2 Xa̱bo̱ Korínto̱ 7
7
1A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ikhaa rúꞌkhue̱n ñajuun rí nixuda-mina̱ꞌ Ana̱ꞌlóꞌ ga̱jma̱á numalóꞌ. Ikhaa jngó, gu̱ꞌne̱-jaꞌwu-mijnáalóꞌ jamí gu̱ꞌne̱-janíí-mijnálóꞌ inuu mbá xúgíí rí naꞌne-maꞌchúu xuyalóꞌ jamí nímia̱ꞌlóꞌ. Ga̱juwalóꞌ jaꞌwu mbá jayu ná inuu Ana̱ꞌlóꞌ, numuu rí nduꞌya-makuíi̱lóꞌ.
Phú nadxu a̱kui̱in Páblo̱ ene̱ xa̱bo̱ Korínto̱
2Gu̱dríguáanꞌlaꞌxo̱ꞌ ná awúun a̱kia̱nꞌlaꞌ. Asndo nimbáa túñi̱íxo̱ꞌ rí ra̱ꞌkhíin, ni máꞌ nimbáa túne̱-maꞌchíixo̱ꞌ, ni máꞌ nimbáa túrígúxo̱ꞌ mbúkho̱o̱ ga̱jma̱á majñu̱u̱ mi̱nduwa. 3Na̱tha̱nꞌlaꞌ ríge̱ꞌ, ra̱ꞌkhá máꞌ numuu rí ra̱máján e̱ne̱laꞌ, numuu rí ni̱tha̱nꞌlaꞌ máꞌ rí ikháanꞌlaꞌ juwalaꞌ ná awúun a̱kui̱nꞌ, kajngó ma̱juwalóꞌ jamí ma̱ja̱ñálóꞌ mbá ꞌnduꞌ. 4Ikhúúnꞌ phú khiamuꞌ gúꞌdáanꞌlaꞌ jamí phú nadxu a̱kui̱nꞌ ja̱ya̱ꞌlaꞌ. Maske máꞌ phú nu̱míni̱íxo̱ꞌ, phú mba̱a̱ tsiakhe̱ ndayáa la a̱kui̱nꞌ e̱ne̱laꞌ jamí gajni̱í rí gagi ná awúun a̱kui̱nꞌ.
5Asndo nákhí máꞌ niguáꞌnúxo̱ꞌ ná numbaa Masedónia̱, na̱nguá ndi̱ya̱a xa̱ꞌxo̱ꞌ nitháan. A̱ꞌkhue̱n gakon, asndo náá máꞌ nakuáxo̱ꞌ nu̱xkamaaxo̱ꞌ gaꞌkho̱, ne̱ne̱ gajmiáxo̱ꞌ xa̱bo̱ sia̱nꞌ tsí júwa̱ꞌ rixa̱á jamí ga̱jma̱á máꞌ ngamí rí ríga̱ ná awúun a̱kia̱nꞌxo̱ꞌ. 6Xómáꞌ Ana̱ꞌlóꞌ, tsí naꞌne rí mbuya̱a xu̱únꞌ xa̱bo̱ tsí niwabaa a̱kui̱ín, niꞌnii̱ rí mbayáa xu̱u̱ꞌ a̱kia̱nꞌxo̱ꞌ ído̱ rí ni̱ga̱nú Títo̱. 7Ra̱ꞌkhá máꞌ i̱ndo̱ó numuu rí ni̱ga̱níi̱, rí mangaa ga̱jma̱á numuu rí phú nadxu a̱kuii̱n ga̱jma̱á numalaꞌ, numuu rí ikháanꞌlaꞌ phú ni̱xnáa̱laꞌ tsiakhe̱. Ikhaa̱ niꞌthánxo̱ꞌ rí ikháanꞌlaꞌ phú naꞌne a̱kia̱nꞌlaꞌ rí mbu̱ya̱ꞌxo̱ꞌ, xúꞌkhue̱n máꞌ niꞌthánxo̱ꞌ rí phú najmálaꞌ ga̱jma̱á numuu rí niríga̱, jamí rí phú naxná-gamiéjwanlaꞌ ga̱jma̱á numuꞌ ikhúúnꞌ. Rúꞌkhue̱n phú i̱tha̱án neꞌne gagi a̱kui̱nꞌ.
