Yakobu 3
3
Kulongosa lulimi
1Walongo wa nenga paghati gha mwenga kukotoho kuwela na wavula watangala, kwaikiva mngumanya yiwa twenga wavula tutetoswa nesu kupiti waghangi. 2Twenga wogha tungukosela mighalu itangala. Pakukawela na mundu kakosela ng'ogha kughala angulongela, hayu katimila, hayu kanguwesa kulikanisa mweni mhigha ghaki ukotoho kulonga mahakata. 3Patuvika vipandi vya kyuma kinung'una kyeni kuwopwa ngowi pamlomo wa falasi tungupala atuyitikili, na kwa njila hai tunguwesa kumlongosa kokosi kula tungupala ayendi, 4au uloli hilahila whato ngulu pamonga na yiwa ingutolwa na liyegha likalipa, ila inguyendeswa na usukani msokombi nesu, kokosi kula angupala ayendi myendesa whato. 5Hilahila lulimi ni kikongonu kisokombi nesu kumhigha, ila wandu wanguwesa kuidumba yiwa lughola mighalu mikulunga nesu. Uliwachilile vila mhitu mkulu unguwesa kunyaywa na lyoto lisokombi hela. 6Lulimi ni handa lyoto lisokombi, lumema mahakata ngenju, na lweni ni paghati gha vikongonu vya twenga, na lweni ndiwa lyeni kubyodosa mhigha wogha, kangi lulimi ni handa lyoto lyeni kunyanya mundu na kumyalamisa kungalilu ghaki hyogha kulyoto lyeni kuhuma kumambi. 7Mundu anguwesa kufuga mfughu wa mbongu, na ndambu weka weka gha mikokolu, mikokolu yeni kukwava na mikokolu gha mbahali. 8Ila kwahela mundu mweni kuwesa kufuga lulimi. Lulimi ni kindu kihakata, kinguwesa ng'ogha kugholokelwa, na kimema sumu yeni kukoma. 9Twenga tungutumila lulimi kumshukwile Bambu na Tati wa twenga. Hila hila kupitila lulimi twenga tunguwalongela wandu wahumilwi na mahakata wandu, wandu weni kulumbwa kwa mlandano wa Sapanga. 10Milando gha kuhighila na milando gha kutakila wandu mahakata kuhuma kumlomu mmonga, walongo wa nenga hai maha ng'ogha. 11Ghuli, uhimbuko mmonga unguwesa kuhumisa masi maheli na masi yeni munyu? 12Walongo wa nenga, ghuli, libiki lya mkuyu linguwesa kulela liembi? Au, libiki lya miembi linguwesa kulela matungula gha mkuyu? Uhimbuki wa masi gha munyu unguwesa ng'ogha kuhumisa masi maheli.
Luhala lihumile kwa Sapanga
13Ghani mweni luhala na umanyi paghati gha mwenga? Alangihi luhala lwaki kwa ngalilu ghaki maha, kwa matendu ghaki yagholilwe kwa unyenyekela weni kuyeghwa na luhala. 14Ila paikawela mioyu gha mwenga imema na lumatamata luhakata na kuipala umweni, mkotoho kuitutumula kwa kulongela uhwangi mkilonga yiwa ni chakaka. 15Luhala lwa ndambu hai lunguhuma ng'ogha kwa Sapanga, ila ni lwa kimundu na lwa Lihyukana, 16kwaikiva pala penikuwela na wifu na kuipala umweni, ndiwa kwenikuwela na mikologhanyiko pamonga na matendu mahakata. 17Ila luhala lwa Sapanga kuhuma kundumba ingutughola tuweli ng'ogha na ndaka kuulongolo gha Sapanga, na tuweli na upongu kwa wandu, weni ni wanyalinyali, yeni inguniwesa kuhyoghanila milando gha wandu waghangi, ingunighola niweli mnyenyekela, ingunighola niweli na luhungu na matendu gha maha, nikotoho kuwela mbaghula, na kangi nikotoho kuwela mmbindingu. 18Wandu weni kughola ndulumu paghati gha wandu, wanguwela handa wakulila mbeyu gha kulikala kwa kuponga, kuulongolo watebena ghala ghala wangupalwa kubena kuulongolo gha Sapanga.
Currently Selected:
Yakobu 3: NTMbBL2025
Highlight
Copy
Compare
Share
Want to have your highlights saved across all your devices? Sign up or sign in
The New Testament in Mbunga @The Word for The World International and Mbunga Language translation, 2025. All rights reserved.