2 Xa̱bo̱ Korínto̱ 1
1
Páblo̱ naraxi̱in tsí nanimbu̱únꞌ juyáá Jesús ná xuajen Korínto̱
1Ikhúúnꞌ ñajunꞌ Páblo̱, tsí waxúngua̱a̱ꞌ neꞌne Jesukrísto̱ numuu rí xkuaꞌnii ndiyoo Ana̱ꞌlóꞌ. Ga̱jmi̱ꞌ dxájwalóꞌ Timotéo̱.
Nu̱xu̱ꞌmáxo̱ꞌ i̱yi̱i̱ꞌ ríge̱ꞌ inúú tsí nanimbu̱únꞌ juyáá Ana̱ꞌlóꞌ ná xuajen Korínto̱, jamí mbá xúgíin xa̱bi̱i Ana̱ꞌlóꞌ tsí júwa̱ꞌ mbá xúgíí numbaa Akáya̱.
2Ana̱ꞌlóꞌ Mikhuíí jamí Táta̱ Jesukrísto̱ gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá.
Ana̱ꞌlóꞌ naxnáa la ski̱yu̱u̱ꞌ a̱kia̱nꞌlóꞌ
3A̱gu̱ma-mba̱a̱ Ana̱ꞌlóꞌ, Anu̱u̱ máꞌ Tátiálóꞌ Jesukrísto̱. Numuu rí Ana̱ꞌlóꞌ nañáwíin a̱kuii̱n jaꞌyalóꞌ jamí jámba̱ miꞌtsú naxnáa la tsiakhe̱ a̱kia̱nꞌlóꞌ. 4Ana̱ꞌlóꞌ naxnáa la tsiakhe̱ a̱kia̱nꞌlóꞌ ído̱ rí juwalóꞌ ná awúun mbá xúgíí inii jamínu̱ꞌ, kajngó mangáanꞌlóꞌ ma̱goo mu̱ꞌxnáalóꞌ tsiakhe̱ a̱kui̱ín tsí júwa̱ꞌ ná awúun jamínu̱ꞌ, xómá rí naꞌne jayu Ana̱ꞌlóꞌ rí naxnáa la tsiakhe̱ a̱kia̱nꞌlóꞌ ikháánꞌlóꞌ. 5Numuu rí xómá rí phú mba̱a̱ nu̱míni̱ílóꞌ ga̱jma̱á numuu Krísto̱, xkuaꞌnii máꞌ phú mba̱a̱ naxnáa la Ana̱ꞌlóꞌ tsiakhe̱ a̱kia̱nꞌlóꞌ ga̱jma̱á majñu̱u̱ Krísto̱. 6Ído̱ rí ikháanꞌxo̱ꞌ nu̱míni̱íxo̱ꞌ, ikháanꞌlaꞌ mbayáa tsiakhe̱ a̱kia̱nꞌlaꞌ jamí ma̱jríñáaꞌlaꞌ. Ído̱ rí ikháanꞌxo̱ꞌ ndayáa tsiakhe̱ a̱kia̱nꞌxo̱ꞌ eꞌne Ana̱ꞌlóꞌ, ikháanꞌlaꞌ mbayáa tsiakhe̱ a̱kia̱nꞌlaꞌ jamí ma̱jríñáaꞌlaꞌ, kajngó ma̱ꞌngo̱o̱ a̱kia̱nꞌlaꞌ rí mu̱míni̱ílaꞌ xómá rí nu̱míni̱í ikháanꞌxo̱ꞌ. 7Numuu rí ikháanꞌxo̱ꞌ mbá jañii a̱kia̱nꞌxo̱ꞌ ju̱ya̱ꞌlaꞌ, jamí ndu̱ya̱áxo̱ꞌ rí xómá rí a̱ngia̱nꞌxo̱ꞌ ñajwanlaꞌ ná awúun jamínu̱ꞌ, xkuaꞌnii máꞌ a̱ngia̱nꞌxo̱ꞌ ñajwanlaꞌ ná awúun rí Ana̱ꞌlóꞌ naxnáa la tsiakhe̱ a̱kia̱nꞌlaꞌ mangaa.
