Kubhoka 3
3
Chapanga ampitalila Musa
1Lichobha limu, Musa akabhi adima hinyama yaka Yesulo nkowanu wake, mpenganyambiku wa ku Midiani. Musa akaipeliki hinyama kutali ku upambala wa kolijibhi lyobha wa chingwenje, najombi akahikiki mbaka ku Holebu, chitombi chaka Chapanga. 2Konihoku mtumika wa kunani waka Bambo Chapanga akumpitalili Musa mu chimuli cha moto chechibhelela kuhuma pachilanda ja chitutu. Musa akalingalili na kukangacha kuchibhona chitutu chibhelela moto, nambu ngachechitinyika. 3Musa akaholalile, “Anang'anambuka henu, na kujenda kuchibhona chindu hechi cha kukangacha, anamonaje kubha maghambu kiki chitutu hechi ngachechitinyika.”
4Bambo Chapanga paakumbweni Musa ang'anambwiki nahuli alolaje, Chapanga akundohiki kuhuma mkati ja chitutu chela, “Musa! Musa!”
Najombi Musa akayangike, “Naam! Nepani pambane.”
5Chapanga akumpwaghile, “Ngawiheghalela pambane nakanopi. Uhulaje magubasi mu magholu ghako, maghambu pandu paujemiki hapa nde pandu pahuhu.” 6Kabheti Chapanga akumpwaghili Musa, “Nepani nde Chapanga wa akahokolu bhaku, Chapanga waka Ibulahimu, Chapanga waka Isaka na Chapanga waka Yakobo.” Musa paakajowini ghanihagha, akalihiiki pamihu jaki kwa mabhoku, maghambu akajowipi kundingalila Chapanga.
7Bambo Chapanga akumpwaghile, “Chakaka naghaweni mang'ahiku gha bhandu bhangu mu Misili, nanatu nyowini chilelu chabhu ntundu mobhahengakewa na bhajemalela bhabhu. Nepani manyi mang'ahiku ghabhu, 8henu nhelili kubhakengalela kuhuma mu mabhoku gha Bhamisili, na kubhakweha kuhuma mu inchi jeniheji, na kubhapelaka mu inchi jinyahi na ngolongwa, inchi jejitwelile mahibha na buse, inchi ja Bhakanaani, Bhahiti, Bhaamoli, Bhapelizi, Bhahivi na Bhayebusi. 9Bhela, chilelu cha Bhaizilaeli chinhikile, na nepani mweni ntundu Bhamisili mobhang'ahila Bhaizilaeli. 10Henu, ananukutumaje ujendaje kwaka Falao, nahuli ukabhabhohaje bhandu bhangu Bhaizilaeli kuhuma mu inchi ja ku Misili.”
11Nambu Musa akumpwaghi Chapanga, “Nepani na nane mbaka nyenda kwaka Falao na kubhapiha Bhaizilaeli bhabhokaje mu inchi ja ku Misili?”
12Chapanga akumpwaghile, “Chakaka nepani anangubha papamu na wehapa. Jenjenu anajikubha nginyulila kwako kubha nde nepani nenukutuma: Bhela anaujomwili kubhapiha bhandu mu Misili, mwanjojabhalyaje Chapanga mu chitombi chenjeno.”
13Musa akumpwaghi Chapanga, “Anambiti kwa Bhaizilaeli na kubhapwaghila, ‘Chapanga wa akatati bhinu andumiki kwinu,’ nabhombi anabhanaluki, ‘Lihina laki nane?’ Ananibhayanga bhole?”
14Chapanga akumpwaghi Musa, “Nepani Mile Nemile. Bhenibhela nde mowabhapwaghilaje Bhaizilaeli, ‘Nepani Mile andumiki kwino.’ ” 15Kabhete Chapanga akumpwaghi Musa, “Ubhapwaghila Bhaizilaeli malobhi ghangane, ‘Bambo Chapanga, Chapanga wa akahokulu bhinu, Chapanga waka Ibulahimu, Chapanga waka Isaka, na Chapanga waka Yakobo andumiki kwino.’ ” Lendenu nde lihina langu mileli, nalombi nde ukombukelu wangu mbaka hibheleku yokapi yeihika. 16Ujendaje, ukabhabhongana bhazee bha ku Izilaeli papamu, ukabhapwaghilaje, “Bambo Chapanga, Chapanga wa akahokulu bhinu, Chapanga waka Ibulahimu, Chapanga waka Isaka, na Chapanga waka Yakobo akambitalili na kumbwaghila, ‘Nundingalili, nanatu naghawe ghamtendiwi ku Misili hoku. 17Nanatu mbwaghiki ananumpihaje kuhuma mu mang'ahiku ghinu mu inchi ja Misili, na kumpeleka ku inchi ja Bhakanaani, Bhahiti, Bhaamoli, Bhapelizi, Bhahivi, na Bhayebusi, inchi jejitwelile mahibha na buse.’
18“Bhazee bha Izilaeli anabhakujowanyaje. Bhela wehapa na bhezee habha mwijendaje kwaka Falao na kumpwaghila, ‘Bambo Chapanga, Chapanga wa Bhaebulania atupitalile. Henu tukulobha utulekakyaje tujenda mwanja wa machobha ghatatu kuchingwenje, nahuli kubhoha nyambiku kwaka Bambo Chapanga witu.’ 19Chakaka manyi kubha nkolongwa wa ku Misili ngaandeki njendaje, mbaka chiwoku chechibhi na makili chinjomalakyaje. 20Nambu ananhatambula chiwoku changu na kubhalapula Bhamisili kwa ngangachu yokapi yeanandendaje pachilanda jabhu. Paghijomuka ghanihagha anaandekakyaje mbokaje.
21“Nanatu ananabhatendaje Bhamisili bhakubhaje na mitima jambone ja kubhahengela Bhaizilaeli, bhela, pamwibhokaje mu inchi jeniheji ngamwibhoki mabhoku matopu. 22Kila mbomba Muizilaeli anaandobha wapambipi jaki Mmisili na mbomba jokapi joatama mu nyumba jaki ampekyaje hindu yeilenganakiki kwa madini gha feza, zahabu na ingobhu, na mwehapa anamwawatika bhana bhinu na akakamwali bhinu. Bhenibhela nde momwihengaje kubhatolela hindu ya Bhamisili.”
Currently Selected:
Kubhoka 3: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
