2 Xa̱bo̱ Korínto̱ 2
2
1Ikhaa jngó ni̱ꞌgí-mina̱ꞌ rí ma̱xáꞌgá gáya̱ꞌlaꞌ mbu̱júꞌ rí ma̱ne̱ rí ma̱juwa-jínálaꞌ. 2Xí ikhúúnꞌ na̱ne̱ rí ma̱juwa-jínálaꞌ, tsáa gáꞌne-gagi̱i a̱kui̱nꞌ ikhúúnꞌ rá, rí i̱ndo̱ó máꞌ ikháanꞌlaꞌ tsáanꞌ ne̱ne̱ rí ma̱juwa-jínálaꞌ. 3Ikhaa numuu rúꞌkhue̱n ni̱tháánlo̱ꞌ ajngáa gakhe̱ ma̱ꞌga inalaꞌ, kajngó mu̱xúne̱laꞌ rí ma̱xtáá-jínúꞌlo̱ꞌ ído̱ rí ma̱gánú a̱ꞌkhue̱n, rí i̱tha̱án máꞌ máján rí mu̱ne̱-gagi̱ilaꞌ a̱kui̱nꞌ. Ikhúúnꞌ nda̱yo̱o̱ mújúnꞌ rí ikháanꞌlaꞌ ma̱ꞌdxu a̱kia̱nꞌlaꞌ ga̱jma̱á nindxu̱ꞌ. 4Numuu rí nákhí ni̱tháánlo̱ꞌ i̱yi̱i̱ꞌ rúꞌkhue̱n, phú naxná-gamiéjunꞌ jamí najmúu a̱kui̱nꞌ e̱ne̱laꞌ, rí asndo na̱mbi̱ya̱ꞌlo̱ꞌ. Xómáꞌ ikhúúnꞌ tátháán ne̱ kajngó ma̱ne̱ rí ma̱juwa-jínálaꞌ, rí nandoꞌ rí mbu̱ya̱álaꞌ rí maphú mba̱a̱ nandoꞌ ja̱ya̱ꞌlaꞌ.
Gu̱ꞌne̱ mba̱a̱ a̱kia̱nꞌlóꞌ juꞌyáá tsí neꞌne aꞌkhán
5Xí mbáa neꞌne rí ma̱xtáá-jínúꞌlo̱ꞌ, ra̱ꞌkhá máꞌ i̱ndo̱ó ikhúúnꞌ niꞌnii̱ rí ma̱xtáá-jínúꞌlo̱ꞌ, rí asndo mbá xúgiáanꞌlaꞌ máꞌ niꞌnii̱ rí ma̱juwa-jínálaꞌ, jamí ra̱ꞌkhá máꞌ nanújngo-rámuꞌ rí na̱tha̱nꞌlaꞌ ríge̱ꞌ. 6Mbájndi máꞌ jamínu̱ꞌ rí ni̱ꞌgílaꞌ mbaꞌáanꞌlaꞌ ná inuu xa̱bo̱ tsúꞌkhue̱n. 7Rí xúge̱ꞌ rá, ikháanꞌlaꞌ jaꞌyoo rí mu̱ne̱ mba̱a̱ a̱kia̱nꞌlaꞌ ju̱yáa̱ jamí rí mu̱xna̱alaꞌ tsiakhe̱ a̱kuii̱n, ra̱ꞌkhá ma̱mbáa̱ gáꞌne rí xtáa̱-jínúu̱ guéño. 8Ikhaa jngó rí xúge̱ꞌ rá, na̱tha̱n-jáñalaꞌ rí mu̱snga̱jmáa̱ mbu̱jwálaꞌ rí nandalaꞌ ju̱yáa̱. 9Ikhaa máꞌ numuu rúꞌkhue̱n mangaa ni̱xu̱ꞌmá i̱yi̱i̱ꞌ inalaꞌ nákhí wapha, kajngó mba̱yo̱o̱ xí juwalaꞌ rí mu̱ne̱-mbáníílaꞌ mbá xúgíí rí na̱tha̱nꞌlaꞌ. 10Ikhaa jngó, xí ikháanꞌlaꞌ nu̱ne̱ mba̱a̱ a̱kia̱nꞌlaꞌ ju̱yáa̱, ikhúúnꞌ mangúúnꞌ na̱ne̱ mba̱a̱ a̱kui̱nꞌ ja̱yo̱o̱. Xí ndaꞌyóo rí ma̱ne̱ mba̱a̱ a̱kui̱nꞌ, na̱ne̱ mba̱a̱ a̱kui̱nꞌlo̱ꞌ ga̱jma̱á numalaꞌ ikháanꞌlaꞌ ná inuu Krísto̱. 11Xkuaꞌnii kajngó ma̱xáꞌngo̱o̱ Satanás gáꞌne-nduwáanꞌlóꞌ, numuu rí nduꞌyáá máꞌ májánlóꞌ rí naꞌgí-mine̱e̱ꞌ ma̱ꞌnii̱ rí ra̱máján.
