Kubhoka 16
16
Mana na ngwale
1Bhela Bhaizilaeli bhokapi bhakabhokiki ku Elimu, na kuhika ku chingwenje cha ku Sini pachilanda ja Elimu na Sinai. Haleli lakabhi lichobha la komi na nhwanu la mwehi wa kabheli kutumbula Bhaizilaeli pabhakabhokiki ku inchi ja ku Misili. 2Henu Bhaizilaeli bhokapi bhakung'ong'utakili Musa na Haluni kuchingwenji hoku. 3Bhaizilaeli bhakabhapwaghile, “Mbanga Bambo Chapanga akabya atukomiku chikahi patukabhili ku Misili hoku! Konihoku tukakuliki inyama na hilebhi yetukaipalike, nambu mwehapa mtuletiki kuchingwenji koni nahuli mtukomaje lipogha lenu lokapi kwa injala.”
4Panihapa Bambo Chapanga akumpwaghi Musa, “Lingalyaje nepani ananuntonyilaje iyula ja mabumunda kuhuma kunani kumahundi. Bhandu anabhapitaje kunja kila lichobha na kutondola chilebhi cha lichobha leniheli. Kwa indela jeniheji ananundengaje nahuli mbataje kulola ngati anankamulaje shelia yangu au ngabhela. 5Mu lichobha la sita anabhatondulaje pandu pabheli pa chilebhi chebhatondola mu machobha ghokapi.”
6Henu Musa na Haluni bhakabhapwaghili Bhaizilaeli bhokapi, “Pakamihi jenjenu anammanyaje kubha Bambo Chapanga nde joakumbohiki ku inchi ja ku Misili. 7Kabhete chilabhu lukela anamubhonaje ulumbalilu waka Bambo Chapanga, kwa ndandi ajowini mang'ong'uteku ghinu. Bho, tepani nde akanane mbaka mtung'ong'utakela?” 8Bhela Musa akapwaghike, “Pakamihi Bambo Chapanga anaampekyaje inyama nkulaje, na lukela anaampekyaje mabumunda nkulaje mtupilaje, maghambu jombi aghajowini mang'ong'uteku ghinu. Bho, tepani nde akanane mbaka mtung'ong'utakela? Ngachemng'ong'uteka panani jitu tepani, nambu mng'ong'uteka panani jaka Bambo Chapanga.”
9Panihapa Musa akumpwaghi Haluni, “Ubhapwaghilaje Bhaizilaeli bhokapi, ‘Muhikaje palongi jaka Bambo Chapanga, kwa ndandi aghajowini mang'ong'uteku ghinu.’ ” 10Haluni paakabhi alongela na Bhaizilaeli bhokapi, bhandu bhokapi bhakalingalili kulipololu hoku, palapala bhakauweni ulumbalilu waka Bambo Chapanga ukapitalyaje mu lihundi. 11Bambo Chapanga akumpwaghi Musa, 12“Nyowini mang'ong'uteku gha Bhaizilaeli. Ubhapwaghilaje, ‘Pakamihi anabhakulaje inyama, na lukela anabhakulaje mabumunda ghamughapala. Panihapa anammanyaje kubha nepani nde Bambo Chapanga, Chapanga winu.’ ”
13Pakamihi pajahikike ngwale yamaheli yakaihyekiki kambi ya Bhaizilaeli. Lukela lwaki kukapitalili na lyangame, lakaghahyekiki makambi ghokapi gha Bhaizilaeli. 14Lyangami heli palajomike, lingalyaje, kukahighalili na chindu chipepandau na chechipepwike kulipololu hoku. 15Bhaizilaeli pabhakaweni chindu hechi bhakakangichi na kulaluwana, “Chenjenu kike?” Maghambu ngachebhamanyi chakabhi chindu bhole. Panihapa Musa akabhapwaghile, “Lendenu nde libumunda leampekihi Bambo Chapanga mkulaje. 16Lilobhi lendenu nde leapwagha Bambo Chapanga, ‘Mwehapa mtondulaje chindu hechi kila mundu ngati moawezela kujomola. Mtondulaje kila mundu pishi jimu kwa ndandi jaka kila mundu joabhile mkati ja lihema lino.’ ”
17Bhaizilaeli bhakatendiki bhenibhela, bhakumu bhabhu bhakatondwili nakanopi, bhangi pachokopi. 18Nambu bhokapi pabhakapemiki, jola joakabhongini nakanopi ngacheakabhili na nyonjeka, kabheti jola joakabhongini pachokopi ngacheakabhili na ukepakeku. Kila jumu akabhongini chilebhi cheakapalike. 19Panihapa Musa akabhapwaghi bhandu, “Mundu jokapi ngayihighakila chilebhi hechi mbaka lukela.” 20Nambu bhandu ngachebhunjowanili Musa. Bhakumu bhabhu bhakahighakili chilebhi mbaka lukela. Nambu lukela chilebhi hechi chakabhi na imbeku na kutumbula kununga. Bhela Musa akabhayomili namaa. 21Kila lukela, kila mundu akatondwili chilebhi cheaweza kula, na lyobha palakabhili likali, chilebhi chechahighalili kola kobhatondulaje, chakatehi kuyeyuka.
