama Halani. Badili gha kihu kya tati ghaki, Sapanga akamuhumisa kangi Halani na kumyegha kulikala kumlima hau mngulikala hinaa. 5Sapanga kampegha ng'ogha hata mahala pamonga paweli ulihi ghaki hata utali wa lighulu limonga, ila, amlaghilili kumpegha mlima hau uvile mlima ghaki na gha wawelekwa ghaki, Lipindi lila, awelili ng'ogha na mwana. 6Sapanga amlongelelilili havi, “Wawelekwa ghako wateyeghwa kumlima ghao ng'ogha, na kula wategholwa wahusutu na watehakilwa kwa machuva imia njechi.” 7Ila nenga nitewatova wandu wa mlima hula utewaghola mwenga wahusutu. Hinu nitewahuyisa kumlima hau ili wahiki kuniyupa mahala baha.ʼ 8Hinu Sapanga akaghola lilaghano na Ibulahimu lilaghano lya lijandu hinu Ibulahimu akamlela Isaka na kumuyingisa jandu lichuwa lya inane badili gha kuwelekwa kwaki kuulongolo Isaka akamlela Yakobu na mweni Yakobu akawalela wala wagogolo wa twenga ikumi na ivili.
9“Wala mambuyi wamwonelili wifu Yusufu, wakamuusa handa mhusutu ku Misili. Ila Sapanga awelili pamonga na mweni,” 10akamkombola kumahakili ghaki hyogha. Sapanga akampegha luhala na kumhighila kuulongolo gha Falao, nkosi wa Misili, hata Falao akamvika aweli mkulu wa hula mlima na lighuta lya kinkosi. 11Hinu kuulongolo, kukahumila njala ngulu kumahala kogha ku Misili na Kanani, ikaghola lung'ai lukulu. Mulyo ukawayomokela wambuyi wa twenga. 12Hinu, Yakobu paaliyoghanila habali yiwa kula mlima gha Misili kuwelili na mulyo, akawayegha wana ghaki, hagha ndiwa mbuyi wa twenga, wayendi kula Misili kwa lihanja lya mtumbulo. 13Ku mwanja ghao gha ivili, Yusufu akajilangiha kwa walongo ghaki, na Nkosi Falao wa Misili akawamanya walongo wa Yusufu. 14Yusufu akayegha ujumbi kwa tati ghaki wamkema Yakobu awayeghi walongo ghaki wogha, wogha wawelili wandu isabani na itano, wayendili ku Misili. 15Nagha, Yakobu ayendili ku Misili, kula mweni na mbuyi wa twenga ghangi wahovili haku. 16Mindumbi ghao ikahuyiswa mbaka Shekemu, ikasikwa kulimambi lila livile Ibulahimu awelili kalihemela kwa mapesa kuhuma kwa wana wa Hamoli.
17“Lipindi palihika pabehi kutimila kwa lila lilaghano Sapanga ampeghili Ibulahimu, wandu wa twenga walelilanili na kuyongeseka nesu.” 18Ndiwa, Nkosi mmonga kammanya ng'ogha Yusufu alitumbula kulongosa kula Misili. 19Nkosi hayu awagholelili uhakata wandu wa twenga, kwa kuwaghola mahakata na kuwalongela watati wa twenga wawaviki wana wanung'una panji ili wahovi. 20Kulipindi hali Musa na mweni awelekilwi. Awelili mwana maheli nesu. Alelelilwi mulighuta kwa miehi itatu, 21Badili gha kusindwa kumhigha wakamtagha panji, biti nkosi wa Misili akamtola na akamlela handa mwana ghaki mweni baha. 22Musa akavulwa mighalu hyogha gha luhala gha Wamisili, akawela na uweso nesu kumilandu na matendu ghaki.
