1 Timotéo̱ 4
4
Rí nusngáá xa̱bo̱ tsí nu̱ni̱ꞌñáá rí nanimba̱ꞌlóꞌ
1Mbá jaꞌwu máꞌ iꞌthán Xu̱u̱ꞌ Ana̱ꞌlóꞌ rí awúun mbiꞌi rí na̱ka̱-rayámba̱ numbaa, mbá tikhuun xa̱bo̱ mu̱ni̱ꞌñáá-ranimbu̱únꞌ rí nanimba̱ꞌlóꞌ juꞌyáá, numuu rí mu̱ꞌgíi̱ idxúu̱n rí mi̱nduwa nuthan gíñá xkawi̱inꞌ jamí ma̱nimbúu̱n rí nusngáá xa̱bi̱i gixa̱a̱. 2Mu̱ꞌgíi̱ idxúu̱n rí nuthan xa̱bo̱ tsí a̱jma̱ inúú jamí mixtutiin, xúꞌkhue̱n máꞌ nánguá ene̱-nuwii̱n mbá jayu rí mate̱ꞌ. 3Ikhiin xa̱bo̱ tsúꞌkhue̱n nuthan rí ra̱gíꞌmaa muda-mijná xa̱bo̱, jamí ra̱gíꞌmaa mu̱ꞌpholóꞌ mbá tikhu ganitsu. Rúꞌkhue̱n neꞌne-ku̱maa Ana̱ꞌlóꞌ, kajngó ma̱goo mu̱drígúlóꞌ ne̱ tsáanꞌ nanimba̱ꞌlóꞌ juꞌyáa̱ jamí nu̱ꞌne̱-nuwiinlóꞌ rí gakon. Xúꞌkhue̱n máꞌ nu̱rígu̱ulóꞌ gamaku inuu Ana̱ꞌló ga̱jma̱á numuu ne̱. 4Numuu rí máján mbá xúgíí rí neꞌne-ku̱maa Ana̱ꞌlóꞌ, jamí ra̱jáꞌyalóꞌ mu̱ni̱ꞌñáá nimbá, xí nu̱rígu̱ulóꞌ gamaku inuu Ana̱ꞌlóꞌ ga̱jma̱á numuu ne̱. 5Na̱gu̱ma-tsakun-rámáá ne̱ ga̱jma̱á majñu̱u̱ ajngáa rawuun Ana̱ꞌlóꞌ jamí ga̱jma̱á majñu̱u̱ rí nu̱rígu̱ulóꞌ gamaku inuu Ana̱ꞌlóꞌ.
Páblo̱ naꞌthán-múꞌúun Timotéo̱
6Xí ikháánꞌ narasngúún a̱ngia̱nꞌlóꞌ rí gakon rí na̱tha̱a̱nꞌ ge̱jyoꞌ, a̱ꞌkhue̱n ma̱nindxa̱a̱ꞌ mbáa yumbáá tsí phú máján eꞌne ñajuun Jesukrísto̱. Xúꞌkhue̱n máꞌ nataxníꞌtsu-mina̱ꞌ ga̱jma̱á ajngáa rí gakon rí nanimba̱ꞌlóꞌ juꞌyáá, jamí ga̱jma̱á gisngáá máján rí nanimba̱a̱ꞌ máꞌ. 7Ma̱xátha̱ꞌgíi idxa̱a̱ꞌ rí ma̱ta̱dxawíín ajngáa xkáꞌtsa rí nda̱a̱ gamakuu jamí mi̱nduwa rí nuthan xa̱bo̱. I̱wa̱á máján, araxná-mina̱ꞌ tsiakhe̱ rí ma̱tha̱ne̱ rí nandoo Ana̱ꞌlóꞌ. 8Maske máꞌ lájwíin nambáyúu ná xuyalóꞌ rí nu̱ꞌne̱-tsiakhe̱-mijnálóꞌ rí nuꞌtsínlóꞌ, i̱tha̱án máꞌ nambáyálóꞌ mbá xúgíí rí nu̱ꞌne̱lóꞌ rí nandoo Ana̱ꞌlóꞌ. Numuu rí rúꞌkhue̱n nambáyálóꞌ awúun mbiꞌi rí juwalóꞌ xúge̱ꞌ jamí mangaa máꞌ awúun mbiꞌi rí ma̱ꞌkha̱ nda̱wa̱á. 9Ajngáa rí gakon ñajuun rúꞌkhue̱n, jamí ga̱náꞌyoo rí ma̱nimbu̱únꞌ ne̱ mbá xúgíin xa̱bo̱. 10Ikhaa máꞌ numuu rúꞌkhue̱n nu̱ñajunlóꞌ jamí nu̱míni̱ílóꞌ, numuu rí wéje̱ máꞌ a̱kia̱nꞌlóꞌ juꞌyáá Ana̱ꞌlóꞌ tsí xtáa ndaꞌya. Ikhaa̱ ñajuu̱n tsí naꞌne-jáwíi̱n mbá xúgíin xa̱bo̱ numbaa, jamí i̱wa̱á máꞌ tsí nanimbu̱únꞌ juyáa̱.
