Kubhoka 12
12
Pasaka
1Bambo Chapanga akumpwaghi Musa na Haluni, pabhakabhili bhakona ku inchi ja Misili, 2“Mwehi ghongoni anaukubhaje mwehi wa kutumbula wa chaka kwinu mwehapa. 3Ubhapwaghila bhandu bhokapi bha ku Izilaeli kubha mu lichobha la komi la mwehi ghoni, kila mundu anaatolaje mwanalimbeleli limu kwa ndandi ja nyumba jaki, limu kwa kila nyumba. 4Anakubhili nyumba jokapi jibhili na bhandu bhachokopi bhangakuweza kujomola mwanalimbeleli nhilima hoju, wehapa papamu na bhandu bha nyumba ja pambipi muhaghulaje mwanalimbeleli jumu, kwa ubhalangiku wa bhandu bhabhabhi monihomu. Panihapa anammanyaji kubha ipalika inyama jamaheli au inyama jichokopi kubhokana na kupala kwaka kila mundu. 5Hinyama yemwihaghulaje, ipalika ikubhaje ya chikambaku na ya chaka chimu, na yangakubha na chilema, muweza kuhaghula kuhuma mu mambeleli au imbuhi. 6Nanamu ngohaje chinyama hechi mbaka mu lichobha la komi na nchechi la mwehi ghoni, lichobha heli, bhandu bhokapi bha Izilaeli anabhachinjaje chinyama hechi chikahi cha pakamihe. 7Panihapa bhitolaje mwahi wakumu na kuupaka mu ngelakete ya munani ya ndyangu, na ngelakete ibheli ya milyangu ja kila nyumba mobhikulaje hinyama heji. 8Ikilu jelajela anabhakula inyama jejijochakiki pamotu, papamu na mabumunda ghangakujeghaleka amila, na likolu libhabha la mahamba. 9Ngamwikula inyama jibhehi wala ja kututuha, nambu jikubhaje jijochakiki pamoto, papamu na mmutu, magholu na inyama yaki ya mkati. 10Ngamwihighakila inyama jokapi mbaka lukela, inyama jejihighalyaji mbaka lukela, mjijochaje pamoto. 11Kabheti mwikulaje anana: Mwalikongaje mihunga mu ibhunu hinu, mwiwataje magubase mu magholu ghino, na mwikamulaje ndonga hinu mumabhoku ghino. Mkulaje manyata, jenjenu nde Pasaka jaka Bambo Chapanga.
12“Ikilu jejeji anambetaje mu inchi jokapi ja Misili na kunkoma kila mbelakeka wa kutumbula wa Bhamisili, waka mundu na wa hinyama, nanatu ananitemulaje ichapanga yokapi ya Misili. Nepani nde Bambo Chapanga. 13Mwahi anaukubha nginyulila kwa ndandi jinu ja kulangiha nyumba yemwikubhaje. Nanatu panaubhonaje mwahi ghonihoghu, anambetaje panani jinu. Njeta lilapuliku la uyonangeku leanalumpataje mwenga panajilapulaje inchi ja Misili. 14Lichobha lendenu analikubhaje ukombukelu kwinu, na mwehapa anamujitendaje kubha uwangalalu kwaka Bambo Chapanga, mu hibheleku hinu jokapi. Anamjikamulaje kubha amuli ja mileli.”
Uwangalalu wa mabumunda ghangakujeghaleka amila
15Bambo Chapanga akapwaghike, “Kwa machobha saba, anamkulaje mabumunda ghangakujeghaleka amila. Lichobha la kutumbula pa machobha saba hagha, mwibhohaje amila yeibhili mu nyumba hinu, maghambu mundu jokapi anaakuliki libumunda lelijeghaliki amila mu chikahi cha machobha saba hagha, anaipalikaje kuntopola kutali kuhuma pachilanda ja Bhaizilaeli bhokapi jumula. 16Lichobha la kutumbula mkubhaje na uhimanganu uhuhu, na uhimanganu uhuhu ghongi mu lichobha la saba. Mu machobha ghanihagha ngamwitenda lihengu lokapi lela, nambu pela kuteleka chilebhe chaka kila jumu, leniheli pela nde leanamulihengaje. 17Anamuhekalyaje uwangalalu ghoni wa mabumunda ghangakujeghaleka amila ngati ukombukelu wa lichobha panakumbohiki mwehapa, mabhongelu gha Bhaizilaeli, kuhuma ku Misili. Bhela mwalitunzaje lichobha leniheli kwa ibheleku yinu yokapi yeihika, kubha amuli ja mileli. 18Bhela anamkulaje mabumunda ghangakujeghaleka amila kutumbu pakamihi ja lichobha la komi na nchechi la mwehi wa kutumbula, mbaka pakamihi ja lichobha la ishilini na jimu ja mwehi gholaghola wa kutumbula. 19Kwa chikahi cha machobha saba, ngamwikubha na amila jokapi mu nyumba hinu. Mundu jokapi, akubhi ngeni au mwenehi, anakuliki chindu chechijeghaliki amila, anaatopuliwaje kutali na bhandu bha Izilaeli. 20Ngamwikula chindu chokapi chechijeghaliki amila. Pokapi pamwitamaje, impalika kula mabumunda ghangakujeghaleka amila.”
