Yakobu 4
4
Kuupala mlima wogha
1Kindu liki kinguyambusa matovano na magombi mghati gha mwenga? Ghuli, hagha yanguyambuswa ng'ogha na lumatamata lweni kuhuma mghati gha mwenga lweni kusindana mghati gha mwenga? 2Mngupala muweli na vindu ila mpata ng'ogha, hinu mngukoma na mnguwela na wifu kwa wandu waghangi, ila mmbila kuhumilwa na ghala mnguyapala, hinu mnguwela na magombi na kutovana. Walongo wa nenga mpata ng'ogha vila mnguvipala kwaikiva mnguyupa ng'ogha kuhuma kwa Sapanga. 3Pamyupa mpata ng'ogha kwaikiva mnguyupa kwa lukani luhakata, ili mpati kuvitumila vila mtepokela kwa lumatamata lula muwela nalu. 4Mwenga wandu weni kuwela ng'ogha wachakaka handa wangongola, mngumanya ng'ogha yiwa kuupala mlima wogha ni kumhyomela Sapanga? Yeyosi mweni kuighola mghanja wa mlima wogha kanguighola mweni kuwela mhakata wa Sapanga. 5Mkotoho kuliwachila yiwa kwahela uchakaka kumayandiko gha Sapanga yeni kulonga, “Mpumulo yula mweni kuvikwa na Sapanga mghati gha twenga kana wifu mkulu.” 6Ila Sapanga katulangiha twenga umaha nesu, Hai ndiwa kwaikiva gha kuwela kwa liyandiko lya Sapanga lingulonga, “Sapanga angungingamana na weni kinyengu, ila wanyenyekela anguwahighila.” 7Hinu mumyitikili Sapanga. Mumngingami Lihyukana, na lyeni litetuwa. 8Mumhikili pabehi Sapanga, na mweni atewahikila mwenga pabehi, mwenga weni sambi mleki kughola mahakata, mwenga weni mawaqchilo maivili maivili mleki na mgholi ghamaha. 9Mlumbilili na kulila! Kiheku kya mwenga na kihyuki kuwela malumbililo, na luheku lya mwenga lihyuswi kuwela kulila. 10Mumyitikili Bambu, na mweni atewayinula.
Mkotoho kutosa kiuhakata
11Walongo, mkotoho kulongelana milando mihakata au kutosana. Yula mweni kumlongela myaki mahakata au kumtosa, hayu angulitosa laghilo na paughola nagha, hinu ungulikola ng'ogha laghilo ila uwela mtosa wa laghilo hali. 12Sapanga weka yaki ndiwa mweni kuvika laghilo na kutosa. Ni mweni weka ghaki mweni uwesa wa kulokola na kuyalamisa. Ghuli wenga kwa ghani hata umlongeleli maha ng'ogha myaku?
Mleki kuidumba
13Hinu mwenga weni kulongela “Lelo au kilau tuteyenda kummbwani mtenu na kulikala haku lichuva lyogha tukighola biasala na kupokela fwaida.” 14Mwenga mngumanya ng'ogha hata vila ngalilu gha mwenga itewela kilau! Mwenga ni handa ukungweta weni kuhumila kwa lipindi lihupi weka na kuulongolo likahuka kangi. 15Mngalipalwa kulongela, “Bambu akipala tutelikala na tuteghola haki au kila.” 16Ila hinaa munguisifila na kuliyinula, kulidumba kwa nagha kwa maha ng'ogha. 17Hinu mundu mweni kumanya kughola mighalu maha na akaleka kughola, hayu angughola sambi.
Currently Selected:
Yakobu 4: NTMbBL2025
Highlight
Copy
Compare
Share
Want to have your highlights saved across all your devices? Sign up or sign in
The New Testament in Mbunga @The Word for The World International and Mbunga Language translation, 2025. All rights reserved.