8A̱ngui̱nꞌ, nandoꞌ rí ma̱gi̱da̱ꞌ idxa̱ꞌlaꞌ wátha̱ mba̱a̱ ni̱míni̱íxo̱ꞌ ná numbaa Ásia̱. Numuu rí ninújngoo gakhe̱ ni̱gíꞌnííxo̱ꞌ ikhín, rí asndo wámba̱ ski̱ya̱ꞌxo̱ꞌ, jamí asndo ni̱ju̱ma̱ꞌxo̱ꞌ rí ma̱ja̱ñáxo̱ꞌ máꞌ. 9Ni̱ndxa̱ꞌwa̱-mijnáxo̱ꞌ rí waꞌxná-máꞌáanꞌxo̱ꞌ máꞌ rí ma̱ja̱ñáxo̱ꞌ. Xómáꞌ jamínu̱ꞌ rúꞌkhue̱n nimbáyáxo̱ꞌ ne̱ rí ma̱xáwe̱je̱ a̱kia̱nꞌxo̱ꞌ ju̱ya̱-mijná máꞌ ikháanꞌxo̱ꞌ, rí ma̱we̱je̱ a̱kia̱nꞌxo̱ꞌ ná inuu Ana̱ꞌlóꞌ tsí naꞌne rí mbuya̱a mbiꞌñúú tsí nijáñúú. 10Ana̱ꞌlóꞌ neꞌne-jríñáa̱ꞌxo̱ꞌ ná awúun ngamí rí ma̱ja̱ñáxo̱ꞌ, jamí naꞌne-jríñáa̱ꞌxo̱ꞌ máꞌ xúge̱ꞌ. Ná ñawúun Ana̱ꞌlóꞌ ni̱ra̱khuá-mijnáxo̱ꞌ, jamí guáꞌthi̱ínxo̱ꞌ rí ma̱ꞌne-jríñáa̱ꞌxo̱ꞌ máꞌ xóó nda̱wa̱á, 11numuu rí ikháanꞌlaꞌ nu̱tha̱n-jáñíílaꞌ Ana̱ꞌlóꞌ ga̱jma̱á numaxo̱ꞌ. A̱ꞌkhue̱n rí phú mbaꞌiin xa̱bo̱ muthán-jáñíí Ana̱ꞌlóꞌ ga̱jma̱á numaxo̱ꞌ, jamí phú mbaꞌiin xa̱bo̱ mu̱rígu̱u gamaku inuu Ana̱ꞌlóꞌ, numuu rí niriꞌña Ana̱ꞌlóꞌ rí ni̱nda̱ꞌe̱e̱ ga̱jma̱á numaxo̱ꞌ.
Naxtiꞌkhu̱u rí naꞌgí-mina̱ꞌ Páblo̱ ma̱ꞌne
12Ma̱goo mu̱tha̱nxo̱ꞌ ga̱jma̱á mbá jañii a̱kia̱nꞌxo̱ꞌ rí ni miꞌtsú túne̱-nduwaxo̱ꞌ, jamí jaꞌwu a̱kia̱nꞌxo̱ꞌ nijuwaxo̱ꞌ ná inúú xa̱bo̱, jamí i̱wa̱á máꞌ rí ga̱jma̱á nindxa̱ꞌlaꞌ ikháanꞌlaꞌ, jamí ikhaa máꞌ rúꞌkhue̱n naꞌthán-máꞌánxo̱ꞌ a̱kia̱nꞌxo̱ꞌ mangaa. Ana̱ꞌlóꞌ nimbáyáxo̱ꞌ rí ma̱juwaxo̱ꞌ xkuaꞌnii ga̱jma̱á majñu̱u̱ rí máján nixnáxo̱ꞌ, ra̱ꞌkhá ga̱jma̱á majñu̱u̱ rí na̱ma̱ñaxo̱ꞌ ikháanꞌxo̱ꞌ. 13Ikhaa máꞌ rí nu̱raxnuulaꞌ jamí nafraꞌa̱ꞌlaꞌ ná inuu i̱ya̱ꞌxo̱ꞌ, ikhaa máꞌ rúꞌkhue̱n ñajuun rí nu̱tha̱nꞌlaꞌxo̱ꞌ, numuu rí nda̱a̱ nitháan rí kri̱ga̱ ngu̱ꞌwo̱o̱ ná inuu i̱ya̱ꞌxo̱ꞌ. Jamí ikhúúnꞌ gúꞌthu̱u̱n rí mbá mbiꞌi ma̱fraꞌa̱ꞌlaꞌ mbá xúgíí rí nu̱tha̱nxo̱ꞌ, 14maske máꞌ xúge̱ꞌ tsífraꞌa̱ꞌlaꞌ mbá xúgíí. Xkuaꞌnii kajngó ído̱ rí ma̱ꞌkha̱a Táta̱ Jesús, ikháanꞌlaꞌ ma̱juwalaꞌ gagi ga̱jma̱á numaxo̱ꞌ, xómá rí ikháanꞌxo̱ꞌ ma̱juwaxo̱ꞌ gagi ga̱jma̱á numalaꞌ ikháanꞌlaꞌ.