Pasaka ja kutumbula
21Bhela, Musa akabhalohiki bhazee bhokapi bha Izilaeli na kubhapwaghila, “Njendanyaje mkahaghulaje bhanambeleli na kuchinja kwa ndandi ja nyumba hinu, mkachinjaje na kula mu lichobha la Pasaka. 22Mtolaje mmea wa hisopu, njwihaje mu mwahi ghoubhili mu bakuli na kupaka mwahi hoghu mu ngelakete ya munani na ngelakete ibheli ya munkeghi ja milyangu ja nyumba hino. Mundu jokapi ngayipita kunja ja ndyangu wa nyumba jaki ikilu jeniheji mbaka lukela. 23Kwa kubha Bambo Chapanga payipetaje na kubhalapula Bhamisili, anaabhonaje mwahi mu ngelakete ya munani ja ndyangu, na ngelakete ibheli ya milyangu, Bambo Chapanga anaapetaje panani, wala ngaandeki myonanga kujingila mu nyumba hinu na kunkoma mwehapa. 24Mkamulaje malaghalakilu ghangani mwehapa na bhana bhinu ngati amuli ja mileli. 25Pamwijingalaje mu inchi ambaju Bambo Chapanga anaampekyaje, ngati moakalaghile, njendalyaje kukamula ntetu ghonihoghu. 26Bhana bhinu pabhandalukyaje, ‘Uwangalalu aghoghu ubhili na ndandi kike kwino?’ 27Mwehapa mwapwaghilaje, ‘Jenjenu nde nyambiku ja Pasaka kwaka Bambo Chapanga, kwa ndandi akaipetiki panani nyumba ya Bhaizilaeli ku inchi ja ku Misili hoku chikahi paakabhakomiki Bhamisili, nambu tepani ngacheatukomike.’ ”
Panihapa bhandu bha Izilaeli bhakachikimi na kunjojabhela Chapanga. 28Bhaizilaeli bhakatendiki ngati bhela Bambo Chapanga moakundaghalakili Musa na Haluni.
Kukomakeka kwa bhabhelakeka bha kutumbula bha Bhamisili
29Pakwahikiki ikilu pamahiku, Bambo Chapanga akabhakomiki bhabhelakeka bha chikambaku bha kutumbula bhokapi bha ku Misili. Bhokapi bhakapotile, kutumbu mbelakeka wa chikambaku wa kutumbula waka Falao, mpwelelu wa ukolongwa, mbaka mbelakeka wa chikambaku waka mundu joakongakiki mu nyumba ja bhakongeka, na bhabhelakeka bha chikambaku bha kutumbula bhokapi bha hinyama. 30Falao, na bhatumika bhaki bhokapi, na Bhamisili bhokapi bhakajumwiki ikilu, na kukabhili na chilelu chikolongwa namaa mu inchi ja ku Misili, maghambu ngachekwabhili na nyumba hata jimu mwangakupotela mundu. 31Ikilu jelajela Falao akabhalohiki Musa na Haluni na kubhapwaghila, “Njumukanyaje! Mbokanyaje pachilanda ja bhandu bhangu. Njendanyaje, mwehapa papamu na Bhaizilaeli abhabha, mukunjojabyaje Bambo Chapanga ngati mondobhile. 32Mtolanyaje mabhongelu ghinu gha mambeleli na imbuhi papamu na ng'ombi, na mbokanyaje ngati mondobhile, bhelabhela mkanobhilaje mbengalelu na nepane.”