23“Paawelili na machuva ialobaini akakolwa na luhujulu ayendi kuwalola walongo ghaki Waizilaili. 24Kula akamlola Mmisili mmonga akimghola mmonga wa wala walongo ghaki uhakata, akayenda kumkombola, na kwa kuhuyisila mghalu, akamkoma yula Mmisili. 25Musa aliwachilili yiwa walongu ghaki watemanya yiwa Sapanga angumtumila kkuwalokola kupitila mweni, ila wamanyili ng'ogha. 26Lichuwa lya ivili ghaki, awalolili Waizilaili waivili wakitovana, akayenda kuwalekanisa ili wakotoho kutovana akilonga, ‘Mwenga ni walongu, kwa kyani hinu, kugholana uhakata mwenga kwa mwenga?’ 27Yula awelili angumtova myaki akamkukula Musa mmbali akilonga, ‘Ni ghani kakuvika wenga uvile mkulu na mwamula wa twenga?’ 28‘Ghuli, ungupala kunikoma handa umkomili yula Mmisili lichu?’ 29Badili gha kuhyoghanila ghala, Musa akabhutuka mbilo, akayenda kutama kumlima gha Midiani na kula akalela wana waivili.
30Badili gha machuva ialobaini, Mtumikila wa Bambu wa kundumba amhumilili Musa kukiputila kiwelili kinguyaka lyoto kula mulivagha pabehi na litumbi Sinai.” 31Musa alikangasili nesu kulola mghalu hau hata akayenda pabehi ili ashungulile, ila ahyoghanilili lilowi gha Bambu likilonga. 32“Nenga ni Sapanga wa mbuyi zyako, Sapanga wa Ibulahimu na Isaka na Yakobu. Musa akahihimila kwa holu hinu kayendelela ng'ogha kulola nesu.” 33Bambu akamlongela, “Uwopoli makubasi ghako kwaikiva baha ugholoka ni mahala kwa Sapanga.” 34“Niyalolili mahakata wangugholwa wandu wa nenga kula Misili. Nihyoghanilili kililo kyao, na nenga nihuluka ili kuwakombola. Hinu hinaa, nitekulaghila Misili.”
35“Hayu Musa ndiwa yulayula wandu wa Izilaili wamkanilili pawalongelili, 'Ni ghani akuvikili wenga uvile mkulu na mlamula wa twenga?ʼ Pala kwa njila gha yula mtumikila wa kundumba wa Sapanga amhumilili kukiputila kiwelili kinguyaka lyoto, Sapanga kamyegha hayu aweli mkulu na mkombola.” 36Ndiwa awalongosili Waizilaili wahuki Misili kwa kughola vilangihi na mighalu gha kukangasa kumlima wa Misili, kubahali gha Shamu na kwa machuva ialobaini mulivagha. 37Musa ndiwa awalongili wandu wa Izilaili, “Bambu Sapanga wa mwenga atewayinulila mlota handa nenga na atevile mmonga paghati gha mwenga walongu.” 38Musa awelili pamonga na wambuyi wa twenga kulivagha ndiwa ailongile na mtumikila wa kundumba wa Sapanga kulitumbi Sinai. Na ndiwa apeghilwi hila milandu gha ukomu atupeghi twenga.
39“Hata nagha mambuyi wa twenga walemili kumyoghanila, wakamkanila na wakapala kuhuya Misili.” 40Wamlongelili Haluni, “Tugholeli milungu itetulongosa munjila, kwaikiva tumanya ng'ogha yampatili hayu Musa atulongosili kuhuma ku Misili.” 41Pala ndiwa pawajigholile kindu kya kuhonga mlandano wa ndama, wakaitambikila na kuigholela mhambu kindu wakigholili kwa mawoku ghao weni baha. 42Ila Sapanga ahukili paghati gha weni, akawaleka wayupi ndondwa zya kunani, handa iyandikililwi kuhitabu kya walota,
“mwenga wandu wa Izilaeli! Nenga ng'ogha
mnipeghili matambiku gha wakokolo
kwa machuva ialobaini kula kulivagha!”
43“Mwenga mpapili kibimilo kya mlungu Moleki,
na ndondwa gha kuhongwa gha mlungu wa mwenga Lefani.