15Numuu rí mbá jañii máꞌ a̱kui̱nꞌ rí nafraꞌa̱ꞌlaꞌ, ikhaa jngó ni̱ꞌgí-mina̱ꞌ rí ma̱ꞌgá gáya̱ꞌlaꞌ ikháanꞌlaꞌ ginii jayu, kajngó ma̱juwalaꞌ gagi a̱jma̱ nothon rí mu̱drígúúnlaꞌ. 16Ikhúúnꞌ ni̱ꞌgí-mina̱ꞌ rí ginii ma̱ꞌgá gáya̱ꞌlaꞌ ído̱ rí ma̱ꞌgálo̱ꞌ ná numbaa Masedónia̱, jamí ído̱ rí ma̱ꞌkha̱aꞌ ná Masedónia̱, ma̱nújnga̱aꞌlo̱ꞌ ná juwalaꞌ. Nda̱wa̱á a̱ꞌkhue̱n rí mu̱mbáyúꞌlaꞌ rí mba̱ya̱a ikhoꞌ ma̱ꞌgá ná numbaa Judéa̱. 17Nákhí ni̱ꞌgí-mina̱ꞌ rí ma̱ne̱ ríge̱ꞌ, á na̱ju̱ma̱ꞌlaꞌ rí tsíndxa̱ꞌwa̱-mína̱ꞌ mújúnꞌ rí ma̱ne̱ dxe̱ꞌ, o na̱ju̱ma̱ꞌlaꞌ rí ikhúúnꞌ mangúúnꞌ jaꞌñúú xómá jaꞌñúú xa̱bo̱ numbaa dxe̱ꞌ, rí ginii nuthee̱n «ma̱ne̱» jamí nda̱wa̱á nuthee̱n «ma̱xáne̱».
18Ana̱ꞌlóꞌ ndaꞌyoo̱ mújúu̱n rí ikháanꞌxo̱ꞌ tsítha̱nꞌlaꞌxo̱ꞌ «ma̱ne̱» jamí «ma̱xáne̱» mangaa. 19Numuu rí Jesukrísto̱, tsí ñajuun A̱dée Ana̱ꞌlóꞌ, ra̱ꞌkhá ginii naꞌthée̱n «ma̱ne̱» jamí nda̱wa̱á naꞌthée̱n «ma̱xáne̱». Ikhúúnꞌ ga̱jmi̱ꞌ Silbáno̱ jamí Timotéo̱ ni̱tha̱n-ráꞌaxo̱ꞌ ga̱jma̱á numuu̱ máꞌ ikhaa̱ ná inalaꞌ, rí mbóó máꞌ ajngóo̱, rí ma̱ꞌne-mbánuu̱ rí naꞌthée̱n ma̱ꞌnii̱. 20Numuu rí ga̱jma̱á majñu̱u̱ Krísto̱ «na̱gu̱ma-mbáníí» mbá xúgíí rí nixuda-mina̱ꞌ Ana̱ꞌlóꞌ. Ikhaa jngó, ído̱ rí nu̱ꞌne̱-mba̱a̱lóꞌ Ana̱ꞌlóꞌ ga̱jma̱á majñu̱u̱ Krísto̱, nuꞌthánlóꞌ «xkuaꞌnii gáꞌne». 21Xómáꞌ Ana̱ꞌlóꞌ naꞌnii̱ rí ma̱wajún-gúkuálóꞌ ga̱jma̱á majñu̱u̱ Krísto̱, jamí niraꞌwáa̱nꞌlóꞌ rí mu̱ꞌne̱lóꞌ ñajuu̱n. 22Xúꞌkhue̱n máꞌ nixnálóꞌ tsinuu̱ rí nasngájma rí xa̱bii̱ ñajwanlóꞌ. Tsina tsúꞌkhue̱n ñajuun Xu̱u̱ꞌ Ana̱ꞌlóꞌ tsí xtáa ná awúun a̱kia̱nꞌlóꞌ, rí nasngájma rí Ana̱ꞌlóꞌ maxnálóꞌ mbá xúgíí rí nixuda-mine̱e̱ꞌ.
23Ana̱ꞌlóꞌ ndaꞌyoo rí gakon rí na̱tha̱nꞌlaꞌ jamí ikhaa̱ gáꞌnii̱ rí ma̱ja̱ñúꞌ xí na̱ne̱-nduwalo̱ꞌ, xóó máꞌ táthangu̱únꞌlo̱ꞌ ná Korínto̱ a̱ꞌkhue̱n, numuu rí tsíyoꞌ máꞌ rí ma̱ríyálaꞌ mbu̱júꞌ. 24Ra̱ꞌkhá máꞌ numuu nandaxo̱ꞌ rí mu̱xna̱-ñájwanlaꞌ xáne gíꞌmaa ma̱juwalaꞌ ga̱jma̱á numuu rí wéje̱ a̱kia̱nꞌlaꞌ ná inuu Ana̱ꞌlóꞌ, numuu rí ikháanꞌlaꞌ kuajún-gúkuálaꞌ máꞌ ná tsu̱du̱u̱ rí wéje̱ a̱kia̱nꞌlaꞌ ju̱ya̱á. I̱ndo̱ó máꞌ numuu rí nandaxo̱ꞌ mu̱ñajunxo̱ꞌ ga̱jma̱á nindxa̱ꞌlaꞌ kajngó ma̱juwalaꞌ i̱tha̱án máꞌ gagi.
Currently Selected:
2 Xa̱bo̱ Korínto̱ 1: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.