33Bhamisili bhakabhatopwili Bhaizilaeli bhabhokaje manyata na kujileka inchi jabhu. Bhakapwaghaje, “Ngati ngamboki, chakaka anatupotilaje!” 34Henu, Bhaizilaeli bhakautoliki uhembi wabhu ghobhuhunyiki mangani ja kuujeghela amila, na mabakuli ghabhu gha kuhunyila na kughakonga chibwahila kwa ingobhu na kughatotola mu mabhegha. 35Bhaizilaeli bhakatendiki ngati Musa moakalaghalakile, nabhombi bhakabhalobhiki Bhamisili bhabhapekyaje hindu yeilenganakiki kwa madini gha feza, zahabu na ingobho. 36Bambo Chapanga akabhatendiki Bhaizilaeli bhapalakakaje na Bhamisili, nabhombi Bhamisili bhakabhapekihi kila chindu chebhakalobhiki. Bhenibhela nde Bhaizilaeli mobhanyaghulile Bhamisili hindu jabhu.
Bhaizilaeli bhabhoka ku Misili
37Bhaizilaeli bhakatendiki mwanja kuhuma ku Lamesesi mbaka ku Sukoti. Bhakabhili bhakambaku ngati laki sita bhabhajenda kwa magholu panga na ubhalangiku wa akambomba na bhana. 38Bhandu bhangi bhamaheli bhakabhili papamu nabhu. Bhelabhela Bhaizilaeli bhakabhokiki koni bhakabyaje papamu na mabhongelu ghabhu makolongwa gha mambeleli, imbuhi na ng'ombi. 39Bhakalenganakili mabumunda ghangakujeghaleka amila kwa uhembi ghola ghowahunyakiki ghobhutoliki ku Misili. Uhembi hoghu ghowahunyakike ngachewajeghaliki amili, maghambu bhakabhohakiki ku Misili kwa manyata, nabhombi ngachebhabhili na chikahi cha kulenganakela chilebhi cha kula mwindela.
40Bhela Bhaizilaeli bhakabhili bhatemi ku Misili kwa chikahi cha hyaka mia nchechi na selasini. 41Payajomwiki hyaka heyi mia nchechi na selasini, makabila ghokapi ghaka Bambo Chapanga ghakabhokiki ku inchi ja ku Misili. 42Ikilu jeniheji Bambo Chapanga akabhili abhalingalila Bhaizilaeli nahuli abhabhohaje kuhuma mu inchi ja Misili, mu ikilu heji Bhaizilaeli bhokapi bhapalika kuhekalela kwa kuchelukila ikilu jokapi nahuli kuntopela Bambo Chapanga mu hibheleku yabhu yokapi yeihika.
Ghaghapalika kuhengakeka mu uwangalalu wa Pasaka
43Bambo akumpwaghi Musa na Haluni, “Ghongoni nde ntetu kwa ndandi ja Pasaka: Ngeni ngacheapalika kula Pasaka. 44Nambu ntumwa jokapi joahemaliki kwa madini gha feza, aweza kula Pasaka ngati anabhi ahekiti jando. 45Ngeni jokapi joatama kwinu, au mtumika jomundepiki kuhenga lihengu, ngacheapalika kula Pasaka. 46Inyama jokapi jipalika mkulaje mkati ja nyumba, ngamwitola inyama na kupiha kunja ja nyumba heji, na ngamwitunyula chihupa chokapi chela cha chinyama hechi. 47Bhandu bhokapi bha Izilaeli ibhapalika bhahekalyaje uwangalalu hoghu. 48Ngati ngeni jokapi joatama pachilanda jinu anaapala kuhekalela uwangalalu wa Pasaka, ipalika hoti akanalomi bhokapi bha mu nyumba jaki bhachekulaje jando, panihapa anabhalangikaje kubha ngati mwenehi na kupalika kuhekalela Pasaka. Mwanalomi jokapi jwangakuchekula jando ngayikula chilebhi cha uwangalalu wa Pasaka ng'o. 49Ntetu ghongoni anauhengaje lihengu kwaka mwenehi Muizilaeli, na bhagheni bhabhitamaje papamu na mwenga.” 50Bhaizilaeli bhokapi bhakatendiki bhenibhela, ngati Bambo Chapanga moakundaghalakile Musa na Haluni. 51Lichobha lelalela Bambo Chapanga akabhabhohiki Bhaizilaeli mu inchi ja ku Misili kulengana na makabila ghabhu.
Currently Selected:
Kubhoka 12: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