Vindu vya kuhongwa ili mvitundamilili.
Kwaikiva gha nagha nitewayegha mvile wahusutu kutali kupiti Babeli.”
44“Kula mulivagha mambuyi wa twenga wawelili na lila libimilo lya kulangiha yiwa Sapanga ka pala. Ligholilwi handa Sapanga amlongelili Musa aligholi.” 45Watati wa twenga pawayomola kupokela kibimilo kwa kupeghana mbaka lipindi lya ulongosi wa Yoshua, na wakilongoswa na Yoshua wayendili kutola mlima kuhuma kwa ghala milima yavile Sapanga awawingili wandu wavile ng'ogha Wayahudi kuulongolo gha weni na lyeni likatama kumlima mbaka lipindi lya Daudi. 46Daudi ambendezili Sapanga, na mweni Daudi akamluwa Sapanga ampeghi uweso wa kumchengela lighuta Sapanga wa Yakobu. 47Ila Selemani ndiwa amchengilili Sapanga lighuta.
48“Hata nagha, Sapanga avile kunani nesu kalikala ng'ogha kulighuta lichengilwi na wandu, handa mlota ghaki angulongela.” 49“Bambu alonga, kundumba ni kikalilo kya ukulu
na mlima wogha ni kikalilo kya nenga kya kuvika maghulu.
Mtenichengela lighuta lya ghuli?
Na mahala ghani nitepumulila?”
50Ghuli ng'ogha nenga mweni baha nigholili vindu havi vyogha?
51Sitefano akayendela kulonga, “Mwenga watatala wakulu! Mioyu gha mwenga ni ikamala na mapulukilo gha mwenga majoghu handa wandu wammanyili ng'ogha Sapanga. Mwenga ni handa wambuyi wa mwenga. Machuwa hyogha mngumkingama Mpumulo wa Sapanga. 52Ghuli, kuvile na mlota yoyose wambuyi wa mwenga wamhakili ng'ogha? Wawakomili wala wandu Sapanga awayeghili, watangasili kuhika kwa mundu yula mweni ulungwana. Na hinaa, mwenga mkamhyuka na mkamkoma. 53Mwenga ndiwa mpokela laghililo lya Sapanga kwa kupitila watumikila wa kundumba, ila muyitikila ng'ogha.”
Sitefano angukomwa
54Wala wagogolo wa njengakaya pawayoghanilili hagha, wahyomili nesu, wakamkekenelela. 55Ila Sitefano kunu akilongoswa na Mpumulo wa Sapanga, akalola kunani kundumba, akaulola ukwilikihi wa Sapanga na Yesu kapegwa utundamilo mkulu kupiti wogha. 56Akalonga, “Mlole! Ningulola kundumba kugubutulwa na Mwana wa Mundu kapeghwa utundamilu mkulunga kupiti wogha.”
57Hinu wandu wogha mula munjengakaya wakakanila kumyoghanila wakadiwa mapulikilo kunu wakitova lilowi na wakamyendela Sitefano wogha kwa pamonga. 58Wakamhumisa panji gha mmbwani, wakamtova maganga. Wala wandu walolile kwa mihu na kuwesa kumlongelela wakavika makoti gha weni pahi gha ugholokela wa mhongolo mmonga lihina lyake Sauli. 59Pawawelili wakiyendelela kumtova Sitefano kwa maganga mweni akiva anguyupa, “Bambu Yesu, upokeli mpumulo gha nenga!” 60Akatundamila manughuna, akalila kwa lilowi likulunga, “Bambu, ukotoho kuwavalangila mahakata hagha.” Pakayomola kulonga hagha akahova.
Currently Selected:
Matendu 7: NTMbBL2025
Highlight
Copy
Compare
Share
Want to have your highlights saved across all your devices? Sign up or sign in
The New Testament in Mbunga @The Word for The World International and Mbunga Language translation, 2025. All rights reserved.