22Lichobha la sita, Bhaizilaeli bhakatondwili chilebhi hechi mala pabheli, pishi ibheli kwaka kila mundu. Henu bhazee bhokapi bha Bhaizilaeli bhakapiti kwaka Musa, na kumpwaghila lijambu lenihele. 23Musa akabhapwaghile, “Jenjenu nde amuli jaka Bambo Chapanga, ‘Chilabhu analikubha lichobha la kupomulela, Sabato jihuhu kwaka Bambo Chapanga. Bhela, njendaje mkajochaje au mkatutuhaje chilebhi chela chemchipala lalenu na chilebhi chechihighalyaje mchibhekaje mbaka lukela.’ ” 24Bhela bhakatendiki bhenibhela na kuchileka chilebhi chengi mbaka lukela, ngati Musa moakalaghalakile, lukela lwaki bhakachiweni kubha ngachechibholiki wala kubha na imbeku. 25Musa akabhapwaghi bhandu, “Mkulaje chilebhi chechihighalili chenu lalenu, maghambu lalenu nde Sabato jaka Bambo Chapanga. Lalenu ngampati chilebhi chokapi chela kunja hoku. 26Kwa machobha sita anamtondulaje chilebhi hechi, nambu lichobha la saba nde Sabato, mu lichobha leniheli ngachipatikane.”
27Hata bhela, bhandu bhakumu bhabhu bhakapitiki kujenda kutondola chilebhi mu lichobha la saba, nambu ngachebhapatiki chokapi. 28Panihapa Bambo Chapanga akumpwaghi Musa, “Bho, mbaka lile anamkanaje kuikamula amuli na shelia yango? 29Mkombukaje kubha, Bambo Chapanga ampekihi mwehapa lichobha la Sabato, nde ndandi akumpekihi chilebhi cha machobha ghabheli mu lichobha la sita. Bhela kila jumu winu apomulyaje panyumba jaki mu lichobha la saba. Mundu jokapi ngayibhoka mu lichobha la saba.” 30Bhela bhandu bhakapomulili mu lichobha la saba.
31Bhaizilaeli bhakachilohiki chilebhi hechi “Mana”. Chakabhili ngati imbeju ya mapemba, chakabhi chihuhu, na kunogha kwaki kukabhili ngati libumunda lipepandau lelilenganakiki na buse. 32Musa akabhapwaghile, “Bambo Chapanga alaghalakili anana, ‘Mtolaje pishi jimu ja mana na kujighoha kwa ndandi ja ibheleku yeihika, nahuli nabhombi bhabhonaje chilebhi chela chenakumpekihi mwehapa mu chingwenje, chikahi panakumbohiki kuhuma ku inchi ja Misili.’ ” 33Musa akumpwaghi Haluni, “Utolaje chihulu, na ubhekaje pishi jimu ja mana mkati jake. Panihapa ubhekaje mana heji palongi jaka Bambo Chapanga, nahuli jighohakikaje kwa ndandi ja ibheleku hinu yeihika.” 34Bhela, Haluni akajibhekiki mana heji mkati ja Lisanduku la Lulaghilu, mokukabhili na ibau ya Shelia nahuli kujighoha, ngati Bambo Chapanga moakundaghalaki Musa. 35Bhaizilaeli bhakakuliki mana kwa chikahi cha hyaka alobaini, mbaka pabhahikiki mu inchi jebhakabhi bhatama bhandu. Bhakakuliki mana heji mbaka pabhahikiki mu malindakanilu gha Kanaani. 36Pishi jimu nde pandu pamu pa komi pa chipemu chekilowakeka efa.
Currently Selected:
Kubhoka 16: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