8Maske máꞌ phú nijuwa-jínálaꞌ neꞌne i̱yi̱i̱ꞌ rí ni̱xu̱ꞌmá inalaꞌ, tsíthanga̱a a̱kui̱nꞌlo̱ꞌ. Gakon máꞌ rí nithanga̱a a̱kui̱nꞌ rí ni̱tháán i̱yi̱i̱ꞌ rúꞌkhue̱n nákhí ginii, numuu ndi̱yo̱o̱ rí neꞌne ne̱ rí ma̱juwa-jínálaꞌ mbégo. 9Rí xúge̱ꞌ rá, phú nadxu a̱kui̱nꞌ, ra̱ꞌkhá numuu ne̱ne̱ rí ma̱juwa-jínálaꞌ, rí ga̱jma̱á numuu rí rúꞌkhue̱n neꞌne rí ma̱thanga̱a a̱kia̱nꞌlaꞌ ná inuu Ana̱ꞌlóꞌ. Ikháanꞌlaꞌ nijuwa-jínálaꞌ xómá rí nandoo Ana̱ꞌlóꞌ. Ikhaa jngó, ikháanꞌxo̱ꞌ túña̱ꞌlaꞌxo̱ꞌ nimbá rí ra̱máján. 10Numuu rí jíná rí na̱ꞌkha̱ xómá rí nandoo Ana̱ꞌlóꞌ naꞌne ne̱ rí ma̱thanga̱a a̱kia̱nꞌlóꞌ ná inuu̱ jamí ma̱jríñáaꞌlóꞌ. Ikhaa jngó, ra̱gíꞌmaa rí ma̱tájwíin a̱kia̱nꞌlóꞌ ga̱jma̱á numuu rúꞌkhue̱n. Xómáꞌ jíná rí na̱ꞌkha̱ ná numbaa ríge̱ꞌ naꞌne ne̱ rí ma̱ja̱ñúú xa̱bo̱. 11A̱gu̱ya̱álaꞌ rí Ana̱ꞌlóꞌ neꞌne rí ma̱juwa-jínálaꞌ. Rúꞌkhue̱n neꞌne rí ma̱xná-gamiéjwanlaꞌ ga̱jma̱á numuu rí ni̱tha̱nꞌlaꞌ, neꞌne rí mu̱ndo̱ꞌo̱ꞌlaꞌ rí ma̱ne̱ mba̱a̱ a̱kui̱nꞌ, neꞌne rí ma̱jiꞌnáaꞌlaꞌ ju̱ya̱á rí ra̱máján, jamí neꞌne rí ma̱mi̱ꞌñálaꞌ. Nda̱wa̱á neꞌne a̱kia̱nꞌlaꞌ rí mbu̱yo̱ꞌlaꞌ jamí ne̱ne̱laꞌ rí mamínu̱u̱ꞌ tsí neꞌne rí ra̱ꞌkhíin. Ga̱jma̱á majñu̱u̱ mbá xúgíí rúꞌkhue̱n, ikháanꞌlaꞌ ni̱snga̱jmálaꞌ rí nda̱a̱ aꞌkhánlaꞌ. 12Ikhaa jngó, nákhí rí ni̱tháán i̱yi̱i̱ꞌ rúꞌkhue̱n, tándxa̱ꞌwa̱-mína̱ꞌ ga̱jma̱á numuu tsí neꞌne rí ra̱ꞌkhíin, ni máꞌ tándxa̱ꞌwa̱-mína̱ꞌ ga̱jma̱á numuu tsí nigíꞌnuu rí ra̱ꞌkhíin, rí ni̱tháán i̱yi̱i̱ꞌ rúꞌkhue̱n kajngó mbu̱ya̱álaꞌ rí ikháanꞌxo̱ꞌ phú nandaxo̱ꞌ ju̱ya̱ꞌlaꞌ#7.12 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «mbu̱ya̱álaꞌ rí ikháanꞌlaꞌ phú nandalaꞌ ju̱ya̱ꞌxo̱ꞌ». ná inuu Ana̱ꞌlóꞌ. 13Mbá xúgíí rúꞌkhue̱n naꞌne rí mbayáa la tsiakhe̱ a̱kia̱nꞌxo̱ꞌ.
Mbáá máꞌ rí ndiyáa la tsiakhe̱ a̱kia̱nꞌxo̱ꞌ ga̱jma̱á numuu rúꞌkhue̱n, phú i̱tha̱án máꞌ nidxu a̱kia̱nꞌxo̱ꞌ ído̱ ndi̱ya̱áxo̱ꞌ rí phú gagi a̱kui̱in Títo̱, numuu rí mbá xúgiáanꞌ ikháanꞌlaꞌ ni̱mbáyíi̱laꞌ rí ma̱xáxná-gamiéjuu̱n gáꞌne nimbá. 14Numuu rí tágájnuu gamakuꞌ ído̱ ni̱thu̱u̱nlo̱ꞌ Títo̱ rí phú nadxu a̱kui̱nꞌ ja̱ya̱ꞌlaꞌ ikháanꞌlaꞌ. A̱ꞌkhue̱n gakon, xómá rí gakon mbá xúgíí rí ni̱tha̱nꞌlaꞌxo̱ꞌ, xkuaꞌnii máꞌ nikujma rí gakon rí ni̱tha̱ánxo̱ꞌ Títo̱ mangaa, rí phú nadxu a̱kia̱nꞌxo̱ꞌ ju̱ya̱ꞌlaꞌ. 15Jamí Títo̱ i̱tha̱án máꞌ nandoo̱ jaꞌyalaꞌ ído̱ na̱rmáꞌáan a̱kuii̱n rí ne̱ne̱-mbáníílaꞌ rí niꞌthánlaꞌ, jamí ni̱dríguíi̱laꞌ ga̱jma̱á gamaku jamí ngamí. 16Nadxu a̱kui̱nꞌ rí phú khiamuꞌ mbá jayu gúꞌdáanꞌlaꞌ.
Currently Selected:
2 Xa̱bo̱ Korínto̱ 7: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.