Kubhoka 2

Kubhelakeka kwaka Musa

1Mundu jumu wa likabila la Bhalawi akuntowili mbomba jumu, mbomba hoju bhelabhela akabhi wa likabila la Bhalawi. 2Mbomba hoju akapatiki chitumbu, na kulibhopola mwana wa chikambaku. Paakumbweni mwana hoju kubha nde mnyahi akunhiiki kwa myehi jitatu. 3Nambu paakaweni ngacheaweza kunhiya nakanopi, akalenganakili chikapu, akachipakiki chindu chechilengana na lami. Panihapa akumbekiki mwana hoju mkati jaki, akachihiiki pachilanda ja mateti munkeghi ja nkoka Naili. 4Ndombu waka mwana jola akalihiiki pambipi na pandu pala nahuli alolaje cheanachumpata mwana.

5Bhela, mwali waka Falao akahelili ku nkoka Naili kujogha, na bhatumika bhaki bhakabhi bhajendajenda munkeghi ja nkoka. Mwali jola akachiweni chikapu pachilanda ja mateti, akuntumiki mtumika waki kujenda kundetela. 6Akachihowili chikapu chela, na kumbona mwana wa chikambaku mkati jaki. Mwana akabhi alela, akumboni chiha. Akapwaghaje, “Jonjoni nde jumu wa bhana bha Bhaebulania.”

7Palapala ndombu waka mwana hoju akundalukili mwali waka Falao, “Bho, nyenda le nikakupalila jumu wa akambomba wa Kiebulania akulelilaje mwana jonjone kwa ndandi jako?”

8Mwali waka Falao akamuyangike, “Ena, ujendaje ukundohaje.” Mwali jola akapiti kundoha mabhu waka mwana jola. 9Mwali waka Falao akumpwaghili mabhu jola, “Untolaje mwana jonjoni unyangatyaje kunjongeha kwa ndandi jangu, nanatu ananukulepaje.” Bhela mbomba jola akuntoliki mwana jola na kundela. 10Mwana paakajomwili kujonga, mabhu waki akumpeliki kwaka mwali waka nkolongwa Falao, najombi akunjopiki na kuntenda kubha mwana waki. Akundohiki lihina laki Musa, akapwaghaje, “Maghambu numbohiki mu machi.”

Musa akembalela ku inchi ja Midiani

11Musa paakabhi akolike, akapiti kubhabhona Bhaebulania bhajaki, ntundu mobhahengela lihengu linonopi. Akumbweni Mmisili akundapulaje Muebulania, jumu wa bhalongu bhaki. 12Musa akalingiki koni na koni, na paakaweni kubha njeta mundu, akundapwili na kunkoma Mmisili jola, na kunhiya muluhanga. 13Chilabhu jaki, Musa akabhokiki kabhete, akabhaweni Bhaebulania bhabheli bhakomana. Bhela, akundalukili jola joakabhi andapula njaki, “Maghambu kiki undapula Muebulania njako?”

14Mundu jola akayangike, “Bho, nde nane joakubhekiki wehepa kubha njemalela na ntemula wito? Bho, upala kungoma ngati mounkomile Mmisili jola?” Panihapa Musa akajowipi, na kuholalela, “Chakaka lijambu lenilihengiki lela lijomwi kumanyikana.” 15Bhela Falao paakajowini lijambu heli, akapaliki kunkoma Musa, nambu Musa akuntiliki Falao na kujenda kutama mu inchi ja Midiani.

Lichobha limu, Musa akabhi atemi munkeghi ja chilibha cha machi. 16Mpenganyambiku wa ku Midiani akabhi na akakamwali saba, nabhombi bhakahikiki kuteka machi mu chilibha, bhakatwelakili pandu pa kukengela hinyama machi nahuli kughakenga mambeleli na imbuhi yaka tati wabhu. 17Bhadima bhakumu bhakahikiki na kubhatopola akakamwali habha. Nambu Musa akajemiki kubhajangatila akakamwali habha, na kuikenga machi hinyama yabhu. 18Akakamwali bhala pabhakakelawiki kunyumba jaka Leueli tati wabhu, akabhalalukile, “Bho, kubhi bhole lalenu kulabhalila kubhuja?”

19Bhakamuyangike, “Mmisili jumu akatukengalili kuhuma mu mabhoku gha bhadima. Kabhete mundu hoju akatutekili machi na kuikenga hinyama yitu.”

20Tati wabhu akabhalalukili akakamwali bhaki, “Bho, abhi kwako? Maghambu kiki mundekiki mundu jonihoju konihoko? Mundohaje ahika kula chilebhe na tepani.”

21Musa akajetakili kutama kwaka mundu hoju, panihapa mundu hoju akumpeki Musa mwali waki joakalowakiki Sipola akubha nhwanu waki. 22Sipola akumbelakili mwana wa chikambaku. Najombi Musa akundohiki lihina laki Geshomu, ndandi jaki, “Mi nungeni mu inchi ja kighene.”

23Hyaka yamaheli yakapetike, nkolongwa wa ku Misili akapotile, Bhaizilaeli bhakaleliki cha muntima kwa ndandi ja utumwa wabhu. Bhakundelili Chapanga nahuli kulobha ujangatilu, na chilelu chabhu chakunhikili Chapanga. 24Chapanga akajowini chilelu chabhu cha muntima, najombi akakombwiki lulaghilu lwaki loakatendiki na Ibulahimu, Isaka na Yakobo. 25Bhela, Chapanga akabhalingalili Bhaizilaeli na kubhabhonela chiha. Panihapa akaweni kubha impalika kubhajangatila.

Currently Selected:

Kubhoka 2: MpBV

Highlight

Compare

Copy