Kubhoka 15
15
Lujembu lwaka Musa
1Bhela Musa papamu na Bhaizilaeli bhakunjembili Bambo Chapanga lujembu alolo,
“Ananunjembilaje Bambo Chapanga,
kwa kubha aweziki kwa ulumbalilu ukolongwa. Falasi na bhabhatami panani ja falasi abhakangili mu bahali.
2Bambo Chapanga nde makili ghangu na lujembu lwangu,
najombi abhili ukengalelu wangu.
Jombi nde Chapanga wangu, nanatu ananundumbalyaje,
jombi nde Chapanga waka tati wangu, nanatu ananundumbalyaje.
3Bambo Chapanga nde mundu wa ngondo,
Bambo Chapanga nde lihina lake.”
4“Magali gha ngondo ghaka Falao na manjolinjoli ghaki aghajibhihi mu bahali.
Bhatumika bhahaghulika bhaka Falao bhakajibhili mu Bahali ja Shamu.
5Machi ghaghanyolike ghakabhayekike,
bhakajibhili kokunyolike ngati liganga mbaka pahi.”
6“Wenga wa Bambo Chapanga, chiwoku chaku cha kumalelelu, chibhili na makili gha kukangacha.
Wenga wa Bambo Chapanga, chiwoku chaku cha kumalelelu, ukuntimbiki adui.
7Kwa ukolongwa wa ulumbalilu waku, ubhahabhuha pahi bhala bhabhakupenga.
Ulekakela inyela jaku jikali, na kubhayonanga ngati matotela.
8Kwa mbomu ja imbunu jaku machi ghakalibhongini pamu.
Majegha gha machi ghakajemiki wema ngati lumatu,
machi ghaghabhili kokunyolike kwa bahali ghakagandike.
9Adui akapwaghike, ‘Ananabhajengalyaje na kubhakamula.
Ananilighabhilaje mali ghabhu ngati mombalila.
Anandolaje lipanga langu na chiwoku changu anachibhayonangaje.’
10Nambu ukaletiki mpongu wako, na bahali jakabhayekalile.
Bhakajibhili mkati ja machi ghamaheli ngati choma chechitopike.”
11“Wenga wa Bambo Chapanga, nde nane pachilanda ja ichapanga joalengana na wenga?
Nde nane joabhi ngati wehapa, wehapa nde mhuhu,
nde nane joaweza kutenda ngangachu na mambu makolongwa ngati wehapa?
12Ukahatambwili chiwoku chaku cha kumalelelu,
na inchi jakabhamiliki maadui bhitu.
13Wehapa kwa upalu waku ukolongwa ukabhalongwihi bhandu bhaku bhaubhakombwile.
Kwa makili ghaku ubhalongwihi mbaka pandu pa matamu ghaku mahuhu.
14Bhandu bha mataifa naghange bhakajowini ghanihagha na kubhaghaja namaa,
Bhafilisti bhakakamuliki na choghoi chikolongwa.
15Bhakolongwa bha ku Edomu anabhajoghupaje.
Ihongozi bha ku Moabu anabhabhaghajaje kwa choghoi,
bhandu bha ku Kanaani bhahekatiki mtima.
16Kujoghupeka na choghoi anayabhakamulaje.
Kwa makili gha chiwoku chaku,
anabhatumbalaje ngati liganga,
mbaka bhandu bhaku bhajomula kupeta, wenga wa Bambo Chapanga,
mbaka bhandu bhanihabha bhaubhakengalile bhapetaje.
17Wehapa anaubhapelakaje na kubhabheka bhatamaje pa chitombi cha upwelelu waku.
Pandu pala paupahawile pakubhaje matamu ghaku, wenga wa Bambo Chapanga,
pandu pahuhu, paupachengiki kwa mabhoku ghaku, wenga wa Bambo Chapanga.
18Wehapa wa Bambo Chapanga, anautawalaje mileli na mileli.”
Lujembu lwaka Miliamu
19Falasi yaka Falao, magali ghaki gha ngondo na bhabhatami panani ja falasi yaki pabhakajingili mu bahali, pandu pajomu, Bambo Chapanga akaghakelawihi machi gha bahali na ghakabhahyekike, nambu Bhaizilaeli bhakapetiki mu bahali pandu pajomu.
20Bhela Miliamu, mlota mbomba jola, ndombu waka Haluni, akatoliki mbelakete mu chiwoku chaki, na akambomba bhokapi bhakunjengalili bhakabhili na mbelakete yabhu koni bhakahonaje na kukina. 21Miliamu akabhalongwihi kujemba:
“Munjembilaje Bambo Chapanga, maghambu atopaliki namaa.
Falasi na bhabhatami panani ja falasi akabhakangili mu bahali.”
Machi mabhabha
22Bhela Musa akabhalongwihi Bhaizilaeli kuhuma ku Bahali ja Shamu na kujingila mu lipololu la ku Shuli. Kwa machobha ghatatu bhakatendiki mwanja kulipololu panga kughabhona machi. 23Pabhahikiki papalowakiki Mara, ngachebhaweziki kunywa machi gha pandu panihapa maghambu ghakabhi mabhabha. Pandu pakalowakiki Mara, maghambu machi ghaki ghakabhi mabhabha. 24Panihapa bhandu bhakung'ong'atakili Musa, bhakapwaghaje, “Henu tukunywaje kike?” 25Henu Musa akundelili Bambo Chapanga, najombi Bambo Chapanga akundangihi chipandi cha nkongu. Musa akachijeghili mkati ja machi, naghombi machi ghanihagha ghakang'anambwiki na kubha manyahi.
Konihoku Bambo Chapanga akabhapekihi Bhaizilaeli amuli na shelia, na bhelabhela akabhalengike. 26Chapanga akabhapwaghile, “Ngati ananjowanili sauti jangu nepani Bambo Chapanga, Chapanga winu na kughahenga ghaghapalika pamihu jangu, ngati anamkamwili malaghalakilu ghangu na kuikamula amuli yangu yokapi, nepani nganundeteli hitamu ngati yenakabhaletile Bhamisili, kwa kubha nepani nde Bambo Chapanga, nenundamiha mwehapa.”
27Bhela Bhaizilaeli bhakahikiki ku Elimu, pandu papakabhili na chemuchemu komi na ibheli, na mikongu sabini ja mitende, nabhombi bhakatami konihoku pambipi na machi.
Currently Selected:
Kubhoka 15: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