Yumbáá tsí nu̱ñajun ga̱jma̱á numuu awan nuxe̱ꞌ
12Nákhí nigánú rí ma̱tha̱n-ráꞌa ajngáa máján ga̱jma̱á numuu Krísto̱ ná xuajen Tróa̱s, a̱ꞌkhue̱n ndi̱yo̱o̱ rí ni̱ma̱ꞌthoo kajngó ma̱goo ma̱ñajunlo̱ꞌ ga̱jma̱á numuu Táta̱. 13Maske máꞌ xkuaꞌnii, táꞌne májáan a̱kui̱nꞌ, numuu rí na̱nguá ni̱xkamaa dxájwalóꞌ Títo̱ ikhín. Ikhaa jngó ni̱tha̱n-ngáwúún xa̱bo̱ jamí nika ná numbaa Masedónia̱.
14I̱ndo̱ó máꞌ numuu rí núma̱aꞌ la Ana̱ꞌlóꞌ, numuu rí jámba̱ miꞌtsú naꞌnii̱ rí ma̱ꞌnga̱ꞌlóꞌ ga̱jma̱á nindxu̱u̱ Krísto̱, jamí naꞌnii̱ rí ga̱jma̱á majña̱ꞌ ikháánꞌlóꞌ ma̱dróꞌoo mbá xúgíí numbaa gisngáá drígo̱o̱ Krísto̱ xómá xu̱u̱ꞌ iya ndaa thawuun. 15Numuu rí ná inuu Ana̱ꞌlóꞌ ikháánꞌlóꞌ ñajwanlóꞌ xu̱u̱ꞌ rí ndaa thawiin Krísto̱, rí na̱dróꞌoo ná majñu̱ú tsí najáwíin jamí tsí nandáti̱gi̱in. 16Ná inúú xa̱bo̱ tsí nandáti̱gi̱in, ikháánꞌlóꞌ juꞌyálóꞌ xu̱u̱ꞌ xa̱bo̱ tsí nijáñuu, numuu rí wéje̱ máꞌ rí ma̱ja̱ñúu̱ rí ikhii̱n. Xómáꞌ ná inúú xa̱bo̱ tsí najáwíin rá, ikháánꞌlóꞌ juꞌyálóꞌ xu̱u̱ꞌ xa̱bo̱ tsí ndaꞌya, numuu rí wéje̱ máꞌ rí mbuyee̱ jámuu rí ikhii̱n. Ndawa̱a̱ asndo nimbáa tsí ma̱ꞌngo̱o̱ ma̱ꞌne ríge̱ꞌ ga̱jma̱á ski̱yu̱u̱ꞌ máꞌ ikhaa. 17Xómáꞌ ikháanꞌxo̱ꞌ tsíngu̱jwa̱xo̱ꞌ ajngáa rawuun Ana̱ꞌlóꞌ rí ma̱piꞌtsaxo̱ꞌ, xómá nune̱ mbaꞌiin tsí na̱ka̱ma̱xu̱ún ajngóo̱. A̱ꞌkhue̱n gakon, Ana̱ꞌlóꞌ ndaꞌyoo rí gakon rí nu̱tha̱nxo̱ꞌ ga̱jma̱á majñu̱u̱ ski̱yu̱u̱ꞌ Krísto̱ numuu rí xa̱bo̱ tsí nixúngui̱inꞌ Ana̱ꞌlóꞌ ñajwanxo̱ꞌ.
Currently Selected:
2 Xa̱bo̱ Korínto̱ 2: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.