11Arasngúún mbá xúgíí rúꞌkhue̱n a̱ngia̱nꞌlóꞌ jamí arathúu̱n rí mune̱-mbáníi̱ ne̱. 12Nimbáa ma̱xándxaꞌwá-mina̱ꞌ rí nda̱a̱ numaaꞌ numuu rí xóó dxáma ñajwaanꞌ. A̱ꞌkhue̱n gakon, araxná-mina̱ꞌ tsiakhe̱ rí ma̱nindxa̱a̱ꞌ mbá xkri̱da mbuyáá i̱ꞌwíin tsí nanimbu̱únꞌ juyáá Ana̱ꞌlóꞌ. Máján gáꞌne mbá xúgíí xó rí na̱tsi̱ndxákuun, xó rí nathane̱, xó rí nandaaꞌ xtañúú xa̱bo̱, xó rí wéje̱ a̱kia̱anꞌ ná inuu Ana̱ꞌlóꞌ, xúꞌkhue̱n máꞌ xó rí jaꞌwu xtaa. 13Awúun máꞌ rí xóó tsíka gáya̱a̱ꞌ a̱ꞌkhue̱n, ma̱xáta̱tsi̱ꞌñáá rí naraxnuu ajngáa rawuun Ana̱ꞌlóꞌ ná inúú a̱ngia̱nꞌlóꞌ, xúꞌkhue̱n máꞌ arathán-múꞌúu̱n jamí arasngúu̱n. 14Ma̱xáta̱tsi̱ꞌñáá rí nathane̱ ñajun rí nijanáaꞌ ma̱tha̱ne̱, ikhaa rí nijanáaꞌ nákhí nitadxawíín ajngáa rí ni̱rawíjnga̱a xa̱bo̱ buanuu ede̱ jamí ni̱xkra̱me̱e̱ꞌ idxa̱a̱ꞌ.
15Athaꞌgíi a̱kia̱anꞌ rí ma̱tha̱ne̱ mbá xúgíí rí na̱tha̱a̱nꞌ ge̱jyoꞌ, jamí ma̱xáta̱tsi̱ꞌñáá rí nathane̱ ne̱, kajngó mbá xúgíin mbuyáá rí na̱gi̱do̱o̱ꞌ ñajun rí nathane̱. 16A̱tia̱wa̱án xtaya-mina̱ꞌ máꞌ ikháánꞌ jamí a̱tia̱wa̱án xó rí narasngúún xa̱bo̱. Ariajún xa̱ꞌ ná ajngóo Ana̱ꞌlóꞌ, numuu rí ído̱ nathane̱ rúꞌkhue̱n, ma̱tha̱ne̱-jríya̱ꞌ-mina̱ꞌ máꞌ ikháánꞌ jamí ma̱jáwíin tsí nu̱dxawíín rí narathán mangaa.
Currently Selected:
1 Timotéo̱ 4: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.