Kubhoka 13
13
Kubhekakeka palongi jaka Chapanga kwa bhabhelakeka bha kutumbula bha chikambaku
1Bambo Chapanga akumpwaghi Musa, 2“Mmekilaje wichu kila mbelakeka wa kutumbula wa chikambaku. Maghambu bhabhelakeka bhokapi bha kutumbula bha chikambaku bha Izilaeli na kila mbelakeka wa kutumbula wa chikambaku wa hinyama, bhokapi habha nde bhangu.”
Uwangalalu wa mabumunda ghangakubhekakeka amila
3Musa akabhapwaghi bhandu, “Mlikombukaje lichobha lenu, lichobha lemwabhokiki mu inchi ja ku Misili, mu inchi ja utumwa, kwa ndandi Bambo Chapanga akumbohiki monihomu kwa chibhoku chaki chechibhi na makili. Ngamwikula libumunda lelijeghaliki amila mu lichobha lendenu. 4Lalenu mwehi wa kutumbula ghoulowakeka Abibu, anambokaje mu inchi ja Misili. 5Bambo Chapanga panaandetaje mu inchi jebhatama Bhakanaani, Bhahiti, Bhaamoli, Bhahivi, na Bhayebusi, inchi jeakabhalapile akahokolu bhinu kubha anaampekya mwehapa, inchi jejitwelile mahibha na busi, ikupalika kuhekalela uwangalalu hoghu kila chaka mu mwehi ghoni wa kutumbula. 6Anamkulaje mabumunda ghangakujeghaleka amila kwa chikahi cha machobha saba, na mu lichobha la saba nde uwangalalu wa kuntopela Bambo Chapanga. 7Kwa chikahi cha machobha saba anamkulaje mabumunda ghangakujeghaleka amila, ngakwikubha na mabumunda ghaghajeghaliki amila, wala amila ngajibhonikana pachilanda jinu na mu inchi jinu jokapi. 8Lichobha heli wampwaghila mwana waku, ‘Ndenda anana kwa ndandi ja kukomboka lijambu leakanhengile Bambo Chapanga lichobha panabhokaje kuhuma ku inchi ja ku Misili.’ 9Uwangalalu ghoni anaukubhaje ngati nginyulila mu chiwoku chaku na ukombukelu pa chibhongi ja pamihu jaku, nahuli ukombukaje shelia jaka Bambo Chapanga. Kwa ndandi Bambo Chapanga akakubhohiki mu inchi ja ku Misili kwa chibhoku chaki chechibhili na makili. 10Henu impalika kuhekalela uwangalalu ghoni kwa chikahi chechibhekakiki, kila chaka.”
Bhabhelakeka bha kutumbula
11Musa akajendalili kubhapwaghila, “Bambo Chapanga paanaandetaje mu inchi ja Kanaani na kumpekeha inchi jeniheji, ngati moakalapile kwinu mwehapa na kwa akahokolu bhinu, 12impalika kumbokeha Bambo Chapanga kila mbelakeka wa kutumbula wa chikambaku. Kila mbelakeka wa kutumbula wa chikambaku waka kila mundu na hinyama hinu, bhokapi habha anabhakubhaje bhaka Bambo Chapanga. 13Nambu kila mbelakeka wa kutumbula wa liponda likambaku anaulikombulaje kwa kumbokeha Chapanga mwanalimbeleli, ngati ngacheunkombwili, unkomaje kwa kuntunyula hingu jaki. Kila mbelakeka wa kutumbula wa chikambaku pachilanda ja bhana bhaku ikupalika unkombulaje. 14Machobha ghaghahika, mwana waku ngati anaakulalukili, ‘Lijambu heli ndandi jaki kike?’ Umpwaghilaje, ‘Kwa chiwoku chaki chechibhili na makili chaka Bambo Chapanga akatubhohiki mu inchi ja ku Misili, kuhuma mu inchi jetukabhili bhatumwa. 15Falao kwa kunonopa mtima waki akakaniki kutulekakela tubhokaje, henu Bambo Chapanga akunkomiki kila mbelakeka wa chikambaku wa kutumbula wa Bhamisili, mundu na hinyama. Jenjenu nde ndandi ja kubhoha nyambiku kwaka Bambo Chapanga mbelakeka wa kutumbula wa chikambaku, wa hinyama yangu, na kunkombola kila mbelakeka wangu wa kutumbula wa chikambaku.’ 16Lijambu lendenu analikubhaje ngati nginyulila mu mabhoku ghinu na ngati alama pa ibhongi ya pamihu jinu, kubha Bambo Chapanga akatubhohiki ku inchi ja Misili kwa chibhoku chaki chechibhili na makili.”
Nguzu ja lihundi na nguzu ja moto
17Chikahi Falao paakabhalekakili Bhaizilaeli bhabhokaje, Chapanga ngacheabhalongwihi kupetela indela jejipeta mu inchi ja Bhafilisti, papamu na kubha indela heji jakabhi jijipi namaa. Kwa ndandi Chapanga akapwaghiki, “Anabhahimangini na bhandu na kukomana ngondo, bhaweza kung'anambula maholalelu ghabhu na kukelabhuka ku Misili.” 18Panihapa Chapanga akabhalongwihi Bhaizilaeli kupetela indela ja kuyongolota kupetela mbaka kulipololu, kujenda ku Bahali ja Shamu. Bhaizilaeli bhakabhokiki ku inchi ja ku Misili koni bhakabya bhalibhekiki wichu kwa ngondo.
19Musa akatoliki ihupa yaka Yusufu, ngati Yusufu moakabhalapishe bhana bhaka Izilaeli mangane ja kupotela. Akapwaghaje, “Chakaka Chapanga anahikaje kunjangatila, nanamu anaimpalika kutola ihupa yangu kuhuma pambani na kuipeleka konihoko.”
20Bhela Bhaizilaeli bhakabhokiki ku Sukoti, bhakapomulili ku Etamu, munkeghi ja chingwenje. 21Chikahi cha muhi Bambo Chapanga akabhalongulili kwa nguzu ja lihundi kubhalongoha mu indela jabhu, na chikahi cha ikilu akabhalongulili kwa nguzu ja moto kubhamulakila, nahuli bhatendaje mwanja muhi na ikilu. 22Nguzu ja lihundi jela ngachejabhokiki pandu paki chikahi cha muhi, na nguzu jela ja moto ngachejabhokiki pandu paki chikahi cha ikilu, machobha ghokapi Bhaizilaeli bhakalonguhiki kwa nguzu heyi.
Currently Selected:
Kubhoka 13: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
